Wi musu suku yepi na engel?

A BUN fu suku yepi na engel te wi de na nowtu? Furu sma e denki taki dati bun. Fu taki en leti, a New Catholic Encyclopedia, wan prenspari lomsu wortubuku e taki: ’Sma e taki nanga engel na ini begi, ma soso fu aksi den efu den kan handri leki mindriman na fesi Gado gi den.’ Wi musu aksi engel yepi fu handri leki mindriman gi wi?

Gado Wortu e kari tu getrow engel fu Gado nomo na den nen, namku Mikael nanga Gabrièl (Danièl 8:16; 12:1; Lukas 1:26; Yudas 9). Fu di Bijbel e kari den nen disi, meki wi e frustan taki ibri engel na wan aparti yeye di abi wan nen, èn den no de wan krakti nomo di e du sani sondro fu denki. Tra engel ben weigri fu kari den nen. Teki leki eksempre, di Yakob ben aksi wan engel fu taigi en san na en nen, dan a ben weigri fu kari en nen (Genesis 32:29; Krutuman 13:17, 18). Bijbel no e kari furu engel na den nen, èn na so wan fasi libisma no e kisi na okasi fu poti tumusi furu prakseri na den.

Wan fu den wroko di engel musu du na fu tyari boskopu fu Gado go na libisma. Fu taki en leti, na ini a Hebrewtongo, nanga a Grikitongo fu fosi, a wortu di vertaal nanga „engel” wani taki „boskopuman”. Ma engel a no mindriman di e tyari den begi fu libisma go na fesi a kownusturu fu a Moro Heiwan. Gado teki a bosroiti taki sma musu begi En na ini a nen fu a Manpikin fu en, namku Yesus Krestes, di ben taki: ’Awansi san unu aksi a Tata na ini mi nen, a sa gi unu’.—Yohanes 15:16; 1 Timoteyus 2:5.

Yehovah Gado noiti abi so furu fu du taki a no man arki wi te wi e go na en fesi na a yoisti fasi. Bijbel e gi wi a dyaranti disi: „Yehovah de krosibei fu ala den wan di e kari en, a de krosibei fu ala den wan di e kari en nanga wan krin ati.”—Psalm 145:18.