A pipel fu Gado musu lobi bunfasi
A pipel fu Gado musu lobi bunfasi
„San Yehovah e aksi fu yu baka, leki fu du san reti èn fu lobi bunfasi èn fu sori sakafasi te yu e waka nanga yu Gado?”—MIKA 6:8.
1, 2. (a) Fu san ede a no musu fruwondru wi taki Yehovah e fruwakti taki a pipel fu en e sori bunfasi? (b) Tapu sortu aksi di abi fu du nanga bunfasi, wi musu poti prakseri?
YEHOVAH na wan Gado fu bunfasi (Romesma 2:4; 11:22). A no de fu taki dati a fosi man nanga uma, Adam nanga Eva, ben e warderi a sani dati! Ala den someni sani di Gado ben meki lontu den na ini a dyari fu Eden, ben e sori krin fa Gado ben bun gi libisma, di ben meki na so wan fasi taki den ben kan nyan bun fu den sani dati. Ma Gado e tan du bun gi ala sma, srefi gi den wan di no abi tangi èn di e du ogri.
2 Fu di libisma meki akruderi a prenki fu Gado, meki den man sori den fasi fu Gado tu (Genesis 1:26). Dati meki a no e fruwondru wi taki Yehovah e fruwakti taki wi sori bunfasi gi trawan. Soleki fa Mika 6:8 e taki, dan a pipel fu Gado musu „lobi bunfasi”. Ma san na bunfasi? San a abi fu du nanga den tra moi fasi fu Gado? Libisma man sori bunfasi gi makandra, ma fu san ede grontapu de so wan ogri presi dan, di lai so furu problema? Fu san ede wi leki Kresten musu pruberi fu sori bunfasi na ini a fasi fa wi e libi nanga trawan?
San na bunfasi?
3. Fa yu ben o fruklari san na bunfasi?
3 Wan sma e sori bunfasi te a e broko en ede nanga a tanbun fu trawan. A fasi disi e kon na krin sosrefi te sma de klariklari fu yepi trawan èn te den e taki na wan fasi di e sori taki den e hori trawan na prakseri. Wan sma di abi bunfasi, e du bun, na presi taki a e du sani di kan tyari takru bakapisi kon. Wan sma di abi bunfasi, na wan sma di e sori switifasi, a abi safrifasi, a e frustan fa trawan e firi, èn a abi safu-ati. So wan sma lobi fu gi trawan sani, èn a e hori tra sma na prakseri tu. Na apostel Paulus ben gi Kresten a deki-ati taki: „Un musu teki sari-ati, bun-ati [noso, bunfasi], sakafasi, safri-ati, nanga langa pasensi, weri den neleki fa wan sma e weri wan krosi” (Kolosesma 3:12). We, bunfasi na wan fu den fasi di ibri tru Kresten musu weri leki wan krosi gi ensrefi.
4. Fa Yehovah fosi bigin sori bunfasi gi a libisma famiri?
4 Yehovah Gado fosi bigin sori bunfasi gi sma. Paulus ben taki, dati di ’Gado wi Frulusuman sori bunfasi nanga lobi gi libisma, dan a frulusu wi fu di a wasi wi na wan fasi di meki wi kon na libi, èn di a meki wi kon nyun nanga a santa yeye’ (Titus 3:4, 5). Gado e „wasi”, noso e krin den salfu Kresten nanga a brudu fu Yesus, san wani taki dati a e gebroiki a waarde fu a frulusu-ofrandi fu Krestes fu tyari wini kon gi den. Den e kon nyun sosrefi nanga yepi fu santa yeye, so taki den e tron „wan nyun sani di Gado meki” leki manpikin fu Gado di kon gebore baka nanga yepi fu santa yeye (2 Korentesma 5:17). Moro fara a de so taki Gado e sori a bunfasi nanga a lobi fu en gi „wan bigi ipi”, di „wasi den langa krosi fu den èn meki den kon weti na ini a brudu fu a Pikin Skapu”.—Openbaring 7:9, 14; 1 Yohanes 2:1, 2.
5. Fu san ede den sma di e meki a yeye fu Gado tiri den, musu sori bunfasi tu?
5 Bunfasi na wan fu den froktu fu a santa yeye, noso a wroko krakti fu Gado. Paulus ben taki: „A froktu fu a yeye na lobi, prisiri, vrede, langa pasensi, switifasi, bunfasi, bribi, safri-ati, dwengi yusrefi. Nowan wet e krutu den sani disi” (Galasiasma 5:22, 23). Yu no denki dan taki den sma di e meki a yeye fu Gado tiri den, musu sori bunfasi gi trawan tu?
Trutru bunfasi a no wan swakifasi
6. O ten bunfasi kan de wan swakifasi? Fu san ede dati de so?
6 Son sma e si bunfasi leki wan swakifasi. Den e feni taki son tron wan sma musu grofu, so taki trawan kan si suma na en. Ma te yu luku en bun, dan wan sma musu tranga trutru efu a wani du bun gi trawan èn efu a no wani sori bunfasi te dati no fiti. Fu di trutru bunfasi na wan fu den froktu fu a yeye fu Gado, meki a no kan de wan swakifasi di e meki sma tapu den ai gi ogridu. Ma na a tra sei a de so tu taki te sma no e sori bunfasi na a yoisti momenti, dan dati kan meki taki den e gi pasi taki trawan du ogri.
7. (a) Fa Eli sori taki a ben safu tumusi? (b) Fu san ede owruman musu luku bun fu no sori bunfasi na wan momenti pe dati no fiti?
7 Prakseri Eli, a granpriester fu Israel, leki eksempre. A ben safu tumusi gi den manpikin fu en, Hofni nanga Pinehas. A no ben e gi den a trangaleri di ben de fanowdu, aladi den boi disi ben de priester na ini a tabernakel. Den no ben breiti nanga den pisi fu den ofrandi di Gado Wet ben taki dati den ben musu kisi. Dati meki den ben e seni sma di ben e wroko na a tabernakel, fu go dwengi trawan di ben e tyari ofrandi, fu gi den wan pisi lala meti, bifo den sma ben kan bron a fatu fu a meti leki ofrandi na tapu na altari. Den manpikin fu Eli ben e du hurudu sosrefi nanga den uma di ben e du wroko na a doro fu a tabernakel. Ma na presi fu puru Hofni nanga Pinehas fu a wroko dati, dan Eli piri-ai gi den na wan safu fasi nomo (1 Samuel 2:12-29). A no e fruwondru wi fu dati ede taki „sma na ini a ten dati no ben e yere a wortu fu Yehovah so furu”! (1 Samuel 3:1) Kresten owruman musu luku bun fu no sori bunfasi gi sma di e du ogri èn di kan tyari bigi problema kon gi a yeyefasi fu a gemeente. Efu wan sma abi bunfasi trutru, dan a no sa tapu en ai gi den takru sani di trawan e taki èn e du, fu di den no e hori densrefi na den markitiki fu Gado.
8. Fa Yesus sori taki a ben abi trutru bunfasi?
8 Noiti Yesus Krestes, di de wi Bigi Eksempre, meki a fowtu fu sori bunfasi te dati no ben fiti. A ben de a moro bun eksempre fu bunfasi. Leki eksempre, ’a ben e firi sari trutru gi a pipel, fu di sma ben e kwinsi den èn den ben e waka bruyabruya leki skapu sondro skapuman’. Opregti sma no ben e frede fu go na Yesus. Den ben e tyari den yongu pikin fu den kon na en srefi. Prakseri nomo fa a ben sori bunfasi, èn fa a ben sori taki a e firi gi sma di ’a ben e teki den pikin ini den anu fu en èn di a ben bigin blesi den’ (Mateyus 9:36; Markus 10:13-16). Yesus ben abi bunfasi, ma toku a tan hori ensrefi na den sani di en Tata na hemel ben e si leki sani di de reti. Noiti Yesus no tapu en ai gi ogridu; Gado ben gi en deki-ati fu krutu a hoigrifasi fu den kerki tiriman fu a ten dati. Soleki fa Mateyus 23:13-26 e sori, dan Yesus ben taki wan tu leisi baka makandra: „Helu fu unu, un leriman fu Wet nanga Fariseiman, un hoigriman!”
Bunfasi nanga den tra fasi fu Gado
9. San bunfasi abi fu du nanga langa-pasensi èn nanga bun-ati?
9 Bunfasi abi fu du nanga tra fasi sosrefi di wi kan kisi nanga yepi fu a yeye fu Gado. A abi fu du sosrefi nanga „langa-pasensi” èn nanga „bun-ati”. Iya, te wan sma abi langa-pasensi, dan a e sori na a fasi dati taki a abi bunfasi. A e sori pasensi, srefi gi den sma di no e libi bun nanga en. Te yu luku en bun, dan bunfasi nanga bun-ati na a srefi, fu di furu tron den sani disi e meki taki sma e du sani fu yepi trawan, so taki den trawan kan kisi wini fu dati. Fu dati ede son leisi a Griki wortu di vertaal na ini Bijbel nanga „bunfasi” kan vertaal tu nanga „bun-ati”. Tertulianus ben taki dati a fasi fa den fosi Kresten ben e sori bunfasi ben fruwondru den heiden so te, taki den ben e kari den bakaman fu Yesus ’sma fu bunfasi’.
10. San bunfasi nanga lobi abi fu du nanga makandra?
10 Bunfasi abi fu du sosrefi nanga lobi. Yesus ben taki fu den bakaman fu en, taki: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Fu a lobi disi Paulus ben taki: „Lobi abi langa pasensi èn a abi switifasi [noso, bunfasi]” (1 Korentesma 13:4). Te yu luku den wortu „lobi bun-ati”, di wi e feni furu tron na ini den Buku fu Bijbel, dan wi e si taki bun-ati noso bunfasi abi fu du sosrefi nanga lobi. Disi na bunfasi di abi fu du nanga loyaal lobi. A Hebrew wortu di vertaal nanga „lobi bun-ati” no wani taki nomo dati wi lobi tra sma trutru. A wortu dati abi fu du nanga bunfasi di wan sma e tan sori gi trawan, teleki a du san a ben wani du gi den. A lobi bun-ati, noso a loyaal lobi, fu Yehovah, e kon na krin na difrenti fasi. Leki eksempre, a e kon na krin na ini a fasi fa a e frulusu sma èn na ini a fasi fa a e kibri sma.—Psalm 6:4; 40:11; 143:12.
11. Sortu dyaranti a lobi bun-ati fu Gado e gi wi?
11 A lobi bun-ati fu Yehovah e hari sma kon na en (Yeremia 31:3). Te den getrow futuboi fu Gado musu kisi frulusu noso yepi, dan den sabi taki a o sori loyaal lobi gi den. Den sabi taki a loyaal lobi fu en no sa misi noiti. Fu dati ede den kan begi, aladi den abi a srefi frutrow leki a psalm skrifiman di ben taki: „Mi fu mi sei ben frutrow tapu a lobi bun-ati fu yu; meki mi ati prisiri na ini a frulusu di yu e gi” (Psalm 13:5). Fu di a lobi fu Gado de loyaal, meki den futuboi fu en kan frutrow na en tapu dorodoro. Den abi a dyaranti disi: „Yehovah no sa drai en baka gi en pipel èn a no sa gowe libi en eigi gudu.”—Psalm 94:14.
Fu san ede grontapu ogri so?
12. O ten èn fa ogri-ati tirimakti bigin?
12 A piki tapu na aksi disi abi fu du nanga san ben pasa na ini a dyari fu Eden. Frukufruku kaba na ini a historia fu libisma, wan yeye libisani di ben bigin prakseri ensrefi nomo èn di ben kisi bigimemre, ben kon nanga a prakseri fu tron wan grontapu tiriman. Den takru prakseri fu en ben meki taki a ben kon tron ’a tiriman fu grontapu’, iya, a tron wan tiriman di e pina sma srefisrefi (Yohanes 12:31). Sma ben kon sabi en leki Satan Didibri, a moro bigi gensman fu Gado nanga libisma (Yohanes 8:44; Openbaring 12:9). Syatu baka di Gado ben meki Eva, dan a kon na krin taki Satan ben abi a takru prakseri fu seti wan tirimakti di ben musu de a srefi leki a lobi-ati tiri fu Yehovah. Sobun, ogri-ati tirimakti bigin di Adam ben wani de fri fu a tiri fu Gado, èn di a sori na a fasi dati taki a no ben e warderi a bun-ati fu Gado (Genesis 3:1-6). Na presi taki den ben man tiri densrefi trutru, dan Adam nanga Eva ben fadon na ini a makti fu Didibri di ben e prakseri ensrefi nomo, èn di ben abi bigifasi. Na so den ben tron sma di ben de ondro a tiri fu en.
13-15. (a) San na wan tu takru bakapisi di sma ondrofeni baka di den poti a regtfardiki tiri fu Yehovah na wan sei? (b) Fu san ede a grontapu disi de so wan ogri presi?
13 Prakseri wan tu fu den bakapisi fu dati. Adam nanga Eva ben e libi na wan pisi fu grontapu di ben de wan paradijs. Ma now den ben musu komoto drape. Den ben abi fu gowe libi wan tumusi moi kontren di ben abi furu moi bon èn gosontu froktu, èn den ben musu go libi wan tranga libi, dorosei fu a dyari fu Eden. Gado ben taigi Adam: „Fu di yu ben arki a sten fu yu wefi èn ben go nyan fu a bon di mi ben gi yu a komando disi: ’Yu no musu nyan fu en’, meki a gron kon de frufruktu fu yu ede. Nanga pen yu sa nyan fu a nyanyan di a gron e gi, ala den dei fu yu libi. Maka nanga brantimaka a gron sa gi yu.” A fluku di ben de tapu a gron ben o meki a kon tranga gi den fu wroko a gron. Den bakapikin fu Adam ben e firi den takru bakapisi fu a fluku di ben de tapu a gron, pe maka nanga brantimaka ben e gro. Dati ben meki taki Lamek, a papa fu Noa, ben taki fu ’a pen di den ben abi na den anu fu a gron ede di Yehovah ben fluku’.—Genesis 3:17-19; 5:29.
14 Adam nanga Eva ben kenki a switi libi di den ben abi gi wan libi di lai broko-ede. Gado ben taigi Eva: „Mi sa meki taki yu kisi moro furu skin-ati te yu de nanga bere; nanga pen yu sa meki pikin, èn yu sa abi tranga lostu gi yu masra, èn en sa basi yu.” Bakaten, Kain, a fosi manpikin fu Adam nanga Eva, ben du wan tumusi ogri sani fu di a ben kiri en brada Abel.—Genesis 3:16; 4:8.
15 „Heri grontapu de na ini a makti fu na ogriwan”, na so na apostel Yohanes ben taki (1 Yohanes 5:19). Den sma na ini a ten disi e tyari densrefi na a srefi ogri-ati fasi leki a tiriman fu grontapu, fu di den e prakseri densrefi nomo èn den abi bigifasi. Dati meki a no e fruwondru wi taki grontapu lai nanga grofu sma èn nanga ogridu! Ma dati no sa tan so ala ten. Yehovah sa sorgu taki grofu fasi nanga ogri-ati sani sa komoto na pasi èn taki bunfasi, nanga a firi di sma e firi gi trawan, sa de na ala sei fu a Kownukondre fu en.
Te Gado Kownukondre o tiri, bunfasi o de na ala sei
16. Fu san ede a de so taki a tirimakti fu Gado ondro a tiri fu Krestes Yesus o de wan tirimakti pe bunfasi o de? San wi musu du fu dati ede?
16 Yehovah nanga Krestes Yesus, a Kownu di A poti na wroko fu tiri a Kownukondre fu En, wani taki den sma di o de ondro a tiri fu den, musu de sma di e sori bunfasi (Mika 6:8). Yesus Krestes ben sori wi pikinso fa a tirimakti di en Tata gi en ben o de; a ben o de wan tirimakti pe bunfasi ben o de (Hebrewsma 1:3). Disi e kon moi na fesi na ini den sani di Yesus ben taigi den kerki fesiman, di ben e poti ala sortu hebi tapu a pipel. A ben taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti” (Mateyus 11:28-30). Bun furu tiriman na grontapu, awinsi den de fu kerki noso den na tra sortu tiriman, e pina a pipel nanga ala sortu hebi lai. Den e du dati fu di den e poti ala sortu wet èn fu di den e gi den sma wan lo wroko sondro fu pai den gi dati. Ma san Yesus e aksi fu den bakaman fu en, abi fu du nanga sani di den abi fanowdu èn nanga sani di den man du. Fu tru, a de wan prisiri sani fu teki a tyatyari fu Yesus, èn a lekti trutru, a no so? Wi no e kisi a firi dan fu sori bunfasi gi trawan, neleki fa Yesus ben du dati?—Yohanes 13:15.
17, 18. Fu san ede wi kan abi a frutrow taki den sma di sa tiri nanga Krestes na ini hemel èn den wan di sa teki presi gi en na grontapu, sa sori bunfasi tu?
17 Den tumusi prenspari sani di Yesus ben taigi den apostel fu en e sori krin fa a tirimakti fu a Kownukondre fu Gado e difrenti fu a di fu libisma. Bijbel e taki: „Den bigin meki wan bigi trobi suma fu den [disipel] ben de a moro bigiwan. Ne a taigi den: ’Den kownu fu den trakondre sma e basi den, èn den sma di abi makti na den tapu, den e taki fu den dati den na sma di e du bun gi trawan. Ma unu no musu de so. We, meki a moro bigiwan fu unu tron leki a moro yonguwan, èn a wan di de a moro prenspariwan, musu de a wan di e dini trawan. Bika suma moro bigi: a wan di e sidon na tafra, noso a wan di e dini trawan? A no a wan di e sidon na tafra? Ma mi de na un mindri leki a wan di e dini unu.’”—Lukas 22:24-27.
18 Libisma tiriman e suku fu kon bigi fu di den e „basi” den sma di de na den ondro èn fu di den e suku bigi nen gi densrefi. Kande den e prakseri taki a sani dati o meki taki den bun moro den wan di de na den ondro. Ma Yesus ben taki dati wan sma bigi trutru te a e dini trawan; te a e tan du fayafaya muiti fu dini trawan. Ala den sma di o tiri makandra nanga Krestes na ini hemel, noso di o de wan fu den sma di e teki presi gi en dyaso na grontapu, musu du muiti fu teki na eksempre fu en, fu di den o sori sakafasi nanga bunfasi tu.
19, 20. (a) Fa Yesus ben sori o furu bunfasi Yehovah abi? (b) Fa wi kan sori bunfasi neleki Yehovah?
19 Meki wi luku wan tu tra lobi-ati rai di Yesus ben gi. Fu sori o furu bunfasi Yehovah abi, dan Yesus ben taki: „Efu unu lobi den sma di lobi unu, dan sortu kefalek sani unu du dan? Bika srefi sondari lobi den sma di lobi den. Efu unu e du bun gi den sma di e du unu wan bun, dan sortu kefalek sani unu du dan? Srefi sondari e du a sani dati tu. Sosrefi, efu unu e leni sma wan sani sondro fu aksi rente, soso fu di unu e howpu taki unu o kisi wan sani fu den, dan sortu kefalek sani unu du dan? Srefi sondari e leni sma wan sani sondro fu aksi rente, soso fu kan kisi a srefi sani baka. Ma tan lobi un feanti, tan du bun èn tan leni sma wan sani sondro fu aksi rente, èn no howpu taki unu o kisi wan sani fu den baka, bika na so fasi unu o kisi wan bigi pai èn unu o de manpikin fu a Moro Heiwan, fu di a bun gi den sma di no de nanga tangi èn gi den ogrisma. Tan abi sari-ati, neleki fa un Tata abi sari-ati.”—Lukas 6:32-36.
20 A bunfasi fu Gado e meki taki a no e prakseri ensrefi nomo. A no e aksi noti fu tra sma, èn a no e fruwakti fu kisi wan sani baka. Fu di Yehovah abi bun-ati meki „a son fu en e opo gi takru sma èn gi bun sma; a e meki alen fadon gi regtfardiki sma nanga sma di no regtfardiki” (Mateyus 5:43-45; Tori fu den Apostel 14:16, 17). Te wi e teki na eksempre fu wi hemel Tata, dan a no de so nomo taki wi e luku bun fu no du ogri nanga den sma di no abi tangi, ma wi e du bun gi den tu, iya, srefi gi den wan di ben tyari densrefi leki wi feanti. Te wi sori bunfasi, dan wi e sori Yehovah nanga Yesus taki wi wani libi ondro a Kownukondre tiri fu Gado. Na a pisi ten dati bunfasi nanga den tra moi fasi fu Gado sa de fu si na ini a fasi fa sma o libi nanga makandra.
Fu san ede wi musu sori bunfasi?
21, 22. Fu san ede wi musu sori bunfasi?
21 Gi wan tru Kresten, a de wan tumusi prenspari sani fu sori bunfasi. Dati e sori krin taki wi abi a yeye fu Gado. Boiti dati, efu wi e sori trutru bunfasi, dan wi e teki na eksempre fu Yehovah Gado èn fu Krestes Yesus. Den sma di wani libi ondro a tiri fu Gado Kownukondre, musu abi bunfasi tu. Fu dati ede wi musu lobi bunfasi èn wi musu leri fu sori a fasi dati tu.
22 San na wan tu moi fasi fa wi kan sori bunfasi na ini wi aladei libi? A tra artikel sa taki fu a pisi tori dati.
San yu e piki?
• San na bunfasi?
• Fu san ede grontapu de so wan ogri presi di lai so furu problema?
• Fa wi du sabi taki bunfasi o de na ala sei te Gado o tiri?
• Fu san ede a de so prenspari taki sma di wani libi ondro a Kownukondre tiri fu Gado, e sori bunfasi?
[Aksi fu a tori disi]
[Prenki na tapu bladzijde 13]
Kresten owruman e du muiti fu sori switifasi te den e handri nanga na ipi
[Prenki na tapu bladzijde 15]
A lobi bun-ati fu Yehovah no sa gowe libi den futuboi fu en na ini tranga ten
[Prenki na tapu bladzijde 16]
Fu di Yehovah abi bun-ati meki a e gi pasi taki son e opo èn taki alen e fadon gi ala libisma