Bijbel yepi en fu kakafutu gi tesi

A grontapu disi lai nanga tesi. A no makriki fu hori wisrefi na den Bijbel markitiki. Fu eksempre, a kan de wan tyalensi fu fiti a Bijbel rai: „Lowe gi hurudu.”​—1 Korentesma 6:18.

Wan Kotoigi fu Yehovah di wi sa kari Sebastian ben e wroko na ini Polen na ini wan bedrijf di ben de fu sma fu Skandinafia. Sebastian ben musu feti wan tranga feti fu hori en soifri retifasi.

Den sma nanga suma Sebastian ben e wroko ben kon sabi taki en na wan Yehovah Kotoigi. Fu di den wrokobasi fu Sebastian ben warderi a tranga wroko di a ben e du èn fu di den ben kan frutrow en, meki den ben gi en difrenti grani na wrokope. Ma soleki fa a sori, dan den grani di a ben kisi ben o meki taki a ben musu de na bisnis konmakandra pe de ben e meki prisiri na wan fasi di no fiti.

Heri esi Sebastian ben bigin tweifri. „A basi fu mi sabi taki mi na wan Yehovah Kotoigi. Dati meki a e frutrow na mi tapu èn a e fruwakti taki mi sa du mi wroko na wan bun fasi. Efu mi ben o weigri fu go na den bisnis konmakandra dati, dan mi o lasi a wroko di mi feni nanga so furu muiti. Ma fa a ben o de efu mi ben go fu luku nomo?”

Ne Sebastian kon frustan moro bun san den ben e fruwakti fu en. A ben musu seti wan tu huru-uma gi den klanti fu dorosei kondre so taki te neti den ben kan abi prisiri nanga den. San a ben o du?

Sebastian ben teki a bosroiti fu taigi en basi ete wan tron san a leri fu Bijbel fu hurudu. Heri esi Sebastian ben kon frustan taki a no ben o man du den sani di den basi fu en ben wani taki a musu du, èn taki te fu kaba a ben o abi fu gowe libi a wroko fu en. A feni wan nyun wroko pe a no e kisi so furu moni, ma a de wan wroko pe a no abi den sortu tesi disi. Now Sebastian abi wan krin konsensi.

San yu ben o du efu wan sma ben o dwengi yu fu du hurudu, noso dwengi yu fu no si dati leki wan takru sani? Yu ben o de klariklari fu tyari bigi kenki kon? Dati na san Yosef fu owruten ben du, soleki fa skrifi na ini Genesis 39:7-12.