Na Gado wani en so?

’Meki sani pasa na ini hemel èn na grontapu, soleki fa yu wani.’—Mateyus 6:10.

NA ATI fu Julio nanga Christina ben e brudu di den ben e tanapu e luku fa a faya ben e bron fo fu den pikin fu den kiri. Wan drunguman ben rei go naki na oto fu den di den ben poti na wan presi, èn na oto sutu faya. Fu den feifi pikin di ben de na ini na oto, den ben man puru Marcos wawan na ini a faya. Ma a faya bron en na so wan fasi taki en skin noiti no ben o kon de baka leki fa a ben de fosi. Marcos ben abi neigi yari. En papa ati ben e krei. A pruberi fu trowstu ensrefi èn sosrefi en osofamiri nanga den wortu: „Na Gado wani en so, èn wi musu frustan dati, awansi san e pasa nanga wi, efu na bun sani, takru sani, noso iniwan tra sani.”

Te den sortu takru sani disi e pasa, dan furu sma e taki a srefi sani. Den e taki: ’Efu Gado abi ala makti èn efu a lobi wi, dan a sani di pasa musu fu de gi wi eigi bun, awansi a sani dati muilek gi wi fu frustan.’ Yu e agri nanga dati?

Furu sma abi a denki taki den sani di e pasa, efu na bun sani noso takru sani, na a wani fu Gado. Moro furu, a denki dati abi fu du nanga a fasi fa den e frustan den wortu di Yesus gebroiki na ini a begi di sma e kari a Wi Tata Begi. Den wortu dati skrifi na a bigin fu na artikel disi. A wani fu Gado e pasa na ini hemel, a no so? Sobun, te wi e begi den wortu ’Meki sani pasa na grontapu soleki fa yu wani’, dan wi no e agri taki den sani di e pasa na grontapu na sani di Gado wani?

A muilek gi furu sma fu bribi dati. Gi den sma dati, a denki disi e sori taki Gado no e broko en ede nanga den firi fu libisma. Den e aksi densrefi: ’Fa a kan taki wan lobi-ati Gado wani taki ogri-ati sani e pasa nanga sma di no e du ogri?’ ’Efu Gado wani taki wi musu leri wan sani fu den takru sani di e pasa, dan san na a sani dati?’ Kande na so yu e denki fu a tori disi.

Disi na san a disipel Yakobus, na afu-brada fu Yesus, ben skrifi fu a tori disi: „Te tesi miti wan sma, no meki a taki: ’Na Gado e tesi mi.’ Bika nowan sma kan tesi Gado nanga ogri sani, èn Gado srefi no e tesi sma tu nanga ogri sani” (Yakobus 1:13). A no Gado e meki taki takru sani e pasa. Sobun, a de krin fu si taki a no ala sani di e pasa na grontapu na ini a ten disi na sani di Gado wani. Den Buku fu Bijbel e taki sosrefi fu a wani fu libisma, a wani fu den nâsi, èn srefi a wani fu Didibri (Yohanes 1:13; 2 Timoteyus 2:26; 1 Petrus 4:3). Yu e agri taki a sani di ben pasa nanga na osofamiri fu Julio nanga Christina no ben kan de wan sani di wan lobi-ati hemel Tata ben wani fu pasa?

Sobun, san Yesus ben wani taki trutru di a leri den disipel fu en fu begi: ’Meki sani pasa soleki fa yu wani’? A de so nomo taki den ben musu aksi Gado fu yepi noso kibri den na ini spesrutu afersi? Noso a de so taki Yesus ben e leri wi fu begi gi wan moro prenspari sani, wan kenki di wi alamala kan fruwakti? Meki wi ondrosuku moro fara san Bijbel abi fu taki fu a tori disi.

[Sma di abi a reti fu den prenki na tapu bladzijde 3]

Car: Dominique Faget-STF/AFP/Getty Images; child: FAO photo/B. Imevbore