Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San e sori taki Yesus ben abi brada nanga sisa?

Bijbel e sori na ini Mateyus 13:55, 56 nanga Markus 6:3 taki Yesus ben abi brada nanga sisa. A Griki wortu (adelphos) di gebroiki dyaso na ini den tekst e sori taki „sma na famiri fu makandra, [èn] a wortu dati wani taki noti moro leki trutru brada noso afu brada” (The Catholic Biblical Quarterly, yanuari 1992).—15/12, bladzijde 3.

• Sortu buweisi de taki orloku e feti heri tra fasi, èn san meki den feti disi de furu tron?

Den orloku di sma e feti na ini a ten di pasa no so langa ete, moro furu na feti na mindri borgu; dati na feti mindri grupu sma di e gens makandra na ini a srefi kondre. Tra sani di e meki taki feti de na mindri borgu na fu di sma fu difrenti kulturu noso lo no man si makandra na ai. A e kon sosrefi fu di kerkigrupu no e agri nanga makandra, fu di sma e du kruktudu, èn fu di dyugudyugu de na politiek sei. Wan tra sani di e meki taki den feti disi de, na fu di sma gridi fu kisi makti nanga moni.—1/1, bladzijde 3, 4.

• Fa wi du sabi taki Yesus no ben wani taki wi musu gebroiki den srefi wortu fu a begi di a ben leri sma?

Na ini a Bergitaki, Yesus ben gi na eksempre disi fa fu begi. Sowan 18 mun baka dati, a ben sori ete wan leisi o prenspari den sani de fu a begi di a ben leri den (Mateyus 6:9-13; Lukas 11:1-4). A moi fu si taki a no ben gebroiki den srefi wortu. Disi e sori taki Yesus no ben e leri sma wan begi di den ben musu taki ibri tron baka.—1/2, bladzijde 8.

• Pe a doifi ben feni na olèifwiwiri di a ben tyari kon baka na a ark, baka a Frudu?

Wi no sabi o sowtu, o kowru, noso o waran a watra fu a Frudu ben de. Ma srefi te sma koti wan olèifbon trowe, toku a e bigin sproiti baka. Sobun, kande son bon no ben dede di a Frudu ben kon, èn na so den ben man sproiti baka.—15/2, bladzijde 31.

• Na a ten fu a borgufeti na ini Nigeria di srudati ben de na ala sei na ini Biafra, dan fa Yehovah Kotoigi na ini a kontren dati kisi yeye nyanyan?

Wan lantiman di ben de Kotoigi ben e wroko na ini Europa, èn wan tra Kotoigi ben e wroko na a presi pe opolani ben e saka na ini Biafra. Den tu Kotoigi disi teki a frantwortu fu sorgu taki yeye nyanyan ben kan go na ini Biafra, aladi dati ben kan meki den lasi den libi srefi. Na so fasi furu brada nanga sisa ben man kisi yepi teleki na orloku ben kon na wan kaba na ini 1970.—1/3 bladzijde 27.

• San ben pasa na a Vrede fu Westfalen, èn na sortu fasi kerki ben abi fu du nanga disi?

A Reformatie bribi ben meki taki a Gran Kownukondre kon abi dri sortu bribi, namku a Lomsu bribi, a Luther bribi, nanga a Calvijn bribi. Na a bigin fu a di fu 17 yarihondro, den Anitri kerki bondru kon na wan èn den Lomsu du a srefi sani. A sani di ben bigin na ini Bohemia leki wan trobi na mindri kerki, ben gro kon tron wan feti pe difrenti kondre ben e suku fu kisi makti. Den Lomsu tiriman nanga den Anitri tiriman ben e du ala sortu kruka sani soso fu kan abi moro makti leki trawan èn fu kisi wini na ini bisnis afersi. Te fu kaba, den taki nanga makandra fu vrede na ini a Doisri distrikt Westfalen. Baka pikinmoro feifi yari, sma skrifi den nen na ondro a Kruderi fu Westfalen na ini 1648. Disi tyari wan kaba kon na a Orloku di feti Dritenti Yari èn a ben de a bigin fu a disiten Europa, leki wan kontren fu kondre di abi den eigi tirimakti.—15/3, bladzijde 20-23.

• San a marki, noso a nen fu „a werdri meti”, noso a nomru 666 wani taki?

A marki disi kari na ini Openbaring 13:16-18. A meti e sori go na libisma tirimakti, èn „a libisma nomru” di a meti abi, e sori taki den tirimakti de na ini a srefi lagi situwâsi neleki ala sondu libisma. A nomru 6 nanga 60 nanga 600 e sori taki a de tumusi lekti na ini Gado ai. Den wan di abi a marki disi e anbegi a politiek sistema fu a kondre na wan lespeki fasi, noso den e howpu tapu den sani disi fu di den e si leki na den sani disi o tyari frulusu kon.—1/4, bladzijde 4-7.