Den wega fu owruten èn o prenspari a ben de fu wini

„IBRIWAN sma di e teki prati na wan strei e dwengi ensrefi ini ala sani.” ’Te wan sma e prei na ini wega, dan a no sa kisi wan kroon efu a no hori ensrefi na den markitiki fu den wega.’—1 Korentesma 9:25; 2 Timoteyus 2:5.

Den wega fu san na apostel Paulus ben e taki dyaso, ben de wan tumusi prenspari sani na ini a libi fu den Grikisma fu owruten. San a historia e fruteri wi fu den wega disi èn san ben e pasa na den wega dati?

No so langa pasa, sma hori wan eksposisi fu den wega di Grikisma fu owruten ben e hori. Na eksposisi disi ben nen Nike—Il gioco e la vittoria („Nike—A wega nanga a fektori”) èn a ben hori na ini a Colosseum na Rome. * Den sani di ben de fu si na a eksposisi meki wi kon sabi moro fu den wega, èn den e meki wi poti prakseri sosrefi na a fasi fa wan Kresten musu si sportwega.

Wan prenspari owruten sani

Den Grikisma no ben de den fosi sma di ben e du sport. Toku, na a pisi ten fu a di fu aiti yarihondro b.G.T., a Griki puwema  skrifiman Homer ben skrifi fu wan libimakandra pe sma ben e suku fu tron dyadya man èn pe sma ben e pruberi fu du sani moro bun leki trawan. A koni fu man feti leki srudati èn fu man du sport ben de tumusi prenspari sani gi den sma dati. Na eksposisi ben tyari kon na krin taki na ini a bigin den fosi Griki fesa ben de seremonia fu gi grani na den gado te wan dyadya man ben dede. Fu eksempre, na ini na Iliad, a moro owru Griki buku di de ete, dan a skrifiman Homer e fruteri fu wan tu lespeki fetiman di ben de mati fu Achilles. Na a beri fu Patroclus, den fetiman disi ben poti den fetisani fu den na wan sei èn den bigin hori wega fu sori taki den ben abi deki-ati. Den wega disi ben de boks, aswa, èn fringi diskus (wan hebi plata lontu sani di ben meki fu udu, noso isri). Boiti dati, den ben e fringi lansri, èn den ben e hori streilon nanga asiwagi.

Sma ben bigin hori den sortu fesa disi na heri Grikikondre. A buku di e gi bodoi fu na eksposisi e fruteri: „Den Grikisma ben lobi fu meki trobi èn den ben e feti ala ten, ma fu di den ben e lespeki den gado fu den, meki den ben e tapu fu meki trobi èn fu feti te den fesa ben e hori. Na so fasi den ben man du sani nanga makandra sondro fu feti, soleki fa den ben gwenti fosi. Iya, den ben e hori sportwega now.”

Sma fu difrenti foto ben teki a gwenti fu kon makandra na presi fu anbegi èn fu hori sportwega fu gi den gado grani. Baka wan pisi ten, fo fu den fesa disi ben tron so prenspari taki heri Grikikondre ben e hori den. Na Olympis Prei nanga a Nemea Prei ben de fu gi grani na a gado Zeus, a Pytis Prei ben de fu gi grani na a gado Apollo, èn na Istmis Prei ben de fu gi grani na a gado Poseidon. Sma na ala sei fu Grikikondre ben mag teki prati na den wega di ben e hori na den fesa disi. Na den fesa sma ben e tyari ofrandi, èn den ben e begi, sosrefi den ben e gi grani na den gado fu di den ben e hori strei fu sori suma ben de a moro kefalek sportman, noso suma ben meki den moro moi puwema, singi noso skedrei.

Soleki fa sma e taki, dan a moro owruwan èn a moro prenspariwan fu den sortu fesa disi ben hori na ini 776 b.G.T. Ibri fo yari a fesa disi ben e hori na ini a foto Olympia fu gi grani na a gado Zeus. Baka na Olympis Prei, a Pytis Prei ben de a moro prenspariwan. A ben e hori na ini a foto Delphi, krosibei fu a moro prenspari santa presi fu grontapu na a ten dati, èn sportwega ben e hori na a fesa disi tu. Ma te den sma ben e gi grani na Apollo, a gado fu puwema nanga poku, dan den ben e strei singi èn dansi.

Sortu sport den ben e du?

Tra fasi leki na ini a ten disi, den sportwega fu owruten no ben de so furu, èn soso mansma ben e teki prati na den. Na den Olympis Prei fu owruten noiti yu ben abi moro leki tin difrenti sport. Na a eksposisi na ini a Colosseum, den popki, den skedrei di ben meki nanga pisipisi grasi, èn den prenki na tapu den prapi ben sori sortu sport den sma ben e du na den fesa dati.

Den ben abi dri sortu streilon. A stadium ben de wan streilon fu sowan 200 meter, a dobru streilon ben de leki a 400 meter streilon di sma e lon na ini a ten disi, èn a langa streilon ben de sowan 4500 meter. Den sportman ben e lon èn den ben e oefen sososkin. Den sportman di ben e teki prati na a pentatlon ben abi fu du feifi difrenti sport: den ben e streilon, strei dyompo, den ben e strei fringi diskus, den ben e strei fringi lansri, èn den ben aswa. Tra wega ben de boks èn sosrefi a pankrâsium, „wan ogri-ati sport pe den sportman ben e aswa èn ben e boks nanga soso-anu na a srefi ten”. Dan yu ben abi na streilon nanga asiwagi di ben de sowan 1600 meter. Den asiwagi disi di no ben abi daki ben lekti, den ben abi pikin banti, èn tu, noso fo asi ben e hari den.

Boks ben de wan tumusi ogri-ati sport èn son tron sma ben e lasi den libi. Lontu a kofu fu den, den sportman ben e tai tranga pisi leribuba di ben  abi srapu pisi isri na tapu. Yu kan frustan fu san ede wan sportman di ben nen Stratofonte no ben sabi ensrefi di a luku na ini wan spikri, baka di a ben boks fo yuru langa. Owruten popki nanga skedrei di meki nanga pisipisi grasi e sori fa a skin fu den man ben kon masimasi baka te den ben boks.

Te den ben e aswa, dan den ben mag hori makandra soso na a tapusei pisi fu den skin, èn a fosi sma di ben hori a trawan didon dri tron na tapu a gron, ben wini a feti. A pankrâsium ben de heri tra fasi, bika na a feti dati den sportman ben mag hori makandra na ala sortu fasi. Den fetiman ben mag skopu èn naki makandra, èn den ben mag drai a trawan anu nanga futu. Den wan-enkri sani di den no ben mag du, na fu diki a trawan ai puru, èn den no ben mag krabu, noso beti a trawan. San den fetiman ben musu pruberi fu du, na fu hori a trawan didon na tapu a gron so taki a no ben man du noti moro, èn den ben musu dwengi èn fu gi ensrefi abra. Son sma ben taki dati disi ben de „a moro span sani di ben e pasa na ini heri Olympia”.

Sma e taki dati a moro pôpi pankrâsium fu owruten ben de a lastiwan di ben hori na a Olympis Prei fu 564 b.G.T. Wan man ben e yokro Arrhachion kiri, ma Arrhachion ben de na en frustan ete fu man drai wan futufinga fu a man. A man kisi so wan hebi pen taki a gi ensrefi abra leti na a momenti di Arrhachion bro en lasti bro. Bakaten, den krutuman fu a feti meki bekènti taki na a dedeskin fu Arrhachion ben wini a strei!

Streilon nanga asiwagi ben de a moro prenspariwan fu ala den wega, èn den heihei sma ben lobi a strei disi moro furu, fu di a no a sma di ben e rei na asiwagi ben e wini a strei, ma na a sma di ben abi na asiwagi nanga den asi. Den muilek pisi fu a strei ben de na a bigin te den asiwagi ben musu tan na ini a lin pe den ben e lon, èn san ben moro muilek na te den ben o meki wan boktu fu drai go baka na a bigin. Efu wan sma ben meki wan fowtu na den pisi dati, noso efu den ben e prei fufuru, dan bigi ongoloku ben kan pasa. Na fu a sani disi meki sma ben lobi a wega disi moro leki den tra wega èn den ben e feni en moro span sosrefi.

A prijs

„Ala den lonman ini wan streilon e lon”, na so na apostel Paulus taki, „ma wán nomo e kisi a prijs” (1 Korentesma 9:24). A moro prenspari sani ben de fu wini a strei. Nowan tra sma ben e wini wan prijs, leki a winiman wawan. „A moro prenspari marki fu wan sportman, ben de fu wini, noso ’Nike’”, na so na eksposisi ben sori. „A no ben wani nowan enkri tra sani leki fu wini, fu di dati ben o sori taki a ben de wan trutru sportman èn taki a ben e tyari ensrefi na a fasi dati tu. Na so fasi den sma na ini a foto pe a ben e tan ben o prisiri nanga en.” A puwema skrifiman Homer ben skrifi fa so wan sportman ben denki: „Mi leri fu de a moro bun wan ala ten.”

A prijs di wan sportman ben kisi na den Prei fu Grikikondre ben de fu sori nomo taki en na a winiman; a ben de wan kroon di ben meki fu bon wiwiri. Paulus ben kari en „wan kroon di kan pori” (1 Korentesma 9:25). Ma toku, a prijs ben wani taki furu. A ben e sori taki a naturu srefi ben gi a winiman krakti fu man wini a strei. Te wan sma ben wini fu di a ben poti na en ede fu wini nomonomo, dan dati ben wani taki dati den gado ben feni en bun. Na a eksposisi yu ben abi skedrei nanga popki di e sori fa Nike, a Griki umagado di ben abi frei èn di e meki sma wini strei, e poti wan kroon na tapu na ede fu a winiman. A moro prenspari sani na ini a heri libi fu wan sportman ben de fu wini wan strei na wan Olympis Prei.

Den kroon di sma ben kan wini na den Olympis Prei ben meki fu wiwiri fu a busi-olèifbon [Apium graveolens], den di  fu den Istmis Prei ben meki fu wiwiri fu a pinabon, di fu den Pytis Prei ben meki fu laurier wiwiri, èn di fu den Nemea Prei ben meki fu wan sortu langa grasi di e gro na ini watra. Den sma di ben e orga den prei na tra presi, ben gi den winiman moni noso tra warti sani, èn disi ben hari den moro bun sportman fu teki prati na den prei. Wan tu fu den vaas di ben de fu si na a eksposisi, ben de prijs di sma ben wini na den Panatanea Prei di ben e hori na ini a foto Ateine fu gi grani na a umagado Ateina. Fosi, den vaas disi di abi tu anu ben abi diri oli na ini di ben komoto fu a kontren fu Atika. Na a seibere fu wan fu den vaas wan prenki fu na umagado Ateina de fu si èn sosrefi den wortu, „a prijs gi den wega fu Ateina”. A tra seibere fu a vaas abi wan prenki fu wan spesrutu wega, kande a wega di a sportman ben wini.

Te wan Griki sportman ben wini wan wega na wan fu den prei, dan den sma na ini a foto pe a ben e tan ben e gi en bigi grani, èn wantronso a ben tron wan prenspari sma na ini a foto dati. Te so wan sportman ben e drai kon na oso baka, dan den sma fu a foto ben e waka wan prodowaka gi en. Den sma ben e meki bigi popki fu en fu taki den gado tangi èn den ben e meki puwema nanga singi fu a fasi fa a ben wini a wega. Soso na den okasi disi wan libisma ben kan kisi so wan bigi grani. Den winiman disi ben e kisi a grani sosrefi fu sidon na den moro prenspari presi te bigi fesa ben e hori, èn lanti ben e sorgu den.

Den sportskoro nanga den sportman fu den

Wan tumusi prenspari sani di wan srudati ben musu leri, na fa fu teki prati na strei leki sportman. Ala Griki foto ben abi sportskoro pe yonkuman ben e go oefen den skin èn pe den ben e kisi leri sosrefi fu sabidensi èn fu a bribi fu den. A sportskoro ben bow lontu wan bigi opo presi pe den sportman ben e oefen, èn lontu den opo presi disi yu ben abi afdaki di ben de skoro, noso bibliotheek pe den ben e leisi buku. Moro furu na yonkuman fu gudu famiri ben e go na den skoro disi, bika na den ben abi a moni fu go na skoro, na presi fu go wroko. Na den skoro disi yu ben abi leriman di ben e meki den sportman oefen hebi wan heri pisi ten bifo den ben o teki prati na den wega. Boiti dati, den leriman ben e taigi den sportman fu nyan spesrutu nyanyan èn den no ben mag abi seks demakandra na ini a pisi ten dati.

Na a eksposisi na ini a Colosseum sma ben kisi na okasi fu luku moi popki fu den owruten sportman, èn moro furu fu den popki disi ben de kopi di Romesma ben meki fu Griki popki. Den Grikisma fu owruten ben abi a denki taki wan sma nanga wan moi skin ben e tyari densrefi na wan tumusi bun fasi, èn taki soso heihei sma ben abi so wan skin. Fu dati ede den moi skin fu den sportman di ben wini, ben de wan tumusi moi sani gi den sma disi. Den Romesma ben e si den popki fu den sportman leki moimoi sani, èn furu tron den ben e poti den na presi pe den ben e hori den wega, presi pe den ben e go wasi, èn na den oso fu gudusma nanga kownu.

Den Romesma ben lobi den prei pe ogri-ati sani ben e pasa, sobun fu ala den Griki sport, den ben lobi boks, aswa, nanga a pankrâsium moro furu. Den Romesma no ben e go luku den sport disi fu si suma na a moro bun sportman, ma den ben e go fu di den ben e prisiri fu si fa sma ben e feti nanga makandra. Tra fasi leki fosi, sportwega no ben e hori moro nanga a marki fu gi gudu fetiman na den skoro na okasi fu strei nanga makandra. Na presi fu dati, a fasi fa den Romesma ben e du sport now, na soso fu oefen den skin pikinso fosi den go  wasi, noso den ben e go luku fa pôti fetiman ben e feti nanga makandra na wan ogri-ati fasi.

Kresten nanga den wega

A ben de krin fu si taki na fu di den wega ben abi fu du nanga na anbegi fu falsi gado, meki den fosi Kresten no ben wani abi noti fu du nanga den, bika „san a tempel fu Gado abi fu du nanga kruktugado?” (2 Korentesma 6:14, 16) Ma fa a de nanga sport na ini a ten disi?

A no de fu taki dati den sport fu disiten no e gi grani na heiden gado. Ma yu no si taki na son sport den sma de leti so fayafaya leki den sma fu owruten di ben e si sport leki wan fasi fu anbegi? Boiti dati, soleki fa nyunsu sori na ini den lasti yari di pasa, dan sportman e du ala sortu sani fu man wini. Den de klariklari fu gebroiki drugs di e gi den moro krakti, aladi a drugs dati kan pori a gosontu fu den, èn a kan kiri den srefi.

A no de wan tumusi prenspari sani gi Kresten fu tron bigi sportman, noso trangaman. San e meki wan sma moi na Gado ai, na ’a fasi fa wi ati’ de na yeye fasi (1 Petrus 3:3, 4). A tru taki na ini a ten disi a no ala sma di e du wan sport wani strei suma moro bun, ma toku furu sportman lobi fu du dati. Efu wi abi demakandra nanga den sma disi, dan yu denki taki dati sa yepi wi fu gi yesi na a rai fu Bijbel fu ’no strei nanga makandra, fu no prakseri wisrefi nomo, ma fu abi a sakafasi fu si trawan moro hei leki wisrefi’? A no de so dan, taki ’feantifasi sa kon, sosrefi trobi, dyarusu, faya atibron, kesekese, nanga pratifasi’ te wi abi demakandra nanga den sortu sma dati?—Filipisma 2:3; Galasiasma 5:19-21.

Furu fu den sport na ini a ten disi soleki boks, futubal, nanga basketbal kan meki taki sma e bigin feti nanga makandra. Iniwan sma di lobi den sortu sport disi musu hori den wortu fu Psalm 11:5 na prakseri: „Yehovah srefi e ondrosuku a regtfardikisma, sosrefi a sma di e du ogri, èn En sili kwetikweti no lobi wan sma di lobi ogri di e du nanga tranga.”

A kan de wan prisiri sani fu oefen yu skin te yu e du dati na wan fasi di fiti, èn na apostel Paulus ben taki dati „te wan sma e oefen a skin, dan dati bun gi wan tu sani nomo” (1 Timoteyus 4:7-10). Ma di Paulus ben taki fu den Griki prei, dan a ben wani sori nomo taki a de prenspari taki Kresten e dwengi densrefi èn e horidoro. A moro prenspari marki di Paulus ben e suku fu doro, na taki a ben wani a „kroon” fu têgo libi di Gado e gi (1 Korentesma 9:24-27; 1 Timoteyus 6:12). Na ini a tori disi a ben de wan heri moi eksempre gi wi.

[Futuwortu]

[Faki/​Prenki na tapu bladzijde 31]

Den bakapisi fu a boks di sma ben e boks

A brons popki disi fu a di fu fo yarihondro b.G.T. e sori den takru bakapisi fu a boks di sma ben e boks na ini owruten. A buku di e gi bodoi fu na eksposisi di ben hori na ini Rome, e fruteri taki „te boksman . . . ben e horidoro na ini wan feti pe den ben e kon weri srefisrefi èn pe den ben e pai ogri nanga ogri, noso ’soro nanga soro’, dan sma ben si den leki wan tumusi bun eksempre na ini a libimakandra”. A buku e taki moro fara: „Den marki noso soro di a sportman ben kisi na a lasti feti ben e moksi nanga den wan fu den tra feti di a ben feti bifo.”

[Prenki na tapu bladzijde 29]

Streilon nanga asiwagi ben de a moro kefalek wan fu den wega di ben e hori na ini owruten

[Prenki na tapu bladzijde 30]

Den sma fu owruten ben meki skedrei nanga popki di e sori fa Nike, na umagado di ben abi frei èn di e meki sma wini strei, e poti wan kroon na tapu na ede fu a sportman di wini a strei