Gado Wortu e gi yu krakti?

FA YU e du te tesi e miti yu? Di Yesus ben e kisi tesi fu Satan, dan a ben memre wan tu bijbeltekst di ben fiti (Mateyus 4:1-11). Na a srefi fasi, di Kownu David ben e kisi tesi, dan a kisi krakti tu fu Gado Wortu. A ben taki: „Te den prakseri fu mi di e trobi mi ben kon furu na ini mi ati, dan mi sili ben kon firi korostu fu di yu ben trowstu mi.”—Psalm 94:19.

Te tesi e miti wi, dan wi kan kisi trowstu, noso krakti tu te wi e memre wan bijbeltekst di wi lobi srefisrefi. Teki na eksempre fu Rex, di abi 89 yari now, èn di de wan furuten preikiman fu a bun nyunsu sensi 1931. Toku, a e taki: „Te mi ben kisi wan spesrutu wroko fu du na ini a diniwroko, dan furu tron mi ben e firi leki mi no bun nofo.” San ben yepi a brada disi? „Mi ben e memre a bijbeltekst di mi lobi srefisrefi, namku Odo 3:5, di e taki: ’Frutrow tapu Yehovah nanga yu heri ati èn no frutrow tapu yu eigi frustan.’ Mi ben man du mi wroko nanga bun bakapisi fu di mi memre a tekst disi, èn fu di mi du sosrefi san a tekst e taki.”

Srefi yongusma e kisi wini te den abi wan bijbeltekst di den lobi. Jack, di abi siksi yari, e taki dati a bijbeltekst di a lobi na Mateyus 24:14. A bijbeltekst disi e gi en deki-ati fu go preiki makandra nanga en papa nanga en mama. A e taki: „Mi lobi fu go preiki ala satra nanga mi mama, mi papa, nanga mi bigi sisa.”

Yu e kisi tesi son leisi tapu a bribi fu yu, soleki fa Yesus ben kisi dati? We, dan kande Filipisma 4:13 kan tron wan fu den bijbeltekst di yu lobi. Yu abi ’prakseri di e trobi’ yu neleki fa Kownu David ben abi dati? We, te yu memre Filipisma 4:6, 7, dan dati kan de wan yepi gi yu fu kakafutu. Son leisi yu e broko yu ede taki a diniwroko di yu e du gi Gado de fu soso? We, te yu e prakseri san 1 Korentesma 15:58 e taki, dan yu sa kisi krakti.

Te wi e hori wan tu bijbeltekst na ede di fiti wan spesrutu situwâsi, dan wi e gi Gado Wortu okasi fu abi krakti tapu wi libi (Hebrewsma 4:12). Den sortu bijbeltekst disi di wi lobi kan gi wi krakti, èn den kan trowstu wi tu.—Romesma 15:4.