Ondrofenitori

Mi ben man si aladi mi ben breni!

SOLEKI FA EGON HAUSER FRUTERI

Tu mun langa mi ben breni, ma di mi ben man si baka, dan mi kon leri sabi a waarheid fu Bijbel, wan sani gi san mi no ben abi ten mi heri libi langa.

TE MI e prakseri a fasi fa mi libi waka na ini den moro leki seibitenti yari di mi de na libi, dan furu sani de di gi mi bigi prisiri. Ma efu mi ben man kenki wán sani na ini mi libi, dan mi ben o wani leri sabi Yehovah Gado di mi ben de moro yongu.

Mi gebore na ini 1927 na ini Urugwei, wan pikin kondre di de na mindri Argentinia nanga Brasyonkondre. Na a sei pe a kondre e miti nanga na Atlantis Se, yu abi wan kontren fu omeni kilometer langa pe tumusi moi presi de fu si. Den sma di e libi drape, moro furu na bakapikin fu den Italiasma nanga den Spanyorosma di ben froisi kon libi drape. Ma mi papa nanga mi mama ben froisi fu Hongaria kon libi drape, èn di mi ben yongu ete, wi ben e libi na ini wan birti pe sma no ben gudu. Ma aladi dati ben de so, toku den sma na ini a birti dati ben abi wan heri bun banti nanga makandra. Wi no ben abi fu sroto wi doro èn wi no ben abi fu poti isri na den fensre, bika furu ogridu no ben de na ini a kontren drape. Nowan fu wi ben e desko sma di no ben de fu a srefi ras leki wi. Trakondre-sma nanga sma fu a kondre srefi, blakaman nanga wetiman, iya, wi alamala ben de mati fu makandra.

Mi papa nanga mama ben de fayafaya Lomsusma, èn di mi ben abi tin yari, mi tron wan fu den boi di ben e yepi a priester na den kerki seremonia. Di mi kon bigi, mi ben e wroko makandra nanga den sma fu a kerki drape èn mi ben de wan memre fu wan grupu sma di ben de raiman fu a beskopu di ben e tiri den Lomsu Kerki na ini a kontren. Fu di mi ben de wan datra, meki mi kisi kari fu teki prati na wan konmakandra di a Lomsu Kerki ben orga na ini Venezuela. Mi ben de na ini wan grupu fu datra di ben e ondrosuku soso  umasma siki. Na ini a pisi ten dati sma ben e seri difrenti sortu perki di umasma ben kan dringi fu no teki bere, èn wi ben kisi a wroko fu ondrosuku den perki dati.

Fa mi ben e denki di mi bigin studeri fu tron datra

Di mi ben e studeri ete na datra-skoro fu kon leri sabi moro fu a libisma skin, dan mi ben fruwondru moro nanga moro taki a libisma skin meki na so wan koni fasi. Mi ben fruwondru taki a skin man dresi ensrefi, fu eksempre, te wan pisi fu a lefre noso fu wan tu lebriki koti puru, dan den man gro kon bun baka leki fa den ben de fosi.

Na a srefi ten, mi ben si furu sma di ben kisi seryusu mankeri, èn mi ben sari te den sma disi dede fu di den ben kisi brudu. Te now ete mi man memre fa a ben muilek fu taigi den famiriman taki a sikisma dede fu di wan tu problema ben opo kon di a sma kisi brudu. Furu tron den datra no ben taigi den famiriman taki a lobiwan fu den dede fu di a ben kisi brudu. Ma na presi fu dati, den ben taigi den famiriman taki na tra sani meki a sma dede. Aladi furu yari pasa kaba, toku mi man memre ete taki mi skin ben piki mi taki a no bun fu gi sma brudu, èn te fu kaba mi kon si taki a no de wan bun sani fu dresi sma nanga yepi fu brudu. A ben o moro bun efu mi ben sabi na a ten dati san a wet fu Yehovah e taki fu a santafasi fu brudu! Efu dati ben pasa, dan kande mi ben o sabi fu san ede mi skin ben piki mi taki a no bun fu dresi sma nanga yepi fu brudu.—Tori fu den Apostel 15:19, 20.

Mi e firi bun te mi e yepi sma

Baka wan pisi ten, mi kisi mi datra papira fu du oparâsi, èn mi tron sosrefi driktoro fu wan bigi ati-oso na ini a foto Santa Lucía. Mi ben e wroko sosrefi na a National Institute of Biological Science, wan presi pe sma e ondrosuku sani di abi fu du nanga ala sortu libisani. Den sani disi ben gi mi furu prisiri. Mi ben e yepi sma nanga den siki fu den, mi ben e yepi den so taki den no ben e pina moro na skin fasi, furu tron mi ben e yepi sma di ben de fu dede, èn mi ben e yepi bere-uma te den ben musu meki a pikin fu den. Fu di mi ben sabi kaba san kan pasa nanga wan sma di teki brudu, meki mi no ben gebroiki brudu fu yepi sikisma, èn na so mi ben man du dusundusun oparâsi sondro fu gebroiki brudu. Mi ben feni taki te wan sma e lasi brudu, dan dati de neleki te wan olo de na ini wan bari. Yu no sa man lusu a problema te yu e tan furu a bari, ma a wan-enkri sani di yu kan du, na fu tapu na olo.

Mi e yepi Kotoigi di siki

Mi kon sabi Yehovah Kotoigi na ini den yari baka 1960, di den bigin kon na a ati-oso fu wi fu di den ben wani taki datra ben musu koti den sondro fu gebroiki brudu. Noiti mi sa frigiti a tori fu Mercedes Gonzalez, wan fu den sikisma, di ben de wan pionier (wan furuten dinari). Na uma disi ben swaki so te taki den datra na a universiteit ati-oso no ben wani koti en, fu di den ben de seiker taki a no ben o tan na libi. Aladi a ben e lasi brudu, toku wi koti en na a ati-oso fu wi. Na oparâsi waka bun, èn Mercedes tan pionier moro leki 30 yari ete, teleki a dede no solanga pasa di a ben abi 86 yari.

A ben naki mi ati ala ten fu si fa den Kotoigi ben e sori lobi gi den Kresten brada fu den èn fa den ben e broko den ede nanga den te den ben e kon luku den na ati-oso. Te mi ben e waka lontu na ini na ati-oso fu luku den sikisma, dan mi ben lobi fu arki fa den ben e taki fu a bribi fu den, èn mi ben teki den buku di den ben e gi mi. Noiti mi ben prakseri taki syatu baka dati mi no ben o de a datra fu den wawan, ma mi ben o de den brada na yeye fasi tu.

 Mi kon sabi den Kotoigi moro bun di mi trow nanga Beatriz, wan umapikin fu wan sikiman di mi ben yepi. Furu fu den famiriman fu en ben abi demakandra nanga den Kotoigi kaba, èn baka di wi trow, a tron wan fayafaya Kotoigi tu. Na a tra sei, a wroko fu mi ben e teki ala mi ten èn mi ben tron wan datra di ben abi biginen. A ben gersi leki a libi fu mi ben e waka heri bun. Ma noiti mi ben prakseri taki mi heri libi ben o kenki fu di problema miti mi.

Problema e miti mi

Wán fu den moro ogri sani di kan pasa nanga wan datra di e koti sma, na te a no man si moro. Na dati ben pasa nanga mi. Mi kon siki na ala tu ai fu mi, èn a sani disi meki taki mi kon breni wantronso. Mi no ben sabi kwetikweti efu mi ben o man si baka. Di den datra du wan oparâsi na mi ai, dan mi ben e didon na bedi èn datra ben poti wan wensre tapu ala tu ai fu mi. Mi kon firi brokosaka srefisrefi. Mi ben firi leki mi no ben man du noti èn mi no ben abi nowan howpu. Den firi disi ben de so tranga taki mi ben wani kiri misrefi. Fu di mi ben de tapu a di fu fo sodro fu na ati-oso, meki mi opo fu mi bedi èn mi waka e firifiri na a skin fu a kamra fu feni wan fensre. Mi ben o dyompo go na gron so taki mi ben kan dede. Ma mi kon feni misrefi na ini a gadri fu na ati-oso, èn wan uma di ben e wroko na a ati-oso tyari mi go baka na mi bedi.

Mi no pruberi moro fu kiri misrefi. Ma fu di mi ben breni, meki mi tan firi brokosaka èn pikinpikin sani ben meki mi atibron. Na a pisi ten disi di mi ben breni, mi pramisi Gado taki efu oiti mi ben man si baka, dan mi ben o leisi a heri Bijbel. Te fu kaba, mi kon betre wan pikinso na mi ai, èn mi ben man leisi baka. Ma mi no ben man tan du mi wroko leki datra. Ma wan sani de di sma na Urugwei lobi fu taki: „No hay mal que por bien no venga” san wani taki: „Wan ogri e tyari wan bun.” Heri esi mi ben o ondrofeni taki a sani disi di sma e taki de tru.

Mi no bigin bun

Mi ben wani bai The Jerusalem Bible, wan Bijbel di abi bigi letter, ma mi kon si taki Yehovah Kotoigi abi wan Bijbel di ben de moro bunkopu. Wan yongu Kotoigi ben taigi mi taki a ben o tyari wan kon gi mi. A mamanten baka dati, a yonkuman disi ben de na mi mofodoro nanga a Bijbel. A wefi fu mi opo a doro èn a taki nanga en. Na wan grofu fasi mi bari gi mi wefi komopo fu inisei fu na oso, taki efu a ben pai a yonkuman gi a Bijbel, dan a yonkuman ben kan gowe èn a no ben abi fu kon moro na mi oso. A no de fu taki dati a yonkuman disi gowe wantewante. Mi no ben sabi taki syatu baka dati, a srefi sma disi ben o tron wan prenspari sma na ini mi libi.

Wan dei mi pramisi mi wefi wan sani, ma mi no ben du san mi pramisi en. Sobun, fu meki sani kon bun baka èn fu meki a firi koloku baka, mi taigi en taki mi ben o go nanga en na a alayari Memrefesa fu a dede fu Krestes. Di a dei dati doro, dan mi memre san mi ben pramisi mi wefi, èn mi go nanga en na a Memrefesa. A naki mi ati di mi si fa ala sma ben e sori switifasi èn fa den gi mi wan switikon. Di a takiman bigin nanga a lezing fu en, dan mi fruwondru fu si taki a ben de a srefi yonkuman di mi ben yagi komoto fu mi oso. A lezing fu en ben abi krakti tapu mi trutru, èn mi no ben firi bun srefisrefi taki mi ben handri na so wan grofu fasi nanga en. Fa mi ben kan meki en bun baka nanga a yonkuman disi?

Mi aksi mi wefi fu gi en wan kari fu kon nyan wan neti na wi oso, ma mi wefi ben taki: „Yu no denki taki a ben o moro bun efu yu gi en wan kari? Tan tanapu dyaso, èn a sa waka kon miti wi.” Mi wefi ben abi leti. A yonkuman waka kon miti wi fu taki wi odi èn nanga prisiri a teki a kari di mi gi en.

A takimakandra di wi ben abi na a mofoneti di a kon fisiti wi, ben de a bigin fu den someni kenki di ben o kon na ini mi libi. A sori mi a buku De waarheid die tot eeuwig leven leidt (A waarheid di e tyari yu go na têgo libi) *, èn mi sori en taki mi ben abi siksi fu a srefi buku dati. Difrenti Kotoigi di ben siki, ben gi mi den buku dati na a ati-oso, ma noiti mi ben leisi den. Di wi ben e nyan mi poti furu aksi gi en, èn di wi kaba nyan mi tan poti aksi gi en te lati neti. A piki ala den aksi nanga yepi fu Bijbel. Wi taki nanga makandra te musudei mamanten. Bifo a yonkuman disi gowe, a aksi mi efu a ben kan studeri Bijbel nanga mi nanga yepi fu a Waarheid-buku. Baka dri mun wi  ben kaba studeri a buku dati èn wi go doro fu studeri a buku „Babylon de Grote is gevallen!” Gods koninkrijk heerst! („Babilon a Bigiwan fadon!” Gado Kownukondre e tiri!) * Baka dati mi gi mi libi abra na Yehovah Gado èn mi teki dopu.

Mi e firi taki mi man yepi sma baka

Fu di mi ben breni trutru, meki ’den ai fu mi ati’ kon opo gi a waarheid fu Bijbel gi san mi no ben abi ten fosi! (Efeisesma 1:18) Di mi kon leri sabi Yehovah nanga den lobi-ati prakseri fu en, dan dati kenki mi heri libi. Now mi e firi baka taki mi man yepi sma èn mi e prisiri sosrefi. Mi e yepi sma na skin fasi èn na yeye fasi, èn mi e sori den sosrefi fa den kan libi wan tu yari moro langa na ini a disiten seti fu sani èn fa den kan libi fu têgo na ini a nyun seti fu sani.

Mi e tan ondrosuku sortu nyun dresi nanga datrayepi de fu kisi, èn mi ondrosuku den kefar di de te sma e teki brudu. Boiti dati, mi ondrosuku den tra sortu fasi di de fu dresi sma, sosrefi a reti di sikisma abi, èn fa fu lusu problema di e kon te wan sma musu kisi dresi. Mi kisi okasi fu fruteri den tra datra fu a kontren drape den sani disi, fu di mi ben kisi kari fu taki fu den tori disi na konmakandra di ben abi fu du nanga datra afersi. Na ini 1994 mi go na Rio de Janeiro, na Brasyonkondre, fu de na a fosi kongres pe difrenti datra tyari kon na fesi fa fu dresi sma sondro fu gebroiki brudu. Na a kongres disi mi hori wan lezing di ben sori san datra kan du te wan sma e lasi brudu. Wan tu fu den sani di mi ben taki na ini a lezing, mi gebroiki na ini wan artikel di mi skrifi, èn na artikel dati nen: „Una propuesta: Estrategias para el Tratamiento de las Hemorragias” („Tra fasi fu yepi sma di e lasi brudu”) di kon na doro na ini a tijdschrift Hemoterapia di e taki fu datratori.

Mi tan getrow aladi datra dwengi mi

Na a bigin di mi tron datra, dan den sani di mi ben sabi fu sabidensi ben meki moro furu taki mi ben tweifri efu a ben bun fu dresi sikisma nanga yepi fu brudu. Ma di misrefi kon siki èn ben e didon na ati-oso, dan a ben muilek gi mi fu weigri fu teki brudu èn fu tan getrow na san mi e bribi, di den datra ben e dwengi mi. Di mi kon siki seryusu na mi ati, dan moro leki tu yuru langa mi ben musu fruklari gi wan datra di e koti sma, fu san ede mi no ben o teki brudu. A datra disi ben de wan manpikin fu bun mati fu mi, èn a ben taki dati a no ben o libi mi meki mi dede efu a ben feni taki a ben kan hori mi na libi nanga yepi fu brudu. Mi begi Yehovah na ini mi ati, èn mi aksi En fu meki a datra disi frustan fu san ede mi no e teki brudu, èn fu meki a lespeki a bosroiti fu mi tu, awansi a no ben e agri nanga disi. Te fu kaba, a datra pramisi taki a ben o du san mi ben aksi en.

Wan tra leisi, datra ben musu koti wan sani puru di ben e gro na ondro a pisi-saka fu mi. Mi ben e lasi brudu. Agen, mi ben musu fruklari fu san ede mi no e teki brudu. Aladi mi ben lasi moro leki afu fu a brudu na ini mi skin, toku den sma di e wroko na a ati-oso ben lespeki a bosroiti fu mi.

Now datra e si sani tra fasi

Mi na wan memre fu na International Association of Bioethics, dati na a grupu sma di e ondrosuku fa fu lusu problema di e kon te wan sma musu kisi dresi. Mi prisiri fu si taki den sma di e du datrawroko èn sosrefi lantiman kon denki tra fasi now fu den reti di sikisma abi. Den datra no e pruberi moro fu teki bosroiti gi den sikisma, ma den e lespeki a bosroiti di wan sikisma e teki te a abi fu du nanga a sortu datrayepi di a sma dati wani. Now datra e gi pasi taki a sikisma srefi kan frukisi sortu datrayepi a wani kisi. Sma no e si Yehovah Kotoigi moro leki fayafaya kerkisma di no warti fu kisi datrayepi. Na presi fu dati, sma e si Koitoigi di siki, leki sma di sabi sortu datrayepi den wani, èn a de fanowdu fu lespeki den reti fu den. Na den konmakandra di abi fu du nanga datra  afersi, èn na telefisi programa, barinen professor taki sani soleki: „Tangi fu a muiti di Yehovah Kotoigi du, meki wi kon frustan now . . . ” „Wi leri fu den Kotoigi . . . ” èn „Den leri wi fu du sani moro bun.”

Sma e taki dati a libi prenspari moro leki ala tra sani, bika efu wan sma no de na libi, dan a reti di a abi fu du san a wani, èn a wartifasi fu en na fu soso. Now, furu sma e agri nanga wan moro hei wet di e taki dati ibri sma abi a reti fu bosroiti gi ensrefi san a wani, èn a sma dati wawan kan taki sortu bosroiti a sa teki èn na sortu ten a sa du dati. Na so fasi, a wartifasi fu wan sma, a reti di wan sma abi fu bosroiti san a wani, èn a bribi fu wan sma e tron den moro prenspari sani. A sikisma abi a reti fu bosroiti gi ensrefi sortu datrayepi a wani. Na afdeling di Yehovah Kotoigi seti fu gi rai fu sani di abi fu du nanga ati-oso tori, yepi furu datra fu kon frustan den sani disi moro bun.

Mi famiri e tan horibaka gi mi, èn disi gi mi na okasi fu yepi sma na ini a diniwroko fu Yehovah èn mi man dini sosrefi leki owruman na ini a Kresten gemeente. Soleki fa mi ben taki kaba, a wan sani di e hati mi trutru na taki mi no leri sabi Yehovah di mi ben de moro yongu. Ma toku, mi de nanga bigi tangi taki a opo mi ai fu si a tumusi moi howpu fu libi ondro a tiri fu Gado Kownukondre, pe „nowan sma di e libi drape sa taki: ’Mi siki.’”—Yesaya 33:24. *

[Futuwortu]

[Prenki na tapu bladzijde 24]

Dyaso mi abi moro leki 30 yari, èn mi e wroko na a ati-oso na ini Santa Lucía

[Prenki na tapu bladzijde 26]

Mi nanga mi wefi Beatriz, na ini 1995