Yepi makandra fu kisi krakti baka
Yepi makandra fu kisi krakti baka
„Den ben de wan yepi gi mi di ben gi mi krakti.”—KOLOSESMA 4:11.
1, 2. (a) Fu san ede den mati fu Paulus go luku en na strafu-oso, aladi dati ben kan abi takru bakapisi gi den?
WI KAN kon na ini bigi problema efu wi na mati fu wan sma di e koti strafu, awinsi a de so taki a sma dati no du noti. Den sma di de frantwortu gi a strafu-oso kan luku yu leki den no e frutrow yu, kande den e waka na yu baka doronomo fu luku san yu e du, soso fu di den wani sorgu taki yu no go du wan ogri. Fu dati ede, yu musu abi deki-ati fu tan abi kontakti nanga a mati fu yu èn fu tan go luku en na strafu-oso.
2 Toku, disi na soifri san wan tu mati fu na apostel Paulus ben du sowan 1900 yari pasa. Den no draidrai fu go na Paulus di a ben de na strafu-oso. Na so fasi den ben kan trowstu en èn gi en a deki-ati di a ben abi fanowdu, èn den ben man gi en krakti baka na yeye fasi. Suma ben de den loyaal mati disi? San wi kan leri fu a deki-ati di den ben abi, a loyaalfasi fu den, èn fu a fasi fa den ben sori taki den na trutru mati?—Odo 17:17.
’Wan yepi di ben gi mi krakti’
3, 4. (a) Suma na feifi fu den mati fu Paulus? San den ben kon tron gi en? (b) San a wani taki fu de ’wan yepi di e gi krakti’?
3 Meki wi go baka te na a yari 60 G.T. Na apostel Paulus de na strafu-oso na ini Rome fu di sma lei gi en taki a ben e suku fu meki sma opo densrefi teige tirimakti (Tori fu den Apostel 24:5; 25:11, 12). Ma dan Paulus kari den nen fu feifi Kresten di ben yepi en: Tikikus, a boskopuman fu en di ben de fu a distrikt Asia èn di ben de „wan srafu fu Masra sosrefi”; Oneisimus, wan „getrow èn lobi brada” fu Kolose; Aristarkus, wan Masedoniaman fu Tesalonika di ben de ’na strafu’ makandra nanga Paulus wan pisi ten; Markus, wan famiriman fu Barnabas, a zendeling-patna fu Paulus èn a skrifiman fu na Evangelietori di abi en nen; nanga Yustus, wan fu den sma di ben e wroko makandra nanga na apostel, „gi a kownukondre fu Gado”. Paulus e taki fu den feifi man disi, taki: „Na den ben de wan yepi gi mi di ben gi mi krakti.”—Kolosesma 4:7-11.
4 Na wan krakti fasi Paulus poti prakseri na a yepi di den loyaal mati fu en ben gi en. A ben gebroiki wan Griki wortu (pa·re·go·riʹa) di vertaal nanga ’wan yepi di e gi krakti’. Disi na a wan-enkri presi na ini Bijbel pe a wortu disi de fu feni. A wortu disi wani taki furu difrenti sani èn sma ben e gebroiki en moro furu na ini tori di abi fu du nanga dresi. * A kan vertaal nanga ’meki wan sma firi moro bun, gi frulekti, trowstu, noso meki wan sma kon fri fu wan sani’. Paulus ben abi a sortu yepi dati fanowdu fu kisi krakti baka, èn den feifi man dati ben e gi en a trowstu dati.
Fu san ede Paulus ben abi ’yepi fanowdu di ben kan gi en krakti’
5. San Paulus ben abi fanowdu, aladi a ben de wan apostel? San wi alamala abi fanowdu, ten na ten?
5 Kande a e fruwondru son sma te den e prakseri taki Paulus di ben de wan apostel, ben abi sma fanowdu fu gi en krakti. Ma toku dati ben de so. A tru taki a bribi fu Paulus ben tranga, èn a ben libi pasa furu skin-ati, a kisi „fonfon pasa marki”, ’furu leisi a misi fu dede’ èn a ben kisi someni tra problema (2 Korentesma 11:23-27). Toku, a ben de wan libisma, èn ten na ten, ala libisma abi trowstu fanowdu èn den abi tra sma fanowdu di e yepi den fu meki a bribi fu den kon moro tranga. Disi ben de so nanga Yesus tu. Na a lasti neti fu en, wan engel ben kon na en na ini Getseimanei èn a ben „gi en krakti”.—Lukas 22:43.
6, 7. (a) Suma ben meki Paulus lasi-ati di a ben de na Rome, ma suma ben gi en deki-ati? (b) San na wan tu sani di den Kresten brada fu Paulus ben du gi en di a ben de na Rome fu ’yepi en fu kisi krakti’ baka?
6 Paulus ben abi sma fanowdu tu di ben kan gi en krakti. Di a doro leki strafuman na ini Rome, dan sma fu en eigi pipel no ben gi en wan switikon. Furu fu den Dyu disi no ben wani yere a Kownukondre boskopu. Baka di son prenspari man fu den Dyu go luku Paulus na a presi pe den ben sroto en, dan Tori fu den Apostel e taki: „Wan tu fu den bigin bribi den sani di a ben taki; trawan no ben wani bribi. Sobun, fu di den no ben man agri nanga makandra, meki den bigin waka gowe” (Tori fu den Apostel 28:17, 24, 25). A musu de taki a ben hati Paulus fu si taki den no ben abi warderi gi a bun-ati fu Yehovah! Wan tu yari baka dati, Paulus skrifi wan brifi gi a gemeente na ini Rome fu taigi den krin san ben de na en ati. A ben taki: „Mi ati e sari trutru èn a e hati mi ala ten. Bika mi ben winsi taki na mi ben de a frufruktu sma èn taki mi ben prati fu Krestes gi a bun fu den brada fu mi [den Dyu], iya, mi eigi famiriman” (Romesma 9:2, 3). Toku, a ben feni loyaal mati na ini Rome, trutru mati di ben e sori lobi gi en na wan fasi di ben gi en kowru-ati. Den ben de en Kresten brada trutru.
7 Na sortu fasi den feifi brada dati ben e gi en krakti? Den no ben koti pasi gi Paulus fu di a ben de na strafu-oso. Na presi fu dati, den ben de klariklari fu yepi en èn na wan lobi-ati fasi den du sani gi en te dati ben de fanowdu. Den ben e yepi en fu du sani di ensrefi no ben man du fu di a ben de na strafu. Leki eksempre, den ben de leki boskopuman fu Paulus èn den ben e tyari den brifi fu en nanga den boskopu fu en gi den difrenti gemeente. Den fu den sei ben e tyari boskopu gi Paulus di ben kan gi en deki-ati, fu di den ben e fruteri en taki sani ben e go heri bun nanga den brada na ini Rome èn nanga den wan di ben de na tra presi. Leki fa a sori, dan den ben e tyari sani di Paulus ben abi fanowdu, soleki deki krosi fu pasa a kowru ten, bukulolo, nanga sani fu skrifi (Efeisesma 6:21, 22; 2 Timoteyus 4:11-13). Ala den fasi disi fa den yepi na apostel ben gi en krakti nanga deki-ati, aladi a ben de na strafu. Disi meki taki na apostel fu en sei ben kan de ’wan yepi di ben gi krakti’ na tra sma, èn na heri gemeente srefi.—Romesma 1:11, 12.
Fa wi kan ’yepi trawan fu kisi krakti’
8. San wi kan leri fu a sakafasi di Paulus sori fu di a ben e sori krin taki a ben abi sma fanowdu fu ’yepi en fu kisi krakti’ baka?
8 San a pisi tori disi e leri wi fu Paulus nanga den feifi brada di ben e wroko makandra nanga en? Meki wi poti prakseri spesrutu na wán fu den sani di wi kan leri: Wi musu sori deki-ati èn wi no musu prakseri wisrefi nomo te wi wani yepi trawan di de na nowtu. Moro fara, a de so taki wi musu abi sakafasi fu man si taki, ten na ten, wi kan abi yepi fanowdu te wisrefi de na ini nowtu. Paulus no ben agri nomo taki a ben abi yepi fanowdu, ma nanga tangi na ati a ben e gi pasi tu taki sma yepi en, èn a ben e prèise den wan di ben e gi en a yepi dati. A no ben e si en leki wan swakifasi fu meki trawan yepi en, noso taki a ben e lagi ensrefi te a ben du dati. Wisrefi no musu prakseri dati. Efu wi ben sa taki dati noiti wan sma sa abi fu yepi wi fu kisi krakti baka, dan wi no e si wisrefi leki wan libisma. Memre taki na eksempre fu Yesus e sori taki srefi wan volmaakti libisma kan begi fu kisi yepi son tron.—Hebrewsma 5:7.
9, 10. Sortu bun bakapisi a kan abi te wan sma e taki krin dati a abi yepi fanowdu? Sortu krakti disi kan abi tapu trawan na ini na osofamiri èn na ini a gemeente?
9 A kan abi bun bakapisi te den brada di e teki fesi e taki krin dati son sani de di den no man du èn taki den abi a yepi fu tra sma fanowdu tu (Yakobus 3:2). Te den e saka densrefi na a fasi disi, dan dati e tranga a banti na mindri den, nanga den wan di musu saka densrefi ondro den brada disi. Disi o meki taki den kan taki fri èn switi nanga makandra. Te sma e sori sakafasi fu di den de klariklari fu meki trawan yepi den, dan dati kan leri tra sma di de na ini wan srefi sortu situwâsi, fa den kan tyari densrefi. A e sori taki den wan di e teki fesi, na libisma neleki wi, èn taki yu no abi fu frede fu go taki nanga den.—Preikiman 7:20.
10 Leki eksempre, te pikin abi problema èn te den e kisi tesi, dan a kan de moro makriki gi den fu teki a yepi fu den papa nanga mama, te den sabi taki a papa nanga mama ben kisi den srefi sortu tyalensi di densrefi ben pikin ete (Kolosesma 3:21). Na a fasi dati na okasi e opo gi papa nanga mama fu taki fri nanga den pikin fu den. A e kon moro makriki fu gi Bijbel rai èn den pikin e teki den rai dati moro esi (Efeisesma 6:4). Na a srefi fasi, a sa moro makriki gi den memre fu a gemeente fu teki a yepi fu owruman, te den e si taki den owruman abi problema tu, taki den abi broko-ede tu, èn taki sani de tu di e bruya den son tron (Romesma 12:3; 1 Petrus 5:3). Agen wi kan taki dati disi e opo a pasi gi sma fu kan abi bun takimakandra. Na okasi de fu gi sma bun Bijbel rai, èn fu tranga a bribi fu trawan. Memre taki na ini a ten disi, moro leki na iniwan tra pisi ten na fesi, den brada nanga sisa fu wi abi sma fanowdu di e gi den krakti.—2 Timoteyus 3:1.
11. Fu san ede so furu sma na ini a ten disi abi trawan fanowdu fu ’yepi den fu kisi krakti baka’?
11 A no abi trobi pe wi e libi, suma na wi, noso omeni yari wi abi; ten na ten, ibriwan fu wi sa kisi fu du nanga den broko-ede fu a libi. Disi na wan pisi fu na aladei libi na ini a ten disi (Openbaring 12:12). Den sortu situwâsi disi, di kan de wan hebi gi wi na skin sei noso na frustan sei, kan de wan tesi tapu a bribi fu wi. Sani kan pasa nanga wi di kan de wan tesi gi wi na wrokope, na skoro, na ini na osofamiri, noso na ini a gemeente. Wan seryusu siki, noso frede di wi abi fu di ogri ben miti wi na ini a ten di pasa, kan meki wi firi brokosaka. A kan gi wi kowru-ati trutru te wi trowpatna, wan owruman, noso wan mati e sori switifasi fu di a e gi wi deki-ati nanga switi wortu, èn fu di a e du sani fu yepi wi. Fu tru, a de leki wan switi dresi na tapu wan pisi fu a skin di abi krasi-krasi! Sobun, te yu e si taki wan brada noso sisa fu yu de na ini so wan situwâsi, dan du muiti fu yepi en fu kisi krakti baka. Noso efu a de so taki wan problema de leki wan hebi gi yu, dan aksi sma di lepi na yeye fasi fu yepi yu.—Yakobus 5:14, 15.
Fa a gemeente kan gi yepi
12. San ibriwan sma na ini a gemeente kan du fu meki den brada nanga sisa fu en kisi krakti baka?
12 Ala sma na ini a gemeente, sosrefi den yonguwan, kan du wan sani fu meki trawan kisi krakti baka. Leki eksempre, te yu de na den konmakandra èn na ini a preikiwroko doronomo, dan dati e gi yu na okasi fu tranga a bribi fu trawan (Hebrewsma 10:24, 25). Te yu e tan du santa diniwroko, dan dati e sori taki yu de loyaal na Yehovah èn taki yu e tan na ai na yeye fasi, awinsi sortu problema yu e ondrofeni (Efeisesma 6:18). Te sma e si taki yu e tan tyari yusrefi na so wan fasi, dan dati kan gi den krakti tu.—Yakobus 2:18.
13. San kan meki taki son sma no e du so furu moro na ini a diniwroko fu den? San trawan kan du fu yepi den?
13 Son tron den tesi fu na aladei libi noso tra problema, kan meki taki son sma e lasi a faya fu den, noso taki den no e preiki (Markus 4:18, 19). A kan taki wi e misi son brada nanga sisa di no e preiki moro, fu di den no kon na den konmakandra wan heri pisi ten. Toku a kan de so taki den lobi Gado ete. San wi kan du fu meki a bribi fu den kon moro tranga? Den owruman kan yepi den na wan lobi-ati fasi fu di den e go luku den na oso (Tori fu den Apostel 20:35). Den kan aksi tra memre fu a gemeente fu yepi den ini a tori disi. Te wi e go luku trawan na so wan lobi-ati fasi, dan, fu taki en so, dati kan de a yoisti dresi fu yepi den wan di abi wan swaki bribi fu kisi densrefi baka.
14, 15. Sortu rai Paulus e gi wi fu sori wi fa fu yepi trawan fu kisi krakti baka? Fruteri fu wán gemeente di ben teki a rai dati.
14 Bijbel e gi wi a deki-ati fu ’taki nanga den sili di brokosaka, fu trowstu den, èn fu yepi den swakiwan’ (1 Tesalonikasma 5:14). Kande den „sili di brokosaka” na sma di e firi leki den no abi so furu deki-ati moro èn taki den no man wini den problema di den abi, sondro taki wan sma yepi den. Yu kan gi den a yepi dati? Den wortu „yepi den swakiwan” ben vertaal tu nanga den wortu ’hori den swakiwan steifi’, noso „no lusu” den swakiwan. Ala den skapu fu Yehovah warti gi en, èn a lobi den alamala. A no e si den leki sani di no warti, èn a no e winsi taki den drifi gowe fu en. Yu denki taki yu kan yepi a gemeente fu hori den wan di swaki na yeye fasi steifi, teleki den kon moro tranga?—Hebrewsma 2:1.
15 Wan owruman ben go na wan trowpaar di ben tapu nanga a diniwroko siksi yari kaba. Na owruman e skrifi: „A fasi fa a heri gemeente sori switifasi nanga lobi gi den fu di den ben e broko den ede nanga den, ben abi so furu krakti na den tapu, taki den drai kon baka na a ipi.” Fa a sisa di ben tapu nanga a diniwroko fu en, ben firi di tra sma fu a gemeente ben e kon luku en? Now a e taki: „San ben yepi wi fu kisi wisrefi baka, na taki nowan fu den brada di ben kon luku wi èn nowan fu den sisa di ben kon makandra nanga den, ben sori taki den e krutu wi, noso taki den ben e kon suku fowtu na wi. Na presi fu dati den ben e sori taki den e frustan wi, èn den gebroiki Bijbel fu gi wi deki-ati.”
16. Suma de klariklari ala ten fu yepi den wan di abi krakti fanowdu?
16 Iya, wan opregti Kresten e prisiri fu yepi trawan fu kisi krakti baka. Te fu kaba a kan de so taki sani e kenki na ini wi libi, so taki wi brada nanga sisa o abi fu yepi wi now fu kisi krakti baka. Ma toku wi musu hori na prakseri taki wan momenti kan kon pe nowan libisma no de fu yepi wi. Toku, wan Sma de di kan gi wi krakti, wan sma di de klariklari ala ten fu yepi wi, dati na Yehovah Gado.—Psalm 27:10.
Yehovah —A moro prenspari Sma di e gi krakti
17, 18. Na sortu fasi Yehovah ben gi en Manpikin, Yesus Krestes, krakti?
17 Aladi Yesus ben spikri na wan postu, a bari: „Tata, na ini yu anu mi e poti mi yeye” (Lukas 23:46). Baka dati a dede. Soso wan tu yuru na fesi, sma ben kon grabu en tyari gowe, èn srefi den moro bun mati fu en ben gowe libi en èn den lowe gowe fu di den ben frede (Mateyus 26:56). Now, wán Sma nomo ben de ete di ben kan gi Yesus krakti, namku en hemel Tata. Toku, a frutrow di a ben abi na ini Yehovah no ben de fu soso. Yesus ben kisi blesi gi a fasi fa a sori taki a ben de loyaal na en Tata, fu di Yehovah sori taki ensrefi ben de loyaal na Yesus.—Psalm 18:25; Hebrewsma 7:26.
18 Na ini a heri pisi ten di Yesus du diniwroko na grontapu, Yehovah gi en Manpikin den sani di a ben abi fanowdu fu man tan hori en soifri-retifasi, teleki a hari en lasti bro. Leki eksempre, syatu baka di Yesus teki dopu na a bigin fu a diniwroko fu en, a ben yere a sten fu en Tata di ben taki dati a ben feni Yesus bun èn taki A ben lobi en ete. Di Yesus ben abi sma fanowdu fu kan gi en deki-ati, dan Yehovah seni engel fu gi en krakti. Di Yesus kisi a moro bigi tesi fu en na a kaba fu en libi na grontapu, dan Yehovah piki den fayafaya begi fu Yesus. A no de fu taki dati ala den sani disi ben gi Yesus krakti.—Markus 1:11, 13; Lukas 22:43.
19, 20. Fu san ede wi kan abi a dyaranti taki Yehovah sa gi wi krakti te wi abi dati fanowdu?
19 Yehovah wani fu de a moro prenspari Sma di e gi krakti na wi sosrefi (2 Kroniki 16:9). En na wan Sma di abi bigi krakti pasa marki èn di tranga srefisrefi. Dati meki a kan tron a Sma di e yepi wi fu kisi krakti baka te wi abi yepi fanowdu (Yesaya 40:26). Orloku, pôtifasi, siki, dede, noso a sondu fasi fu wi kan meki wi lasi-ati srefisrefi. Te a gersi leki den tesi di wi e kisi e kon na wi tapu neleki wan „tranga feanti”, dan Yehovah kan de a Sma di e meki taki wi de tranga èn a kan gi wi krakti (Psalm 18:17; Exodus 15:2). A abi wan wrokosani di kan de wan bigi yepi gi wi, namku a santa yeye fu en. Nanga a yeye disi, Yehovah kan gi „krakti na a sma di weri”, so taki a kan ’opo go na loktu nanga frei neleki den di fu aka’.—Yesaya 40:29, 31.
20 A yeye fu Gado na a moro tranga krakti fu hemel nanga grontapu. Paulus ben taki: „Mi man du ala sani fu di en e gi mi krakti.” Iya, wi lobi-ati hemel Tata kan gi wi „krakti di bigi pasa marki”, so taki wi kan horidoro awinsi wi kisi problema di e hati wi, teleki a meki „ala sani kon nyun” na ini a Paradijs di a pramisi wi èn di de so krosibei.—Filipisma 4:13; 2 Korentesma 4:7; Openbaring 21:4, 5.
[Futuwortu]
^ paragraaf 4 A wortubuku Vine’s Complete Expository Dictionary of Old and New Testament Words fu W. E. Vine, e taki: „Wan tra fasi fa sma e gebroiki a wortu [pa·re·go·riʹa], wani taki dresi di e yepi fu puru krasi-krasi.”
Yu e memre disi ete?
• Fa den brada na ini Rome ben ’yepi Paulus fu kisi krakti baka’?
• Fa wi kan yepi trawan na ini a gemeente ’fu kisi krakti baka’?
• Na sortu fasi Yehovah na a moro prenspari Sma di kan gi wi krakti?
[Aksi fu a tori disi]
[Prenki na tapu bladzijde 19]
Difrenti brada ben yepi Paulus ’fu kisi krakti baka’ fu di den ben yepi en na wan loyaal fasi, den gi en deki-ati, èn den du sani gi en
[Prenki na tapu bladzijde 21]
Owruman e teki fesi fu yepi na ipi fu kisi krakti baka