Den granisma—Wi Kresten brada nanga sisa di warti srefisrefi

„Den wan di prani na ini na oso fu Yehovah . . . o gi bromki. Den sa tan gro bun srefi te den ede-wiwiri kon weti.”—PSALM 92:13, 14.

1. Fa furu sma e prakseri fu owrusma?

YEHOVAH lobi ala den getrow futuboi fu en, sosrefi den wan di kon grani kaba. Ma soleki fa sma di ondrosuku sani e taki, dan na ini Amerkankondre wawan, ibri yari pikinmoro leki wan afu milyun owrusma e pina fu di sma e du den ogri, noso fu di sma no e broko den ede nanga den. Nyunsu di e komoto na ala sei fu grontapu, e sori taki na heri grontapu sma e du ogri nanga owrusma. Wán organisâsi e taki dati a rutu fu a problema disi na „a denki di furu sma abi . . . taki den owrusma libi tumusi langa kaba, so taki sma no abi den fanowdu moro; den feni taki yu no man gebroiki den moro èn taki den abi tumusi furu yepi fu tra sma fanowdu”.

2. (a) Fa Yehovah e si den getrow futuboi fu en di kon owru kaba? (b) Sortu tumusi moi sani skrifi na ini Psalm 92:12-15?

² Yehovah Gado e si den loyaal futuboi fu en di kon owru kaba, leki sma di warti srefisrefi. A e poti prakseri na „a sma di wi de na inisei”, sobun na a yeye fasi fu wi, na presi fu luku nomo san na den sani di wi no man du moro na skin sei (2 Korentesma 4:16). Na ini en Wortu, Bijbel, wi e feni a tumusi moi dyaranti di e kon now: „A regtfardikiwan srefi sa gi bromki neleki wan palmbon; leki wan sedre na ini Libanon, na so a sa gro kon bigi. Den wan di prani na ini na oso fu Yehovah, na ini den fesidyari fu wi Gado, na den o gi bromki. Den sa tan gro bun srefi te den ede-wiwiri kon weti, den sa fatu èn den sa tan moi, so taki den kan fruteri taki Yehovah de opregti” (Psalm 92:12-15). Te wi luku den tekst disi, dan dati sa sori unu leki owruwan fa unu kan yepi un Kresten brada nanga sisa na heri grontapu.

„Den sa tan gro bun srefi te den ede-wiwiri kon weti”

3. (a) Fu san ede Bijbel e teki regtfardikisma gersi nanga palmbon? (b) Fa owrusma kan „gro bun srefi te den ede-wiwiri kon weti”?

³ A psalm skrifiman e agersi den regtfardikiwan nanga palmbon di ’prani na ini den fesidyari fu wi Gado’. Den e „tan gro bun srefi te den ede-wiwiri kon weti”. Wan tra vertaling e taki: „Dem sa meki froktoe ete na ini dem owroe jari” (Da Bijbel na ini Sranantongo). Yu no e agri taki disi na wan prakseri di e gi sma deki-ati? Na ini Bijbel ten, pikinmoro ala sma na den Owstusei kondre ben abi kefalek moi palmbon na a fesidyari fu den. Ma boiti taki sma ben e prani den fu di den ben e moi wan presi, dan den ben e prani den tu fu di den ben e meki bun furu froktu; sonwan fu den bon e tan gi nyanyan pikinmoro wan hondro yari langa. * Efu  yu tan tanapu steifi fu di yu teki rutu na ini a tru anbegi, dan yu kan de neleki wan bon di e ’tan meki froktu ini ibri bun wroko’.—Kolosesma 1:10.

4, 5. (a) Sortu prenspari froktu Kresten musu tan meki? (b) Gi wan tu eksempre fu owrusma na ini Bijbel ten, di ben e meki ’a froktu fu a mofobuba’.

⁴ Yehovah e fruwakti fu Kresten taki den e tan meki „a froktu fu [den] mofobuba”. Dati wani taki, dati den musu taki wortu fu prèise Yehovah, èn taki den musu fruteri trawan san a abi na prakseri fu du (Hebrewsma 13:15). A sani disi abi fu du sosrefi nanga yu leki owrusma? Iya, a no de fu taki dati disi de so.

⁵ Na ini Bijbel wi e leisi fu owrusma di ben de sondro frede te den ben e preiki fu a nen fu Yehovah èn fu den prakseri fu en. Moses ben pasa „seibitenti yari” kaba di Yehovah poti en leki profeiti èn leki a sma di e teki presi gi en (Psalm 90:10; Exodus 4:10-17). A profeiti Danièl ben kon owru kaba, ma toku dati no ben tapu en fu fruteri sondro frede taki Yehovah na a Sma di abi ala reti fu tiri. A musu de taki Danièl ben pasa 90 yari kaba di Belsasar kari en fu kon fruklari wan dangra sani di ben skrifi na tapu wan skotu fu na oso fu en (Danièl, kapitel 5). Fa a ben de nanga na owru apostel Yohanes? Na a kaba fu a libi fu en leki wan getrow futuboi fu Gado, dan sma ben poti en leki strafuman na tapu na èilanti Patmos ’fu di a ben e taki fu Gado èn fu di a ben e gi kotoigi fu Yesus’ (Openbaring 1:9). A no de fu taki dati yu man memre furu tra sma na ini Bijbel di ben tan meki ’a froktu fu a mofobuba’, srefi di den ben kon owru.—1 Samuel 8:1, 10; 12:2; 1 Kownu 14:4, 5; Lukas 1:7, 67-79; 2:22-32.

6. Fa Yehovah gebroiki „grani man” fu taki profeititori na ini den lasti dei disi?

⁶ Na apostel Petrus ben gebroiki den wortu fu a Hebrew profeiti Yoèl di a ben taki: „’Na ini den lasti dei’, na so Gado e taki, ’mi sa kanti pikinso fu a yeye fu mi na tapu ibri sortu skin [sosrefi na tapu „grani man”], . . . èn den sa taki profeititori’” (Tori fu den Apostel 2:17, 18; Yoèl 2:28). So a de tu taki na ini den lasti dei disi, Yehovah gebroiki den owru memre fu a salfu grupu èn fu den „tra skapu”, fu fruteri sma san a abi na prakseri fu du (Yohanes 10:16). Sonwan fu den e meki Kownukondre froktu na wan getrow fasi, someni tenti yari kaba.

7. Gi wan eksempre fu a fasi fa owrusma kan meki Kownukondre froktu, aladi den abi problema na skin sei.

⁷ Prakseri Sonia di ben tron wan furuten preikiman fu a Kownukondre na ini 1941. Wan heri pisi ten a ben abi fu feti nanga wan siki di no man dresi. Toku a ben e hori oso-bijbelstudie doronomo na en eigi oso. „A de wan pisi fu mi aladei libi fu preiki a bun nyunsu”, na so Sonia e fruteri. „Fu taki en leti, dan dati na mi libi. Mi e weigri fu tapu fu preiki.” No so langa pasa, Sonia nanga en sisa Olive, ben preiki a Bijbel boskopu fu howpu gi Janet, di den ben e sidon wakti datra na ati-oso. Na uma disi ben abi wan siki di no ben man dresi moro. A mama fu Janet, wan fayafaya Lomsusma, ben fruwondru so te fu si a lobi-ati fasi fa den ben poti prakseri na a umapikin fu en, taki a ben teki wan oso-bijbelstudie, èn now a e go na fesi srefisrefi. Yu ben sa kan teki den srefi sortu okasi disi fu meki Kownukondre froktu?

8. Fa Kaleb ben e sori taki a e frutrow tapu Yehovah, aladi a ben e kon owru? Fa owru Kresten kan teki na eksempre fu en?

⁸ Furu fu den owru Kresten brada nanga sisa e go doro fayafaya na ini a Kownukondre preikiwroko, aladi den abi problema na skin sei fu di den kon grani kaba. Te den e du dati, dan den e teki na eksempre fu a getrow Israelman Kaleb, di  ben waka nanga Moses na ini a gran sabana sowan 40 yari langa. Kaleb ben abi 79 yari di a abra a Yordanliba go na ini a Pramisi Kondre. Baka di a feti leki wan srudati na ini a kefalek legre fu Israel sowan siksi yari langa, dan a ben kan taki dati a ben du nofo kaba èn taki a ben wani go rostu now. Ma a no ben du dati. Na presi fu dati a ben sori deki-ati, fu di a ben aksi fu kisi a frantwortu fu go teki „den bigi tranga foto” abra di ben de na ini den bergi kontren fu Yuda. A wroko dati ben de wan bigi tyalensi fu di den Enaksma, di ben de bun bigiskin man, ben e libi drape. Yehovah yepi Kaleb fu ’puru den na pasi tu, soifri leki fa A ben pramisi’ (Yosua 14:9-14; 15:13, 14). Efu yu tan meki Kownukondre froktu aladi yu kon owru kaba, dan yu abi a dyaranti taki Yehovah sa de nanga yu, neleki fa a ben de nanga Kaleb. Efu yu tan getrow sosrefi, dan a sa gi yu wan presi na ini a nyun grontapu fu en di a pramisi libisma.—Yesaya 40:29-31; 2 Petrus 3:13.

„Den sa fatu èn den sa tan moi”

9, 10. Fa Kresten di owru kaba, e tan abi wan tranga bribi? Fa den e tan tranga na yeye fasi? (Luku a faki na bladzijde 13.)

⁹ A psalm skrifiman ben poti prakseri na a bun wroko di den owru futuboi fu Yehovah e du, di a singi: „A regtfardikiwan srefi sa gi bromki neleki wan palmbon; leki wan sedre na ini Libanon, na so a sa gro kon bigi. Den sa tan gro bun srefi te den ede-wiwiri kon weti, den sa fatu èn den sa tan moi.”—Psalm 92:12, 14.

¹⁰ Fa yu kan tan tranga na yeye fasi, aladi yu e kon owru? A moro prenspari sani di e meki taki wan palmbon e tan gro moi a heri yari langa, na taki a musu kisi nofo krin watra. So a de tu taki yusrefi kan feni krakti fu den watra fu Bijbel waarheid, te yu e studeri a Wortu fu Gado èn te yu abi demakandra nanga na organisâsi fu en (Psalm 1:1-3; Yeremia 17:7, 8). Efu yu tranga na yeye fasi, dan dati e meki taki yu e tron wan bigi yepi gi den brada nanga sisa fu yu di abi a srefi bribi leki yu. Prakseri fa disi ben kon na krin na ini na eksempre fu na owru Gran Priester Yoyada.

11, 12. (a) Sortu tumusi prenspari wroko Yoyada ben du na ini a historia fu a kownukondre fu Yuda? (b) Fa Yoyada gebroiki a makti di a ben abi fu meki a tru anbegi go na fesi?

¹¹ A kan taki Yoyada ben pasa wán hondro yari kaba di a gridi Umakownu Atalia kiri en eigi granpikin, soso fu kan teki Yuda abra. San na owru Yoyada ben man du? Siksi yari langa en nanga en wefi kibri Yoas na ini a tempel; Yoas ben de a wan-enkri pikin di ben tan abra fu ala den wan di ben kan tron kownu. Dan na wan fasi di fruwondru ala sma, Yoyada ben meki bekènti taki Yoas di ben abi seibi yari, ben de kownu èn a meki sma kiri Atalia.—2 Kroniki 22:10-12; 23:1-3, 15, 21.

¹² Yoyada gebroiki a makti di a ben abi leki a sma di ben musu sorgu gi a kownu, fu meki a tru anbegi go na fesi. A ben „meki wan frubontu na mindri en, a heri pipel, èn a kownu, taki den ben o tan tyari densrefi leki a pipel fu Yehovah”. Yoyada ben gi a pipel a komando fu broko na oso fu a falsi gado Bâal puru, èn den puru den altari, den popki, nanga den priester fu Bâal. Ondro a tiri fu Yoyada, Yoas ben seti a wroko na ini a tempel baka èn a ben meki a tempel kon bun baka. „Yoas tan du san Yehovah ben feni bun ala den dei di Yoyada a priester ben e gi en leri” (2 Kroniki 23:11, 16-19; 24:11-14; 2 Kownu 12:2). Yoyada dede di a ben abi 130 yari. Den ben gi en bigi grani, iya, den beri en pe den kownu ben e beri, fu di „a ben du bun na ini Israel èn gi a tru Gado nanga na oso fu En”.—2 Kroniki 24:15, 16.

13. Fa owru Kresten kan ’du bun gi a tru Gado èn gi na oso fu en’?

¹³ A kan taki yu no man du so furu moro fu meki a tru anbegi go na fesi fu di yu no de so gosontu, noso fu tra situwâsi ede. Ma awinsi dati de so, toku yu man ’du bun gi a tru Gado èn gi na oso fu en’. Yu kan sori taki yu abi faya gi na oso fu Yehovah, fu di yu e go na den gemeente konmakandra èn fu di yu e teki prati na den. Yu kan sori dati tu fu di yu o go na ini a preikiwroko, na ibri okasi di yu feni. Efu yu de klariklari fu teki Bijbel rai èn efu yu e horibaka na wan getrow fasi gi „a getrow èn koni srafu” èn gi a gemeente, dan dati sa abi krakti tapu den tra  Kresten brada nanga sisa fu wi (Mateyus 24:45-47). Yu kan gi yu brada nanga sisa deki-ati tu „fu sori lobi èn fu du bun wroko” (Hebrewsma 10:24, 25; Fileimon 8, 9). Yu sa de wan blesi gi trawan tu efu yu teki a rai fu na apostel Paulus: „Den man di owru no musu du sani pasa marki, den musu de seryusu, den musu abi krin frustan, den musu abi wan tranga bribi nanga lobi èn den musu tan horidoro. Sosrefi, den uma di owru musu tyari densrefi na wan fasi di fiti santa sma. Den no musu fruteri ogri-ati lei èn den no musu de uma di lobi dringi furu win. Den musu de sma di e leri trawan bun sani.”—Titus 2:2-4.

14. Fa brada di e dini leki Kresten opziener someni yari kaba, kan du fu yepi meki a tru anbegi go na fesi?

¹⁴ A de so taki yu e dini leki gemeente owruman someni yari kaba? Wan brada di e dini leki gemeente owruman langa ten kaba e gi yu leki rai: „Te yu e kon moro owru, dan yu e kisi moro koni tu. Gebroiki a koni disi fu yepi trawan.” A e taki sosrefi: „Meki tra sma yepi yu fu tyari frantwortu, èn prati na ondrofeni di yu abi nanga tra sma di wani leri sani . . . Du muiti fu si den bun sani di tra sma man du. Yepi den fu gro èn fu kon moro bun na ini den afersi dati. Seti sani gi a tamara” (Deuteronomium 3:27, 28). Te yu e poti prakseri na a Kownukondrewroko fu meki a go na fesi, dan dati sa meki furu fu wi Kresten brada nanga sisa na heri grontapu kisi wini.

„Fruteri taki Yehovah de opregti”

15. Fa owru Kresten e „fruteri taki Yehovah de opregti”?

¹⁵ Nanga prisiri den futuboi fu Gado di de moro owru, e tyari a frantwortu fu den, fu di den e „fruteri taki Yehovah de opregti”. Efu yu na wan Kresten di kon owru kaba, dan den sani di yu e taki èn den sani di yu e du kan sori trawan taki ’Yehovah na yu Klepston, èn taki na Yehovah nowan onregtfardikifasi no de’ (Psalm 92:15). Aladi a palmbon no e taki, toku a e gi kotoigi fu den tumusi moi fasi fu en Mekiman. Ma Yehovah gi yu a tumusi moi okasi fu taki fu en nanga den sma di e teki a tru anbegi now (Deuteronomium 32:7; Psalm 71:17, 18; Yoèl 1:2, 3). Fu san ede disi de prenspari?

16. Sortu Bijbel eksempre e sori o prenspari a de fu ’fruteri sma taki Yehovah de opregti’?

¹⁶ Di Yosua, a fesiman fu Israel, ben kon „owru èn ben abi furu yari”, dan a „kari a heri  pipel fu Israel, den owruman, den edeman, den krutuman, nanga den ofsiri,” èn a memre den na a opregti fasi fa Yehovah ben handri nanga den. A ben taki: „No wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu” (Yosua 23:1, 2, 14). Wan heri pisi ten den wortu disi tranga a bosroiti di a pipel ben teki fu tan getrow. Ma baka di Yosua dede, dan „wan tra grupu fu sma bigin opo kon . . . di no ben sabi Yehovah, noso den wroko di a ben du gi Israel. Ne den manpikin fu Israel bigin du san fowtu na Yehovah ai èn den bigin dini den Bâal.”—Krutuman 2:8-11.

17. Fa Yehovah handri nanga a pipel fu en na ini a ten disi?

¹⁷ Na ini a ten disi, a no de so taki sma na ini a Kresten gemeente no sa man hori den soifri retifasi efu den owru futuboi fu Gado no fruteri san den ben ondrofeni. Toku, a de so taki a bribi di wi abi na ini Yehovah nanga den sani di a pramisi wi, e kon moro tranga te wisrefi e yere fu a „bigi wroko” di a du gi a pipel fu en na ini den lasti dei disi (Krutuman 2:7; 2 Petrus 1:16-19). Kande yu abi demakandra nanga na organisâsi fu Yehovah someni yari kaba. Efu dati de so, dan a kan taki yu e memre a ten ete di wan tu Kownukondre preikiman nomo ben de na ini a heri kontren noso a heri kondre fu yu. Noso kande yu e memre fa sma ben e gens a preikiwroko srefisrefi. Te fu kaba, yu si fa Yehovah puru difrenti sani na pasi di ben e tapu a wroko èn fa a meki a nomru fu preikiman gro „moro esi” (Yesaya 54:17; 60:22). Yu si fa wi kon frustan difrenti tori fu Bijbel moro krin èn yu si fa Gado meki taki en organisâsi dyaso na grontapu, bigin drai moro bun (Odo 4:18; Yesaya 60:17). Yu si na opregti fasi fa Yehovah e handri nanga sma. We, yu e du muiti dan fu gi trawan deki-ati fu di yu e fruteri den fu dati? Fu tru, disi kan abi furu krakti tapu den Kresten brada nanga sisa fu wi!

18. (a) Gi wan eksempre di e sori sortu bakapisi a kan abi te fu kaba, efu wi e ’fruteri tra sma taki Yehovah de opregti’. (b) Fa yusrefi ben ondrofeni na opregtifasi fu Yehovah?

¹⁸ Fa a de nanga den okasi pe yu ondrofeni a lobi-ati sorgu fu Yehovah, noso a tiri di a gi yu na ini yu eigi libi? (Psalm 37:25; Mateyus 6:33; 1 Petrus 5:7) Wan owru sisa di nen Martha ben gwenti fu gi trawan deki-ati fu di a ben e taki: „Awinsi san pasa, noiti no gowe libi Yehovah. A sa horibaka gi yu.” A rai disi ben abi furu krakti tapu Tolmina, wan fu den bijbelstudenti fu Martha di teki dopu syatu baka 1960. „Di mi masra dede”, na so Tolmina e taki, „dan mi ben lasi-ati trutru, ma den wortu dati ben meki taki mi ben teki a fasti bosroiti fu no misi nowan konmakandra. Fu tru, Yehovah gi mi furu krakti fu tan go doro.” Na ini ala den yari di pasa baka dati, Tolmina gi a srefi rai disi na furu tra bijbelstudenti fu en. Iya, te yu e gi trawan deki-ati, èn te yu e fruteri den fu na opregti fasi fa Yehovah e handri nanga sma, dan yu kan du furu fu bow a bribi fu den Kresten brada nanga sisa fu wi.

 Yehovah e si getrow owrusma leki sma di warti trutru

19, 20. (a) Fa Yehovah e prakseri fu a wroko fu den futuboi fu en di kon grani kaba? (b) San wi sa go luku na ini na artikel di e kon?

¹⁹ A grontapu di wi e libi na ini nownow no abi tangi moro, èn sma no e abi ten moro gi den graniwan (2 Timoteyus 3:1, 2). Furu tron sma e memre den graniwan fu san den ben du fositen, èn no fu san e du nownow. Ma san Bijbel e taki de heri tra fasi; a e taki: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den” (Hebrewsma 6:10). A no de fu taki dati Yehovah Gado e memre a getrow wroko di yu ben du gi en na ini a ten di pasa. Ma a abi warderi tu gi den sani di yu e tan du na ini a diniwroko fu en. Iya, a e si getrow owrusma leki Kresten di kan meki froktu ete, sma di abi wan bun èn tranga bribi. Den de wan krin buweisi taki Gado abi furu makti.—Filipisma 4:13.

²⁰ Yu e si den owru Kresten brada nanga sisa fu wi leki fa Yehovah e si den? Efu dati de so, dan yu sa wani fu sori lobi gi den tu (1 Yohanes 3:18). Na artikel di e kon sa sori wi san na wan tu moi fasi fa wi kan sori a lobi dati te wi o sorgu gi den sani di den abi fanowdu.

[Futuwortu]

San yu ben o piki?

• Fa den graniwan ’e meki froktu’?

• Fu san ede a tranga bribi fu den graniwan de wan bigi yepi gi trawan?

• Fa den owruwan kan „fruteri taki Yehovah de opregti”?

• Fu san ede Yehovah e si den futuboi fu en di e dini en someni langa kaba, leki warti sma?

[Aksi fu a tori disi]

[Faki na tapu bladzijde 13]

Fa den ben man tan abi wan tranga bribi

San ben yepi sma di de Kresten langa ten kaba fu tan abi wan tranga bribi èn fu no kon swaki na yeye fasi? Luku san son sma ben taki:

„A de tumusi prenspari fu leisi bijbeltekst di e poti prakseri na a matifasi di wi abi nanga Yehovah. Furu tron, te neti, mi e leisi nanga wan tranga sten san skrifi na ini Psalm 23 nanga 91.”—Olive, a dopu na ini 1930.

„Mi e sorgu taki mi de na ibriwan dopulezing èn taki mi e arki nanga ala mi prakseri, neleki na mi e teki dopu. Fu di mi tan hori na prakseri taki mi gi misrefi abra, meki mi ben kan tan getrow.”—Harry, a dopu na ini 1946.

„A de tumusi prenspari fu begi ala dei. Ala ten wi musu aksi Yehovah fu yepi wi, fu kibri wi, èn fu blesi wi, aladi wi e ’poti prakseri na en na ini ala san wi e du’” (Odo 3:5, 6).—Antônio, a dopu na ini 1951.

„Te mi e arki ondrofenitori fu den wan di e dini Yehovah na wan getrow fasi someni yari kaba, dan dati e meki a bosroiti di mi teki fu tan loyaal èn getrow na en, kon nyun ibri tron baka.”—Joan, a dopu na ini 1954.

„A prenspari fu no prakseri tumusi furu fu wisrefi. Ala san wi abi, wi kisi fu di Gado sori bun-ati gi wi. Te wi e luku sani na a fasi disi, dan dati e yepi wi fu tan waka a yoisti pasi, so taki wi kan kisi a yeye nyanyan di wi abi fanowdu fu horidoro te na a kaba.”—Arlene, a dopu na ini 1954.

[Prenki na tapu bladzijde 11]

Den owrusma e meki tumusi warti Kownukondre froktu

[Prenki na tapu bladzijde 14]

A tranga bribi fu den graniwan de wan bigi yepi gi trawan