Fa fu kisi wan langa èn koloku libi

WAN odo e taki: „Ala sma wani libi langa, ma nowan sma wani kon grani.” Furu sma di e doro a libimarki fu go nanga pensyun e howpu fu kisi moro ten fu du sani gi densrefi èn fu kisi moro mendri frantwortu. Ma toku den e frede taki den no sa abi nowan marki na ini den libi, èn den e frede taki den sa kisi a firi taki sma no abi den fanowdu moro. Den e frede sosrefi taki den sa de den wawan, taki den no sa de koloku, èn taki den gosontu sa go na baka.

We, san na a sroto fu kisi wan koloku libi? Bun mati nanga wan lobi-ati famiri e tyari koloku kon gi yongusma, èn sosrefi granisma. Ma san tra sma kan du fu tyari koloku kon gi granisma a no a moro prenspari sani. A moro prenspari sani na san granisma kan du gi trawan.

Sma di ben ondrosuku 423 grani trowpaar wan heri pisi ten, ben tyari kon na krin taki „te wi e yepi tra sma na ini den libi, dan dati kan yepi wi fu tan libi moro langa”. Stephanie Brown, di ben du na ondrosuku disi, e fruklari: „Den sani di wi leri fu na ondrosuku disi, e sori taki a no san wi e kisi fu a matifasi di wi abi nanga trawan de so prenspari; ma na san wi e gi trawan.” Wi e gi, te wi e yepi trawan kande nanga oso-wroko, te wi e yepi den sorgu den pikin, te wi e du boskopu gi den, te wi e go teki den tyari go na wan presi, noso te wi e teki ten fu arki wan sma di wani taki san de na en ati.

Sowan 2000 yari na fesi, Yesus Krestes ben taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Wan sma no e kisi wan langa èn koloku libi te a abi furu moni na bangi, noso te a e kisi ala sortu datrayepi, nanga spesrutu sortu nyanyan di musu yepi en fu tan yongu. Na presi fu dati, wan sma di wani wan langa èn koloku libi musu opo du sani, èn a musu gebroiki en ten nanga en krakti fu meki taki tra sma kisi moro prisiri na ini den libi.

Ma awansi wi e gi wi ten nanga wi krakti, toku dati no man sorgu taki wi no kon grani, siki, noso dede. Na Gado en Kownukondre wawan sa puru den sani disi. Ondro a tiri fu a Kownukondre dati, siki èn srefi „dede no sa de moro” (Openbaring 21:3, 4; Yesaya 33:24). Fu taki en leti, sma di e gi yesi sa de koloku èn den sa libi fu têgo na tapu wan paradijs grontapu (Lukas 23:43). Yehovah Kotoigi breiti taki den kan fruteri tra sma san Bijbel e taki san den kan du fu kisi wan langa èn koloku libi.