Tru Kresten abi a frantwortu fu sorgu gi den graniwan

„Srefi te wan sma kon grani, mi na a srefi Sma; èn srefi te wan sma ede-wiwiri kon weti, mi sa tan horibaka gi en.”—YESAYA 46:4.

1, 2. San na a difrenti na mindri a fasi fa wi hemel Tata e sorgu gi wi, nanga a fasi fa wan libisma papa nanga mama e du dati?

PAPA nanga mama di lobi den pikin fu den, e sorgu den bun te den na nyofi pikin ete, den e sorgu gi den na ini den pikin-nengreten, èn te den tron tini. Srefi te yonguwan tron bigisma èn te den abi den eigi osofamiri, dan a papa nanga mama fu den e tan poti prakseri na den na wan lobi-ati fasi èn den e tan yepi den.

² Aladi son sani de di libisma no man du gi den pikin fu den, toku a de so taki wi hemel Tata man fu poti prakseri na den getrow futuboi fu en ala ten, èn a man horibaka gi den tu. Di Yehovah ben e taki nanga a pipel fu en na ini owruten, dan a fruteri den: „Srefi te wan sma kon grani, mi na a srefi Sma; èn srefi te wan sma ede-wiwiri kon weti, mi sa tan horibaka gi en” (Yesaya 46:4). Den wortu disi de wan dyaranti gi den owru Kresten! Yehovah no e gowe libi den wan di e tan loyaal na en. Na presi fu dati, a e pramisi den taki a sa yepi den, taki a sa horibaka gi den èn taki a sa tiri den, den heri libi langa, srefi te den kon owru.—Psalm 48:14.

3. Fu sortu sani wi sa taki na ini na artikel disi?

³ Fa wi kan sori taki wi e broko wi ede nanga den graniwan, neleki fa Yehovah e broko en ede nanga den? (Efeisesma 5:1, 2) Meki wi go luku wan tu fasi fa pikin, opziener na ini a gemeente, nanga tra Kresten brada nanga sisa, kan sorgu gi den sani di den owru brada nanga sisa fu wi na heri grontapu abi fanowdu.

Wi frantwortu leki pikin

4. Sortu frantwortu Kresten pikin abi na a papa nanga a mama fu den?

⁴ „Gi grani na yu papa nanga yu mama” (Efeisesma 6:2; Exodus 20:12). Nanga den krakti wortu disi di skrifi na ini den Hebrew Buku fu Bijbel, na apostel Paulus e memre ala pikin taki den abi  wan frantwortu na a papa nanga a mama fu den. Ma san den wortu disi abi fu du nanga a sorgu di wi musu gi den graniwan? Wi o kisi piki tapu na aksi disi te wi go luku wan tumusi moi eksempre fu sma di ben libi na ini a pisi ten fu den Kresten.

5. (a) San e sori taki Yosef no ben frigiti den frantwortu di a ben abi na ini en famiri? (b) San a wani taki fu gi grani na wi papa nanga wi mama? Sortu moi eksempre Yosef gi wi ini a pisi tori disi?

⁵ Moro leki 20 yari langa, Yosef no ben miti na owru papa fu en, a famiri-edeman Yakob. Ma soleki fa a sori, dan Yosef no ben lasi a lobi di a ben abi gi en papa Yakob. Te yu luku en bun, dan di Yosef fruteri den brada fu en suma a ben de trutru, dan a ben aksi den: „Mi papa de na libi ete?” (Genesis 43:7, 27; 45:3) Na a ten dati angriten ben de na ini a kondre Kanan. Dati meki Yosef seni boskopu gi en papa taki: „Kon na mi. No draidrai. Yu musu libi na a kondre Gosen, èn yu musu tan krosibei fu mi . . . Dan mi sa gi yu nyanyan drape” (Genesis 45:9-11; 47:12). Iya, te wan sma e gi grani na en papa nanga en mama di kon owru kaba, dan dati wani taki tu dati a e gi den san den abi fanowdu na skin sei, te den no man sorgu gi densrefi moro (1 Samuel 22:1-4; Yohanes 19:25-27). Nanga prisiri Yosef ben teki a frantwortu disi.

6. Fa Yosef ben sori taki a lobi en papa trutru? Fa wi kan teki na eksempre fu en?

⁶ Yehovah ben blesi Yosef so taki a ben kon tron wan fu den moro gudu man fu Egepte; wan man di ben abi furu makti (Genesis 41:40). Ma a no ben du leki a prenspari tumusi, noso taki a abi tumusi furu fu du fu poti prakseri na en papa di ben abi 130 yari kaba. Di Yosef yere taki Yakob (noso Israel) ben de krosibei kaba, dan Yosef „meki sma seti na asiwagi fu en èn a hari go miti Israel, a papa fu en, na ini Gosen. Di a si en a brasa en wantewante èn a bigin krei na en papa neki ibri tron baka” (Genesis 46:28, 29). A fasi disi fa Yosef gi en papa wan switikon no ben de fu sori sma nomo taki a abi lespeki gi en papa. Nôno, Yosef ben lobi en papa di ben kon owru kaba èn a no ben e syen fu sori taki a lobi en. Efu wi abi papa nanga mama di kon owru kaba, dan wi musu aksi wisrefi efu wi e sori taki wi lobi den trutru, neleki fa Yosef ben du dati.

7. Fu san ede Yakob ben wani taki sma beri en na ini Kanan?

⁷ Yakob tan dini Yehovah na wan getrow fasi teleki a dede (Hebrewsma 11:21). Fu di Yakob ben e bribi na ini den pramisi fu Gado, meki a ben aksi efu sma ben kan beri a dedeskin fu en na ini Kanan. Yosef ben gi grani na en papa fu di a du san en papa ben aksi en, aladi dati ben kostu en furu moni èn furu muiti.—Genesis 47:29-31; 50:7-14.

8. (a) San na a moro prenspari sani di musu meki taki wi sorgu gi wi papa nanga wi mama di kon owru kaba? (b) San wan furuten wrokoman ben du soso fu kan sorgu gi en papa nanga en mama di ben e kon owru kaba? (Luku a faki na tapu bladzijde 17.)

⁸ San ben meki taki Yosef ben wani sorgu gi en papa? Yosef ben si en leki wan plekti fu sorgu gi a sma di ben gi en libi èn di ben sorgu gi en teleki a ben kon bigi. Aladi dati de so, toku a no de fu taki dati Yosef ben wani plisi Yehovah tu. Wi musu wani du a srefi tu. Paulus ben skrifi: „Efu wan weduwe abi pikin noso granpikin, meki den disi leri fosi fu sori taki den e dini Gado na wan getrow fasi na ini den eigi osofamiri èn meki den tan pai wan paiman di fiti na den papa nanga mama èn na den granpapa nanga granmama, bika disi bun  na Gado ai” (1 Timoteyus 5:4). Iya, te wi lobi Yehovah èn te wi abi bigi lespeki gi en, dan dati sa meki taki wi wani sorgu gi wi papa nanga wi mama di kon owru kaba, awinsi sortu tyalensi wi o kisi leki bakapisi fu dati. *

A fasi fa owruman e sori taki den e broko den ede nanga den graniwan

9. Suma Yehovah poti leki skapuman fu luku na ipi, èn sosrefi den Kresten di kon owru kaba?

⁹ Na a kaba fu a langa libi fu Yakob, dan a ben kari Yehovah „a tru Gado di tiri mi leki wan skapuman, mi heri libi langa te kon miti a dei disi” (Genesis 48:15). Na ini a ten disi Yehovah e tiri den futuboi fu en na grontapu neleki wan skapuman, nanga yepi fu Kresten opziener, noso owruman, di de ondro a tiri fu en Manpikin, Yesus Krestes, „a gran skapuman” (1 Petrus 5:2-4). Fa opziener kan teki na eksempre fu Yehovah te den e sorgu gi den owru memre fu na ipi?

10. Fa sma yepi owru Kresten brada nanga sisa fu feni den sani di den abi fanowdu? (Luku a faki na tapu bladzijde 19.)

¹⁰ Syatu baka di a Kresten gemeente bigin, den apostel ben ’poti seibi man . . . di ben furu nanga yeye èn nanga koni’ fu sorgu taki ’nyanyan ben prati ala dei’ na mindri den pôti Kresten uma di lasi den masra na ini dede (Tori fu den Apostel 6:1-6). Bakaten, Paulus taigi na opziener Timoteyus fu skrifi den nen fu den grani uma di ben de wan bun eksempre èn di ben musu kisi yepi fu feni den sani di den ben abi fanowdu (1 Timoteyus 5:3, 9, 10). Na ini a ten disi opziener na ini a gemeente de klariklari tu fu seti sani so taki den owru Kresten kan kisi yepi te dati de fanowdu. Ma boiti dati, moro de ini a tori te wi e sorgu gi den owruwan di tan getrow.

11. San Yesus ben taki fu a pikinso moni di a pôti uma di lasi en masra na ini dede, ben poti na ini a monikisi?

¹¹ Na a kaba fu Yesus en diniwroko dyaso na grontapu, dan a ben sidon na ini a tempel èn a „ben e luku fa den sma ben e poti moni na ini den monikisi”. Ne wan sma hari en prakseri. A tori e taki: „Wan pôti uma di lasi en masra na ini dede, kon drape èn a poti tu sensi di no ben warti furu.” Yesus ben kari den disipel fu en kon èn a taigi den: „Fu tru mi e taigi unu taki a pôti uma disi poti moro moni leki ala den sma di poti moni na ini a monikisi; bika den alamala poti san ben tan abra fu a moni fu den, ma na uma poti ala san a ben abi” (Markus 12:41-44). Te yu luku a moni di na uma ben gi, dan a no ben furu, ma Yesus ben sabi o furu en Tata na hemel e warderi den sortu sma disi di e sori nanga den heri sili taki den e dini Gado na wan getrow fasi. A no abi trobi omeni yari a pôti uma disi ben abi, ma Yesus no ben du leki a no ben si san na uma du.

12. Fa owruman kan sori taki den abi warderi gi den sani di den grani Kresten e du?

 ¹² Kresten owruman de neleki Yesus fu di den no e tapu den ai gi den sani di den graniwan e du fu meki a tru anbegi go na fesi. A fiti srefisrefi te owruman e prèise den graniwan fu a fasi fa den e teki prati na a diniwroko èn sosrefi na den gemeente konmakandra. A fiti tu fu prèise den gi a tumusi bun krakti di den abi tapu a gemeente, èn gi a fasi fa den e horidoro. Te wi gi den graniwan deki-ati na wan opregti fasi, dan dati kan ’meki taki den e prisiri’ na ini a santa diniwroko fu den. Na so fasi den no abi fu bruya densrefi fu di den e teki a wroko fu den gersi nanga san tra Kresten man du, noso nanga san den ben man du fosi.—Galasiasma 6:4.

13. Fa owruman kan gebroiki a koni nanga na ondrofeni fu den owrusma na ini a gemeente?

¹³ Owruman kan sori taki den e warderi a bun yepi di den owru Kresten brada nanga sisa e gi fu di den e gebroiki na ondrofeni nanga a koni fu den sma disi. Te owrusma de bun eksempre na ini a gemeente, dan den owruman kan gebroiki den fu hori wan demonstrâsi, noso den kan interview den. „Den arkiman e sidon arki nanga ala den prakseri te mi abi wan takimakandra nanga wan owru brada, noso sisa di kweki pikin na ini a waarheid”, na so wan owruman e taki. Owruman na ini wan tra gemeente e taki dati wan owru pionier sisa di abi 71 yari ben man yepi difrenti Kownukondre preikiman fu tron sma di e teki prati na a preikiwroko doronomo. A e gi den deki-ati sosrefi fu du den „prenspari sani”, soleki fu leisi Bijbel nanga a deitekst, èn fu denki dipi fu den sani di den e leisi.

14. Fa wan skin fu owruman sori taki den ben abi warderi gi wan owru brada di ben e dini leki opziener makandra nanga den?

¹⁴ Owruman e warderi a yepi sosrefi fu tra opziener di kon owru kaba. No tumusi langa pasa, dan José di pasa 70 yari èn di e dini leki owruman someni tenti yari kaba, ben abi fu du wan hebi oparâsi. Fu di a ben o teki langa bifo a ben o man wroko baka leki fa a ben gwenti, meki a ben prakseri fu saka a frantwortu fu en leki fesiman opziener na ini a gemeente. José e taki: „A ben fruwondru mi srefisrefi fu si san den tra owruman du.” A e taki moro fara: „Na presi fu taki dati a bun taki mi wani saka a frantwortu fu mi, dan den aksi mi sortu yepi den kan gi mi so taki mi sa kan tan tyari mi frantwortu.” Nanga a yepi fu wan moro yongu owruman, José ben man tan dini leki fesiman  opziener na wan prisiri fasi èn disi ben de wan blesi gi a gemeente. Wán fu den tra owruman e taki: „A gemeente abi furu warderi gi a wroko di José e du leki owruman. Den lobi en èn den e lespeki en fu di a abi so furu ondrofeni èn fu di a bribi fu en de wan bun eksempre gi trawan. A de wan blesi gi a gemeente fu wi.”

Meki wi sori taki wi e broko wi ede nanga makandra

15. Fu san ede meki ala Kresten musu broko den ede nanga a tanbun fu den graniwan na den mindri?

¹⁵ A no de nomo na den pikin di abi papa nanga mama di grani kaba, noso na den brada di kisi frantwortu na ini a gemeente, fu broko den ede nanga den graniwan. Paulus ben teki a Kresten gemeente gersi nanga a skin fu wan libisma. A ben skrifi: „Gado ben meki a skin so, taki a ben gi moro grani pasa marki na a pisi di no ben abi someni, so taki nowan pratifasi no de na ini a skin, ma taki den memre fu a skin musu sorgu gi makandra na a srefi fasi” (1 Korentesma 12:24, 25). Wan tra Bijbel e taki: „Ma tak’ den pisi [fu a skin] sa sorgu bun gi makandra” (Nyun Testamenti). Efu wi wani taki a Kresten gemeente drai bun fu di ala sma e wroko makandra, dan ibri memre fu a gemeente musu broko en ede nanga a tanbun fu den brada nanga sisa fu en, èn sosrefi nanga a tanbun fu den graniwan.—Galasiasma 6:2.

16. Fa wi kan sori taki wi e poti prakseri na den graniwan te wi de na den Kresten konmakandra?

¹⁶ Kresten konmakandra e gi wi wan tumusi moi okasi fu poti prakseri na den graniwan (Filipisma 2:4; Hebrewsma 10:24, 25). Wi e teki ten fu taki nanga den owrusma disi na den okasi dati? A fiti fu aksi den fa den e firi. Ma yu denki taki wi ben sa kan ’gi den wan presenti na yeyefasi’ sosrefi, kande fu di wi e fruteri den wan ondrofenitori, noso wan sani fu Bijbel di kan gi den deki-ati? Fu di sonwan fu den no man waka so bun moro, meki a ben o de moro bun efu wi go na den, na presi fu fruwakti taki den musu kon na wi. Efu a de so taki den no e yere so bun moro, dan wi kan du muiti fu no taki tumusi esi èn fu taki den wortu moro krin, so taki den kan frustan wi. Ma efu wi wani „gi makandra deki-ati” trutru, dan wi musu arki nanga ala wi prakseri fu kan yere bun san na owru sma e taki.—Romesma 1:11, 12.

17. Fa wi kan sori taki wi e broko wi ede trutru nanga den owru Kresten di no man komoto na ini den oso?

¹⁷ San wi musu du te son owru sma no man kon na den Kresten konmakandra? Yakobus 1:27 e sori taki a de a frantwortu fu wi fu „sorgu gi sma di de na nowtu, dati wani taki fu sorgu gi pikin di no abi papa nanga mama moro èn gi uma di den masra dede kaba”. A Griki wortu di vertaal nanga „sorgu gi” wani taki sosrefi „go luku” (Tori fu  den Apostel 15:36). Iya, den graniwan e warderi en srefisrefi te wi e go luku den! Di Paulus ben de na strafu na ini Rome wan pisi ten fu 65 G.T., dan a ben „owru” kaba. Te yu luku en bun, dan a ben de drape en wawan. A ben e angri fu si Timoteyus, di ben wroko makandra nanga en fosi èn a ben skrifi: „Du muiti fu kon na mi esi-esi” (Fileimon 9; 2 Timoteyus 1:3, 4; 4:9). Aladi den owruwan na wi mindri no de na strafu leki Paulus, toku sonwan fu den no man komoto na ini den oso fu di den abi problema nanga a gosontu fu den. Te yu luku en bun, dan kande densrefi e taki tu: ’Grantangi, du muiti fu kon na mi esi-esi.’ Wi e du muiti fu poti prakseri na den dan?

18. Sortu wini a kan abi te wi e go luku den graniwan?

¹⁸ Noiti no denki taki yu no sa kisi furu wini te yu e go na wan owru Kresten brada, noso sisa. Di wan Kresten man di ben nen Oneisiforus ben de na Rome, dan a du ala muiti fu feni Paulus. Te fu kaba a feni en, èn baka dati a go baka ’nofo tron fu gi Paulus kowru-ati’ (2 Timoteyus 1:16, 17). „Mi lobi fu abi demakandra nanga yongusma”, na so wan owru sisa e taki. „San mi lobi srefisrefi na taki den e libi nanga mi neleki mi na wan memre fu na osofamiri fu den. Dati e gi mi furu deki-ati.” Wan tra owru Kresten sisa e taki: „Mi e warderi en srefisrefi te sma e seni wan karta gi mi, te den e bel mi wan tu miniti nomo, noso te den e kon luku mi pikinso. A gi mi krakti baka.”

Yehovah e blesi den sma di e broko den ede nanga trawan

19. Sortu blesi wi kan kisi te yu e sorgu gi den graniwan?

¹⁹ A o tyari furu blesi gi wi efu wi e sorgu gi den graniwan. A de wan grani fu kan abi demakandra nanga den owrusma disi, fu kan leri fu den sani di den sabi èn fu na ondrofeni di den abi. Sma di e sorgu gi den graniwan e firi a bigi prisiri di wan sma e firi te a e gi sani na trawan. Den e firi sosrefi taki den du wan bun sani. Na ini den ati den abi wan korostu firi, fu di den e du san Bijbel e taigi den fu du (Tori fu den Apostel 20:35). Boiti dati, den wan di e sorgu gi den graniwan, no abi fu frede taki sma no sa luku den te densrefi kon owru bakaten. A Wortu fu Gado e gi wi a dyaranti: „A sili di lobi fu gi sani, ensrefi sa meki kon fatu, èn a sma di e kowru na ati fu trawan pasa marki, den sa kowru en ati pasa marki tu.”—Odo 11:25.

20, 21. Fa Yehovah e si den wan di e sorgu gi den graniwan? Sortu fasti bosroiti wi musu teki?

²⁰ Yehovah e blesi pikin, owruman, nanga tra Kresten di abi frede gi En èn di e broko den ede nanga trawan, fu di den e sorgu gi den sani di den owru brada nanga sisa abi fanowdu, sondro fu prakseri densrefi nomo. So wan fasi fu denki e kruderi nanga na odo disi: „A sma di e yepi den mofinawan, e leni Yehovah, èn A sa pai a sma dati gi san a du” (Odo 19:17). Efu wi lobi den mofinawan nanga den pôtisma, dan dati musu meki taki wi e du bun sani gi den. Gado e si a fasi dati fu gi sani, leki na leni wi e leni en wan sani, èn a sa gi wi furu blesi leki pai. Gado e pai wi baka sosrefi te wi e sorgu na wan lobi-ati fasi gi den grani brada nanga sisa fu wi, fu di furu fu den na ’pôtiwan na ini grontapu, ma guduman na ini bribi’.—Yakobus 2:5.

²¹ Fu tru, a pai di Gado sa gi wi, bigi srefisrefi! A abi fu du nanga têgo libi. Gi furu fu den futuboi fu Yehovah, dati wani taki dati den sa libi fu têgo na ini wan paradijs na grontapu, pe den bakapisi fu a sondu di den gebore nanga dati, no sa de moro. Gi granisma di de getrow na Gado a sa wani taki dati den sa kisi a krakti fu wan yongu sma baka (Openbaring 21:3-5). Aladi wi e wakti a ten dati te wi sa kisi den blesi disi, dan meki wi tan tyari wi frantwortu leki Kresten fu sorgu gi den graniwan.

[Futuwortu]

San yu ben o piki?

• Fa pikin kan gi grani na a papa nanga mama fu den di kon owru kaba?

• Fa owruman e sori warderi gi den owru memre fu na ipi?

• San ibri Kresten kan du fu sori taki a wani yepi den graniwan trutru?

• Sortu blesi wi sa kisi te wi e sorgu gi den Kresten brada nanga sisa fu wi di kon grani kaba?

[Aksi fu a tori disi]

[Faki na tapu bladzijde 17]

Di en papa nanga mama ben abi yepi fanowdu

Na ini 1999, Philip ben e dini leki wan friwani bow-wrokoman na ini Liberia. Ne a kisi fu yere taki en papa siki srefisrefi. Fu di a ben sabi taki en mama wawan no ben o man sorgu en papa, meki a ben bosroiti fu drai go baka na oso, fu seti sani so taki en papa ben kan kisi a datrayepi di a ben abi fanowdu.

„A no ben makriki fu drai go baka”, na so Philip e taki, „ma mi ben e firi leki a fosi frantwortu fu mi ben de fu yepi mi papa nanga mama.” Na ini den dri yari baka dati, a froisi en papa nanga mama go na wan moro bun oso. Nanga yepi fu Kresten brada nanga sisa na ini a kontren, a ben seti na oso pikinso tra fasi, so taki a ben moro makriki gi en papa fu libi drape.

Now a mama fu Philip man libi moro makriki nanga a seryusu siki fu a papa. No tumusi langa pasa, Philip ben man teki a kari fu go wroko leki friwani-wrokoman na a bijkantoro fu Yehovah Kotoigi na ini Masedonia.

[Faki na tapu bladzijde 19]

A fasi fa wan gemeente yepi wan owru sisa

Di Ada, wan Kresten uma fu 85 yari di e libi na Australia, no ben man komoto na ini en oso moro fu di a ben siki, dan den owruman na ini en gemeente seti sani fu yepi en. Den ben seti wan grupu fu brada nanga sisa di ben kan yepi a sisa disi. Nanga prisiri den brada nanga sisa ben e krin na oso, wasi krosi, bori, èn du ala sortu boskopu gi en.

Now, pikinmoro tin yari pasa di den bigin du a sani disi. Te na a momenti disi, dan moro leki 30 brada nanga sisa di de Kotoigi fu Yehovah, ben yepi fu sorgu gi Ada. Den e tan go na en, den e leisi gi en komoto fu den buku fu wi di abi Bijbel tori na ini. Den e fruteri en fa den wan na ini a gemeente e go na fesi na yeye fasi, èn den e tan begi nanga en doronomo.

Wan Kresten owruman di de na ini a gemeente fu en ben taki: „Den wan di e sorgu gi Ada e si en leki wan grani fu kan yepi en. Furu fu den kisi deki-ati fu a getrow diniwroko di a sisa disi du na ini den someni tenti yari di pasa, èn den no ben o denki srefi fu no yepi a sisa disi nanga den sani di a abi fanowdu.”

[Prenki na tapu bladzijde 16]

A de so taki wi e sori wi papa nanga mama di kon grani kaba taki wi lobi den trutru?

[Prenki na tapu bladzijde 18]

Ala sma na ini a gemeente kan sori taki den lobi den grani brada nanga sisa fu den