Aksi fu leisiman

David ben de wan getrow futuboi fu Yehovah. Ma fu san ede a ben gi pasi taki en wefi Mikal ben abi wan terafimpopki, noso kruktugado, soleki fa 1 Samuel 19:12, 13 e sori dati?

Meki wi luku syatu fosi san skrifi na ini den tekst di de lontu a vers disi. Di a wefi fu David yere taki Kownu Saul ben wani kiri David, dan a handri wantewante. Bijbel e taki: „Mikal meki David saka na a fensre, so taki a ben kan lowe gowe. Ne Mikal teki a terafimpopki [soleki fa a sori dan disi ben bigi neleki wan libisma èn a ben gersi wan libisma tu] èn a poti en tapu a foroisi bangi, èn a tapu na ede nanga wan nèt fu krabita wiwiri, èn baka dati a tapu en nanga wan krosi.” Di den futuboi fu Saul kon fu grabu David, dan Mikal taigi den: „A siki.” A triki disi ben meki taki David ben kisi nofo ten fu lowe gowe.—1 Samuel 19:11-16.

Den sani di sabidensiman fu owruten sani feni e sori taki na ini owruten, sma no ben abi terafimpopki soso fu anbegi den, ma den ben abi den tu fu man seti sani akruderi wet. Neleki fa wan dokumenti nanga testamenti e gi sma na ini a ten disi a reti fu kisi wan gudu, na so terafimpopki ben e gi sma a reti dati fositen. Soleki fa a sori, dan na spesrutu situwâsi, a masra fu wan umapikin di ben abi a terafim, ben abi a reti fu kisi den gudu fu a papa fu en wefi te a papa dede. Disi kan fruklari fu san ede, na wan okasi na fesi, Rakel ben teki den terafimpopki fu en papa, èn fu san ede en papa ben du ala muiti fu kisi den baka. Na ini a kefal disi, Yakob, a masra fu Rakel, no ben sabi san en wefi ben du.—Genesis 31:14-34.

Di den Israelsma ben tron wan nâsi, dan den kisi den Tin Komando, èn a di fu tu komando ben sori spesrutu taki den no ben mag meki kruktugado (Exodus 20:4, 5). Bakaten, a profeiti Samuel ben sori go na a wet disi di a ben taki nanga Kownu Saul. A ben taki: „Tranga-ede fasi na a srefi leki a sondu fu lukuman-wroko, èn pusu go na fesi na wan asranti fasi, na a srefi leki a gebroiki di wan sma e gebroiki obia krakti nanga terafim” (1 Samuel 15:23). Fu dati ede, a no de fu fruwondru taki a terafim ben e dini leki wan sani fu man kisi famiri gudu na ini Israel. Awansi fa no fa, a kruktu denki disi di den Dyu ben abi fosi ben tan na ini son osofamiri na ini Israel (Krutuman 17:5, 6; 2 Kownu 23:24). Taki Mikal ben abi a terafimpopki na mindri den sani di a ben abi e sori taki a no ben e dini Yehovah nanga en heri ati. Kande David no ben sabi taki a ben abi a terafimpopki, noso kande a ben gi Mikal pasi fu abi en fu di en ben de na umapikin fu Kownu Saul.

A fasi fa David ben prakseri fu a fasi fa sma musu dini Yehovah wawan e kon na krin na ini den wortu: „Yehovah bigi èn a musu kisi prèise srefisrefi, èn wi musu frede en moro leki ala tra gado. Bika ala den gado fu den sma na gado di no warti notinoti. Ma na Yehovah meki den hemel.”—1 Kroniki 16:25, 26.

[Prenki na tapu bladzijde 29]

A di fu tu wet fu den Tin Komando ben sori taki a fowtu fu meki kruktugado soleki a terafimpopki di de fu si dyaso

[Sma di abi a reti fu a prenki]

A teki puru fu a buku The Holy Land, Pisi II, 1859