Den wan di e gi Gado glori, sa kisi blesi
Den wan di e gi Gado glori, sa kisi blesi
„Den sa saka kindi na fesi yu, o Yehovah, èn den sa gi yu nen glori.”—PSALM 86:9.
1. Fu san ede wi man gi Gado glori na wan moro bun fasi leki den sani di no abi libi?
YEHOVAH warti fu kisi prèise fu ala den sani di a meki. Den sani di no abi libi, e gi en glori na wan fasi di no de fu yere. Ma wi libisma de tra fasi fu di wi kan denki, wi kan frustan sani, èn wi kan warderi sani; wi kan anbegi Gado sosrefi. Sobun, a psalm skrifiman e taki nanga wi, te a e taki: „Bari nanga prisiri gi Gado, ala un pipel fu grontapu. Singi poku fu gi en nen glori. Prèise a glori fu en.”—Psalm 66:1, 2.
2. Suma e gi yesi na a komando fu gi glori na Gado nen, èn fu san ede den e du dati?
2 Furu libisma e weigri fu bribi taki Gado de èn den no wani gi en glori tu. Ma na ini 235 kondre, moro leki siksi milyun Kotoigi fu Yehovah e sori taki den e si „den eigifasi fu [Gado] di sma no kan si nanga ai” fu di den e luku den sani di a meki èn den e „yere” fa den sani dati e kotoigi fu en aladi den no e taki (Romesma 1:20; Psalm 19:2, 3). Fu di den e studeri Bijbel, meki den kon leri sabi Yehovah èn den lobi en sosrefi. Psalm 86:9, 10 ben taki na fesi: „Ala nâsi di yu meki, sa kon èn den sa saka kindi na fesi yu, o Yehovah, èn den sa gi yu nen glori. Bika yu bigi èn yu e du wondru sani; yu na Gado, yu wawan.”
3. Fa a „bigi ipi” e du „santa diniwroko dei nanga neti”?
3 Na a srefi fasi, Openbaring 7:9, 15 e taki fu „wan bigi ipi” fu anbegiman di e „du santa diniwroko gi [Gado] na ini a tempel fu en dei nanga neti”. A no de so taki Gado wani dati en futuboi musu prèise en doronomo sondro fu tapu. Ma den anbegiman fu en de na ini wan organisâsi di de na heri grontapu. Sobun, te sonwan fu den e rostu na neti na a wan sei fu grontapu, dan na a tra sei fu grontapu den trawan e gi kotoigi fayafaya fu di a de deiten drape. Fu dati ede wi kan taki dati den e gi Yehovah glori dei nanga neti. Heri esi, „ibri sani di e bro” sa opo en sten fu prèise Yehovah (Psalm 150:6). Ma fosi a ten dati doro, dan san ibriwan fu wi kan du fu gi Gado glori? Sortu problema kan miti wi? Èn sortu blesi e wakti den wan di e gi Gado glori? Fu kisi piki tapu den aksi disi, dan meki wi go luku wan bijbeltori fu den Israelsma fu a lo Gad.
Wan problema na ini owruten
4. Sortu problema a lo fu Gad ben kisi?
4 Bifo den Israelsma fu a lo Gad ben go na ini a Pramisi Kondre, dan den ben aksi fu go tan owstusei fu a Yordanliba di ben de wan heri moi presi fu kweki meti (Numeri 32:1-5). Ma te den ben o libi drape, dan den ben o kisi fu du nanga seryusu problema. Den tra lo na a westsei fu a Yordanliba ben o abi en moro makriki, fu di a Lagipresi fu a Yordan ben de leki wan skotu di ben e kibri den gi feanti (Yosua 3:13-17). Ma a buku The Historical Geography of the Holy Land (A fasi fa a Santa Kondre ben de na owruten) di George Adam Smith skrifi, e taki fu den kondre di ben de owstusei fu a Yordan: „[Den] alamala na bradi plata pisi kontren di de na tapu a bigi heipresi fu Arabia; pikinmoro nowan sani de na den presi drape fu kibri den gi feanti. Fu dati ede, den pipel di no abi wan fasti tanpresi, ben e go feti nanga den ala ten fu teki a nyanyan fu den; sonwan fu den pipel disi ben e go fufuru a nyanyan fu den ibri yari baka.”
5. San Yakob ben taigi den bakapikin fu Gad fu du te sma ben o kon feti nanga den?
5 Fa a lo fu Gad ben o du nanga so wan hebi problema? Hondrohondro yari na fesi, Yakob, na afo fu den, ben taki wan profeititori di a ben de fu dede. A ben taki: „Èn Gad, we, wan grupu fu ogri-ati fufuruman sa kon feti nanga en, ma en sa go feti nanga den wan di de te na bakasei” (Genesis 49:19). Kande disi e gersi leki sani no ben o waka bun gi den. Ma te yu luku en bun, dan den wortu disi na wan komando gi den sma fu a lo fu Gad taki den ben musu feti baka nanga den ogri-ati fufuruman. Yakob ben gi den a dyaranti taki efu den ben o du dati, dan den fufuruman ben o lowe gowe èn kisi syen, aladi den sma fu Gad ben o go na den baka fu feti nanga den wan di ben de te na bakasei fu a grupu.
Problema di kan abi krakti tapu na anbegi fu wi na ini a ten disi
6, 7. Fa a situwâsi fu Kresten na ini a ten disi de a srefi leki a di fu a lo fu Gad?
6 Neleki a lo fu Gad, na so Kresten na ini a ten disi e kisi fu du nanga den broko-ede èn problema fu a sistema fu Satan; wi no e kisi kibri na wan wondru fasi so taki den problema dati no miti wi (Yob 1:10-12). Furu fu wi e kisi problema na skoro, na wrokope, èn te wi e kweki den pikin fu wi. Boiti dati, wi abi problema noso swakifasi fu wisrefi tu. Son sma abi „wan maka na ini a skin” fu di den malengri, noso fu di den e siki seryusu (2 Korentesma 12:7-10). Trawan e feti nanga a firi taki den no warti noti. Tra Kresten e kisi fu du nanga „muilek dei” fu di den e kon owru, èn dati e meki taki den no man dini Yehovah nanga a srefi krakti di den ben abi fosi.—Preikiman 12:1.
7 Na apostel Paulus e memre wi tu taki ’wi e feti . . . nanga den ogri yeye na den hemel kontren’ (Efeisesma 6:12). Ala ten wi e kisi fu du nanga „a yeye fu grontapu”; Satan nanga den ogri yeye fu en e gi sma a denki taki den musu opo densrefi teige trawan di abi wan moro hei posisi leki den, èn taki den musu libi wan yayolibi (1 Korentesma 2:12; Efeisesma 2:2, 3). Neleki Lot di ben abi frede gi Gado, na so wi na ini a ten disi kan firi brokosaka tu te wi e si fa sma e libi wan doti sekslibi èn fa den e taki fu den sortu sani dati (2 Petrus 2:7). Ma Satan e kon langalanga na wi tapu tu. Satan e feti nanga a fikapisi fu den salfuwan „di e hori den komando fu Gado èn abi a wroko fu gi kotoigi fu Yesus” (Openbaring 12:17). Satan e feti tu nanga den „tra skapu” fu Yesus fu di a e meki tirimakti tapu a wroko fu den, noso a e meki sma frufolgu den.—Yohanes 10:16.
Wi o gi abra, noso wi o feti baka?
8. San wi musu du te Satan e kon feti nanga wi, èn fu san ede wi musu du dati?
8 San wi musu du te Satan e kon feti nanga wi? Neleki a lo fu Gad, na so wi sosrefi musu de tranga na yeye fasi èn wi musu feti baka, na a fasi fa Gado wani. A de wan sari sani taki son sma kon weri fu den problema fu a libi, èn den no e poti prakseri moro na den frantwortu di den abi na yeye fasi (Mateyus 13:20-22). Wan Kotoigi fruteri fu san ede trawan no ben e kon so furu moro na den konmakandra fu a gemeente pe a ben de na ini: „Den brada nanga sisa e kon weri trutru. Den alamala e firi brokosaka srefisrefi.” A tru taki furu sani de na ini a ten disi di kan meki sma kon weri. Fu dati ede, a makriki fu si na anbegi fu Gado leki wan problema tu, noso leki wan hebi plekti. Ma dati na wan bun fasi fu si sani?
9. Fa wi e kisi krakti baka te wi e teki a tyatyari fu Krestes?
9 Luku san Yesus ben taigi den ipi sma di ben kon weri tu fu den problema fu a libi: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka.” Yu denki taki Yesus ben wani taki dati wi ben o kisi krakti baka te wi no ben o du so furu moro na ini a diniwroko gi Gado? Nôno, na presi fu dati, Yesus taki: „Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka.” Wan tyatyari na wan sortu udu, noso isri sani di wan sma, noso wan meti kan gebroiki fu tyari wan hebi lai. Ma fu san ede wan sma ben o wani teki so wan tyatyari fu Yesus dan? Wi alamala abi wi eigi „hebi lai” kaba, a no so? Iya, ma na ini Grikitongo, den wortu kan wani taki tu : „Kon na ondro mi tyatyari, makandra nanga mi.” Prakseri fu disi: Yesus wani yepi wi fu tyari wi lai! Wi no abi fu tyari a lai wi wawan.—Mateyus 9:36; 11:28, 29, futuwortu; 2 Korentesma 4:7.
10. San na a bakapisi fu a muiti di wi e du fu gi Gado glori?
10 Te wi e teki a tyatyari di Krestes e gi wi leki en disipel, dan wi e feti teige Satan. „Kakafutu gi Didibri èn a sa lon gowe libi unu”, na so Yakobus 4:7 e pramisi wi. A no de fu taki dati disi no makriki fu du. Efu wi wani dini Gado, dan wi musu meki muiti trutru (Lukas 13:24). Ma na ini Psalm 126:5 Bijbel e pramisi disi: „Den wan di e sai nanga watra-ai, den sa koti srefi nanga bigi prisiri.” Iya, wi no e dini wan Gado di no abi warderi gi san wi e du. En na „a sma di e pai den wan di e suku en seryusu”, èn a e blesi den wan di e gi en glori.—Hebrewsma 11:6.
Gi Gado glori leki Kownukondre preikiman
11. Fa a preikiwroko e yepi wi fu man feti teige Satan?
11 Yesus ben gi a komando: „Fu dati ede, go na sma fu ala kondre èn meki den tron disipel.” A preikiwroko na a moro prenspari fasi fa wi kan gi Gado „wan srakti-ofrandi fu prèise” (Mateyus 28:19; Hebrewsma 13:15). Wi musu ’weri a bun nyunsu fu vrede leki susu na wi futu’, bika disi na wan tumusi prenspari pisi fu „a heri fetisani fu Gado” di wi abi fanowdu fu man feti teige Satan (Efeisesma 6:11-15). Fu prèise Gado na ini a preikiwroko, na wan moi fasi fu tranga a bribi fu wi (2 Korentesma 4:13). A e yepi wi fu no prakseri sani di kan meki wi firi brokosaka (Filipisma 4:8). Te wi e teki prati na a preikiwroko, dan wi e kisi na okasi fu abi demakandra nanga wi brada nanga sisa èn wi kan gi makandra deki-ati.
12, 13. Fa a kan abi wini gi osofamiri te den e teki prati na a preikiwroko doronomo? Gi wan eksempre.
12 A preikiwroko na wan bun sani sosrefi di na osofamiri kan du makandra. A no de fu taki dati yongu pikin musu kisi na okasi tu fu prei. Ma a ten di na osofamiri de na ini a preikiwroko, no abi fu de wan fruferi sani gi den. Papa nanga mama kan meki a preikiwroko kon tron wan prisiri sani gi den pikin, te den e leri den pikin fu taki bun nanga den ososma. Te wan pikin sabi du wan sani bun, dan ala ten a o wani du dati, a no so? Papa nanga mama no musu aksi tumusi furu fu den yongu pikin fu den, ma den musu tan hori na prakseri san a pikin kan du èn san a no kan du. Te den e du dati, dan den o yepi a pikin fu si a preikiwroko leki wan prisiri sani.—Genesis 33:13, 14.
13 Boiti dati, wan osofamiri di e prèise Gado makandra sa kisi wan moro bun banti nanga makandra. Luku wan eksempre fu wan sisa di ben abi wan masra di no de na bribi. Di a masra gowe libi en nanga feifi pikin, dan a ben abi fu go suku wan wroko fu man sorgu gi den pikin. Ma yu denki taki a ben kon weri so te, taki a no ben e poti prakseri na a yeyefasi fu den pikin? A sisa e memre: „Mi ben e studeri Bijbel nanga den Bijbel publikâsi fayafaya èn mi ben e pruberi fu du san mi leisi. Mi ben e tyari den pikin go na den konmakandra èn na ini a preikiwroko doronomo. San ben de den bakapisi fu a muiti di mi ben meki? Ala feifi pikin dopu.” Te yu e teki prati fayafaya na a preikiwroko, dan disi kan yepi yu tu fu kweki yu pikin „nanga a trangaleri èn a seryusu frumane fu Yehovah”.—Efeisesma 6:4.
14. (a) Fa yonguwan kan gi Gado glori na skoro? (b) San kan yepi yonguwan fu no „syen gi a bun nyunsu”?
14 Yonguwan, yu e libi na ini wan kondre pe sma abi primisi fu preiki na publiki? Efu disi de so, dan yu e gi Gado glori fu di yu e gi kotoigi na skoro? Noso yu no e du disi fu di yu e frede san sma o taki? (Odo 29:25) Na ini Puerto Rico, wan Kotoigi sisa di abi 13 yari e taki: „Noiti mi no syen fu preiki na skoro fu di mi sabi taki disi na a waarheid. Te mi de na ini a klas, dan ala ten mi e sutu mi finga go na loktu èn mi e fruteri san mi leri fu Bijbel. Efu mi abi fri ten na skoro, dan mi e go na ini a bibliotheek pe den buku fu skoro de, èn drape mi e leisi a Jonge mensen vragen-buku.” * Yehovah blesi den muiti di a meki? A sisa e taki: „Son tron, den skoromati fu mi e poti aksi gi mi èn son leisi den e aksi mi wan fu den buku srefi.” Efu yu ben draidrai fu gi kotoigi na skoro, dan kande yu musu studeri fayafaya fu kon sabi gi yusrefi san na „a bun, yoisti, èn volmaakti wet fu Gado” (Romesma 12:2). Te yu de seiker taki san yu leri na a waarheid, dan noiti yu sa „syen gi a bun nyunsu”.—Romesma 1:16.
Wan ’doro opo’ fu du diniwroko
15, 16. Na ini sortu ’bigi doro di opo fu du wroko’ son Kresten pasa go, èn sortu blesi den kisi fu dati?
15 Na apostel Paulus ben skrifi taki ’wan bigi doro opo gi en fu du wroko’ (1 Korentesma 16:9). A situwâsi fu yu e gi yu na okasi fu pasa go na ini so wan doro fu du wroko? Fu eksempre, te yu go na ini a yepi-pionierwroko, noso a gewoon pionierwroko, dan yu o abi fu du a preikiwroko 50 yuru, noso 70 yuru ibri mun. A no de fu taki dati tra Kresten brada nanga sisa e warderi den pionier trutru fu di den e dini na wan getrow fasi. Ma den pionier no e firi densrefi moro hei leki den tra brada nanga sisa fu den, soso fu di den e gebroiki moro ten fu du a preikiwroko. Na presi fu dati, den e kon kisi a denki di Yesus ben taki dati wi musu abi. A ben taki: „Wi na srafu di no warti noti. Wi du san wi ben musu du.”—Lukas 17:10.
16 Efu wi wani pionier, dan wi musu dwengi wisrefi, wi musu orga wi libi bun, èn wi musu de klariklari fu libi wan tu sani na baka di wi ben lobi. Ma te wi e du dati, dan wi sa kisi blesi trutru. „A de wan trutru blesi fu man gebroiki Gado Wortu fu waarheid na wan reti fasi”, na so wan yongu pionier di nen Tamika e taki. „Te yu e pionier, dan yu e gebroiki Bijbel bun furu. Now, te mi e go oso fu oso, dan mi sabi difrenti tekst di mi man gebroiki gi difrenti ososma” (2 Timoteyus 2:15). Wan pionier di nen Mica e taki: „Wan tra moi blesi, na te mi e si fa a waarheid abi so furu krakti tapu a libi fu sma.” Wan yonguwan di nen Matthew e taki tu dati a e prisiri fu ’si fa wan sma e kon na ini a waarheid. Nowan tra sani e gi en moro prisiri leki disi’.
17. Fa wan Kresten ben kon kisi wan bun denki fu a pionierwroko?
17 Yu denki kaba fu go na ini a pionierwroko? Kande yu ben sa wani du disi, ma yu e firi leki yu no bun nofo. Wan yongu sisa di nen Kenyatte e taki: „Mi no ben denki fu go na ini a pionierwroko. Mi ben e denki taki mi no ben o man du disi. Mi no ben sabi fa fu bigin wan takimakandra èn mi no ben sabi fa fu overtoigi sma nanga yepi fu den Buku fu Bijbel.” Ma den owruman ben aksi wan lepi pionier sisa fu wroko makandra nanga en. Kenyatte e memre: „Mi ben e prisiri fu wroko nanga en. Disi ben gi mi a firi fu go na ini a pionierwroko tu.” Kande efu trawan gi yu deki-ati èn efu den leri yu, dan yu sosrefi o kisi a firi fu go na ini a pionierwroko.
18. Sortu blesi den wan di e go du zendelingwroko, kan kisi?
18 Te yu e pionier, dan dati kan yepi yu fu du muiti fu du tra sortu diniwroko tu. Fu eksempre, son trowpaar kan doro den markitiki fu go teki leri fu man dini leki zendeling na ini tra kondre. Zendeling musu kon gwenti den sani na ini wan tra kondre, soleki wan tra tongo, wan tra kulturu, noso tra sortu nyanyan. Ma den blesi di den e kisi, e meki taki den e frigiti den sortu problema disi. Mildred fu Meksikow, na wan zendeling furu yari kaba. A e taki: „Noiti a hati mi taki mi teki a bosroiti fu tron wan zendeling. Sensi mi ben de wan pikin meisje, mi ben wani du disi kaba.” Sortu blesi a ben kisi? „Na ini mi eigi kondre, a ben muilek fu feni wan bijbelstudie. Ma dyaso na ini Meksikow mi abi so furu bijbelstudie, taki fo fu den bigin nanga a preikiwroko na a srefi ten!”
19, 20. Fa furu sma kisi blesi di den go wroko na Bethel, di den go yepi fu bow bijkantoro na tra kondre, èn di den go na a Dinariskoro?
19 Den wan di e dini na Bethel na den bijkantoro fu Yehovah Kotoigi, e kisi furu blesi tu. Sven, wan yongu brada di e dini na a Bethel fu Doisrikondre, e taki fu a wroko di a e du drape: „Mi e firi taki mi e du wan sani di warti trutru. Mi ben kan gebroiki a koni fu mi fu du wan grontapuwroko. Ma a ben o de leki mi e poti moni na wan bangi di de fu lasi ala moni.” A tru taki wan friwani-wrokoman no e kisi moni fu a wroko di a e du, sobun a no man du ala san a wani. Ma Sven e taki: „Te yu e go na oso, dan yu sabi taki ala san yu du a dei dati, ben de gi Yehovah. Èn dati e meki mi firi heri bun.”
20 Son brada nanga sisa kisi a blesi fu go yepi bow bijkantoro na tra kondre. Di wan trowpaar ben go du disi na a di fu aiti kondre, dan den skrifi: „Wi lobi den brada nanga sisa dyaso srefisrefi. A de wan sari taki disi na a di fu aiti leisi di wi o abi fu gowe libi den mati fu wi dyaso. Disi ben de wan tumusi moi sani di wi ondrofeni!” Dan yu abi a Dinariskoro sosrefi. Brada di no trow èn di doro den markitiki fu go na a skoro disi kan kisi leri fu kon moro tranga na yeye fasi. Wan fu den brada di kaba a skoro ben taki: „Mi no abi wortu nofo fu taki unu tangi gi a tumusi moi leri di mi ben kisi na a skoro. Sortu organisâsi ben o du so furu muiti fu gi so wan leri?”
21. Sortu tyalensi ala Kresten e kisi na ini a diniwroko gi Gado?
21 Iya, furu san de di wi kan du na ini a diniwroko gi Gado. A tru taki furu fu wi no man dini na Bethel, noso na wan tra kondre. Yesus srefi ben taki dati son Kresten ben o gi furu „froktu”, ma trawan no ben o gi so furu, fu di den de na ini difrenti situwâsi (Mateyus 13:23). Fu dati ede, a de wan tyalensi gi ibriwan fu wi leki Kresten fu du so furu leki wi man. Wi musu luku a situwâsi fu wi èn du ala muiti fu teki prati fayafaya na a diniwroko gi Yehovah. Te wi e du dati, dan wi e gi Yehovah glori, èn wi kan abi a dyaranti taki dati e plisi en. Luku na eksempre fu Ethel, wan owru sisa di e tan na wan presi pe den e sorgu gi owrusma. Doronomo a e preiki gi den trawan di e tan drape èn a e preiki na telefon sosrefi. Aladi a no man du so furu, toku a e du en diniwroko nanga en heri ati.—Mateyus 22:37.
22. (a) Na sortu tra fasi wi kan gi Gado glori? (b) Sortu tumusi moi ten e wakti wi?
22 Ma memre taki a preikiwroko na wán fasi nomo fa wi e gi Yehovah glori. Te wi de wan eksempre na ini a fasi fa wi e tyari wisrefi èn na ini a fasi fa wi e moi wisrefi èn e weri krosi te wi de na wrokope, na skoro, noso na oso, dan wi e prisiri na ati fu Yehovah (Odo 27:11). Odo 28:20 e pramisi wi: „Wan man di e du sani na wan getrow fasi, sa kisi furu blesi.” Fu dati ede, meki wi ’sai pasa marki’ na ini wi diniwroko gi Gado, fu di wi sabi taki wi sa kisi blesi pasa marki tu (2 Korentesma 9:6). Te wi e du dati, dan wi sa kisi a grani fu de na libi na a tumusi moi ten te „ibri sani di e bro” sa gi Yehovah a glori di a musu kisi trutru!—Psalm 150:6.
[Futuwortu]
^ paragraaf 14 A buku Wat jonge mensen vragen—Praktische antwoorden, na wan buku di Yehovah Kotoigi tyari kon na doro.
Yu e memre disi ete?
• Fa a pipel fu Gado e dini Yehovah „dei nanga neti”?
• Sortu problema ben miti a lo fu Gad, èn san dati e leri Kresten na ini a ten disi?
• Fa a preikiwroko kan yepi wi fu feti teige Satan?
• Na ini sortu ’opo doro’ son Kresten pasa go, èn sortu blesi den kisi?
[Aksi fu a tori disi]
[Prenki na tapu bladzijde 15]
Neleki fa den sma fu a lo fu Gad ben e feti teige ogri-ati fufuruman, na so Kresten musu feti teige Satan
[Prenki na tapu bladzijde 17]
Na ini a preikiwroko, wi e kisi deki-ati fu di wi abi demakandra nanga wi brada nanga sisa
[Prenki na tapu bladzijde 18]
Te yu e pionier, dan dati kan yepi yu fu kisi tra grani na ini a diniwroko, soleki:
1. Fu go dini na wan tra kondre
2. Fu go dini na Bethel
3. Fu go dini leki zendeling