Du bun na ini ten fu nowtu

„MEKI wi du bun gi ala sma”, na so na apostel Paulus ben frumane wi, „ma spesrutu gi den wan di de na ini a srefi bribi leki wi” (Galasiasma 6:10). Yehovah Kotoigi na heri grontapu e meki tranga muiti fu fiti a rai disi na ini den libi, fu di den e du bun gi ala sma, spesrutu gi den wan di de na ini a srefi bribi leki den. Na ini ten fu nowtu, disi de fu si ibri tron baka. Meki wi luku wan tu eksempre fu sani di pasa no so langa pasa, na ini dri difrenti kondre.

Na ini december 2002, wan bigi winti ben wai so tranga leki 300 kilometer wán yuru, tapu na èilanti Guam. Furu oso ben broko, èn wan tu ben pori krinkrin. Wantewante den gemeente drape ben orga grupu di ben yepi den Kotoigi famiri di ben abi moro yepi fanowdu, fu seti den tanpresi baka. A bijkantoro fu Guam ben seni wrokosani nanga wrokoman fu meki den oso di ben broko, èn a bijkantoro fu Hawai ben horibaka tu gi a wroko. Wan tu wiki baka a rampu, wan grupu fu temreman fu Hawai ben doro drape fu yepi nanga a bow-wroko, èn wan tu brada fu a presi drape ben teki fakansi fu den grontapuwroko, so taki den ben kan yepi den. Fu di den ben wroko nanga furu prisiri makandra, meki a ben de wan kotoigi gi den birtisma.

Na wan presi leti na a lanki fu a foto Mandalay, na Myanmar, wan oso ben teki faya krosibei fu wan Kownukondre zaal. Wan sisa nanga en osofamiri ben e libi krosibei fu a Kownukondre zaal. A sisa disi no ben e preiki moro. A winti ben e wai go na a sei fu na oso fu a sisa, èn dati meki a ben lon go suku yepi na a zaal. Na a ten dati, furu brada ben de drape fu di den ben e seti a zaal kon bun baka. Den ben fruwondru fu miti a sisa, bika den no ben sabi taki a ben e libi na ini a birti dati. Wantewante den brada ben yepi a sisa fu puru den sani di a ben abi na ini na oso. Di a masra, di no ben de wan Kotoigi, ben yere fu a faya, dan esi-esi a drai go na oso. Drape a ben si fa den brada ben sorgu gi na osofamiri fu en. A ben fruwondru fu a sani dati srefisrefi èn a ben de nanga tangi na ati. A ben breiti tu fu di furu tron fufuruman e teki den okasi dati fu fufuru den sani di sma puru fu den oso. Fu di den brada ben handri na so wan switi fasi, meki disi ben gi a sisa nanga en manpikin a deki-ati fu abi demakandra baka nanga a Kresten gemeente, èn now den e go na ala den konmakandra.

Na ini a dienstyari di pasa, wan angriten ben naki furu sma na ini Mosambik, fu di a dreiten ben hori langa èn den sani di den ben prani no ben gi nyanyan. Wantewante a bijkantoro fu Yehovah Kotoigi di de na ini a kondre ben seni nyanyan gi den wan di ben abi dati fanowdu.  Den ben prati a nyanyan na ini den Kownukondre zaal, son leisi baka den gemeente konmakandra. Wan mama di no abi masra, ben taki: „Mi ben firi brokosaka di mi go na a konmakandra, fu di mi no ben sabi san mi ben o gi den pikin fu nyan te mi ben o drai go baka na oso.” A yepi di den brada ben gi en na wan lobi-ati fasi ben gi en deki-ati wantewante. A ben taki: „Gi mi a ben de neleki wan opobaka!”

Den Kotoigi e ’du san bun’ tu na yeye fasi fu di den e prati a Bijbel boskopu di e trowstu sma èn di e gi sma howpu. Den e bribi a sani di a koniman fu owru ten ben bribi, di a ben taki: „Ma a sma di e arki [a koni fu Gado], sa abi wan bun libi èn a no sa frede te rampu miti en.”—Odo 1:33.

[Prenki na tapu bladzijde 31]

1, 2. Nyanyan e prati gi den wan di abi en fanowdu na ini Mosambik

3, 4. A bigi winti na ini Guam pori furu oso

[Sma di abi a reti fu a prenki]

Wan pikin, kruktu-anusei: Andrea Booher/FEMA News Photo; wan uma, tapusei: AP Photo/Pacific Daily News, Masako Watanabe