Sortu bribi yu musu teki?

’DEN difrenti bribi di de, na difrenti pasi di e yepi yu fu doro a srefi marki. Na wán Gado nomo de, a no tru?’ Furu sma di feni taki a de prenspari fu de wan memre fu wan kerki, e prakseri so tu. Den feni taki a no abi trobi sortu bribi wan sma wani teki.

Te yu luku a tori disi frafra, dan a gersi leki san den e taki de so trutru, bika a tru taki na wán Gado nomo de, na Almaktiwan (Yesaya 44:6; Yohanes 17:3; 1 Korentesma 8:5, 6). Ma wi no kan du leki wi no e si a bigi difrenti di de na mindri den someni kerkigrupu di e taki dati den e dini a tru Gado; son leisi den e taki sani srefi di no e kruderi nanga makandra kwetikweti. Bigi difrenti de na ini san den e du, san den e bribi, san den e leri sma, èn san den e aksi fu wan sma di wani tron wan memre fu a kerki fu den. Den difrenti bigi so te, taki sma di de fu a wán kerki noso grupu, abi problema fu frustan, noso fu teki san den tra kerki e bribi, noso e leri sma.

Na a tra sei, Yesus ben taki: „Gado na wan Yeye, èn den sma di e anbegi en, musu anbegi en nanga yeye èn nanga waarheid” (Yohanes 4:24). Bijbel e taki dati wi musu dini Gado akruderi waarheid. Ma efu wi musu du dati, dan wi no kan abi wan lo fowtu denki fu suma Gado de trutru, fu den prakseri fu en, èn fu a fasi fa a wani taki sma musu anbegi en, a no so? Yu denki taki a de wan yoisti sani fu prakseri taki na Almakti Gado no e broko en ede nanga a fasi fa wi e anbegi en?

Tru Kresten na ini owruten èn na ini a ten disi

Son tron den Kresten fu a fosi yarihondro ben e si sani na difrenti fasi. Leki eksempre, Paulus ben taki fu den wan na ini a gemeente Korente, taki: „A de so, mi brada, taki den ososma fu Klowe ben fruteri mi taki trobi de na un mindri. San mi wani taigi unu nanga disi, na taki ibriwan fu unu e taki: ’Mi na fu Paulus’, ’Mi na fu Apolos’, ’Mi na fu Seifas’, ’Mi na fu Krestes.’”—1 Korentesma 1:11, 12.

Fa Paulus ben e prakseri? A ben e si den difrenti disi leki sani di no de so prenspari? A ben de so nomo taki ibriwan sma ben e teki en eigi pasi fu kan kisi frulusu? Nôno, kwetikweti! Paulus ben gi a rai: „Mi e frumane unu brada, na ini a nen fu wi Masra Yesus Krestes, taki un alamala musu taki na ini wánfasi nanga makandra, èn taki nowan pratifasi musu de na un mindri, ma taki unu de makandra na ini wánfasi soleki fa a fiti, nanga a srefi denki èn nanga a srefi fasi fu prakseri.”—1 Korentesma 1:10.

A no de fu taki dati wánfasi na ini a bribi no e kon nanga dwengi. Wi kan kisi en nomo te sma e ondrosuku sani finifini so taki den kon frustan sani na a srefi fasi èn so taki den teki den srefi bosroiti. Sobun, efu wi wani abi a sortu wánfasi di  Paulus ben e taki fu dati, dan a de tumusi prenspari fu studeri Gado Wortu, èn a musu de so trutru taki wi wani du den sani di wi e leri. A sortu wánfasi dati de fu feni? Soleki fa wi si kaba, dan someni langa kaba Gado e wroko nanga en pipel leki wan grupu. A grupu dati de fu feni na ini a ten disi?

A abi wini te wi abi demakandra nanga a grupu sma di Gado feni bun

Wan leisi a psalm skrifiman David ben aksi: „O Yehovah, suma sa de wan fisitiman na ini yu tenti? Suma sa tan na tapu yu santa bergi?” Dati na wan aksi di e poti wi na prakseri broki, a no so? David srefi ben piki: „A sma di e waka sondro fowtu èn e du retidu èn di e taki waarheid na ini en ati” (Psalm 15:1, 2). Te wan sma frustan bun san Bijbel e taki, dan dati sa yepi en fu kon sabi sortu grupu fu anbegiman e hori ensrefi na den markitiki di Gado poti. Te wan sma moksi ensrefi nanga a grupu dati, dan a sa abi bun demakandra nanga sma di e anbegi Gado na ini wánfasi èn „nanga yeye èn nanga waarheid”.

Yehovah Kotoigi sori taki libisma kan de wán na ini bribi èn na ini a fasi fa den e tyari densrefi, awinsi pratifasi lai na ini a ten disi. Na den mindri yu abi sma di komoto na ini furu difrenti bribi èn sma fu difrenti ras. Son Kotoigi ben de sma di ben e bribi fosi taki wi no kan kon sabi Gado trutru, noso taki Gado no de. Tra Kotoigi baka noiti no ben sidon denki seryusu fu na anbegi fu Gado. Na mindri den difrenti fasi fu anbegi, den difrenti kulturu, nanga den difrenti filosofia, sma komoto di e nyan bun now fu wánfasi na ini bribi, wan sani di no de fu feni na ini grontapu na ini a ten disi.

A sani di e meki taki a wánfasi disi kan de, na Bijbel, a Wortu fu Gado. A no de fu taki dati Yehovah Kotoigi e frustan taki den no kan taigi tra sma san den musu du. Ma den e warderi a grani di den abi fu kan gi trawan a deki-ati fu teki leri komoto fu Bijbel. Disi o meki taki den sma kan teki wan bun bosroiti ini a tori fu anbegi. Na a fasi disi, furu tra sma kan kisi wini tu fu den blesi di Gado e gi sma di e anbegi en „nanga yeye èn nanga waarheid”.

Na ini a ten disi, a de moro makriki fu brokokindi gi tesi fu di den ogri sani di kan abi krakti na wi tapu, kon moro furu. Dati meki a de tumusi prenspari fu suku demakandra nanga den yoisti sma. Bijbel e taki dati „a sma di e waka nanga koni sma, sa kon koni” èn taki „takru kompe e pori bun gwenti” (Odo 13:20; 1 Korentesma 15:33). A de wan kibri gi wi te wi abi demakandra nanga sma di e anbegi Gado trutru. Dati meki Bijbel e memre wi: „Meki wi poti prakseri na makandra, so taki wi e tranga makandra fu sori lobi èn fu du bun wroko, fu no libi a kon di wi e kon makandra, soleki fa sonwan abi a gwenti fu du, ma fu gi makandra deki-ati, èn dati moro furu, fu di unu e si a dei e kon krosibei” (Hebrewsma 10:24, 25). A de wan bigi blesi te trutru mati, Kresten brada nanga sisa, e yepi makandra na wan lobi-ati fasi fu tyari den difrenti frantwortu di Gado e gi wi!

Ottmar e taki dati disi de so tru. A kweki na ini wan Lomsu osofamiri na ini Doisrikondre, ma a ben yongu ete di a komoto na ini a kerki dati. A e fruteri: „Ibri leisi te mi ben e go na kerki, mi ben e kisi a firi leki mi ben go fu soso.” Toku a ben tan poti bribi na ini Gado. Dan a miti nanga Yehovah Kotoigi èn a ben kisi na overtoigi taki den na den tru anbegiman fu Gado. A ben kon si taki a de fanowdu fu abi demakandra nanga den. Now a e taki: „Now di mi e wroko makandra fayafaya nanga wan organisâsi di abi sma na heri grontapu, dan mi e firi taki mi abi vrede èn mi e firi korostu. Safrisafri mi e kisi yepi fu kon sabi Bijbel moro soifri. Dati na wan sani di warti gi mi trutru.”

Wan kari gi den wan di e suku a tru anbegi

Wan grupu fu sma di abi a srefi prakseri èn di e wroko makandra kan du wan wroko moro bun leki trawan di e suku fu du a wroko den wawan. Leki eksempre, di Yesus ben de fu gowe libi den bakaman fu en, dan a taki: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi taigi unu” (Mateyus 28:19, 20). Fa so wan wroko ben o man du na wan bun fasi, efu nowan sma ben  de fu tiri a wroko èn efu sani no ben orga bun? Fa wan sma ben o man gi yesi na a Bijbel rai disi efu a ben sa dini Gado en wawan?

Na ini a yari di pasa, Yehovah Kotoigi na heri grontapu prati 91.933.280 buku nanga brochure di abi Bijbel tori na ini, èn sosrefi 697.603.247 tijdschrift. Na a fasi dati den ben man doro milyunmilyun sma na ini 235 kondre nanga a boskopu fu Gado Wortu. Disi na wan tumusi moi buweisi taki te sma e wroko makandra leki wan grupu di orga bun, dan den abi moro bun bakapisi leki te wán sma nomo ben sa pruberi fu du wan wroko en wawan, sondro taki trawan yepi en!

Boiti taki Yehovah Kotoigi e prati buku di abi fu du nanga Bijbel, dan den e studeri Bijbel nanga sma sondro fu aksi moni gi dati. Na so fasi den e yepi sma fu kon frustan moro bun san Gado e aksi fu den. A yari di pasa, dan ibri wiki den hori sowan 5.726.509 fu den bijbelstudie disi nanga sma, noso nanga grupu fu sma. A Bijbel leri disi yepi milyunmilyun sma fu kisi nofo sabi fu kan bosroiti sortu fasi fu anbegi den wani teki. Yu e kisi a kari fu kon leri sabi den markitiki di Gado meki sma skrifi poti na ini Bijbel. Dan yu kan teki yu eigi bosroiti.—Efeisesma 4:13; Filipisma 1:9; 1 Timoteyus 6:20; 2 Petrus 3:18.

Efu yu wani plisi Gado, dan a de tumusi prenspari fu de wan memre fu wan spesrutu bribi, ma dati no wani taki dati yu kan teki iniwan bribi di yu wani. Te yu o teki wan bribi, dan a bosroiti dati musu de akruderi a soifri sabi di yu kan kisi nanga yepi fu Bijbel. Yu no musu teki a bosroiti dati fu di yu e poti bribi na kerki leri gi san yu no abi buweisi, noso fu di sma e fruteri yu nomo san Bijbel e taki (Odo 16:25). Kon sabi san na den markitiki di Gado e poti gi a tru fasi fu anbegi. Teki den markitiki dati gersi nanga san yu e bribi. Dan yu musu teki wan bosroiti akruderi san yu sabi.—Deuteronomium 30:19.

[Prenki na tapu bladzijde 7]

Yehovah Kotoigi abi wánfasi na ini wan grontapu pe pratifasi de