’A leri wi fu lespeki a bribi fu en’

WAN Kotoigi fu Yehovah fu a distrikt Rovigo, na ini Italiakondre, ben kon sabi taki a abi kanker, èn taki a ben kan dede fu a siki disi. Na uma disi ben e didon na ati-oso wan tu leisi, èn na a ten dati a aksi datra fu yepi en sondro fu gebroiki brudu. Bakaten sma fu a presi drape di abi a wroko fu sorgu sma di abi kanker, ben kon yepi en na oso.

A ben naki na ati fu den ati-oso wrokoman fu si taki a siki uma disi di ben abi 36 yari, ben abi wan tranga bribi èn taki a ben de klariklari fu wroko makandra nanga den. Syatu bifo na uma disi dede fu a kanker di a ben abi, wan fu den sma di ben kon na en oso fu yepi en, skrifi wan pisi tori di ben poti na ini wan tijdschrift di e taki fu a wroko di sma e du fu sorgu sikisma. A man disi ben skrifi fa en ben feni en fu sorgu gi a siki uma disi di a ben kari Angela.

„Angela no e firi brokosaka srefisrefi èn a e feti fu tan na libi. A sabi na ini sortu situwâsi a de èn a sabi o seryusu a siki fu en de. Neleki fa iniwan fu wi ben o du, na so Angela sosrefi e suku wan fasi fu kon betre, noso wan dresi. . . . Safrisafri, wi di ben e yepi en, kon leri sabi en. A no ben e du muilek te wi ben wani yepi en. Ma na presi fu dati, a ben makriki gi wi fu du wi wroko fu di ala ten Angela ben e taigi wi fa a e denki. A ben de wan prisiri sani fu go yepi en, fu di wi ben sabi taki wi ben o abi demakandra nanga wan opregti sma èn wi ben o kisi wini fu a demakandra dati. . . . Wantewante wi kon si taki a bribi fu en ben o meki en muilek gi wi fu yepi en nanga a siki fu en.” Dati na san a man disi ben prakseri, fu di a ben feni taki Angela ben musu kisi brudu, wan sani di a ben weigri fu du.—Tori fu den Apostel 15:28, 29.

„Wi di abi a wroko fu sorgu gi sikisma, ben taigi Angela taki wi no ben agri nanga a bosroiti di a teki, ma a yepi wi fu kon frustan o prenspari a libi de gi en. Wi kon frustan sosrefi o prenspari a bribi fu en de gi en nanga en osofamiri. Angela no gi abra. A no libi ensrefi gi a siki fu en. A abi deki-ati. A wani tan na libi, a wani feti fu tan na libi, èn a wani tan libi go doro. A meki wi kon sabi san a e bribi. A abi wan fasti bosroiti di wi no gwenti fu abi, iya, a abi wan bribi di tranga moro leki a di fu wi. . . . Angela leri wi o prenspari a de fu lespeki a bribi fu en, aladi dati no e kruderi kwetikweti nanga den markitiki fu a wroko fu wi. . . . Wi feni taki a sani di Angela leri wi na wan tumusi prenspari sani, fu di wi e miti ala sortu sma, wi e kisi fu du nanga ala sortu situwâsi, èn nanga ala sortu bribi. Wi kan leri fu ala den sani disi èn wi kan yepi ala sma di wi e miti.”

Baka dati, na artikel na ini a tijdschrift poti prakseri na a Code of Professional Ethics for Italian Nurses (wan nomru fu tirilin gi sma na ini Italiakondre di abi a wroko fu sorgu gi sikisma). Den tirilin disi bigin abi krakti na ini 1999. Wan tu fu den tirilin e taki: „Te a sma di abi a wroko fu sorgu gi sikisma e du a wroko fu en, dan a musu hori a bribi fu a sikisma na prakseri, den markitiki na san a sikisma e hori ensrefi, a kulturu fu a sikisma, a ras fu a sikisma èn a musu hori na prakseri tu efu a sikisma na wan man, noso wan uma.” Son leisi a no makriki gi datra nanga sma di e sorgu gi sikisma fu lespeki a bribi fu den wan di siki. Ma wan sikisma trutru e warderi den sma di e lespeki a bribi fu en.

Yehovah Kotoigi e poti bun prakseri na den bosroiti di den e teki te a abi fu du nanga a gosontu fu den, èn te a abi fu du nanga a datrayepi di den wani. Den e ondrosuku bun san Bijbel e taki, èn soleki fa na eksempre fu Angela e sori, den a no sma di e hori densrefi fayafaya na wan sortu fromu bribi (Filipisma 4:5). Na heri grontapu, moro nanga moro sma di abi a wroko fu yepi sikisma, de klariklari fu lespeki a bribi fu Kotoigi di siki.