A moro warti gudu di de

NA OWRU apostel Yohanes ben skrifi na ini den lasti yari fu en libi: „Nowan tra sani e gi mi moro prisiri leki te mi e yere taki den pikin fu mi e tan waka na ini a waarheid.”—3 Yohanes 4.

A getrow apostel disi ben taki fu den pikin fu en na yeye fasi. Ma neleki na apostel, furu papa nanga mama wani a srefi sani gi den pikin fu den. Den meki tranga muiti fu kweki den pikin fu den na ini „a trangaleri èn a seryusu frumane fu Yehovah”, èn now den e prisiri fu si taki den pikin fu den di kon bigi ’e tan waka na ini a waarheid’ (Efeisesma 6:4). Fu taki en leti, a moro warti gudu di papa nanga mama kan gi den pikin fu den, na fu leri den fa fu libi na wan fasi di sa meki den kisi têgo libi. Disi de so fu di wan sma di e dini Gado getrow, dati wani taki wan sma di e libi soleki fa Yehovah wani wan Kresten fu libi, „abi wan pramisi gi a libi fu now èn a libi di musu kon ete”.—1 Timoteyus 4:8.

Yehovah, a volmaakti Papa, e warderi en trutru te papa nanga mama di abi frede gi en, e meki tranga muiti fu gi den pikin fu den leri na yeye fasi. Te den pikin e teki a leri disi, dan den e kisi bigi prisiri fu di den e teki prati na a tru anbegi makandra nanga a papa nanga mama fu den. Te den pikin disi e kon lepi, dan den sa man memre den furu prisiri sani di den ondrofeni makandra nanga den papa nanga mama. Sonwan fu den e memre nanga prisiri fa a ben de di den ben teki prati fu a fosi leisi na a Theokrasia Diniwroko-skoro. * Noso den e memre a fosi leisi di den ben man leisi wan bijbeltekst na ini na oso-fu-oso wroko, di den ben de makandra nanga a papa, noso a mama fu den. Den no man frigiti kwetikweti fa den ben e yere den papa nanga mama e leisi gi den na ini Mi boekoe nanga Bijbel tori, noso na ini a buku Naar de Grote Onderwijzer luisteren. * Gabriel e memre wan fu den sani di a ben lobi trutru: „Di mi ben abi fo yari nomo, mi mama ben e singi ibri dei gi mi te a ben e bori. Te now ete mi man memre wan spesrutu Kownukondre singi di naki mi ati trutru. Bakaten a singi disi yepi mi fu si o prenspari a diniwroko fu Yehovah de.” Kande yu e memre a moi singi disi tu fu san Gabriel e taki dyaso. Dati na nomru 157 na ini a singibuku Singi Prèisesingi gi Yehovah, èn a singi dati nen „Dini Yehovah na ini Yu Yongu Yari”.

A singi e bigin so: „Mofo fu pikin prèise Gado wan ten; Èn den ben bar kari Yesus en nen.” Fu tru, pikin ben de di ben abi a grani fu de makandra  nanga Yesus, èn a ben musu de so taki a switi fasi èn na opregti fasi fa den pikin disi ben e tyari densrefi, ben gi en prisiri. Yesus ben gi den bakaman fu en deki-ati srefi fu teki na eksempre fu yongu pikin di lobi fu kisi leri (Mateyus 18:3, 4). Fu dati ede, a e fiti taki pikin-nengre e teki prati na a anbegi fu Yehovah. Fu taki en leti, den wortu fu a singi e taki moro fara: „Ya, Sref den pkin kan gi grani na Yah.”

Furu pikin gi grani na Gado èn na a famiri fu den, fu di den e tyari densrefi bun te den de na oso, na skoro, èn na tra presi. A de wan blesi trutru gi den pikin fu abi „Kresten ppa nanga mma di lobi tru” (Deuteronomium 6:7). Papa nanga mama di e frede Gado, e du san Gado taki. Yehovah srefi na wan lobi-ati Papa di e leri den mekisani fu en fa fu waka na a yoisti pasi. Èn papa nanga mama e kisi trutru blesi fu dati! Te den e leri den yonguwan na ini na osofamiri fu den, dan a e gi den trutru prisiri fu abi pikin di e „arki a leri di krin”! (Yesaya 48:17, 18) Angélica di e dini now na a bijkantoro fu Yehovah Kotoigi na ini Meksikow, e taki: „Ala ten mi papa nanga mama ben e meki muiti fu libi akruderi Bijbel gronprakseri. Disi meki taki mi ben abi wan prisiri pikin-nengreten. Mi ben de koloku.”

Kresten di abi a srefi ondrofeni disi e agri taki a bun fu tan anbegi Gado soleki fa yu papa nanga mama ben leri yu. Kande yu na wan yonguwan di e gro kon bigi na ini wan osofamiri di e hori densrefi na tru Kresten gronprakseri. Efu dati de so, dan a srefi singi disi e gi yu a frumane: „Yongwan fu Krestes, hor yu pasi krin”. Wan ten sa kon te yu sa musu teki yu eigi bosroiti, èn fu dati ede, now yu musu „leri fu bow tap Yehovah lek pkin. No wroko fu kon so pôpi fu tru.”

Efu yu e meki a fowtu fu poti leki marki fu kon pôpi, dan a kan taki ala leri di yu kisi o de fu soso èn yu kan lasi den pramisi di yu abi gi a ten di e kon. Te yu angri fu kon pôpi, dan dati kan meki taki yu no sa de na ai moro. Son yonguwan kon abi demakandra nanga sma di e tyari densrefi neleki den na bun sma di abi bun maniri sosrefi, aladi den no wani sabi noti fu Kresten gronprakseri. Na disi ben pasa nanga Tara na ini a video Jonge mensen vragen—Hoe kom ik aan echte vrienden? Na ini a video dati, Tara ben plèi a moro prenspari rol. Neleki Tara, ibri yongu Kresten di abi demakandra nanga tra sma di no de na ini a tru anbegi, sa kon frustan te fu kaba, taki „takru kompe e por bun gwenti tu”, soleki fa a singi e taki. Wan sma musu du furu muiti furu yari langa fu kon kisi bun gwenti, ma den bun gwenti disi kan pori heri esi.

A no de fu taki, dati a no makriki fu libi na a  fasi fa Gado wani. Ma toku, soleki fa a singi e go moro fara: „Ef y’e prakser Gado te y’ yongu now”, èn efu yu e „Din En in yeye èn waarheid getrow”, dan dati sa de wan bun bigin di sa meki yu abi trutru bun bakapisi na ini yu libi. Èn „te yu kon owru prisiri sa tan”. Yu sa kon frustan moro bun taki te yu e ondrofeni fa Yehovah e sorgu yu na wan lobi-ati fasi, dan noti sa man tapu yu fu du san bun na ini en ai. Na so yu sa tron wan lepi sma di abi frede gi Gado. Boiti dati, te yu e du bun fu kisi wini fu a fasi fa yu kweki leki Kresten, dan dati e gi yu na okasi fu „prisiri Yehovah wawan”. Wan moro bigi grani no de di wan libisma kan abi, a no so?—Odo 27:11.

Fu dati ede, yonguwan, noiti no frigiti o prenspari a leri de di yu e kisi fu Yehovah èn fu yu Kresten papa nanga mama. Meki a de so taki a bigi lobi di yu papa nanga mama abi gi yu, e meki yu du san bun na ini Yehovah ai. Neleki Yesus Krestes nanga a getrow yonguwan Timoteyus, yu tu sa prisiri yu hemel Papa èn sosrefi yu trutru papa nanga mama. Èn efu oiti yusrefi tron wan papa, noso wan mama, dan kande yu sa agri nanga Angélica, di wi ben kari na a bigin. A e taki: „Efu oiti mi kisi wan pikin, dan fu sensi en pikin-nengreten mi o meki tranga muiti fu a kon lobi Yehovah, so taki a lobi dati sa de a moro prenspari sani di e tiri en na ini en libi.” Fu tru, a moro warti gudu di de, na fu waka tapu a reti pasi di e tyari wi go na têgo libi!

[Futuwortu]