Den begi fu yu kan yepi?

SUMA fu wi noiti no kisi fu du nanga wan seryusu problema pe wi no ben man du noti? Bijbel e sori taki na apostel Paulus ben sabi taki begi kan abi krakti tapu a fasi fa den sortu problema dati e lusu.

Di sma ben poti Paulus na strafu-oso na ini Rome aladi a no ben frudini dati, dan a aksi den brada nanga sisa fu en fu begi gi en. A ben taki sosrefi: „Mi e frumane unu spesrutu fu du disi, so taki mi kan kon baka na unu moro esi” (Hebrewsma 13:18, 19). Na wan tra okasi, Paulus sori taki a ben abi a frutrow taki Gado ben o arki èn ben o piki den begi fu sma di ben aksi taki Paulus komoto na strafu-oso moro esi (Fileimon 22). No so langa baka dati, Paulus ben lusu fu strafu-oso, èn a bigin du en zendelingwroko baka.

Ma a tru taki begi kan kenki den problema di yu abi? Kande. Ma hori na prakseri taki begi a no wan kerkigwenti nomo. Begi na a fasi fa wi e taki nanga wi lobi-ati èn makti Tata na hemel. Wi no musu frede fu taki fu spesrutu sani te wi e begi, ma baka dati wi musu wakti nanga pasensi fu luku fa Yehovah sa piki a begi fu wi.

A kan taki Gado no e piki ibri begi wantewante, èn kande a no e piki ala ten na a fasi, noso na a ten di wi e fruwakti. Paulus, fu eksempre, ben begi ibri tron baka efu Gado ben kan puru a „maka na ini a skin”. Gado no ben puru a problema fu Paulus, awansi sortu problema dati ben de, ma a ben trowstu Paulus nanga den wortu disi di ben gi en krakti: „A bun-ati fu mi nofo gi yu, bika a krakti fu mi e kon volmaakti na ini swakifasi.”—2 Korentesma 12:7-9.

Wi sosrefi kan abi a frutrow taki, awinsi Gado no puru wan spesrutu problema gi wi, toku a kan ’opo a pasi gi wi fu komoto, so taki wi man frudrage en’ (1 Korentesma 10:13). Heri esi, Gado sa puru ala pina fu a libisma famiri. Ma fosi a ten dati doro, a kan tyari furu wini kon gi wi efu wi e suku yepi na a „Yereman fu begi”.—Psalm 65:2.