Den tyalensi di wi e ondrofeni te wi e kweki pikin na ini a ten disi

LATILATI na neti, wan man di abi wan nyanyan-oso e seti sani fu tapu a wenkri fu en, so taki a kan go na oso. Ne tu uma nanga wan pikin boi e kon na inisei èn den e taigi a man disi taki den wani nyan wan sani. A man weri srefisrefi èn a wani taigi den taki a nyanyan-oso tapu kaba, ma toku a e bosroiti fu sreka a nyanyan gi den. Aladi den tu uma e taki tori èn e nyan, a boi e lonlon na ini a nyanyan-oso, èn a e trapu den pisipisi kuku di a e meki fadon na gron. Na presi a mama e bari a pikin fu en, a e lafu. Te den klanti gowe te fu kaba, dan a man di weri srefisrefi musu go krin a gron di kon doti.

Soleki fa yu sabi, dan den sortu sani disi di e pasa trutru, e sori taki a leri di pikin e kisi na ini furu osofamiri no e tyari bun bakapisi kon gi den. Difrenti reide de fu san ede dati de so. Son papa nanga mama e libi den pikin fu den du san den wani, fu di den e feni taki na so den pikin musu gro kon bigi. Wan tra sani, na taki fu di papa nanga mama abi so furu fu du, meki a kan de so taki den no e teki ten fu poti prakseri na den pikin fu den èn fu gi den a leri di den abi fanowdu. Son papa nanga mama e feni taki a skoroleri fu wan pikin na a moro prenspari sani, èn fu dati ede meki den e gi pasi taki a pikin e du pikinmoro ala san a wani, solanga leki a e wroko bun na skoro èn e kisi okasi fu studeri na wan barinen heiskoro.

Ma son sma feni taki den markitiki di papa nanga mama èn sosrefi a libimakandra e si leki den moro prenspariwan, musu kon kenki. Den sma disi e taki dati pikin e du ala sortu ogri èn taki dei fu dei moro nanga moro ogridu e pasa na skoro. Dati meki wan driktoro fu wan lagiskoro na ini a foto Seoul, na ini a Republiek Korea, e sori taki a moro prenspari sani di pikin musu leri, na fa den kan kisi bun fasi nanga bun maniri. A man disi ben taki: „Wan pikin musu abi bun fasi nanga bun maniri, fosi yu kan leri en tra sani.”

Furu papa nanga mama di wani taki den pikin fu den musu go na wan heiskoro èn taki den musu abi wan bun libi, no e gi yesi na den sortu warskow disi. Efu yu na wan papa noso wan mama, dan sortu sma yu wani yu pikin fu de? Yu wani en fu de wan bigisma di e tyari ensrefi bun èn di man tyari frantwortu? Yu wani en fu de wan sma di e hori trawan na prakseri, di e fiti ensrefi makriki na iniwan situwâsi, èn di lobi fu yepi tra sma? Efu dati de so, dan grantangi luku na artikel di e kon now.