Si a libi di yu kisi leki wan trutru warti sani
Si a libi di yu kisi leki wan trutru warti sani
„A brudu fu Krestes, . . . sa krin wi konsensi fu dede wroko, so taki wi kan du santa diniwroko gi a libilibi Gado.”—HEBREWSMA 9:14.
1. Sortu buweisi de taki a libi de wan tumusi warti sani gi wi?
SAN yu ben o piki efu wan sma aksi yu o warti yu libi de? Wi alamala e si a libi, dati wani taki a libi fu wi èn a libi fu trawan, leki wan tumusi warti sani. Dati meki, te wi e siki wi e go suku yepi na datra kande. Son leisi wi e go na datra, soso fu a ondrosuku nomo efu ala sani de bun nanga wi. Wi wani tan na libi èn wi wani tan gosontu. Srefi moro furu fu den owrusma noso malengrisma no wani dede; den wani tan na libi.
2, 3. (a) Sortu plekti wi abi, soleki fa Odo 23:22 e tyari kon na krin? (b) San Gado abi fu du nanga a plekti di skrifi na ini Odo 23:22?
2 A fasi fa yu e si a libi, abi furu krakti tapu a banti di yu abi nanga trawan. Fu eksempre, Gado Wortu e gi wi a komando: „Arki yu papa di meki taki yu gebore, èn no wisiwasi yu mama soso fu di a kon owru” (Odo 23:22). Fu „arki”, wani taki moro leki fu yere den wortu nomo di wan sma e taki; na odo disi wani taki dati yu musu yere èn du san yu yere (Exodus 15:26; Deuteronomium 7:12; 13:18; 15:5; Yosua 22:2; Psalm 81:13). Fu san ede Gado Wortu taki dati yu musu arki yu papa nanga yu mama? A no soso fu di den owru moro yu, noso fu di den abi moro ondrofeni leki yu. Bijbel e sori taki yu musu arki den fu di den „meki taki yu gebore”. Na ini son Bijbel, a tekst disi skrifi so: „Arki yu papa di gi yu libi.” A de krin taki efu yu e si yu libi leki wan warti sani, dan yu o frustan taki yu abi a plekti fu gi yesi na a sma di gi yu libi.
3 A no de fu taki dati efu yu na wan tru Kresten, dan yu o si Yehovah leki a moro prenspari Sma di gi yu libi. Na en meki taki yu „abi libi”; yu kan „buweigi” èn yu kan firi. En meki taki yu kon „de” èn taki yu kan prakseri fu sani di yu o du na ini a ten di e kon; yu kan prakseri fu têgo libi sosrefi (Tori fu den Apostel 17:28; Psalm 36:9; Preikiman 3:11). Soleki fa Odo 23:22 e taki, dan a yoisti fu „arki” Gado èn fu du san a e taki. Sobun, yu musu wani fu frustan fa a e si a libi èn yu musu sori taki na so yu e si a libi tu, na presi taki yu abi wan tra denki fu a libi.
Sori lespeki gi a libi
4. Fa Yehovah ben sori frukufruku na ini a libisma historia, taki a de wan prenspari sani fu abi lespeki gi a libi?
4 Frukufruku kaba na ini a libisma historia, Yehovah ben sori krin taki a no ben o gi pasi taki libisma gebroiki a libi fu den fa den wani, noso taki den gebroiki en na wan fasi di no fiti. Dyarusu nanga atibron ben meki taki Kain tyari wan kaba kon na a libi fu en brada Abel di no ben du en noti. Yu denki taki Kain ben abi a reti fu teki so wan bosroiti di abi fu du nanga a libi fu wan sma? Gado no ben denki so. A ben kari Kain fu gi frantwortu fu san a ben du: „San yu du? Arki! A brudu fu yu brada e bari kari mi komoto na a gron” (Genesis 4:10). Luku taki a brudu fu Abel na tapu a gron ben e agersi en libi, di Kain ben teki na wan ogri-ati fasi, èn a brudu ben e bari kari Gado fu strafu Kain.—Hebrewsma 12:24.
5. (a) Sortu komando Gado ben gi na ini a ten fu Noa, èn suma ben musu hori densrefi na a komando disi? (b) Fu san ede a komando disi ben de wan prenspari sani?
5 Baka a Frudu, wan nyun libisma famiri bigin nanga aiti sma nomo. Gado ben taki wan sani di ben abi fu du nanga ala libisma; a fruteri libisma moro fu a fasi fa a e si libi nanga brudu. A ben taki dati libisma ben kan nyan meti, ma den ben musu hori densrefi na a wet disi: „Ibri meti di e buweigi èn di de na libi kan de leki nyanyan gi unu. Mi e gi unu sosrefi ala den grun sani di e gro. Soso a skin nanga en sili, a brudu fu en, unu no musu nyan” (Genesis 9:3, 4). Son Dyu ben feni taki a tekst disi wani taki dati libisma no ben musu nyan a meti, noso a brudu fu wan meti di ben de na libi ete. Ma bakaten a ben kon na krin taki Gado ben taki dyaso dati libisma no ben musu nyan noso dringi brudu fu tan na libi. Boiti dati, a komando di Gado ben gi Noa, ben abi fu du nanga wan moro prenspari sani di Gado ben abi na prakseri èn di ben abi fu du nanga brudu. Gado ben abi na prakseri fu gi libisma na okasi fu libi fu têgo.
6. Fa Gado ben sori nanga yepi fu Noa, taki a e si a libi leki wan warti sani?
6 Gado ben taki moro fara: „A brudu fu un sili mi sa aksi baka. Mi sa aksi en baka fu na anu fu ibri libisani; èn fu na anu fu libisma, fu na anu fu ibriwan sma di de en brada, mi sa aksi baka a sili fu libisma. Iniwan sma di e trowe libisma brudu, sma sa trowe en brudu, bika Gado ben meki libisma akruderi a prenki fu en” (Genesis 9:5, 6). Den wortu disi di Gado taigi a heri libisma famiri, e meki wi frustan krin taki Gado e si a brudu fu libisma leki wan sani di e agersi a libi fu den. Na a Mekiman e gi wan sma libi, èn nowan tra sma musu teki a libi dati, noso a brudu di e agersi a libi. Efu wan sma e kiri wan trawan, neleki fa Kain ben du dati, dan a Mekiman abi a reti fu ’aksi a libi baka’ fu a kiriman.
7. Fu san ede wi musu poti prakseri na den sani di Gado ben taigi Noa fu brudu?
7 Nanga den wortu di Gado taki, a ben gi libisma a komando taki den no ben musu gebroiki brudu na wan fowtu fasi. Ma oiti yu aksi yusrefi fu san ede Gado ben gi a komando dati? Iya, fu san ede Gado e si brudu na so wan fasi? Fu taki en leti, a piki abi fu du nanga wan fu den moro prenspari leri fu Bijbel. A heri Kresten boskopu abi fu du nanga a leri dati, ma furu kerki no wani poti prakseri na dati. San na a leri dati, èn san a abi fu du nanga a libi fu yu, den bosroiti di yu e teki, èn den sani di yu e du?
A yoisti fasi fa sma ben kan gebroiki brudu
8. Sortu sani den Israelsma no ben mag du nanga brudu, soleki fa Yehovah ben taki na ini a Wet?
8 Yehovah ben fruteri moro fu libi èn fu brudu di a ben gi Israel a Wet fu Moses. Di a du dati, dan a ben seti moro sani fu meki den prakseri fu en kon tru. Soleki fa yu sabi kande, dan a Wet ben taki dati den Israelsma ben musu tyari ofrandi gi Gado, soleki tarwe, oli, nanga win (Lefitikus 2:1-4; 23:13; Numeri 15:1-5). Den ben abi fu tyari meti ofrandi tu. Gado ben taki fu den ofrandi disi: „A sili fu a skin de na ini a brudu, èn misrefi poti en na tapu na altari fu meki un sili kon bun baka, bika a de a brudu di e meki sani kon bun baka fu a sili ede di de na ini en. Dati meki mi taigi den manpikin fu Israel: ’Nowan sili fu unu musu nyan brudu.’” Yehovah ben taki tu dati efu wan sma, kande wan ontiman noso wan gronman, ben kiri wan meti fu nyan en, dan a ben musu trowe a brudu na tapu a gron èn a ben musu tapu en nanga doti. Bijbel e taki dati grontapu na a futubangi fu Gado; sobun, te wan sma ben e trowe a brudu na tapu a gron, dan a ben e sori taki a e gi a libi baka na a Sma di e gi libi.—Lefitikus 17:11-13; Yesaya 66:1.
9. San ben de a wan-enkri fasi fa libisma ben mag gebroiki brudu, soleki fa a Wet ben taki? Sortu marki disi ben abi?
9 Den sani di ben skrifi na ini a Wet dati, no ben de seremonia nomo di no wani taki noti gi wi. Yu si fu san ede den Israelsma no ben mag nyan brudu? Gado ben taki: „Dati meki mi taigi den manpikin fu Israel: ’Nowan sili fu unu musu nyan brudu.’” Fu san ede? „Misrefi poti [brudu] na tapu na altari fu meki un sili kon bun baka.” Yu e si moro krin now fu san ede Gado ben taigi Noa taki libisma no mag nyan brudu? A Mekiman bosroiti fu si brudu leki wan tumusi prenspari sani, èn a ben wani gebroiki dati leki wan spesrutu sani di ben kan kibri a libi fu furu sma. Brudu ben o de wan tumusi prenspari sani fu tapu den sondu fu libisma (fu meki den kon bun baka nanga Gado). Sobun, a Wet ben sori taki a wan-enkri fasi fa Gado ben taki dati libisma ben mag gebroiki brudu, ben de na tapu na altari. Na a fasi disi, den Israelsma di ben wani taki Yehovah gi den pardon, ben kan kon bun baka nanga en.
10. Fu san ede a brudu fu meti no ben man gi pardon fu sondu dorodoro? Den ofrandi di den Israelsma ben musu tyari soleki fa a Wet ben taki, ben e memre den na sortu sani?
10 Neleki den Israelsma, na so Kresten e si brudu leki wan sani di kan gi pardon fu sondu. Di a Kresten apostel Paulus ben e sori go na a seti disi di Gado ben poti na ini a Wet, dan a taki: „Pikinmoro ala sani e kon krin nanga brudu akruderi a Wet, èn efu brudu no trowe, dan nowan pardon no de” (Hebrewsma 9:22). Paulus ben sori krin taki den ofrandi di den Israelsma ben musu tyari, no ben e meki den tron libisma di no abi sondu. A ben skrifi: „Ibri yari den srakti-ofrandi disi e meki sma memre den sondu fu den, fu di a brudu fu mankaw nanga krabita no man puru sondu kwetikweti” (Hebrewsma 10:1-4). Ma a no fu soso den ben e tyari den srakti-ofrandi disi. Den ofrandi ben e memre den Israelsma taki den ben sondu èn taki den ben abi ete wan sani fanowdu fu man kisi pardon dorodoro. Ma efu a brudu di ben e agersi a libi fu den meti, no ben man puru sondu dorodoro, dan sortu brudu ben kan du dati?
A Sma di e gi libi, tyari wan lusu kon
11. Fa wi du sabi taki den ofrandi fu a brudu fu meti ben e sori go na wan tra sani?
11 A Wet ben e sori go na wan moro prenspari sani di ben o meki taki sani pasa soleki fa Gado wani. Paulus ben aksi: „Fu san ede a Wet de dan?” A ben piki: „A ben tyari sondu kon na krin, teleki a siri di kisi a pramisi ben o doro, èn a ben tyari kon nanga yepi fu engel na a anu fu wan mindriman [Moses]” (Galasiasma 3:19). Na so Paulus ben skrifi tu: „A Wet abi wan skaduw fu den bun sani di musu kon ete, ma a no de a trutru sani srefi.”—Hebrewsma 10:1.
12. Na sortu fasi a tori fu brudu e sori wi fa Gado e meki a prakseri fu en kon tru?
12 Sobun, san wi leri te now, na taki Gado ben gi libisma a komando na ini den dei fu Noa taki den ben kan nyan meti fu tan na libi, ma den no ben musu nyan, noso dringi a brudu fu a meti. Baka wan pisi ten, Gado ben taki dati „a sili fu a skin de na ini a brudu”. Iya, Gado ben bosroiti fu si brudu leki wan sani di e agersi a libi èn a taki: „Misrefi poti [brudu] na tapu na altari fu meki un sili kon bun baka.” Ma moro sani ben o kon ete di ben abi fu du nanga a tumusi moi fasi fa Gado e meki a prakseri fu en kon tru. A Wet ben de wan skaduw fu den bun sani di musu kon ete. San na den bun sani dati?
13. Fu san ede a dede fu Yesus de so prenspari?
13 A trutru sani di ben musu kon ete, abi fu du nanga a dede fu Yesus Krestes. Yu sabi taki sma ben du ogri-ati sani nanga Yesus èn taki den ben spikri en na wan postu. A ben dede leki wan ogriman. Paulus ben skrifi: „Di wi ben swaki ete, Krestes dede gi ogrisma na a reti ten. . . . Gado ben sori fa a lobi wi, fu di Krestes dede gi wi, aladi wi ben de sondari ete” (Romesma 5:6, 8). Di Krestes dede gi wi, dan a ben gi wan lusu-paiman di kan tapu den sondu fu wi. A lusu-paiman dati, na a moro prenspari boskopu di Kresten e prati gi trawan (Mateyus 20:28; Yohanes 3:16; 1 Korentesma 15:3; 1 Timoteyus 2:6). San a lusu-paiman abi fu du nanga brudu èn nanga libi, èn san yu libi abi fu du nanga disi?
14, 15. (a) Fa son bijbelvertaling e poti krakti tapu a dede fu Yesus na ini Efeisesma 1:7? (b) Sortu sani fu Efeisesma 1:7, wan sma kan frigiti?
14 Son kerki e poti krakti tapu a dede fu Yesus, èn furu tron kerkisma e taki sani soleki „Yesus dede gi mi”. Luku fa Efeisesma 1:7 skrifi na ini son bijbelvertaling: „A de nanga yepi fu en èn nanga yepi fu a dede fu en taki wi kisi frulusu, dati wani taki dati den fowtu fu wi poti go na wan sei” (The American Bible, fu Frank Scheil Ballentine, 1902). „Nanga yepi fu a dede fu Krestes wi kon fri, èn wi kisi pardon fu den sondu fu wi” (Today’s English Version, 1966). „A de nanga yepi fu Krestes èn a srakti-ofrandi fu en libi taki wi kon fri, wan fri di wani taki dati wi kisi pardon fu sondu” (The New Testament, fu William Barclay, 1969). „A de nanga yepi fu a dede fu Krestes taki wi kisi pardon fu wi sondu èn taki wi kon fri” (The Translator’s New Testament, 1973). Yu kan si taki den bijbelvertaling disi e poti krakti tapu a dede fu Yesus. Kande son sma e taki: ’Ma a dede fu Yesus de prenspari trutru. Sobun, san e misi na ini den bijbelvertaling disi?’
15 Iya, efu yu ben abi den bijbelvertaling disi nomo, dan kande yu no ben o sabi wan tumusi prenspari sani, èn disi kan meki taki yu no o frustan a boskopu fu Bijbel bun. Den bijbelvertaling disi no e sori taki a fosi tekst fu Efeisesma 1:7, abi wan Griki wortu na ini, di wani taki „brudu”. Sobun, na ini furu tra bijbelvertaling, soleki a Nieuwe-Wereldvertaling, a tekst disi skrifi moro fini: „Nanga yepi fu en wi abi a frulusu nanga a lusu-paiman di wi kisi nanga a brudu fu a sma dati, iya, a pardon di wi kisi fu den sondu fu wi, akruderi a gudu fu a no-frudini bun-ati fu en.”
16. Na sortu sani den wortu „a brudu fu a sma dati” musu meki wi denki?
16 Den wortu „a brudu fu a sma dati” prenspari trutru èn den musu meki wi prakseri furu afersi di abi fu du nanga brudu. Moro ben de fanowdu leki a dede fu wan sma; srefi a dede fu a volmaakti man Yesus no ben sari. Yesus ben meki den sani kon tru di a Wet ben taki na fesi, spesrutu den sani di ben abi fu du nanga a Verzoendei. Na a spesrutu dei dati, den ben e tyari spesrutu meti leki srakti-ofrandi soleki fa a Wet ben taki. Dan a granpriester ben e teki pikinso fu a brudu fu den meti èn a ben tyari en go na ini a Moro Santa presi fu a tabernakel noso a tempel. Drape a ben pristeri a brudu na Gado, neleki a ben de leti na fesi Gado.—Exodus 25:22; Lefitikus 16:2-19.
17. Fa Yesus meki den sani kon tru di ben pasa na a Verzoendei?
17 Soleki fa Paulus ben taki, dan Yesus meki den sani kon tru di ben pasa tapu a Verzoendei. A fosi sani di Paulus sori, na taki a granpriester fu Israel ben go na ini a Moro Santapresi wán leisi wan yari fu tyari brudu leki ofrandi „gi ensrefi èn gi den sondu di a pipel ben du sondro fu den sabi” (Hebrewsma 9:6, 7). Neleki fa a ben e pasa na a Verzoendei, na so Yesus ben go na ini hemel srefi, baka di a ben kisi wan opobaka leki wan yeye. Leki wan yeye di no abi wan skin fu meti nanga brudu, a ben man go na fesi „Gado srefi, fu a bun fu wi”. San a ben gi Gado? A no gi wan sani di wi man si noso fasi, ma a ben de wan sani di ben prenspari trutru. Paulus ben taki moro fara: „Di Krestes ben kon leki granpriester . . . , dan a ben go na ini a santapresi, no nanga a brudu fu bokoboko èn fu yongu mankaw, nôno, ma nanga en eigi brudu, èn a ben kisi wan têgo frulusu gi wi, wan tron fu ala ten. Bika efu a brudu fu bokoboko èn fu mankaw . . . e meki sani kon santa na so wan fasi taki a e krin a skin, dan o moro betre a brudu fu Krestes, di ben òfer ensrefi sondro fowtu na Gado nanga yepi fu wan têgo yeye, sa krin wi konsensi fu dede wroko so taki wi kan du santa diniwroko gi a libilibi Gado?” Iya, Yesus ben gi Gado a waarde fu en brudu.—Hebrewsma 9:11-14, 24, 28; 10:11-14; 1 Petrus 3:18.
18. Fu san ede a de prenspari gi Kresten na ini a ten disi fu sabi san Bijbel e taki fu brudu?
18 A prenspari tru tori disi di Gado meki wi kon sabi, e meki wi frustan ala den tumusi moi sani di Bijbel e taki fu brudu. A e meki wi frustan fa Gado e si brudu èn fu san ede a e si en na a fasi dati. A e meki wi frustan tu fa wi musu si brudu, èn fu san ede wi musu lespeki den wet di Gado poti fu a fasi fa libisma kan gebroiki brudu. Te yu o leisi den Kresten Griki Buku fu Bijbel, dan yu o si furu tron taki den e taki fu a brudu fu a Krestes (Luku a faki). Den buku disi e sori krin taki ibri Kresten musu poti bribi „na ini en [Yesus] brudu” (Romesma 3:25). Wi man kisi pardon fu wi sondu èn wi kan libi na ini vrede nanga Gado, soso „nanga yepi fu a brudu di a [Yesus] ben trowe” (Kolosesma 1:20). Disi de so, spesrutu gi den sma di Yesus ben meki wan spesrutu frubontu nanga den, taki den ben o tiri makandra nanga en na ini hemel (Lukas 22:20, 28-30; 1 Korentesma 11:25; Hebrewsma 13:20). Na so a de tu gi a „bigi ipi” na ini a ten disi, di sa pasa a „bigi banawtu” di de fu kon èn di sa libi fu têgo na ini wan paradijs grontapu. Na wan agersi fasi, den e ’wasi den langa krosi na ini a brudu fu a Pikin Skapu’.—Openbaring 7:9, 14.
19, 20. (a) Fu san ede Gado bosroiti fu gi sma wet di abi fu du nanga a fasi fa den e gebroiki brudu, èn fa wi musu si a tori dati? (b) Sortu sani wi musu wani fu kon sabi seiker?
19 A de krin fu si taki brudu na wan spesrutu sani gi Gado. Na so a musu de gi wi tu. A Mekiman di e broko en ede nanga ala sani di de na libi, abi a reti fu gi libisma wet di abi fu du nanga a fasi fa den musu gebroiki brudu. Fu di a e broko en ede nanga wi libi sosrefi, meki a bosroiti fu gebroiki brudu soso na wán tumusi prenspari fasi, a wan-enkri fasi fa wi kan kisi têgo libi. A fasi dati abi fu du nanga a brudu fu Yesus di warti srefisrefi. Wi kan de nanga bigi tangi taki Yehovah Gado gebroiki brudu, iya, a brudu fu Yesus, na wan fasi di e tyari wini kon gi wi, so taki wi kan tan na libi! Wi musu de nanga bigi tangi sosrefi taki Yesus gi en brudu leki srakti-ofrandi gi wi! Fu tru, wi kan frustan fa na apostel Yohanes ben e firi di a ben taki: „Na en di lobi wi èn di ben frulusu wi fu den sondu fu wi nanga yepi fu en eigi brudu; èn a ben meki wi tron wan kownukondre, priester gi en Gado nanga Tata; iya, na en musu abi a glori nanga a makti fu têgo. Amen.”—Openbaring 1:5, 6.
20 Langa ten na fesi kaba, wi Gado di abi ala koni èn di gi wi libi, ben abi na prakseri fu frulusu wi na a fasi disi. Fu dati ede wi ben sa kan aksi wisrefi: ’Sortu krakti disi musu abi tapu den bosroiti di wi e teki èn tapu den sani di wi e du? Na artikel di e kon now sa taki fu a tori disi.
San yu ben sa piki?
• Te wi e luku den tori di abi fu du nanga Abel èn nanga Noa, dan san wi kan leri fu a fasi fa Gado e si brudu?
• San libisma no ben mag du nanga brudu, soleki fa Gado ben taki na ini a Wet? Fu san ede den no ben mag du dati?
• Fa Yesus meki den sani kon tru di ben pasa tapu a Verzoendei?
• Fa a brudu fu Yesus kan kibri wi libi?
[Aksi fu a tori disi]
[Faki na tapu bladzijde 18]
A BRUDU FU SUMA E KIBRI SMA LIBI?
„Poti prakseri na unsrefi èn na a heri ipi, di santa yeye ben poti unu fu wroko leki opziener na den mindri, fu luku a gemeente fu Gado, di a ben bai nanga a brudu fu en eigi Manpikin.”—Tori fu den Apostel 20:28.
„O moro a de so dan, taki nanga yepi fu en wi kisi frulusu fu na atibron, fu di Gado ben fruklari taki wi de regtfardiki nanga yepi fu Krestes brudu.”—Romesma 5:9.
„Unu no ben abi howpu èn unu ben de sondro Gado na grontapu. Ma a brudu fu Krestes meki unu di ben de farawe fosi, kon de krosibei, èn unu de wán nanga Krestes now.”—Efeisesma 2:12, 13.
„Gado ben feni en bun fu meki ala sani di de, tan dorodoro na ini en, èn nanga yepi fu en, verzoen ensrefi baka nanga ala tra sani, fu di a ben suku vrede nanga yepi fu a brudu di a ben trowe na a pina-udu.”—Kolosesma 1:19, 20.
„Fu dati ede, brada, a brudu fu Yesus gi wi a dyaranti taki wi kan waka na tapu a pasi di e go na ini a santa presi.”—Hebrewsma 10:19.
„A no ben de nanga sani di e pori gowe, . . . taki unu ben kon fri fu a soso fasi fa unu ben tyari unsrefi, èn di unu ben kisi fu un fositen tata. Ma a ben de nanga diri brudu, leki a di fu wan pikin skapu di no doti èn di no flaka, iya, a brudu fu Krestes srefi.”—1 Petrus 1:18, 19.
„Efu wi e waka na ini leti neleki fa ensrefi de na ini leti, dan wi abi den srefi sani makandra. Na so a brudu fu Yesus, en Manpikin, e krin wi fu ala sondu.”—1 Yohanes 1:7.
„Yu warti fu teki a bukulolo èn fu opo den lakstampu fu en, bika na yu den ben kiri èn nanga a brudu fu yu, yu ben bai gi Gado sma fu ibri lo nanga tongo nanga pipel nanga nâsi.”—Openbaring 5:9.
„Den fringi a sma di e kragi den brada fu wi, go na ondro . . . Èn den ben wini en fu a brudu fu a Pikin Skapu ede èn fu a wortu ede fu a kotoigi di den ben gi.”—Openbaring 12:10, 11.
[Prenki na tapu bladzijde 16]
Nanga yepi fu a Wet, Gado ben sori krin taki nanga yepi fu brudu sma ben kan kisi pardon fu sondu
[Prenki na tapu bladzijde 17]
Nanga yepi fu a brudu fu Yesus, furu sma ben kan kisi libi