Suma ben de den Anabaptistsma?

NOFO TRON te sma e go fu a fosi leisi na a mindrisei pisi fu a foto Münster na ini Westfalen, na Doisrikondre, dan den e teki den ten fu luku dri isri koi di e anga na a toren fu wan kerki. Wan tu leisi sma ben puru den koi disi fu wan syatu pisi ten, ma ala nanga ala, den e anga drape pikinmoro 500 yari kaba. Biginbigin den dedeskin fu den dri man ben de na ini den koi disi. Sma ben du ogri-ati sani nanga den man disi èn den ben kiri den na fesi ala sma. Den man disi ben de Anabaptistsma, èn den koi na fu memre sma na a kownukondre fu den.

Suma ben de den Anabaptistsma? Fa a kerkigrupu disi bigin? San ben de den moro prenspari leri fu den? Fu san ede sma ben kiri den dri man disi? Èn san den dri koi abi fu du nanga wan kownukondre?

Kerki musu kenki—Ma fa?

Na a kaba fu a di fu 15 yarihondro èn na a bigin fu a di fu 16 yarihondro, moro nanga moro sma bigin krutu a Lomsu Katolik Kerki nanga den kerki fesiman. Kruktudu nanga hurudu ben lai na ini a kerki; dati meki furu sma ben feni taki bigi kenki ben musu kon. Na ini a yari 1517, Maarten Luther bigin taki na publiki taki wan kenki musu kon, èn di tra sma bigin si sani na a srefi fasi dati tu, dan a Reformatie (a pisi ten fu bigi kenki) fu den protestantsma bigin.

Ma den sma di ben wani tyari kenki kon na kerki, no ben man agri nanga makandra san den ben musu du, èn san den ben o kenki. Furu fu den ben kon si taki a prenspari fu poti prakseri na a fasi fa Bijbel taki dati sma musu anbegi Gado. Ma toku, den no ben man agri nanga makandra fu den moro prenspari leri fu Bijbel srefi. Sonwan fu den ben feni taki den kenki ben musu kon moro esi. We, na mindri den sma disi di ben wani kenki sani esi-esi, na Anabaptistgrupu bigin.

„Te yu luku en bun, a no wán baptistgrupu nomo ben de; yu ben abi wan lo fu den”, na so Hans-Jürgen Goertz ben skrifi na ini en buku Die Täufer—Geschichte und Deutung (Den Baptistsma—A historia fu den èn suma den ben de). Fu eksempre, fo man, di sma ben e kari den Zwickau profeiti, ben meki wan lo dyugudyugu kon na ini a yari 1521, fu di den ben e preiki den leri fu den Anabaptistsma na ini a foto Wittenberg. Na ini a yari 1525, wan tra sortu Anabaptistgrupu ben seti na ini a foto Zurich, na Switserland. Tra Anabaptistgrupu ben seti tu na ini a kondre Moravia, di de a Tyekia Republiek now, èn na Bakrakondre.

Dopu na wan sani gi pikin, noso gi bigisma?

Nofo tron den Anabaptistgrupu ben pikin, èn moro furu fu den ben de sma di no ben e muilek trawan. Den sma disi ben e sori krin san den ben e bribi; fu taki en leti, den ben e preiki gi tra sma srefi. Den moro prenspari leri fu den Anabaptistsma ben skrifi na ini a Schleitheim Confessie fu 1527. Wan tu fu den leri ben de taki den ben e weigri fu du srudatiwroko, den no ben e bumui nanga grontapu afersi, èn den ben e puru wan sma na den mindri te a sma ben du ogri. Ma a leri di meki taki den Anabaptistsma ben de so aparti fu den tra kerki, na a overtoigi di den ben abi taki dopu na wan sani gi bigisma èn no gi pikin-nengre. *

Fu dopu bigisma no ben abi fu du nanga bribi nomo; a ben abi fu du nanga makti sosrefi. Efu kerki ben o wakti fu dopu sma teleki den ben tron bigisma fosi, dan na a bribi fu a sma ben o meki taki a bosroiti fu teki dopu. Èn efu dati ben pasa, dan son sma kande no ben o bosroiti fu dopu srefisrefi, èn kerki no ben o man abi ala makti tapu den. Sobun, son kerki ben o lasi makti efu den ben gi pasi taki sma ben o dopu te den de bigisma.

Fu dati ede, den Lomsusma, nanga den  Luthersma no ben wani taki sma dopu te den de bigisma kaba. Baka a yari 1529, a ben de a gwenti na son presi taki wan sma ben e kisi dedestrafu efu a ben e dopu bigisma, noso efu a ben dopu di a ben de wan bigisma kaba. A nyunsuman Thomas Seifert e fruteri taki den Anabaptistsma ben e „kisi frufolgu na wan ogri-ati fasi, na ini a heri Santa Lomsu Gran Kownukondre fu a Doisri Nâsi”. A moro hebi frufolgu di den ben kisi, ben de na ini a foto Münster.

Sma na ini na owruten foto Münster wani tyari kenki kon

A foto Münster fu owruten ben abi sowan 10.000 sma na ini, èn a ben lontu nanga wan skotu fu sowan 5 kilometer langa èn sowan 90 meter bradi, sobun feanti no ben man kon na ini a foto disi so makriki. Ma sani no ben e go so bun na ini a foto disi. A buku The Kingdom of the Anabaptists (A kownukondre fu den Anabaptistsma) di a City Museum fu Münster tyari kon na doro, e taki dati ’den fesiman fu a foto nanga den bisnisman ben e meki trobi’. Boiti dati, den sma na ini a foto ben e atibron nanga a fasi fa den kerki fesiman ben e tyari densrefi. Den sma fu a foto Münster ben teki a Reformatie bribi, èn na ini a yari 1533 a Lomsu foto disi, ben tron wan foto di ben e horibaka gi a Luther bribi.

Wan fu den prenspari preikiman di ben wani kenki sani na ini Münster, ben de Bernhard Rothmann, wan man di ben lobi fu du sani esi-esi. A skrifiman Friedrich Oehninger e fruteri taki „a ben de krin fu si taki den denki fu [Rothmann] ben de leki a di fu den Anabaptistsma; en nanga tra sma di ben e wroko makandra nanga en, ben e weigri fu dopu pikin-nengre”. Furu sma na ini Münster bigin horibaka gi en, aladi son sma ben feni taki a ben e kon nanga wan lo freimde leri di ben de heri tra fasi leki san den ben sabi. „Moro nanga moro sma di ben lobi a fasi fa kerki ben de fosi, ben gowe libi a foto nanga tu ati èn den ben abi a firi leki wan ogri ben o pasa. Fu ala sei Anabaptistsma ben e kon na Münster, fu di den ben e howpu taki sani ben o kenki soleki fa den ben e bribi.” Fu di so furu Anabaptistsma ben kon na Münster, meki wan tumusi ogri sani pasa te fu kaba.

Srudati e lontu a Nyun Yerusalem

Tu sma fu Bakrakondre di ben kenki sani na ini Münster, ben de Jan Mathys, wan bakriman fu a foto Haarlem, nanga Jan Beuckelson, di sma ben sabi leki Jan van Leiden. Mathys ben taki dati a ben de wan profeiti èn a ben meki bekènti taki Krestes ben o kon fu a di fu tu leisi na ini april fu a yari 1534. A ben taki tu dati Münster ben o de a Nyun Yerusalem fu san Bijbel e taki, èn furu sma bigin denki taki a kaba fu grontapu ben de krosibei. Rothmann ben taki dati wan sma no ben kan abi gron fu ensrefi; ala gron ben de fu ala sma. Den bigisma di ben e tan na ini a foto, ben musu teki wan bosroiti, namku fu gowe libi a foto, noso fu tan na ini. Ipi-ipi sma ben e dopu, sosrefi den wan di ben dopu soso fu di den no ben wani gowe libi na oso fu den nanga den tra sani di den ben abi.

Tra foto no ben man bribi san den ben e si: Münster ben tron wan foto pe den Anabaptistsma ben de a moro tranga kerkigrupu èn politiekgrupu. Soleki fa a buku Die Täufer zu Münster (Den Baptistsma na Münster) e taki, dan disi ben meki taki „a heri Santa Lomsu Gran Kownukondre fu a Doisri Nâsi ben e atibron tapu den sma na ini Münster”. Prins-Beskopu Graaf Franz von Waldeck, di ben de wan sortu granman di furu sma ben sabi, ben tyari wan legre kon na wán fu teki Münster abra. Na ini a legre dati yu ben abi Lomsusma nanga Luthersma. Fosi, den Lomsusma nanga den Luthersma ben e feti teige makandra fu di den Luthersma ben wani kenki a fasi fa kerki ben de na a ten dati. Ma now, den tu grupu disi, span anu makandra fu go feti teige den Anabaptistsma, aladi no langa baka dati, den ben o bigin feti baka nanga makandra na ini a Dritenti Yari Feti fu den.

 A kownukondre fu den Anabaptistsma e kisi pori

Den sma na ini a foto Münster, di ben lontu nanga skotu, no ben e frede a legre di ben kon feti nanga den. Na ini april fu a yari 1534, di Krestes ben o kon fu a di fu tu leisi soleki fa Mathys ben taki, dan Mathys rèi go na dorosei fu a foto na tapu wan weti asi, fu di a ben denki taki Gado ben o kibri en. Yu kan frustan fa den bakaman fu en ben skreki èn frede di den ben luku abra den skotu fu a foto èn ben si fa den srudati ben koti Mathys na pisipisi èn ben poti en ede na tapu wan srapu postu.

Jan van Leiden ben tron kownu baka Mathys, èn a ben kisi a nen Kownu Jan fu den Anabaptistsma na ini Münster. Na a ten dati, a foto ben abi moro umasma leki mansma, èn Kownu Jan ben pruberi fu kenki disi fu di a ben gi den mansma deki-ati fu teki someni wefi leki den ben wani. A heri sistema fu a kownukondre fu den Anabaptistsma na ini Münster ben kon bruya; fu eksempre, wan sma ben e kisi dedestrafu te a ben du sutadu noso hurudu, aladi den ben e gi pasi taki wan man ben kan abi moro leki wán wefi; den ben e si dati leki wan plekti srefi. Kownu Jan srefi ben teki 16 wefi. Di wan fu den wefi, Elisabeth Wandscherer, ben aksi primisi fu gowe libi a foto, dan Kownu Jan ben koti en ede puru na fesi ala sma.

Tinafo mun langa a legre ben lontu a foto, teleki den teki en abra na ini yuni fu a yari 1535. Den legre ben pori Münster krinkrin; noiti moro a foto ben kisi so wan pori, boiti na ini a di fu Tu Grontapufeti. Rothmann ben lowe, ma den ben kisi Kownu Jan nanga tu tra prenspari Anabaptistsma. Baka di den srudati du ala sortu ogri-ati sani nanga den, dan den kiri den, èn den poti den dedeskin na ini koi, di den ben anga na a toren fu a St. Lambert Kerki. Den du disi „fu tapu skreki èn fu warskow ala sma di ben wani opo densrefi teige den”, na so Seifert e fruteri. Iya, tumusi takru bakapisi ben kon fu di den ben go bumui nanga politiek.

San ben pasa nanga den tra Anabaptistgrupu? Wan tu yari langa sma frufolgu den na ini heri Europa. Furu fu den Anabaptistsma ben tan weigri fu wroko leki srudati, ma wan tu fu den ben e go na feti. Baka wan pisi ten, Menno Simons, di ben de wan priester fosi, ben tron fesiman fu den Anabaptistsma, èn te fu kaba sma ben kon sabi a grupu disi leki den Mennosma, noso den ben gi den tra nen tu.

Den dri koi

Moro furu fu den Anabaptistsma ben de kerkisma di ben e pruberi fu hori densrefi na Bijbel markitiki. Ma den sma di ben tyari bigi kenki kon na ini Münster, ben meki den Anabaptistsma drai baka gi den leri di den ben abi fosi èn den bigin bumui nanga politiek. Di dati pasa, dan den tron wan grupu fu sma di ben opo densrefi teige tirimakti. Disi ben tyari bigi rampu kon gi den Anabaptistsma nanga na owruten foto Münster.

Den sma di e go na a foto disi now, sa si sani di e memre den na a tumusi ogri sani di ben pasa drape sowan 500 yari pasa. San na den sani dati? Den dri isri koi di e anga na a toren fu a kerki.

[Futuwortu]

[Prenki na tapu bladzijde 13]

Srudati ben du ogri-ati sani nanga Kownu Jan, den kiri en, èn den anga en na a toren fu a St. Lambert Kerki