Gado e broko en ede nanga yu trutru

WI LEKI libisma abi a gwenti fu kari Gado te wi de na ini muilek situwâsi. Disi de so fu di a „bigi èn a abi krakti pasa marki; a frustan fu en no skotu” (Psalm 147:5). En na a moro bun sma di kan yepi wi fu lusu den problema fu wi. Boiti dati, Bijbel e gi wi a kari fu taki na fesi en ’san de tapu wi ati’ (Psalm 62:8). Ma dan fu san ede so furu sma e denki taki Gado no e piki den begi fu den? A sani dati wani taki dati Gado no e broko en ede nanga wi?

Na presi taki wi e krutu Gado wantewante taki a no e du noti fu tyari wan kenki kon na ini a situwâsi fu wi, memre a ten di yu ben de wan pikin-nengre ete. Te yu papa nanga mama no ben e du ala san yu ben wani, dan kande yu ben feni taki den no lobi yu, a no so? Furu pikin e denki so. Ma di yu gro kon bigi, dan yu kon frustan taki sma e sori lobi na difrenti fasi, èn taki a no de wan lobi-ati sani fu gi wan pikin ala san a wani.

Na so wi musu si en tu taki efu Yehovah no e piki den begi fu wi ala ten na a fasi fa wi wani, dan dati no wani taki dati a no lobi wi. Fu taki en leti, Gado e sori na furu difrenti fasi taki a e broko en ede nanga wi alamala.

’Na en meki taki wi de na libi’

Na a fosi presi, Gado meki taki ’wi de na libi, taki wi e buweigi, èn taki wi de’ (Tori fu den Apostel 17:28). A de krin fu si taki a e broko en ede na wan lobi-ati fasi nanga wi, fu di a gi wi libi!

Boiti dati, Yehovah e gi wi ala san wi abi fanowdu fu man tan na libi. Wi e leisi: „A e meki grun grasi gro gi den meti, èn prani fu a bun fu a libisma famiri, so taki grontapu kan gi nyanyan” (Psalm 104:14). Te yu luku en bun, dan wi Mekiman e du moro leki fu gi wi den moro prenspari sani di wi abi fanowdu na ini wi libi. A e gi wi furu ’alen komoto fu hemel èn bun ten sosrefi, so taki wi ati firi bun fu di wi abi bogobogo nyanyan nanga prisiri’.—Tori fu den Apostel 14:17.

Toku, son sma kan aksi densrefi: ’Efu Gado lobi wi so te, dan fu san ede a e gi pasi taki wi e pina?’ Yu sabi a piki tapu na aksi dati?

Na Gado e meki taki wi e pina?

Furu tron na libisma srefi e meki taki pina e miti den. Fu eksempre, wi alamala sabi taki son sani di sma e du kan meki taki den e kisi takru bakapisi. Toku, sma e du seks hurudu, den e dringi tumusi furu sopi èn den e gebroiki drugs pasa marki, den e gebroiki tabaka, den e du son sport di kan meki taki den lasi den libi, den e rèi tumusi tranga, èn so moro fara. Efu den e pina leki bakapisi fu den sortu sani disi di den e du, dan suma abi a fowtu? Na Gado, noso na den sma srefi di e du den sortu dondon sani disi? A Wortu fu Gado di skrifi nanga yepi fu en santa yeye, e taki: „No kori unsrefi: Gado no e meki sma spotu nanga en. Bika san wan sma e sai, na dati a sa koti tu.”—Galasiasma 6:7.

Boiti taki libisma srefi e meki taki pina e miti den, furu tron den e pina makandra tu. Te wan kondre o feti nanga wan trawan, dan a no de fu taki dati a no Gado e meki sma ondrofeni a pina di den e ondrofeni leki bakapisi fu a feti dati. Te wan ogriman gi wan sma mankeri, noso te a kiri wan sma, dan a de so taki na Gado meki disi pasa? Kwetikweti! Te wan ogri-ati tiriman e kwinsi, e pina, noso e kiri den sma di de na en ondro, dan na Gado meki disi pasa? A no ben o bun fu denki dati.—Preikiman 8:9.

Ma fa a de nanga den milyunmilyun sma di pôti srefisrefi, noso den wan di e dede fu angri? Na Gado e du disi? Nôno. A grontapu pe wi e libi, abi nofo nyanyan gi ibriwan sma (Psalm 10:2, 3; 145:16). Ma a bogobogo nyanyan di  Gado e gi wi, no e prati nanga leti, èn fu dati ede so furu angri nanga pôtifasi de. Èn na a gridifasi fu libisma e meki taki a problema disi no man lusu.

A moro prenspari reide fu san ede libisma e pina

Ma suma e meki taki sma e kon siki, noso e dede fu di den kon owru? A ben o fruwondru yu fu kon sabi taki a no Gado e meki taki den sani dati e pasa tu? Gado no ben meki libisma fu kon owru èn fu dede.

Di Yehovah poti a fosi libisma paar, Adam nanga Eva na ini a dyari fu Eden, dan a gi den a howpu fu libi fu têgo na ini wan paradijs na grontapu. Ma a ben sori krin taki a ben wani a heri grontapu fu kon lai nanga sma di ben o warderi den sani di den ben kisi. Fu dati ede, den ben sa musu sori taki den ben warti fu kisi têgo libi. Adam nanga Eva ben o tan na ini Paradijs, solanga den ben e tan gi yesi na a lobi-ati Mekiman fu den.—Genesis 2:17; 3:2, 3, 17-23.

A sari fu taki dati Adam nanga Eva opo densrefi teige Gado. Eva bosroiti fu arki Satan Didibri. Satan lei gi en, èn te yu luku en bun, dan Satan taki dati Gado ben e hori wan bun sani na baka gi en. Sobun, Eva bigin teki en eigi bosroiti, èn a pruberi fu „de leki Gado, fu sabi bun nanga ogri”. Adam teki a sei fu Eva, èn a opo ensrefi teige Gado tu.—Genesis 3:5, 6.

Di Adam nanga Eva sondu na a fasi disi, dan den sori taki den no ben warti fu libi fu têgo. Den ondrofeni den takru bakapisi fu sondu. Safrisafri den kon swaki èn te fu kaba den dede (Genesis 5:5). Ma a opo di den ben opo densrefi, ben abi moro takru bakapisi. Te now ete wi e ondrofeni den takru bakapisi fu a sondu fu Adam nanga Eva. Na apostel Paulus ben skrifi: „Wán man [Adam] tyari sondu kon na ini grontapu èn nanga sondu dede kon, èn na so dede panya go na ala libisma, fu di den alamala ben sondu” (Romesma 5:12). Iya, fu di Adam nanga Eva ben opo densrefi teige Gado, meki sondu nanga dede panya leki wan takru siki go na a heri libisma famiri.

A moro krin buweisi taki Gado e broko en ede nanga wi

Ma dati wani taki dati noiti moro sani ben o waka bun gi den libisma di Gado meki? Nôno, Gado du wan sani, èn a sani disi  na a moro krin buweisi taki a e broko en ede nanga wi. Aladi a no ben makriki gi Gado, toku a seti sani fu frulusu libisma fu sondu nanga dede. A frulusu paiman ben de a volmaakti libi fu Yesus, wan sani di a ben gi nanga en heri ati fu a bun fu wi (Romesma 3:24). Fu dati ede, na apostel Yohanes ben skrifi: „Gado ben lobi grontapu so te, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Fu di Gado sori lobi na so wan tumusi moi fasi, meki wi abi a howpu baka fu man libi fu têgo. Paulus ben skrifi den Romesma taki: „Wán regtfardiki sani di du sa meki taki Gado e fruklari ala sortu sma regtfardiki, so taki den kan kisi libi.”—Romesma 5:18.

Wi kan de seiker taki na a ten di Gado feni bun, nowan pina noso dede sa de na grontapu moro. Na presi fu dati, a situwâsi sa de soleki fa a ben skrifi na fesi na ini a buku Openbaring: „Luku! A tenti fu Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba” (Openbaring 21:3, 4). Kande yu e taki: ’Na a ten dati mi dede kaba.’ Ma fu taki en leti, a kan taki yu de na libi na a ten dati. Èn awinsi yu dede now, toku Gado kan gi yu wan opobaka (Yohanes 5:28, 29). Dati na san Gado abi na prakseri gi wi, èn na so a o pasa tu. Iya, a no tru kwetikweti taki Gado no e broko en ede nanga libisma!

„Kon krosibei na Gado”

A de wan trowstu fu sabi taki Gado seti sani fu tyari wan kaba kon fu ala ten na a pina di libisma e pina. Ma fa a de now? San wi kan du te wi lasi wan lobiwan na ini dede, noso te wi pikin e kon siki? We, a ten no doro ete gi Gado fu puru siki nanga dede. Bijbel e sori taki wi sa abi fu wakti pikinso moro langa bifo a problema dati lusu. Ma Gado no libi wi sondro yepi. A disipel Yakobus ben taki: „Kon krosibei na Gado, èn a sa kon krosibei na unu” (Yakobus 4:8). Iya, wi Mekiman e gi wi a kari fu abi wan krosibei banti nanga en. Den wan di abi so wan krosibei banti nanga en, e si ala ten taki Gado e yepi den, srefi na ini den moro muilek situwâsi.

Fa wi kan kon krosibei na Gado? Kownu David ben aksi a srefi sortu sani sowan dri dusun yari pasa, di a ben taki: „O Yehovah, . . . suma sa tan na tapu yu santa bergi?” (Psalm 15:1) David ben piki en eigi aksi di a taki moro fara: „A sma di e waka sondro fowtu èn e du retidu èn di e taki waarheid na ini en ati. Nanga en tongo a no fruteri lei fu pori sma nen. A kompe fu en a no du nowan ogri” (Psalm 15:2, 3). Sobun, Yehovah e gi wan switikon na den wan di bosroiti fu libi na a fasi fa Adam nanga Eva ben weigri fu libi. Yehovah e kon krosibei na den wan di e du a wani fu en.—Deuteronomium 6:24, 25; 1 Yohanes 5:3.

Fa wi kan du a wani fu Gado? Wi abi fu leri san „Gado, wi Frulusuman, feni bun èn san e gi en prisiri”, èn baka dati wi musu teki a bosroiti fu du san wi leri (1 Timoteyus 2:3). Dati wani taki dati wi musu kon kisi soifri sabi fu Gado Wortu, Bijbel (Yohanes 17:3; 2 Timoteyus 3:16, 17). Wi musu du moro leki fu leisi Bijbel nomo. Wi musu de leki den fosi-yarihondro Dyu fu Berea, di ben yere fa Paulus ben e preiki. Disi na san wi e leisi fu den: ’Den ben teki a wortu nanga den heri ati, èn ala dei den ben e ondrosuku den Buku fu Bijbel finifini fu si efu den sani disi ben de so trutru.’—Tori fu den Apostel 17:11.

Na ini a ten disi, a de so tu taki te wi e studeri Bijbel finifini, dan dati e tranga a bribi di wi abi na ini Gado, èn a e yepi wi fu kisi wan moro krosibei banti nanga en (Hebrewsma 11:6). A e yepi wi sosrefi fu frustan krin fa Yehovah e handri nanga libisma. Yehovah no wani taki sani e waka bun nanga sma fu wan syatu pisi ten nomo, ma a wani taki sani e waka bun fu ala ten spesrutu nanga ala reti-ati sma.

Luku san wan tu Kresten e taki. Den sma disi abi wan krosibei banti nanga Gado. „Mi lobi Yehovah srefisrefi, èn mi musu taki en tangi gi so furu sani”, na so Danielle, di abi 16 yari, e taki. „A gi mi wan lobi-ati papa nanga mama di lobi En trutru, èn den leri mi fu libi soleki fa En  wortu e taki.” Wan Kresten na ini Urugwei e skrifi: „Mi abi furu warderi, èn a e gi mi fu taki Yehovah tangi gi a bun-ati di a sori gi mi, aladi mi no frudini dati, èn mi wani taki en tangi tu fu di a de mi mati.” Gado e gi srefi den yonguwan na okasi fu abi wan krosibei banti nanga en. Gabriela di abi seibi yari, e taki: „Mi lobi Gado moro leki iniwan tra sma na heri grontapu! Mi abi mi eigi Bijbel. Mi lobi fu kon sabi sani fu Gado nanga en Manpikin.”

Na ini a ten disi, milyunmilyun sma na heri grontapu e agri dorodoro nanga san a psalm skrifiman ben taki: „A kon di mi e kon krosibei na Gado, bun gi mi” (Psalm 73:28). Den kisi yepi fu man libi nanga den problema di den abi now, èn den abi a tranga howpu taki den sa libi fu têgo na ini Paradijs na grontapu trutru (1 Timoteyus 4:8). Fu san ede yu no e meki muiti fu „kon krosibei na Gado”? Iya, wi e kisi a dyaranti taki: „A no de fara fu ibriwan fu wi” (Tori fu den Apostel 17:27). Iya, Gado e broko en ede nanga yu trutru!

[Prenki na tapu bladzijde 5]

Furu fasi de fa wi man si taki Yehovah e broko en ede nanga wi

[Prenki na tapu bladzijde 7]

Srefi yongu pikin kan kon krosibei na Gado

[Prenki na tapu bladzijde 7]

Na ini a ten disi, Yehovah e yepi wi fu horidoro. Na a reti ten, a sa puru siki nanga dede