’Go èn meki disipel’

„Mi kisi ala makti na ini hemel èn na grontapu. Fu dati ede, go na sma fu ala kondre èn meki den tron disipel.”—MATEYUS 28:18, 19.

1, 2. (a) Sortu wroko Yesus ben gi den bakaman fu en? (b) Sortu aksi di abi fu du nanga den komando fu Yesus wi sa luku?

A BEN de wan lente-dei na ini Israel, na ini a yari 33 G.T. Yesus nanga den disipel fu en ben kon makandra na tapu wan bergi na Galilea. A Masra fu den di ben kisi wan opobaka, ben de fu opo go na hemel, ma a ben abi wan prenspari sani fu taigi den fosi. Yesus ben abi wan wroko gi den. San ben de a wroko? San den disipel du di den kisi fu yere san na a wroko? Èn san a wroko dati abi fu du nanga wi na ini a ten disi?

² Den sani di Yesus ben taki, skrifi na ini Mateyus 28:18-20: „Mi kisi ala makti na ini hemel èn na grontapu. Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu. We, dan mi sa de nanga unu ala dei te na a kaba fu a grontapu disi.” Yesus ben taki fu „ala makti”, „ala kondre”, „ala san mi taigi unu”, èn „ala dei”. Den komando disi di wani taki furu, e meki wan tu aksi opo kon. Den aksi disi na, fu san ede? pe? san? èn o ten? Meki wi luku den aksi disi wan fru wan. *

„Mi kisi ala makti”

3. Fu san ede wi musu gi yesi na a komando di wi kisi fu meki disipel?

³ A fosi aksi na: Fu san ede wi musu gi yesi na a komando di Yesus gi wi fu meki disipel? Yesus ben taki: „Mi kisi ala makti na ini hemel èn na grontapu. Fu dati ede, go na sma fu ala kondre èn meki den tron disipel.” Den wortu „fu dati ede”, e sori taki wan prenspari reide de fu san ede wi musu gi yesi na a komando disi. Wi musu gi yesi fu di Yesus, a sma di gi wi a komando, abi „ala makti”. O bigi a makti fu en de?

4. (a) O bigi a makti fu Yesus de? (b) Te wi e frustan o bigi a makti fu Yesus de, dan fa dati musu abi krakti tapu a fasi fa wi e si a komando di a gi wi fu meki disipel?

⁴ Yesus e tiri en gemeente, èn sensi 1914 a e tiri a nyun Kownukondre fu Gado di seti (Kolosesma 1:13; Openbaring 11:15). En na a gran engel, èn fu dati ede a de edeman fu wan legre fu hondrohondro milyun engel na hemel (1 Tesalonikasma 4:16; 1 Petrus 3:22; Openbaring 19:14-16). A kisi a makti fu en Tata fu pori „ala tiri nanga ala makti nanga ala krakti” di e gens regtfardiki markitiki (1 Korentesma  15:24-26; Efeisesma 1:20-23). Yesus no abi makti fu tiri sma di de na libi wawan. A de sosrefi „krutuman fu den libiwan nanga den dedewan”, èn a kisi a makti fu Gado fu wiki den wan di e sribi na ini dede (Tori fu den Apostel 10:42; Yohanes 5:26-28). A no de fu taki dati wi musu si wan komando fu a Sma di kisi someni makti, leki wan tumusi prenspari komando. Fu dati ede, wi e sori lespeki èn wi de klariklari fu gi yesi na a komando di Krestes gi wi, fu ’go èn meki disipel’.

5. (a) Fa Petrus ben gi yesi na den wortu fu Yesus? (b) Sortu blesi Petrus kisi fu di a ben gi yesi na Yesus?

⁵ Na a bigin fu en diniwroko na grontapu, Yesus ben leri en disipel na wan moi fasi taki den ben o kisi blesi te den ben e saka densrefi ondro en makti, èn te den ben e gi yesi na den komando fu en. Wan leisi a ben taigi Petrus, di ben de wan fisiman: „Go pe a watra dipi, dan unu musu saka den fisinèt fu unu go na ini a watra so taki unu kan kisi fisi.” Petrus ben de seiker taki fisi no ben de, sobun a taigi Yesus: „Leriman, heri neti wi wroko tranga èn wi no ben kisi noti.” Ma na wan saka fasi Petrus taki moro fara: „Ma fu di yu aksi dati, meki mi o saka den fisinèt go na ini a watra.” Baka di Petrus gi yesi na a komando fu Krestes, a kisi „wan heri ipi fisi”. Disi ben abi so furu krakti tapu Petrus, taki „a saka kindi na Yesus futusei èn a taki: ’Mi Masra, komoto na mi fesi, bika mi na wan sondu sma.’” Ma Yesus piki en: „No frede moro. Now yu o bigin kisi sma libilibi” (Lukas 5:1-10; Mateyus 4:18). San wi e leri fu a tori disi?

6. (a) Te wi e luku a tori fu den heri ipi fisi di den apostel ben fanga na wan wondru fasi, dan fa Yesus wani taki wi musu gi yesi na en? (b) Fa wi kan teki na eksempre fu Yesus?

⁶ Yesus meki Petrus, Andreas, nanga tra apostel fanga furu fisi na wan wondru fasi, èn dan fosi a gi den a wroko fu „tron fisiman fu libisma” (Markus 1:16, 17). A de krin fu si taki Yesus no ben wani taki den ben musu gi yesi na en, soso fu di a taigi den fu du so. A ben sori den man krin fu san ede den ben musu gi yesi na en. Neleki fa den ben kisi wan heri ipi fisi fu di den ben gi yesi na a komando di Yesus ben gi den fu saka den fisinèt go na ini a watra, na so den ben o kisi bigi blesi te den ben o gi yesi na a komando di a ben gi den, fu „tron fisiman fu libisma”. Nanga tranga bribi, den apostel go du san Yesus ben taki. A tori e kaba so: „Den tyari den boto go baka na syoro, dan den gowe libi ala sani èn den go waka na Yesus baka” (Lukas 5:11). Na ini a ten disi, wi e teki na eksempre fu Yesus, fu di wi e gi trawan deki-ati fu teki prati na a wroko fu meki disipel. Wi no wani taki sma e du nomo san wi e taigi den fu du, ma wi e sori den krin fu san ede den musu gi yesi na a komando fu Krestes.

Fu san ede wi musu gi yesi na den komando fu Krestes

7, 8. (a) San na wan tu reide di Bijbel e gi wi fu du a Kownukondre preikiwroko èn a wroko fu meki disipel? (b) Sortu bijbeltekst e gi yu moro deki-ati fu tan du a preikiwroko? (Luku a futuwortu sosrefi.)

⁷ Fu di wi e frustan o bigi a makti fu Krestes de, meki wi e teki prati na a Kownukondre preikiwroko èn na a wroko fu meki disipel. Te wi wani gi wan sma deki-ati fu du bun wroko, dan fa wi kan gebroiki Bijbel fu sori en sortu tra reide wi abi fu du a wroko dati? Luku san wan tu getrow Kotoigi fu difrenti kondre taki, èn luku fa den bijbeltekst di kari e horibaka gi san den taki.

⁸ Roy, di dopu na ini 1951: „Di mi gi misrefi abra na Yehovah, dan mi pramisi en taki mi o dini en ala ten. Mi wani hori misrefi na a pramisi fu mi” (Psalm 50:14; Mateyus 5:37). Heather, di dopu na ini 1962: „Te mi e prakseri fu ala den sani di Yehovah du gi mi, dan mi wani sori en nanga a getrow fasi fa mi e dini en, taki mi de nanga tangi na ati” (Psalm 9:1, 9-11; Kolosesma 3:15). Hannelore, di dopu na ini 1954: „Ibri tron te wi e du a preikiwroko, dan engel e horibaka gi wi. Dati na wan bigi grani trutru!” (Tori fu den Apostel 10:30-33;  Openbaring 14:6, 7) Honor, di dopu na ini 1969: „Te a ten fu Yehovah doro fu krutu sma, dan mi no wani sma na ini mi birti krutu Yehovah, noso den Kotoigi fu en, taki den no poti prakseri na den, noso taki noiti wan sma no warskow den!” (Esekièl 2:5; 3:17-19; Romesma 10:16, 18) Claudio, di dopu na ini 1974: „Te wi e preiki, dan wi de ’ondro na ai fu Gado’ èn ’makandra nanga Krestes’. Prakseri a sani dati! Te wi e preiki, dan wi de nanga den moro bun Mati fu wi.”—2 Korentesma 2:17. *

9. (a) Nanga sortu denki sma musu gi yesi na Krestes, soleki fa a tori fu Petrus nanga den tra apostel di ben kisi fisi, e sori? (b) Nanga sortu denki sma musu gi yesi na Gado èn na Krestes na ini a ten disi, èn fu san ede disi de so?

⁹ A tori fu den heri ipi fisi di den apostel ben fanga na wan wondru fasi, e sori wi tu taki a de tumusi prenspari fu gi yesi na Krestes nanga a yoisti denki. Wi musu gi yesi na en fu di wi lobi en. Di Petrus taki: „Komoto na mi fesi, bika mi na wan sondu sma”, dan Yesus no gowe, èn a no krutu Petrus fu sondu di a ben du (Lukas 5:8). Yesus no krutu Petrus srefi di a ben begi en fu gowe. Na presi fu dati, Yesus piki en na wan switi fasi: „No frede moro.” A no ben o bun te Petrus ben e gi yesi na Krestes fu di a ben e frede gi en. Na presi fu dati, Yesus taigi Petrus taki a ben o gebroiki en nanga den mati fu en leki fisiman fu libisma. Na ini a ten disi, wi no e tapu skreki tu gi sma so taki den kan gi yesi na Krestes, èn wi no e meki den firi brokosaka tu, fu di wi e meki den firi leki den du wan ogri, noso fu di wi e meki den firi syen. A sani di e gi Yehovah prisiri, na te sma e gi yesi na En èn na Krestes fu di den lobi den nanga den heri ati.—Mateyus 22:37.

’Meki disipel fu sma fu ala kondre’

10. (a) Sortu pisi fu a komando fu Yesus no ben makriki srefisrefi gi den disipel? (b) Fa den disipel gi yesi na a komando fu Yesus?

¹⁰ A di fu tu aksi di abi fu du nanga a komando  fu Krestes na, Pe wi musu du a wroko fu meki disipel? Yesus ben taigi den bakaman fu en: ’Meki disipel fu sma fu ala kondre.’ Na a pisi ten bifo Yesus bigin du en diniwroko, den Israelsma ben gwenti fu gi trakondre-sma wan switikon te den ben kon na Israel fu dini Yehovah (1 Kownu 8:41-43). Yesus srefi ben e preiki moro furu gi den Dyu, ma now a taigi den bakaman fu en fu go na sma fu ala kondre. Te yu luku en bun, dan den ’fisi-olo’, noso den kontren pe den disipel ben preiki, no ben bigi, bika den ben e preiki soso gi den Dyu. Ma heri esi, den ben o preiki gi wan heri „se” fu libisma. Aladi disi no ben makriki gi den disipel, toku den ben de klariklari fu gi yesi na a komando fu Yesus. Pikinmoro 30 yari baka di Yesus dede, na apostel Paulus ben man skrifi taki a bun nyunsu no ben preiki gi den Dyu wawan, ma sosrefi gi „ala sma na ondro hemel”.—Kolosesma 1:23.

11. Fa den ’fisi-olo’ kon moro bigi sensi a bigin fu a di fu 20 yarihondro?

¹¹ Na ini den lasti yari di pasa, wi si taki a kontren pe wi e du preikiwroko kon moro bigi tu. Na a bigin fu a di fu 20 yarihondro, den ’fisi-olo’ ben de na wan tu kondre nomo. Ma den bakaman fu Krestes na ini a ten dati ben teki na eksempre fu den fosi-yarihondro Kresten, èn den go preiki fayafaya na tra presi (Romesma 15:20). Na ini den yari baka 1930, den ben e meki disipel na ini pikinmoro wán hondro kondre. Na ini a ten disi, den ’fisi-olo’ fu wi de na ini 235 kondre.—Markus 13:10.

„Fu ala tongo”

12. Sortu problema Sakaria 8:23 e tyari kon na krin?

¹² A no fu di wi musu go na difrenti presi wawan, meki a muilek fu meki disipel fu sma fu ala nâsi, ma a muilek sosrefi fu di sma e taki difrenti tongo. Nanga yepi fu a profeiti Sakaria, Yehovah ben taki na fesi: „A sa de na ini den dei dati, taki tin man fu ala tongo fu den nâsi sa grabu hori, iya, fu tru den sa grabu hori a mofokanti fu a krosi fu wan man di de wan Dyu, èn taki: ’Wi wani go nanga unu, fu di wi yere taki Gado de nanga unu’” (Sakaria 8:23). Na ini a moro bigi kontru fu a profeititori disi, a „man di de wan Dyu” e agersi a fikapisi fu den salfu Kresten, èn den „tin man” e agersi a „bigi ipi” * (Openbaring 7:9, 10; Galasiasma 6:16). A bigi ipi fu den disipel fu Krestes ben o de fu feni na ini furu nâsi, èn soleki fa Sakaria ben taki, dan den ben o taki difrenti tongo. A de so trutru taki a pipel fu Gado na ini a ten disi de fu difrenti kondre, èn den e taki difrenti tongo? A piki na ’Iya’.

13. (a) Fa sani waka nanga a disiten pipel fu Gado di e taki difrenti tongo? (b) San a getrow èn koni srafu du di den si taki moro nanga moro sma abi yeye nyanyan fanowdu na ini difrenti tongo? (Luku sosrefi a faki „Buku gi brenisma”.)

¹³ Na ini 1950, dri fu ibri feifi Kotoigi fu  Yehovah na heri grontapu, ben e taki Ingrisitongo. Na ini 1980, tu fu ibri feifi Kotoigi ben e taki Ingrisitongo, èn now soso wan fu ibri feifi Kotoigi e taki Ingrisitongo. San a getrow èn koni srafu du di den kon si taki moro furu Kotoigi e taki wan tra tongo? Safrisafri den meki taki yeye nyanyan ben de fu kisi na ini moro nanga moro tongo (Mateyus 24:45). Fu eksempre, na ini 1950, den buku fu wi ben e kon na doro na ini 90 tongo, ma now den e kon na doro na ini sowan 400 tongo. A getrow èn koni srafu kisi bun bakapisi di den poti moro prakseri na difrenti grupu sma di e taki wan tra tongo? Iya! Sowan 5000 sma ’fu ala tongo’ e tron disipel fu Krestes ibri wiki fu a yari! (Openbaring 7:9) Èn a grupu disi e gro moro nanga moro. Na ini son kondre, den „fisinèt” e fanga bun furu fisi!—Lukas 5:6; Yohanes 21:6.

Yu kan abi wan prati na a diniwroko di e gi prisiri

14. Fa wi kan yepi sma na ini wi birti di e taki wan tra tongo? (Luku sosrefi a faki „Wi e gebroiki dofusma-tongo fu meki disipel”.)

¹⁴ Furu sma e froisi go na tra kondre, èn fu dati ede wi musu tan meki muiti fu meki disipel fu sma fu ’ala tongo’ na ini wi eigi kondre (Openbaring 14:6). Fa wi kan yepi den sma na ini wi birti di e taki wan tra tongo? (1 Timoteyus 2:4) Wi musu gebroiki den yoisti wrokosani te wi e go ’fisi’. Te yu e pristeri buku na sma di e taki wan tra tongo, dan yu musu gi den buku di skrifi na ini a tongo di den e taki. Efu a kan, seti sani so taki wan Kotoigi di e taki a tongo fu den, kan go fisiti den (Tori fu den Apostel 22:2). Disi de moro makriki now, fu di furu Kotoigi leri fu taki wan tra tongo, so taki den kan yepi sma fu tra kondre fu tron disipel fu Krestes. Ondrofenitori e sori taki a e gi trutru prisiri fu yepi sma na so wan fasi.

15, 16. (a) Sortu eksempre e sori taki a e gi furu prisiri fu yepi den sma di e taki wan tra tongo? (b) Sortu sani wi musu aksi wisrefi te wi e prakseri fu go du preikiwroko na ini kontren pe sma e taki wan tra tongo?

¹⁵ Luku tu eksempre fu Bakrakondre, pe sani seti fu du a Kownukondre preikiwroko na ini 34 tongo. Wan Kotoigi trowpaar ben gi den nen fu go meki disipel fu sma di e taki Pôlsutongo. Den ben kisi so furu bun bakapisi, taki a  masra bosroiti fu wroko moro mendri dei na ini a wiki, so taki a ben kan abi ete wan dei fu studeri Bijbel nanga sma di ben wani sabi moro. A no langa baka dati, a trowpaar disi ben e hori moro leki 20 bijbelstudie ibri wiki. Den taki: „A diniwroko fu wi e gi wi furu prisiri.” Den wan di e meki disipel e prisiri spesrutu te den sma di e yere den tru tori fu Bijbel na ini den eigi tongo, e sori warderi. Fu eksempre, di wan konmakandra ben e hori na ini a Vietnameisitongo, dan wan owru man opo èn a aksi efu a ben kan taki wan sani. Nanga watra-ai a taigi den Kotoigi: „Grantangi fu a muiti di unu e meki fu leri taki a muilek tongo fu mi. Mi de nanga bigi tangi taki mi man leri so furu moi sani fu Bijbel, aladi mi kon owru kaba.”

¹⁶ Fu dati ede, a no de fu fruwondru taki den wan di e dini na ini gemeente di e taki wan tra tongo, e firi taki den e kisi furu wini. Wan trowpaar fu Ingrisikondre ben taki: „A moro prisiri preikiwroko di wi du na ini den 40 yari di wi e teki prati na a Kownukondre diniwroko, na a preikiwroko di wi du na mindri sma di e taki wan tra tongo.” Yu kan kenki a situwâsi fu yu, so taki yu kan abi wan prati na a diniwroko disi di e gi deki-ati? Efu yu e go na skoro ete, dan yu kan pruberi fu leri wan tra tongo fu sreka yusrefi gi a sortu diniwroko disi. Te yu e du disi, dan yu kan kisi furu prisiri nanga blesi na ini yu libi (Odo 10:22). Fu san ede yu no e taki a tori disi nanga yu papa nanga mama?

Wi musu preiki na difrenti fasi

17. Fa wi kan preiki gi moro sma na ini a kontren pe wi gemeente e preiki?

¹⁷ A no de fu taki, dati wi alamala no de na ini wan situwâsi di e gi okasi fu go fringi wi ’fisinèt’ na ini kontren pe sma e taki wan tra tongo. Ma toku wi kan preiki gi moro sma na ini a kontren pe wi gemeente e preiki. Fa so? Fu di wi e kenki a fasi fa wi e preiki, aladi wi e tan preiki a srefi boskopu. Na furu presi, moro nanga moro sma e tan na ini oso di abi waktiman, alarm, noso tra sani, so taki wi no e kisi na okasi makriki fu preiki gi den. Furu sma no de na oso tu te wi e preiki oso fu oso. Sobun, a kan de fanowdu taki wi e fringi wi ’fisinèt’ na wan tra ten, noso na tra presi. Na so fasi wi e du leki Yesus. A ben meki muiti fu taki nanga sma na difrenti presi.—Mateyus 9:9; Lukas 19:1-10; Yohanes 4:6-15.

18. Sortu bun bakapisi Kotoigi abi fu di den e preiki na difrenti presi? (Luku sosrefi a faki „Wi e meki disipel fu sma di e du bisnis”.)

¹⁸ Na son presi fu grontapu, wan tumusi prenspari fasi fu meki disipel, na fu gi kotoigi na iniwan presi pe sma de fu feni. Sma di sabi fa fu meki disipel, e preiki moro nanga moro now na difrenti presi. Boiti taki preikiman e go oso fu oso, den e go tu na opolanigron, na kantoro, na wenkri, èn na presi pe sma e poti den wagi. Den e preiki sosrefi na presi pe sma e wakti bus, na presi pe sma e go koiri, na strati, na sekanti, èn na tra presi tu. Furu Kotoigi fu Hawai, di dopu no so langa pasa, ben kon yere a boskopu na den sortu presi disi. Te wi e du a preikiwroko na difrenti fasi, dan dati o yepi wi fu gi yesi dorodoro na a komando di Yesus gi wi fu meki disipel.—1 Korentesma 9:22, 23.

19. Fu sortu tra pisi fu a komando fu Yesus wi sa taki na ini na artikel di e kon?

¹⁹ A wroko di Yesus gi den disipel fu en fu meki disipel no ben sori finifini wawan fu san ede èn pe wi musu du a wroko dati, ma a ben sori finifini tu san wi musu preiki èn te o ten wi musu tan du disi. Den tu pisi disi fu a komando fu Yesus, wi sa luku na ini na artikel di e kon.

[Futuwortu]

Yu e memre disi ete?

• Fu san ede wi abi wan prati na a Kownukondre preikiwroko èn na a wroko fu meki disipel, èn nanga sortu denki wi e du dati?

• Sortu muiti den disiten futuboi fu Yehovah meki fu gi yesi na a komando di Yesus gi fu meki disipel fu sma fu ala kondre?

• Fa wi kan ’kisi fisi’ na difrenti fasi, èn fu san ede wi musu du disi?

[Aksi fu a tori disi]

[Faki/​Prenki na tapu bladzijde 10]

Buku gi brenisma

Albert na wan Kresten owruman di e libi na Amerkankondre, èn di e du furuten diniwroko drape. A breni. Fu di a e gebroiki Bijbel publikâsi di skrifi na ini Braille (buku di meki na wan spesrutu fasi so taki brenisma man leisi den), meki a man du en diniwroko moro bun èn sosrefi den tra sani di a musu du leki dienstopziener. Fa a e du en wroko na ini a gemeente?

„Noiti wi ben abi wan moro bun dienstopziener na ini wi gemeente, leki Albert”, na so James, a fesiman opziener, e taki. Na ini den yari di pasa, Albert nanga sowan 5000 tra brenisma na Amerkankondre kisi Bijbel publikâsi na ini na Ingrisitongo Braille èn na ini a Spanyorotongo Braille. Fu taki en leti, sensi 1912, a getrow srafu grupu tyari moro leki wán hondro difrenti buku kon na doro na ini Braille. Nownow, Yehovah Kotoigi e gebroiki nyun-modo wrokosani fu druk milyunmilyun bladzijde na ini Braille ibri yari, na ini moro leki tin tongo, èn den e prati den na ini moro leki 70 kondre. Yu sabi wan sma di kan kisi wini fu den Bijbel publikâsi di meki spesrutu gi brenisma?

[Faki/​Prenki na tapu bladzijde 11]

Wi e gebroiki dofusma-tongo fu meki disipel

Dusundusun Kotoigi na heri grontapu, sosrefi furu fayafaya yonguwan, leri taki a dofusma-tongo, so taki den kan yepi dofusma fu tron disipel fu Krestes. A bakapisi de taki na ini Brasyonkondre wawan, 63 dofusma dopu na ini wán yari no so langa pasa, èn 35 dofu Kotoigi drape e dini now leki furuten preikiman. Na heri grontapu yu abi moro leki 1200 dofusma-tongo gemeente nanga grupu. Te yu e luku a kontren fu a wan-enkri dofusma kring na ini Rosiakondre, dan yu o si taki a de a moro bigi kring na heri grontapu fu di a kontren fu den e teki heri Rosiakondre!

[Faki na tapu bladzijde 12]

Wi e meki disipel fu sma di e du bisnis

Di wan Kotoigi na ini Hawai ben go na den kantoro fu sma di e du bisnis, dan a miti wan driktoro fu wan bisnis di e yepi sma fu go fu a wan presi na a trawan. Aladi a man ben abi furu fu du, toku a agri fu studeri Bijbel ibri wiki, sowan 30 miniti na ini en kantoro. Ibri dridewroko, a e taigi den wrokoman fu en fu no kari en te sma e bèl en, èn baka dati a e poti ala en prakseri na a studie. Wan tra Kotoigi na ini Hawai e studeri Bijbel wán leisi wan wiki nanga wan man di abi wan wenkri pe sma e tyari den susu kon fu meki. A studie e hori leti na a tonbangi fu a wenkri. Te wan klanti e kon, dan a Kotoigi e go na wan sei. Te a klanti gowe, dan den e go doro nanga a studie.

Den Kotoigi ben miti a driktoro nanga a man fu a susu-wenkri fu di den bosroiti fu trowe den ’fisinèt’ na difrenti presi. Yu sabi presi na ini a kontren fu yu gemeente, pe yu kan miti sma di no de na oso nofo tron?

[Prenki na tapu bladzijde 12]

Yu kan go preiki gi sma di e taki wan tra tongo?