„Leri den fu du ala san mi komanderi unu”
„Leri den fu du ala san mi komanderi unu”
„Fu dati ede, go na sma fu ala kondre èn meki den tron disipel . . . . Leri den fu du ala san mi komanderi unu.”—MATEYUS 28:19, 20.
1. Fu sortu sani a disipel Filipus nanga wan man fu Etiopia ben e taki?
WAN man fu Etiopia ben go te na Yerusalem. Drape a anbegi Yehovah, a Gado di a ben lobi. Soleki fa a sori, dan a ben lobi sosrefi a Wortu di Gado ben meki sma skrifi. Di a ben e drai go na oso baka na ini en asiwagi, dan a ben e leisi wan kopi fu den sani di a profeiti Yesaya ben skrifi. Ne Filipus, wan disipel fu Yesus, miti en. Filipus aksi na Etiopiaman: „Yu e frustan trutru san yu e leisi?” A man piki: „Fu tru, fa mi ben sa man du dati dan, efu nowan sma e leri mi?” Ne Filipus yepi a man disi di ben e studeri den Buku fu Bijbel fayafaya, fu tron wan disipel fu Krestes.—Tori fu den Apostel 8:26-39.
2. (a) Fu san ede a piki fu na Etiopiaman de prenspari? (b) Sortu aksi wi sa luku di abi fu du nanga a komando di Krestes gi fu meki disipel?
2 A piki fu na Etiopiaman prenspari trutru. A ben taki: ’Fa mi ben sa man du dati dan, efu nowan sma e leri mi?’ Iya, a ben abi wan sma fanowdu di ben o leri en, wan sma di ben o sori en san den sani di a ben leisi, ben wani taki. A piki disi e sori taki a de tumusi prenspari fu poti prakseri na wan spesrutu sani di Yesus ben taki di a ben gi a komando fu meki disipel. San a ben taki? Fu kisi piki tapu na aksi dati, meki wi go doro fu luku san Yesus ben taki na ini Mateyus kapitel 28. Na artikel di wi ben luku fosi a wan disi, ben taki fu den aksi, fu san ede? èn pe? Now wi sa go luku ete tu aksi di abi fu du nanga a komando di Krestes ben gi fu meki disipel. Den aksi dati na, san? èn o ten?
„Leri den fu du ala san mi komanderi unu”
3. (a) Fa wan sma e tron wan disipel fu Yesus Krestes? (b) Te wi wani meki sma tron disipel, dan san wi musu leri den tu?
3 San wi musu leri trawan fu yepi den fu tron disipel fu Krestes? Yesus ben gi den bakaman fu en a komando disi: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi komanderi unu” (Mateyus 28:19, 20). Sobun, wi musu leri sma den sani di Krestes komanderi wi. * Ma san wi kan du fu de seiker taki wan sma di leri den komando fu Yesus, no sa tron wan disipel wawan, ma sa tan wan disipel sosrefi? Wan prenspari sani di wi musu du, de fu si na ini den wortu di Yesus ben taki nanga koni. Luku taki a no ben taki nomo: ’Leri den ala san mi komanderi unu.’ Na presi fu dati, a taki: „Leri den fu du ala san mi komanderi unu” (Mateyus 19:17). San dati wani taki?
4. (a) San a wani taki fu gi yesi na wan komando? (b) Sori nanga yepi fu wan agersitori fa wi kan leri wan sma fu gi yesi na den komando fu Krestes.
4 Te wan sma e gi yesi na wan komando, dan dati wani taki dati a e du soleki fa a komando e taki, noso a e tan hori ensrefi na a komando dati. Ma dan fa wi kan leri wan sma fu du, noso fu gi yesi na den komando fu Krestes? We, prakseri fa wan leriman e leri wan studenti fu hori ensrefi na den wet te a e rèi na strati. A leriman kan leri a studenti den wet te a de na ini wan klas. Ma efu a wani leri a studenti fu gi yesi na den wet dati, dan a abi fu rèi makandra nanga a studenti na strati pe tra wagi e rèi, so taki a studenti kan meki muiti fu du san a leri. Na so a de tu taki te wi e studeri Bijbel nanga sma, dan wi e leri den san den komando fu Krestes wani taki. Ma wi musu sori den studenti tu fa fu du san Krestes taki, na ini den aladei libi èn na ini a preikiwroko (Yohanes 14:15; 1 Yohanes 2:3). Sobun, efu wi wani hori wisrefi finifini na a komando di Krestes gi fu meki disipel, dan wi musu gi sma leri, èn wi musu sori den tu fa fu du san den leri. Na a fasi dati, wi e teki na eksempre fu Yesus, èn fu Yehovah.—Psalm 48:14; Openbaring 7:17.
5. San kan meki taki wan bijbelstudenti e draidrai fu gi yesi na a komando fu Krestes fu meki disipel?
5 Fu leri trawan fu gi yesi na den komando fu Yesus, wani taki tu dati wi musu yepi den fu hori densrefi na a komando fu meki disipel. Son bijbelstudenti, kan feni a sani disi muilek. Srefi efu den ben de fayafaya na ini wan tra kerki fu Krestenhèit fosi, toku a kan taki den kerki leriman fu a kerki dati, noiti no leri den fu go èn meki disipel. Son kerki fesiman e taki krin dati den kerki fu Krestenhèit no e leri den kerkisma fu preiki srefisrefi. A Bijbel sabiman John R. W. Stott ben taki fu a komando di Yesus ben gi sma fu go na ala kondre èn fu yepi ala sortu sma fu tron disipel. A ben taki: „Na ini a ten disi, a moro bigi swakifasi fu wi di e kari wisrefi bakaman fu Krestes, na taki wi no e hori wisrefi na a komando di Krestes ben gi wi.” A ben taki moro fara: „Wi no abi a gwenti fu go na sma oso fu go preiki gi den. Son leisi wi e gersi sma di de na syoro e bari gi tra sma san den musu du, aladi den sma dati e suku fu dede na watra. Wi no e go na ini a watra fu pruberi fu yepi den sma. Wi e frede fu kon nati.”
6. (a) Fa wi kan teki na eksempre fu Filipus, te wi e yepi wan bijbelstudenti? (b) Fa wi kan sori taki wi e broko wi ede trutru nanga wan bijbelstudenti di e bigin teki prati na a preikiwroko?
6 Efu wi e studeri Bijbel nanga wan sma di ben de na wan kerki fosi pe sma e frede fu go preiki, dan a kan muilek gi en fu kisi deki-ati fu go preiki, èn fu gi yesi na a komando fu Krestes fu meki disipel. A sma disi sa abi yepi fanowdu. Fu dati ede, wi musu abi pasensi, te wi e gi en a leri èn a yepi di a abi fanowdu fu frustan waarheid moro bun. Disi sa meki taki a o wani du wan sani, neleki fa na Etiopiaman ben wani teki dopu, baka di a kon frustan bun san Filipus ben leri en (Yohanes 16:13; Tori fu den Apostel 8:35-38). Boiti dati, te wi wani trutru taki den bijbelstudenti gi yesi na a komando fu meki disipel, dan wi sa wroko makandra nanga den fu yepi den te den o teki prati na a Kownukondre preikiwroko fu a fosi leisi.—Preikiman 4:9, 10; Lukas 6:40.
„Ala san mi komanderi unu”
7. Sortu komando wi musu leri sma te wi e leri den fu ’du ala san’ Yesus taki?
7 Wi no e leri nyun disipel nomo fu meki disipel. Yesus ben taigi wi fu leri trawan fu „du ala san” a komanderi wi fu du. Dati wani taki dati wi musu leri den sosrefi san na den tu moro bigi komando di de, namku fu lobi Gado èn fu lobi tra sma (Mateyus 22:37-39). Fa wi kan leri wan nyun disipel fu hori ensrefi na den komando dati?
8. Sori nanga yepi fu wan agersitori fa wan nyun disipel kan leri fu gi yesi na a komando di e taki dati wi musu sori lobi gi trawan.
8 Prakseri baka fu a studenti di e leri rèi na strati. Te a e rèi na strati nanga a leriman na en sei, dan na a srefi ten a e teki leri fu di a e arki san a leriman e taki, èn fu di a e luku fa tra sma e rèi. Fu eksempre, a leriman kan sori a studenti wan sma di e sori switifasi fu di a e meki wan trawan koti na en fesi fu rèi pasa. Noso kande wan tra sma e sori bun maniri fu di a e saka a faya fu en wagi so taki a no e breni trawan di e rèi kon miti en. Kande a leriman e sori en wan sma tu di de klariklari fu yepi wan mati di wagi broko na pasi. Den sortu eksempre disi e leri na a studenti prenspari sani di ensrefi kan du te a de na pasi e rèi. Na so a de tu nanga wan nyun disipel di e waka a pasi fu libi. Boiti taki a e teki leri fu en leriman, a e teki leri sosrefi fu den moi eksempre di a e si na ini a gemeente.—Mateyus 7:13, 14.
9. Fa wan nyun disipel e leri san a wani taki fu sori lobi, soleki fa Krestes ben komanderi wi fu du?
9 Fu eksempre, kande wan bijbelstudenti e si fa wan papa noso wan mama di no abi trowpatna, e du furu muiti fu kon na a Kownukondre zaal nanga den nyofi pikin fu en. A studenti kan si wan sma di e tan kon na den konmakandra aladi a e firi brokosaka, noso a e si fa wan owru sisa di no abi masra e rèi go teki tra owrusma fu tyari den kon na ibri konmakandra, noso fa wan tini e yepi fu krin a Kownukondre zaal. Kande a bijbelstudenti e si wan gemeente owruman di e tan teki fesi na wan getrow fasi na ini a preikiwroko, aladi a abi so furu frantwortu na ini a gemeente. Kande a studenti e miti wan Kotoigi di malengri èn di no man komoto fu en oso, ma di e gi furu deki-ati na den wan di e kon luku en. Kande wan trowpaar de di e tyari bigi kenki kon na ini den libi, so taki den kan sorgu gi na owru papa nanga mama fu den. Te a nyun disipel e si den Kresten disi di abi switifasi, di lobi fu yepi trawan, èn di de fu frutrow, dan na eksempre fu den e leri en san a wani taki fu lobi Gado èn fu lobi tra sma, spesrutu den wan di abi a srefi bribi, soleki fa Krestes ben komanderi wi fu du (Odo 24:32; Yohanes 13:35; Galasiasma 6:10; 1 Timoteyus 5:4, 8; 1 Petrus 5:2, 3). Na a fasi disi, ibri sma fu a Kresten gemeente kan èn musu de wan leriman di e sori den studenti sosrefi fa den musu du san den leri.—Mateyus 5:16.
„Te na a kaba fu a sistema disi”
10. (a) O langa wi o tan meki disipel? (b) Sortu eksempre Yesus ben gi wi te wi e luku a fasi fa a ben du a wroko di a ben kisi?
10 Te o ten wi musu go doro fu meki disipel? Te na a kaba fu a sistema disi (Mateyus 28:20). Wi sa man gi yesi na a pisi disi fu a komando di Yesus gi wi? Leki wan gemeente na heri grontapu, wi abi a fasti bosroiti fu du dati. Na ini den yari di pasa, wi ben de klariklari fu gi wi ten, wi krakti, nanga tra sani di wi abi, fu feni den sma di abi ’a yoisti denki fu man kisi têgo libi’ (Tori fu den Apostel 13:48). Nownow, Yehovah Kotoigi e gebroiki moro leki dri milyun yuru ibri dei fu a yari, fu du a Kownukondre preikiwroko èn fu meki disipel na heri grontapu. Wi e du disi fu di wi e teki na eksempre fu Yesus. A ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en” (Yohanes 4:34). Wi wani du dati tu nanga wi heri ati (Yohanes 20:21). Wi wani du moro leki fu bigin a wroko nomo di wi kisi; wi wani kaba a wroko.—Mateyus 24:13; Yohanes 17:4.
11. San pasa nanga son Kresten brada nanga sisa fu wi, èn san wi musu aksi wisrefi?
11 Ma a e meki wi firi sari fu si taki son sma di abi a srefi bribi leki wi, kon swaki na yeye fasi èn leki bakapisi fu dati, den e du a wroko moro safri, noso den tapu fu gi yesi na a komando di Krestes gi fu meki disipel. Wan fasi de fa wi kan yepi den fu abi demakandra baka nanga a gemeente, èn fu teki prati baka na a wroko di wi e du fu meki disipel? (Romesma 15:1; Hebrewsma 12:12) A fasi fa Yesus ben yepi den apostel fu en di den ben kon swaki fu wan syatu pisi ten, e sori wi san wi kan du na ini a ten disi.
Sori taki yu e broko yu ede nanga den
12. (a) San den apostel ben du syatu bifo Yesus dede? (b) Fa Yesus ben handri nanga den apostel aladi den ben sori taki den ben abi seryusu swakifasi?
12 Na a kaba fu Yesus diniwroko na grontapu, di a ben kon na krin taki a ben o dede trutru, dan den apostel „lon gowe libi en”. Soleki fa Yesus ben taki na fesi kaba, dan ’ibriwan fu den panya go na en eigi oso’ (Markus 14:50; Yohanes 16:32). Fa Yesus du nanga den mati fu en di ben kon swaki na yeye fasi? Syatu baka di Yesus kisi wan opobaka, dan a taigi sonwan fu den bakaman fu en: „No frede! Un go fruteri den brada fu mi taki den kan go na Galilea èn drape den o si mi” (Mateyus 28:10). Aladi den apostel ben sori taki den ben abi seryusu swakifasi, toku Yesus ben kari den „den brada fu mi” (Mateyus 12:49). A no ben lasi frutrow na ini den. Na so fasi, Yesus ben sori taki a abi sari-ati èn taki a e gi pardon, neleki fa Yehovah abi sari-ati èn e gi pardon (2 Kownu 13:23). Fa wi kan de leki Yesus?
13. Fa wi musu si den wan di kon swaki na yeye fasi?
13 Wi musu broko wi ede trutru nanga den wan di go du a diniwroko fu den moro safri, noso den wan di tapu srefi fu abi wan prati na a diniwroko. Wi kan memre ete fa den brada noso sisa dati ben sori lobi na ini a ten di pasa; kande sonwan fu den ben du dati someni tenti yari langa kaba (Hebrewsma 6:10). Wi e angri trutru fu abi demakandra nanga den (Lukas 15:4-7; 1 Tesalonikasma 2:17). Ma fa wi kan sori taki wi e broko wi ede nanga den?
14. Fa wi kan teki na eksempre fu Yesus fu yepi wan swaki sma?
14 Yesus ben taigi den apostel di ben e firi brokosaka, taki den ben musu go na Galilea èn taki den ben o si en drape. Te yu luku en bun, dan Yesus ben gi den wan kari fu kon na wan spesrutu konmakandra (Mateyus 28:10). Na ini a ten disi, wi e gi deki-ati tu na den wan di swaki na yeye fasi, fu kon na den konmakandra fu a Kresten gemeente, èn kande wi musu gi den deki-ati moro leki wán leisi fu du dati. A kari di den apostel kisi no ben de fu soso, bika „den erfu disipel go na Galilea na a bergi pe Yesus meki mofo nanga den” (Mateyus 28:16). Wi e prisiri srefisrefi te wi e si taki swakiwan e teki a waran kari di wi gi den, èn e bigin go na den Kresten konmakandra baka!—Lukas 15:6.
15. Fa wi kan teki na eksempre fu Yesus fu gi wan switikon na den swakiwan di e kon na wi konmakandra presi?
15 San wi sa du te wan swaki Kresten kon na a Kownukondre zaal? We, san Yesus du di a si den apostel fu en, di ben kon kisi wan swaki bribi fu wan syatu pisi ten, na a presi pe a ben o miti den? ’Yesus kon moro krosibei èn a taki nanga den’ (Mateyus 28:18). A no ben tan farawe e luku den nomo, ma a go na den. Prakseri fa den apostel ben musu fu breiti di Yesus fosi waka kon miti den! Meki wi sosrefi waka go miti den swakiwan na yeye fasi di e du muiti fu kon baka na ini a Kresten gemeente, èn meki wi gi den wan waran switikon.
16. (a) San wi kan leri fu a fasi fa Yesus ben handri nanga den bakaman fu en? (b) Fa wi kan sori taki wi e si den swakiwan neleki fa Yesus ben e si den? (Luku a futuwortu.)
16 Sortu tra sani Yesus du? Fosi, a meki a taki den wortu disi: „Mi kisi ala makti na ini hemel èn na grontapu.” Leki a di fu tu sani, a gi den apostel wan wroko fu du: „Fu dati ede, go na sma fu ala kondre èn meki den tron disipel.” Leki di fu dri sani, a pramisi: „Mi sa de nanga unu ala den dei.” Ma yu si san Yesus no du? A no bigin krutu den disipel fu den fowtu di den ben meki, noso fu di den ben e tweifri (Mateyus 28:17). Den sani disi di Yesus ben du ben abi bun bakapisi? Iya. A no langa baka dati, den apostel ben ’e gi sma leri baka èn den ben e fruteri sma a bun nyunsu’ (Tori fu den Apostel 5:42). Te wi e teki na eksempre fu Yesus te a abi fu du nanga a fasi fa a ben e si èn ben e handri nanga swakiwan, dan wi kan abi den srefi moi bakapisi na ini wi gemeente. *—Tori fu den Apostel 20:35.
„Mi sa de nanga unu ala den dei”
17, 18. Sortu deki-ati wi e kisi fu den wortu fu Yesus, „Mi sa de nanga unu ala den dei”?
17 Den lasti wortu fu a komando fu Yesus na: „Mi sa de nanga unu ala den dei.” Den wortu disi e gi deki-ati na ala sma di e du muiti fu gi yesi na a komando di Krestes gi fu meki disipel. Awinsi na sortu fasi feanti e suku fu gens a Kownukondre preikiwroko, èn awinsi sortu lei den e fruteri fu gi wi porinen, toku wi no abi fu frede. Fu san ede? Wi Fesiman Yesus, di abi „ala makti na ini hemel èn na grontapu”, de nanga wi fu horibaka gi wi!
18 A pramisi fu Yesus, „Mi sa de nanga unu ala den dei”, e gi wi furu trowstu sosrefi. Aladi wi e du muiti fu gi yesi na a komando di Krestes gi wi fu meki disipel, dan wi no e kisi prisiri wawan, ma wi e kisi sari tu (2 Kroniki 6:29). Sonwan fu wi e sari fu wan pisi ten fu di wan lobiwan fu den lasi libi (Genesis 23:2; Yohanes 11:33-36). Trawan e kon owru, èn safrisafri den e kon swaki (Preikiman 12:1-6). Trawan de tu di e firi brokosaka srefisrefi son leisi (1 Tesalonikasma 5:14). Èn moro nanga moro fu wi e feti nanga ekonomia problema. Ma awinsi wi abi den sortu problema disi, toku wi man tan du wi diniwroko, fu di Yesus de nanga wi „ala den dei”, sosrefi na den moro muilek dei na ini wi libi.—Mateyus 11:28-30.
19. (a) San Yesus taigi wi fu du di a ben gi wi a komando fu meki disipel? (b) San e meki taki wi man du san Krestes komanderi wi?
19 Soleki fa wi ben si na ini na artikel disi èn na ini a wan na fesi, dan a komando di Yesus gi wi fu meki disipel, wani taki furu. Yesus ben taigi wi fu san ede, èn pe wi musu du san a ben komanderi wi fu du. A ben taigi wi sosrefi san wi musu leri sma èn te o ten wi musu du dati. A tru taki a no makriki fu du a bigi wroko disi. Ma fu di Krestes, di abi ala makti, e horibaka gi wi, èn fu di a de nanga wi, meki wi man du a wroko disi! Yu no denki so tu?
[Futuwortu]
^ paragraaf 3 Wan buku e sori taki Yesus ben taki, „dopu den . . . leri den”; a no ben taki ’dopu den èn leri den’. Sobun, a komando di Yesus gi fu dopu èn fu leri sma, „no wani taki dati nomonomo . . . den tu sani disi musu pasa baka makandra”. Na presi fu dati, „te wi e gi sma leri, dan dati na wan sani di e pasa doronomo, a e pasa bifo wan sma dopu . . . èn a e go doro sosrefi baka te wan sma dopu”.
^ paragraaf 16 A Waktitoren fu 1 februari 2003, bladzijde 15-18 e fruteri moro fu a fasi fa wi musu si den swakiwan èn fa wi kan yepi den.
San yu ben sa piki?
• Fa wi kan leri trawan fu du san Yesus komanderi wi fu du?
• Sortu sani wan nyun disipel kan leri fu trawan na ini a gemeente?
• San wi kan du fu yepi den wan di kon swaki na yeye fasi?
• Sortu deki-ati nanga trowstu wi e kisi fu a pramisi fu Yesus, „Mi sa de nanga unu ala den dei”?
[Aksi fu a tori disi]
[Prenki na tapu bladzijde 15]
Wi musu gi sma leri èn wi musu sori den tu fa fu du san den leri
[Prenki na tapu bladzijde 17]
Wan nyun disipel e leri prenspari sani te a e luku na eksempre fu trawan