Na Gado e meki taki wi e kisi problema?

DI NA umapikin fu Marion gro kon bigi, dan a kisi seryusu mankeri na en edetonton. * Sobun, Marion du san furu fu wi ben o du na ini so wan situwâsi. A begi Gado fu yepi en. „Mi no ben man memre taki oiti mi ben firi so. Mi ben de leki mi no man du nowan sani, èn mi ben firi leki na mi wawan de”, na so Marion taki. Bakaten, a situwâsi fu en umapikin kon moro takru, èn Marion bigin tweifri na Gado. „Fu san ede disi e pasa?”, na so a ben e aksi ensrefi. A no ben man frustan fa wan lobi-ati Gado di e broko en ede nanga libisma, ben kan gowe libi en.

A sani di pasa nanga Marion na wan sani di furu sma e ondrofeni. Furu sma na heri grontapu firi taki Gado gowe libi den na a ten di den ben abi en fanowdu trutru. Baka di sma kiri a granpikin fu Lisa, dan Lisa taki: „Te now ete mi e aksi misrefi fu san ede Gado e gi pasi taki den sortu ogri disi e pasa. Mi no lasi ala bribi na ini Gado, ma a bribi fu mi no de so tranga moro leki fosi.” Wan uma ben abi den srefi sortu firi disi di a beibi fu en lasi libi na wan ogri-ati fasi. A taki: „Gado no trowstu mi di a sani disi pasa. A no sori mi taki a e broko en ede nanga mi, noso taki a abi sari-ati nanga mi.” Na uma disi ben taki moro fara: „Noiti mi sa gi Gado pardon.”

Trawan e kisi bita-ati gi Gado te den e luku san e pasa lontu den. Den e si fa pôtifasi lai na son kondre, fa sma e dede fu angri, fa sma di lowe gi orloku no sabi san fu du, fa bun furu pikin no abi papa nanga mama moro fu di den dede fu AIDS, èn fa tra sortu siki e pina milyunmilyun sma. Te den sortu sani disi e pasa, noso te tra sortu rampu e pasa, dan furu sma e krutu Gado fu di den feni taki a no e du noti fu tyari wan kenki kon na ini a situwâsi disi.

Ma te yu e luku en bun, dan a no Gado e meki taki libisma abi so furu problema. Fu taki en leti, nofo reide de fu bribi taki Gado sa tyari wan kaba kon na den ogri di e miti libisma. Grantangi drai a bladzijde go na a tra artikel, so taki yusrefi kan si taki Gado e broko en ede nanga wi trutru.

[Futuwortu]