Wan brifi gi Noa
Wan brifi gi Noa
„LOBI Noa, na omeni tron kaba mi leisi fu yu na ini Bijbel èn fu a fasi fa yu ben bow wan ark di ben meki taki yu nanga yu osofamiri pasa a Frudu libilibi.”
Na so wan meisje di abi 15 yari èn di nen Minnamaria, ben bigin nanga a brifi fu en. A ben teki prati na wan strei pe sma ben e luku suma e skrifi den moro moi brifi. Studenti di abi 14 yari te go miti 21 yari ben kan teki prati na a strei disi. A strei disi ben seti nanga yepi fu a postkantoro fu Finland, na organisâsi fu sma di e horibaka gi a tongo di den e taki na ini Finland, èn na organisâsi fu sma di e skrifi buku na ini a tongo dati. Den wan di ben e teki prati, ben musu skrifi wan brifi di ben abi fu du nanga wan buku. Den ben kan skrifi a brifi gi a skrifiman fu a buku, noso gi wan fu den sma di kari na ini a buku. Fu ala den brifi fu den studenti, den skoromeester nanga skoromisi ben teki 1400 brifi èn den ben seni den go na a grupu fu sma di ben o luku sortuwan moro moi. A grupu disi ben puru a moro moi wan fu den 1400 brifi disi. Den ben puru sosrefi, tin brifi di ben teki a di fu tu presi, nanga tin tra brifi di ben teki a di fu dri presi. Minnamaria ben breiti fu yere taki a brifi fu en ben de ini a grupu fu brifi di ben teki a di fu dri presi.
Fu san ede Minnamaria, di de wan yongu studenti, ben skrifi wan brifi gi Noa, wan man di libi sowan 5000 yari pasa? A e taki: „Bijbel na a fosi buku di mi ben prakseri. Den sma di Bijbel e taki fu den, na sma di mi kon sabi heri bun. Mi leisi so furu fu den, taki gi mi a gersi leki den de na libi ete. Mi ben frukisi fu skrifi wan brifi gi Noa, fu di a libi fu en ben span èn a ben de heri tra fasi leki a di fu mi.”
Na a kaba fu a brifi di Minnamaria ben skrifi gi Noa, a ben skrifi den wortu disi: „Te now ete yu na wan eksempre fu wan sma di sori bribi, èn wan sma di gi yesi na Gado. A fasi fa yu libi, e gi ala sma di e leisi Bijbel deki-ati fu sori bribi tu.”
A brifi disi fu wan yongu sma di e leisi Bijbel, e sori krin taki Bijbel ’de libilibi èn taki a abi krakti’ tapu sma, awinsi den yongu noso owru.—Hebrewsma 4:12.