„A bosroiti fu Yehovah” no abi misi

„Meki mi taki fu a bosroiti fu Yehovah; a taigi mi: ’Yu na mi manpikin . . . Aksi mi, so taki mi kan gi yu den nâsi leki a gudu fu yu.’”—PSALM 2:7, 8.

1. Sortu bigi difrenti de na mindri a prakseri fu Gado èn a di fu den nâsi?

YEHOVAH GADO abi wan sani na prakseri gi libisma èn gi a grontapu. Den nâsi abi wan sani na prakseri tu. Ma wan bigi difrenti de na mindri a prakseri fu Gado èn a di fu den nâsi! Wi musu fruwakti taki disi de so, bika Gado e taki: „Soleki fa den hemel hei moro grontapu, na so den pasi fu mi hei moro den pasi fu unu, èn den denki fu mi hei moro den denki fu unu.” Wi kan de seiker taki den prakseri fu Gado o kon tru, bika a e taki moro fara: „Neleki fa na alen, nanga a snew, e saka kon fu hemel èn no e drai go baka na a presi dati, boiti efu trutru a e nati grontapu èn e meki a gi froktu èn e meki a sproiti, èn siri e gi trutru na a saiman èn brede na a sma di e nyan, na so mi wortu di e komoto na mi mofo, sa sori taki a de. A no sa drai kon baka na mi sondro bakapisi, ma seiker a sa du a sani di mi abi prisiri na ini, èn fu tru, a sa abi bun bakapisi nanga a sani di mi ben seni en go du.”—Yesaya 55:9-11.

2, 3. San a di fu tu psalm e sori krin, ma sortu aksi e opo kon?

 ² A di fu tu psalm e sori krin taki den prakseri fu Gado di abi fu du nanga a Mesias Kownu fu en, sa kon tru seiker. A skrifiman fu a di fu tu psalm ben de Kownu David fu owruten Israel, èn Gado ben meki a skrifi na fesi taki wan prenspari ten ben o kon pe den nâsi ben o bruya. Den tiriman fu den nâsi ben o opo densrefi teige Yehovah Gado nanga en Salfuwan. Ma a psalm skrifiman ben singi sosrefi: „Meki mi taki fu a bosroiti fu Yehovah; a taigi mi: ’Yu na mi manpikin . . . Aksi mi, so taki mi kan gi yu den nâsi leki a gudu fu yu èn den kabapisi fu grontapu leki wan sani di de fu yusrefi.’”—Psalm 2:7, 8.

³ San „a bosroiti fu Yehovah” wani taki gi den nâsi? Sortu krakti a abi tapu ala libisma? Iya, san den sani di o pasa soleki fa Gado bosroiti wani taki gi ala sma di e frede Gado èn di e leisi a di fu tu psalm?

Den pipel e bruya

4. Fa yu ben o fruteri syatu sortu prenspari sani skrifi na ini Psalm 2:1, 2?

⁴ Na a bigin fu a singi fu en, a psalm skrifiman e taki fu den sani di den nâsi nanga den tiriman e du. A e singi: „Fu san ede den pipel ben e bruya èn fu san ede den sma fu den kondre ben e tan krutukrutu fu wan soso sani? Den kownu fu grontapu opo tanapu èn den hei man fu kondre srefi kon makandra leki wán man teige Yehovah èn teige en salfuwan.”—Psalm 2:1, 2. *

5, 6. Fu sortu „soso sani” den sma fu den kondre „ben e tan krutukrutu”?

⁵ Fu sortu „soso sani” den sma fu den kondre na ini a ten disi „ben e tan krutukrutu”? Na presi taki den e saka densrefi ondro a Salfuwan fu Gado, di de a Mesias, noso Krestes, dan den sma fu den kondre „ben e tan krutukrutu” noso den e tan denki fu fasi fa den kan tan abi makti. Den wortu disi fu a di fu tu psalm ben kon tru sosrefi na ini a fosi yarihondro G.T., di den Dyu tiriman nanga den tiriman fu Rome ben span anu makandra fu kiri a sma di Gado ben o poti leki Kownu, namku Yesus Krestes. Ma a moro prenspari kontru fu a psalm disi bigin na ini 1914, di Yesus tron Kownu na hemel. Sensi a ten dati, nowan politiek tirimakti na grontapu saka ensrefi ondro a Kownu di Gado poti.

⁶ San a psalm skrifiman ben wani sori di a aksi ’fu san ede den sma fu den kondre ben e tan krutukrutu fu wan soso sani’? A ben wani sori taki a sani di den abi na prakseri fu du, no wani taki noti; a de wan soso sani èn a no o kon tru kwetikweti. Den no man tyari vrede nanga wánfasi kon na grontapu. Toku, den e du ala san den man fu opo densrefi teige a tirimakti fu Gado. Fu taki en leti, leki wán man den e seti  densrefi fu go feti teige a Moro Heiwan nanga en Salfuwan. Dati na wan don sani fu tru!

A Kownu fu Yehovah di wini

7. Fa den fosi bakaman fu Yesus ben gebroiki Psalm 2:1, 2 na ini a begi fu den?

⁷ Den bakaman fu Yesus ben sori taki Psalm 2:1, 2 abi fu du nanga Yesus. Fu di a bribi fu den ben meki taki den ben e kisi frufolgu, meki den ben begi: „Almakti Masra [Yehovah], na yu meki hemel nanga grontapu nanga a se nanga ala sani di de na den ini; na yu meki wi afo David, yu futuboi, taki nanga yepi fu santa yeye: ’Fu san ede den pipel e kon bruya èn fu san ede den pipel poti ala den prakseri na soso sani? Den kownu fu grontapu opo tanapu èn den tiriman kon makandra leki wán man teige Yehovah èn teige en salfuwan.’ A ben de so, taki Herodes [Antipas], Pontius Pilatus, den trakondre sma, nanga sma fu Israel ben kon makandra tu na ini a foto disi fu opo densrefi teige Yesus, a santa futuboi fu yu di yu salfu” (Tori fu den Apostel 4:24-27; Lukas 23:1-12). * Iya, na ini a fosi yarihondro, den ben seti densrefi fu du ogri nanga Yesus, a salfu futuboi fu Gado. Ma hondrohondro yari na baka, a psalm disi ben o kon tru na wan tra fasi.

8. San Psalm 2:3 abi fu du nanga den nâsi fu a ten disi?

⁸ Di owruten Israel ben abi wan libisma kownu, soleki David, dan den heiden nâsi nanga tiriman ben kon makandra fu feti teige Gado en salfuwan di a ben poti leki kownu. Ma fa a de na ini a ten fu wi? Den nâsi na ini a ten disi no wani hori densrefi na den markitiki fu Yehovah nanga a Mesias. Fu dati ede, a de neleki den e taki: „Meki wi go priti den banti fu den èn trowe den tetei fu den gowe fu wi!” (Psalm 2:3) Den tiriman nanga den nâsi ben o weigri fu gi yesi na iniwan wet di Gado nanga en Salfuwan poti. A no de fu taki dati na fu soso den e pruberi fu priti den sortu banti disi èn fu trowe den sortu tetei disi.

Yehovah e spotu den

9, 10. Fu san ede Yehovah e spotu den nâsi?

⁹ Yehovah no e broko en ede nanga den muiti di tiriman e du fu tiri sondro a yepi fu En. A di fu tu psalm e taki moro fara: „A Sma di e sidon na hemel, sa lafu; Yehovah srefi sa spotu den” (Psalm 2:4). Gado e go doro fu du san a abi na prakseri; a e du neleki den tiriman disi no de prenspari srefisrefi. A e lafu den fu di den abi bigifasi èn a e spotu den. Meki den dyaf fu den sani di den abi na prakseri fu du. Yehovah e teki den leki spotupopki. A e lafu fu di na fu soso den e opo densrefi teige en.

¹⁰ Na ini wan tra psalm, David e taki fu den sma nanga den nâsi di de feanti fu Yehovah. A e singi: „Yu o Yehovah Gado fu den legre, na a Gado fu Israel. Grantangi, wiki fu poti yu prakseri na ala den nâsi. No sori bun-ati gi nowan  ogri sma di e tori trawan. Den e tan kon baka na netiyuru; den e tan bari leki wan dagu èn den e waka lontu na ini a heri foto. Luku! Den e meki wortu kuku komoto na den mofo; feti-owru de na den mofobuba, bika suma e arki? Ma yusrefi, o Yehovah, sa lafu den; yu sa spotu ala den nâsi” (Psalm 59:5-8). Yehovah e lafu a don fasi fa den nâsi e dyaf èn e bruya, aladi den e suku fu opo densrefi teige en.

11. San e pasa te den nâsi e pruberi fu tapu Gado fu du san a abi na prakseri?

¹¹ Den wortu fu Psalm 2 e tranga a bribi di wi abi taki Gado man lusu iniwan problema. Wi kan de seiker taki ala ten a e du san a wani èn noiti a e gowe libi den loyaal futuboi fu en (Psalm 94:14). Sobun, san e pasa te den nâsi e du muiti fu tapu Yehovah fu du san a abi na prakseri? Soleki fa a psalm disi e taki, dan Gado „sa taki nanga den ini en atibron”, neleki fa bigi dondru e bari. Sosrefi, neleki faya di e koti na hemel, „a sa bruya den”.—Psalm 2:5.

Gado poti en Kownu

12. Pe Gado ben o poti en Kownu, soleki fa Psalm 2:6 e taki?

¹² A sani di Yehovah e taki now nanga yepi fu a psalm skrifiman, e bruya den nâsi srefisrefi. Gado e taki: „Mi, iya mi, poti mi kownu na tapu Sion, mi santa bergi” (Psalm 2:6). A Sinaibergi ben de wan bergi na ini Yerusalem pe Gado ben poti David leki kownu. Ma a Mesias Kownu no o sidon na tapu wan kownusturu na ini a foto dati noso na iniwan tra presi na grontapu. Fu taki en leti, Yehovah poti Yesus Krestes kaba leki a Mesias Kownu na tapu a Sionbergi na hemel.—Openbaring 14:1.

13. Sortu frubontu Yehovah meki nanga en Manpikin?

¹³ Now a Mesias Kownu e opo en mofo fu taki. A e taki: „Meki mi taki fu a bosroiti fu Yehovah [di meki wan Kownukondre frubontu nanga en Manpikin kaba]; a [Yehovah Gado] taigi mi: ’Yu na mi manpikin; tide mi tron yu papa’” (Psalm 2:7). Krestes ben taki fu a Kownukondre frubontu di a taigi den apostel fu en: „Unu na den wan di tan nanga mi di mi kisi tesi; èn mi e meki wan frubontu nanga unu, soleki fa mi Tata meki wan frubontu nanga mi, fu wan kownukondre.”—Lukas 22:28, 29.

14. Fu san ede wi kan taki dati Yesus abi ala reti fu de Kownu?

¹⁴ Soleki fa Psalm 2:7 taki na fesi, dan Yehovah sori krin taki Yesus na En Manpikin. A ben du disi di Yesus teki dopu, èn di A gi Yesus wan opobaka fu libi leki wan yeye na hemel (Markus 1:9-11; Romesma 1:4; Hebrewsma 1:5; 5:5). Iya, a Kownu fu a hemel Kownukondre fu Gado, na a wan-enkri gebore Manpikin fu en (Yohanes 3:16). Leki bakapikin fu Kownu David, Yesus abi ala reti fu tron Kownu (2 Samuel 7:4-17; Mateyus 1:6, 16). Soleki fa a psalm disi e sori, dan Gado e taigi en Manpikin: „Aksi mi, so taki mi kan gi yu den nâsi leki a gudu fu yu èn den kabapisi fu grontapu leki wan sani di de fu yusrefi.”—Psalm 2:8.

15. Fu san ede Yesus e aksi fu kisi den nâsi leki wan gudu?

¹⁵ Baka Yehovah, a Kownu, noso a Manpikin fu Gado, abi a moro bigi makti. Yehovah e frutrow Yesus, fu di a sori taki a tan getrow di a kisi  tesi. Boiti dati, Yesus abi reti leki a Fosi geborewan fu Gado. Fu tru, Yesus Krestes „na a prenki fu Gado di wi no kan si, a fosi geborewan fu ala den sani di Gado meki” (Kolosesma 1:15). A wan-enkri sani di a musu du, na fu aksi Gado èn Gado ’e gi en den nâsi leki a gudu fu en èn den kabapisi fu grontapu leki wan sani di de fu ensrefi’. Yesus e aksi disi fu di a ’lobi den manpikin fu libisma trutru’, èn fu di a e prisiri srefisrefi fu du a wani fu en hemel Tata di abi fu du nanga grontapu èn nanga libisma.—Odo 8:30, 31.

A bosroiti di Yehovah teki teige den nâsi

16, 17. San o pasa nanga den nâsi, soleki fa skrifi na ini Psalm 2:9?

¹⁶ A di fu tu psalm e kon tru nownow, na ini a pisi ten fu a denoya fu Yesus Krestes di wi no man si nanga ai. Sobun, san o pasa nanga den nâsi na ini a pisi ten disi? Heri esi, a Kownu sa du san Gado meki bekènti: „Yu sa broko den [den nâsi] nanga wan isri tiriman-tiki, yu sa broko den na pisipisi, neleki den na wan tokotoko patu.”—Psalm 2:9.

¹⁷ Den tiriman-tiki fu den kownu fu owruten ben e sori taki a kownu abi makti. Sonwan fu den tiriman-tiki ben meki fu isri, neleki a wan fu san a psalm disi e taki. Na agersitori di gebroiki dyaso, e sori o makriki Krestes a Kownu sa pori den nâsi. Efu wan sma naki tranga nanga wan isri tiriman-tiki na tapu wan tokotoko patu fu wan patu-bakriman, dan a patu o broko na someni pisi taki noiti a no man meki moro.

18, 19. San den kownu fu grontapu musu du efu den wani taki Gado feni den bun?

¹⁸ Den tiriman fu den kondre musu fu kisi so wan pori nomonomo? Nôno, bika a psalm skrifiman e gi den a rai disi: „Now, o kownu, sori taki unu abi koni fu man si sani krin; meki den poti unu tapu a reti pasi, o krutuman fu grontapu” (Psalm 2:10). Den kownu e kisi a deki-ati fu poti seryusu prakseri; den musu sori taki den abi koni fu man si sani krin. Den musu kon frustan taki den sani di den abi na prakseri fu du, na fu soso, èn taki disi de heri tra fasi leki den bun sani di Gado Kownukondre sa du gi ala libisma.

¹⁹ Efu den kownu fu grontapu wani taki Gado feni den bun, dan den musu kenki a fasi fa den e tyari densrefi. Den e kisi a rai fu „dini Yehovah nanga frede èn prisiri nanga beifi” (Psalm 2:11). San o de a bakapisi te den e du disi? Na presi fu bruya, den kan abi prisiri fu di a Mesias Kownu e gi den moi howpu. A de tumusi prenspari taki den tiriman fu grontapu tapu nanga a bigifasi èn a heimemre di den e sori na ini a fasi fa den e tiri. Boiti dati, den abi fu kenki sondro fu draidrai; den musu kon kisi koni fu man si krin taki Yehovah na a Moro Hei Tiriman, èn taki a wan-enkri sani fu du, na fu saka densrefi ondro a makti fu Gado nanga a Mesias Kownu fu en.

„Bosi a Manpikin”

20, 21. San a wani taki fu „bosi a Manpikin”?

²⁰ Now, Psalm 2 e gi wan kari di e sori sari-ati gi den tiriman fu den nâsi. Na presi taki den e kon makandra fu opo densrefi teige Gado, den e kisi a rai: „Bosi a manpikin so taki En [Yehovah Gado] ati no bron èn unu no lasi gowe fu a pasi, bika en atibron e opo kon makriki” (Psalm 2:12a). Te a Moro Hei Masra Yehovah e du soleki fa a bosroiti, dan ala sma musu poti prakseri. Di Gado poti en Manpikin na tapu a kownusturu, den tiriman fu grontapu ben musu tapu fu „krutukrutu fu wan soso sani”. Den ben musu saka densrefi ondro a Kownu wantewante èn den ben musu de klariklari fu gi yesi na en.

²¹ Fu san ede den musu „bosi a manpikin”? Na a ten di a psalm disi skrifi, dan sma ben gwenti fu bosi makandra fu sori taki den na mati. A ben de a gwenti tu fu bosi wan sma fu gi en wan switikon te a ben kon na yu oso pe yu nanga en ben o abi wan switi ten makandra. Wan sma ben kan bosi wan trawan tu fu sori taki a de getrow, noso loyaal (1 Samuel 10:1). Na ini a vers disi fu a di fu tu psalm, Gado e taigi den nâsi fu bosi en Manpikin, noso fu gi en wan switikon leki salfu Kownu.

22. Na sortu warskow den tiriman fu den nâsi musu gi yesi?

 ²² Den wan di e weigri fu saka densrefi ondro a tirimakti fu a Kownu di Gado poti, e afrontu Yehovah. Den no wani si kwetikweti taki Yehovah Gado abi a reti èn ala a makti fu tiri hemel nanga grontapu, èn taki a man poti wan Kownu di de a moro bun tiriman gi libisma. Den tiriman fu den nâsi sa si taki a faya atibron fu Gado o kon na den tapu wantronso te den e pruberi fu du san den abi na prakseri. „En atibron e opo kon makriki”; esi-esi a o atibron èn nowan sma o man tapu en fu du san a wani. Den tiriman fu den kondre musu de nanga tangi taki Gado e warskow den èn den musu gi yesi na a warskow. Te den e du disi, dan den o tan na libi.

23. San ibriwan sma kan du ete?

²³ A tumusi moi psalm disi e kaba so: „Koloku fu ala den wan di e suku kibri na en [Yehovah]” (Psalm 2:12b). Ten de ete gi ibriwan sma fu kisi kibri. Srefi ibriwan tiriman di e horibaka gi den sani di den nâsi e du, kan kisi kibri ete. Den kan lowe go na Yehovah, di e kibri den nanga yepi fu a Kownukondre tirimakti. Ma den sma disi sa musu du wan sani bifo a Mesias Kownukondre pori den nâsi di e opo densrefi teige a tiri disi.

24. Fa wi kan abi wan moro bun libi na ini a bruya grontapu disi?

²⁴ Te wi e studeri den Buku fu Bijbel fayafaya èn te wi e gebroiki den rai na ini wi libi, dan nownow kaba wi kan kisi wan moro bun libi na ini a bruya grontapu disi. Te wi e teki a rai fu Bijbel, dan wi sa abi wan moro koloku osofamiri banti, èn wi sa kon fri fu furu fu den sani fu a grontapu disi di e gi sma broko-ede èn di e meki sma frede. Te wi e hori wisrefi na Bijbel markitiki, dan wi o abi a frutrow taki wi e plisi a Mekiman. A Moro Hei Tiriman na a wan-enkri sma di kan gi wi wan dyaranti gi „a libi fu now èn a libi di musu kon ete”, baka te a krin a grontapu fu den wan di e weigri fu du san reti fu di den no wani saka densrefi ondro a Kownukondre tiri.—1 Timoteyus 4:8.

25. Sortu sani wi kan fruwakti na ini a ten fu wi, fu di wi sabi taki „a bosroiti fu Yehovah” no abi misi?

²⁵ „A bosroiti fu Yehovah” no abi misi. Leki wi Mekiman, Gado sabi san na a moro bun sani gi libisma èn a sa du san a abi na prakseri, namku fu blesi den libisma di e gi yesi na en, so taki den kan abi vrede, prisiri, èn wan bun libi fu têgo na ini a Kownukondre fu en lobi Manpikin. A profeiti Danièl ben skrifi fu a ten fu wi, taki: „Na ini den dei fu den kownu dati, a Gado fu hemel sa opo wan kownukondre di noiti no sa kisi pori. . . . A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu” (Danièl 2:44). Fu dati ede, a de tumusi prenspari nownow fu „bosi a Manpikin” en fu dini a Moro Hei Masra, Yehovah!

[Futuwortu]

San yu ben sa piki?

• Fu sortu „soso sani” den sma fu den kondre „ben e tan krutukrutu”?

• Fu san ede Yehovah e spotu den nâsi?

• San na a bosroiti di Gado teki teige den nâsi?

• San a wani taki fu „bosi a manpikin”?

[Aksi fu a tori disi]

[Prenki na tapu bladzijde 16]

David ben singi fu a Mesias Kownu di wini

[Prenki na tapu bladzijde 17]

Den tiriman nanga a pipel fu Israel ben span anu makandra teige Yesus Krestes

[Prenki na tapu bladzijde 18]

Gado poti Krestes leki Kownu na tapu a Sinaibergi na hemel