Den wondru fu Yesus—Den pasa trutru?

„SMA tyari furu sma di ben abi ogri yeye na den tapu, kon na Yesus [Krestes]; wán sani nomo a taki èn den yeye ben gowe libi den sma, èn a ben meki ala sma di no ben firi bun, kon betre” (Mateyus 8:16). „A [Yesus] opo, dan a bari a winti èn a taigi a se: ’Un tapu! Un tan tiri!’ Dan a winti saka èn ala sani kon tiri” (Markus 4:39). Fa yu e denki fu den tori disi? Yu e bribi taki den tori disi na trutru sani di pasa fositen? Noso yu e denki taki den na anansitori nomo?

Furu sma na ini a ten disi e tweifri efu den wondru di Yesus ben du, pasa trutru. Na ini a ten disi sma go na fesi ini a tori fu sabidensi. Den meki wrokosani fu luku stari èn fu luku pikinpikin sani di wi no man si nanga wi ai. Sma man ondrosuku sani na hemel soleki stari, munkenki nanga den tra planeiti. Den man kenki sani srefi na ini wan cel fu libisani. Fu di sma man du den kefalek sani disi now, meki den e si en leki wan lawlaw sani te den e yere taki wondru e pasa, noso taki sani e pasa nanga yepi fu wan mekisani di hei moro libisma.

Son sma e feni taki den tori di e taki fu wondru di pasa, na soso anansitori. Na ini wan buku wan skrifiman e fruteri fa en e prakseri fu Yesus. A e skrifi dati den tori di e taki fu den wondru di Krestes du, na soso „wan fasi fu meki reklame” gi a Kresten bribi.

Trawan e si den wondru di Yesus du leki sani di sma e fruteri fu kori trawan krinkrin. Son tron sma e feni taki na Yesus srefi ben e kori sma. Justinus Martyr di ben libi na ini a di fu tu yarihondro G.T., sori taki den sma di ben feni fowtu na Yesus „ben taki  srefi dati a de wan towfruman èn wan man di e kori a pipel”. Son sma e taki dati Yesus „no ben du den wondru fu en leki wan Dyu profeiti, ma leki wan towfruman di ben kisi leri na den heiden tempel”.

Fu san ede sma e taki dati wondru no kan pasa

Kande yu e denki taki wan reide musu de fu san ede sma e tweifri efu den sani disi tru, èn fu san ede den no wani bribi taki wondru ben pasa trutru. Den sma disi e feni en wan muilek sani èn den e feni dati a no kan kwetikweti taki wan mekisani di hei moro libisma, kan meki wondru e pasa. „A de krin taki wondru no e pasa kwetikweti”, na so wan yongu sma ben taki di e tweifri efu wan Gado de trutru. A ben sori go na den wortu fu a filosofiaman David Hume fu Skotland di ben libi na ini a di fu 18 yarihondro. A filosofiaman disi ben skrifi: „Te wi e luku den wet fu a naturu, dan a no kan de so kwetikweti taki wondru e pasa.”

Ma furu sma ben o luku bun fu taki dati wan sani di pasa no kan, soso fu di den no man fruklari dati. The World Book Encyclopedia e taki dati wan wondru na „wan sani di sma no man fruklari nanga yepi fu san den sabi fu den wet fu a naturu”. Te yu e luku san a buku disi e taki, dan sani soleki fu go na munkenki, fu taki nanga wan sma na cellulair, nanga den sateliet di sma e gebroiki fu kan feni den pasi, ben o gersi „wondru” gi sma di ben libi wán hondro yari pasa. A no de wan koni sani kwetikweti fu taki dati wondru no kan pasa soso fu di wi no abi a sabi now fu fruklari dati.

Te wi go ondrosuku wan tu buweisi na ini Bijbel di abi fu du nanga den wondru di Yesus Krestes ben du, dan san dati o tyari kon na krin? Den wondru di Yesus du pasa trutru?