Yu e prisiri na ini „a wet fu Yehovah”?
Yu e prisiri na ini „a wet fu Yehovah”?
„Koloku fu a sma . . . [di] en prisiri de na ini a wet fu Yehovah.”—PSALM 1:1, 2.
1. Fu san ede wi de koloku leki futuboi fu Yehovah?
YEHOVAH e yepi wi èn a e blesi wi leki getrow futuboi fu en. A tru taki wi e kisi furu tesi. Ma wi de koloku trutru sosrefi. Disi no de fu fruwondru, bika wi e dini „a koloku Gado”, èn en santa yeye e meki taki wi ati e firi prisiri (1 Timoteyus 1:11; Galasiasma 5:22). Prisiri na te wan sma e firi koloku trutru fu di a e fruwakti fu kisi wan bun sani. Èn a no de fu taki dati wi hemel Tata e gi wi bun presenti trutru (Yakobus 1:17). Dati meki wi de so koloku!
2. Fu sortu psalm wi o taki?
2 A wortu „koloku” de fu feni furu tron na ini a buku Psalm. Fu eksempre, disi de so nanga Psalm 1 nanga 2. Den fosi bakaman fu Yesus Krestes ben taki dati Kownu David fu Israel ben skrifi a di fu tu psalm (Tori fu den Apostel 4:25, 26). Bijbel no e kari a nen fu a sma di Gado gebroiki fu skrifi a fosi psalm, ma a skrifiman e bigin en singi nanga den wortu disi: „Koloku fu a sma di no waka na ini a rai fu den ogriwan” (Psalm 1:1). Meki wi luku na ini na artikel disi èn na ini na artikel di e kon baka a wan disi, fa Psalm 1 nanga 2 e sori wi fu san ede wi musu prisiri.
Fa fu de trutru koloku
3. San na wan tu sani di e meki taki wan sma de koloku te a e hori ensrefi na den wet fu Gado, soleki fa Psalm 1:1 e sori?
3 Psalm 1 e sori fu san ede wan sma de koloku te a e hori ensrefi na den wet fu Gado. A psalm skrifiman e fruteri fu wan tu sani di e meki taki wan sma e kisi a sortu koloku dati. A e singi: „Koloku fu a sma di no waka na ini a rai fu den ogriwan, èn na ini a pasi fu sondari a no tanapu, èn na ini a sturu fu den spotuman a no sidon.”—Psalm 1:1.
4. Fa a fasi fa Sakaria nanga Elisabet ben e tyari densrefi, de wan eksempre gi wi?
4 Efu wi wani de koloku trutru, dan wi musu gi yesi na den regtfardiki markitiki fu Yehovah. Sakaria nanga Elisabet ben e prisiri nanga a grani di den ben kisi fu tron a papa nanga mama fu Yohanes a Dopuman. Den „ben de regtfardiki na fesi Gado fu di den ben tyari densrefi sondro fowtu akruderi ala den komando nanga wet fu Yehovah” (Lukas 1:5, 6). Wi kan de koloku te wi e tyari wisrefi na a srefi fasi disi, èn te wi e weigri fu „waka na ini a rai fu den ogriwan”, noso te wi e weigri fu teki na ogri rai fu den.
5. San kan yepi wi fu no kon tapu „a pasi fu sondari”?
5 Te wi e kakafutu gi a denki fu ogrisma, dan wi no sa ’tanapu tapu a pasi fu sondari’. Fu taki en leti, wi no o de na nowan presi pe den de furu tron, sobun wi no o de na den presi pe den abi prisiriten di no fiti. San wi musu du te wi e kisi a firi fu abi wan prati na a sondu fu sma di e tyari densrefi na wan fasi di Bijbel e krutu? Meki wi aksi Gado na ini begi fu yepi wi fu tyari wisrefi leki fa na apostel Paulus ben taki: „No kon na ondro a srefi tyatyari nanga sma di no e bribi. Iya, san regtfardikifasi abi fu du nanga kruktudu? Noso, san leti abi fu du nanga dungru?” (2 Korentesma 6:14) Te wi e frutrow tapu Gado èn te wi abi „wan krin ati”, dan wi sa kakafutu gi a denki fu sondari èn gi a fasi fa den e tyari densrefi. Na presi fu dati, wi sa abi wan krin denki, wi sa tyari wisrefi na wan fasi di fiti, èn wi sa abi „bribi di de sondro hoigrifasi”.—Mateyus 5:8; 1 Timoteyus 1:5.
6. Fu san ede wi musu luku bun nanga spotuman?
6 Efu wi wani plisi Yehovah, dan a no de fu taki dati wi ’no musu sidon na ini a sturu fu spotuman’. Son sma e spotu trawan di e hori densrefi na den wet fu Gado, ma na ini den „lasti dei” disi, sma di ben de Kresten fosi, ma di fadon komoto na bribi, e spotu na wan tumusi ogri-ati fasi. Na apostel Petrus ben warskow den Kresten brada nanga sisa fu en: „Lobiwan, . . . ini a fosi presi unu sabi disi, taki na ini den lasti dei spotuman sa kon nanga den spotu fu den, di sa du sani akruderi den eigi lostu èn den e taki: ’Pe a denoya disi fu en de di den ben pramisi? Bika sensi den dei di den afo fu wi fadon na sribi ini dede, ala den sani ben tan soifri leki fa a ben de sensi di Gado bigin meki sani’” (2 Petrus 3:1-4). Efu noiti wi no e ’sidon na ini a sturu fu spotuman’, dan wi sa wai pasi gi a rampu di o miti den seiker.—Odo 1:22-27.
7. Fu san ede wi musu poti prakseri na den wortu fu Psalm 1:1?
7 Efu wi no e poti prakseri na den biginwortu fu Psalm 1, dan wi kan lasi a yeyefasi di wi kon kisi fu di wi studeri den Buku fu Bijbel. Fu taki en leti, a libi fu wi kan kon moro ogri srefi. Fosi, wi kan bigin go na baka na yeye fasi te wi e teki a rai fu ogrisma. Dan kande wi o bigin abi demakandra nanga den doronomo. Te fu kaba, wi kan tron spotuman di fadon komoto na bribi srefi. A no de fu taki dati te wi de mati fu ogrisma, dan wi kan kon kisi takru denki èn disi kan pori a matifasi di wi abi nanga Yehovah Gado (1 Korentesma 15:33; Yakobus 4:4). Meki wi no gi pasi noiti taki so wan sani pasa nanga wi!
8. San sa yepi wi fu tan poti prakseri na yeye afersi?
8 Begi sa yepi wi fu poti ala wi prakseri na yeye afersi èn fu no abi demakandra nanga ogrisma. „No broko un ede nanga nowan sani”, na so Paulus skrifi, „ma na ini ibriwan sani, meki Gado kon sabi san unu wani fu di unu e begi èn e aksi en tangitangi aladi unu e taigi en grantangi tu; èn a vrede fu Gado, di pasa ala suma frustan, sa kibri un ati nanga un frustan nanga yepi fu Krestes Yesus.” Na apostel ben gi a deki-ati fu poti prakseri na sani di tru, sani di seryusu, sani di regtfardiki, sani di krin, sani di bun fu lobi, sani di sma e taki bun fu den, sani di Gado feni bun, èn sani di warti fu sma prèise (Filipisma 4:6-8). Meki wi du soleki fa Paulus gi wi a rai èn meki wi no lagi wisrefi noiti fu du leki den ogrisma.
9. Fa wi e pruberi fu yepi ala sortu sma, aladi wi e weigri fu du ogri?
9 Aladi wi e weigri fu du ogri, toku wi e gi trawan kotoigi na wan switi fasi, neleki fa na apostel Paulus ben taki nanga Granman Feliks fu Rome fu sani soleki ’regtfardikifasi, a dwengi di sma musu dwengi densrefi, èn a krutu di sma o kisi’ (Tori fu den Apostel 24:24, 25; Kolosesma 4:6). Wi e preiki a bun nyunsu fu a Kownukondre gi ala sortu sma, èn wi e handri na wan switi fasi nanga den. Wi sabi seiker taki den wan ’di abi a yoisti denki fu man kisi têgo libi’ sa tron bribiman èn den sa abi prisiri na ini a wet fu Gado.—Tori fu den Apostel 13:48.
En prisiri de na ini a wet fu Yehovah
10. San sa yepi wi fu poti den wortu fu Bijbel dipi na ini wi frustan nanga ati te wi e studeri?
10 A psalm skrifiman e go doro fu taki fu a koloku man: „En prisiri de na ini a wet fu Yehovah, èn na ini en a e leisi nanga wan safri sten dei nanga neti” (Psalm 1:2). Leki futuboi fu Gado, wi e ’prisiri na ini a wet fu Yehovah’. Son leisi te wi e studeri èn e denki dipi fu Gado Wortu, dan wi kan leisi „nanga wan safri sten”, so taki wi kan yere den wortu di wi e leisi. Efu wi e du disi te wi e leisi iniwan pisi fu den Buku fu Bijbel, dan dati sa yepi wi fu poti den wortu dati dipi na ini wi frustan nanga ati.
11. Fu san ede wi musu leisi Bijbel „dei nanga neti”?
11 „A getrow èn koni srafu” gi wi deki-ati fu leisi Bijbel ibri dei (Mateyus 24:45). Fu di wi wani trutru fu kon sabi moro bun san na a boskopu di Yehovah abi gi libisma, meki a bun fu leisi Bijbel „dei nanga neti”, iya, wi kan leisi en srefi te wan sani e meki taki wi no man sribi. Petrus ben gi wi a deki-ati: „Leki nyunyun pikin, kweki wan angri gi a soifri merki di de fu a wortu, so taki nanga yepi fu dati unu kan gro kon kisi frulusu” (1 Petrus 2:1, 2). Yu e prisiri fu leisi Bijbel ibri dei èn fu denki dipi na neti fu Gado Wortu nanga den sani di a abi na prakseri fu du? A psalm skrifiman ben prisiri fu du dati.—Psalm 63:6.
12. San wi o du te wi e prisiri na ini a wet fu Yehovah?
12 Efu wi wani de koloku fu têgo, dan wi musu prisiri na ini a wet fu Gado. A wet disi de volmaakti èn regtfardiki, èn wi sa kisi furu wini te wi e hori wisrefi na dati (Psalm 19:7-11). A disipel Yakobus ben skrifi: „A sma di e luku finifini na ini a volmaakti wet di e meki sma kon fri èn di e tan du dati, sa de koloku, bika a no sa tron wan sma di e frigiti san a yere, ma a sa tron wan sma di e du a wroko” (Yakobus 1:25). Efu wi e prisiri na ini a weti fu Yehovah trutru, dan nowan dei o pasa sondro taki wi poti prakseri na yeye afersi. Iya, wi sa kisi a firi fu ’ondrosuku den dipi sani fu Gado’ èn fu tan poti Kownukondre afersi na a fosi presi na ini wi libi.—1 Korentesma 2:10-13; Mateyus 6:33.
A e tron leki wan bon
13-15. Na sortu fasi wi kan de leki wan bon di prani na wan presi pe furu watra de?
13 A psalm skrifiman e taki moro fara fu na opregti sma: „Fu tru, a sa tron leki wan bon di prani pe watra e lon pasa, di e gi en eigi froktu te en ten doro, èn den wiwiri fu en no e kon flaw, èn ala san a e du sa waka bun” (Psalm 1:3). Neleki ala tra sondu libisma, na so wi di e dini Yehovah, e kisi problema na ini a libi tu (Yob 14:1). Kande wi e kisi frufolgu noso tra tesi di abi fu du nanga a bribi fu wi (Mateyus 5:10-12). Ma nanga a yepi fu Gado, wi man horidoro te den tesi disi e miti wi, neleki fa wan gosontu bon e tan tanapu, awinsi sortu bigi winti e wai.
14 Wan bon di prani na wan presi pe watra de ala ten, no e drei noiti, èn a no e dede gowe te a son faya noso na dreiten. Efu wi na sma di abi frede gi Gado, dan wi e kisi krakti fu Yehovah Gado, a Sma di abi krakti ala ten. Paulus ben e frutrow tapu Gado taki A ben o yepi en, èn dati meki a taki: „Mi man du ala sani fu di en [Yehovah] e gi mi krakti” (Filipisma 4:13). Te a santa yeye fu Yehovah e tiri wi èn e gi wi krakti na yeye fasi, dan a no o de so taki wi e flaw, taki wi no e meki froktu, noso taki wi e dede gowe na yeye fasi. Na presi fu dati, wi o meki froktu na ini a diniwroko gi Gado èn wi o sori den froktu fu en yeye tu.—Yeremia 17:7, 8; Galasiasma 5:22, 23.
15 Fu di a psalm skrifiman e gebroiki a Hebrew wortu di vertaal nanga „leki”, meki wi man frustan taki a e taki fu wan agersitori. A e agersi tu sani di de difrenti fu makandra, ma toku na wan spesrutu sortu fasi den de a srefi. Libisma nanga bon na tu difrenti sani. Ma a moi fasi fa wan bon e gro te a prani na wan presi pe furu watra de, ben e memre a psalm skrifiman kande na a bun libi di wan sma abi na yeye fasi te a e ’prisiri na ini a wet fu Yehovah’. Te wi e prisiri na ini a wet fu Gado, dan wi kan libi langa neleki wan bon. Fu taki en leti, wi kan libi fu têgo.—Yohanes 17:3.
16. Fu san ede èn na sortu fasi ’ala san wi e du e waka bun’?
16 Te wi e tan libi na wan opregti fasi, dan Yehovah sa yepi wi fu horidoro te tesi nanga problema e miti wi. Wi e prisiri èn wi e meki froktu na ini a diniwroko gi Gado (Mateyus 13:23; Lukas 8:15). ’Ala san wi e du e waka bun’ fu di a moro prenspari sani gi wi, na fu du a wani fu Yehovah. Fu di ala sani di Yehovah abi na prakseri e pasa trutru èn fu di wi e prisiri fu hori den komando fu en, meki wi e gro na yeye fasi (Genesis 39:23; Yosua 1:7, 8; Yesaya 55:11). Disi de so, srefi te sma e gens wi.—Psalm 112:1-3; 3 Yohanes 2.
A gersi leki den ogrisma abi wan bun libi
17, 18. (a) Nanga sortu sani a psalm skrifiman e agersi den ogrisma? (b) Fu san ede a bun libi fu ogrisma no o tan so fu ala ten, awinsi den e kisi moro nanga moro gudu?
17 A libi fu ogrisma de heri tra fasi leki a di fu den regtfardikisma! Kande a e gersi leki den ogrisma abi wan moro bun libi fu wan pisi ten èn taki den e kisi moro nanga moro gudu, ma a no e go bun nanga den na yeye fasi. Disi de krin fu si na ini den wortu fu a psalm skrifiman di e taki now: „Den ogrisma no de so, ma den de leki den buba fu tarwe-siri di a winti e wai gowe. Dati meki den ogriwan no o man tan tanapu te den e kisi krutu, èn den sondari no o man de na den konmakandra fu regtfardikiwan” (Psalm 1:4, 5). Luku taki a psalm skrifiman e taki dati „den ogrisma no de so”. A wani sori taki den ogrisma no de leki sma di e hori densrefi na den wet fu Gado, sma di a ben agersi nanga wan bon di e gi froktu èn di e libi langa.
18 Srefi te den ogrisma e kisi moro nanga moro gudu, toku den no o abi wan bun libi fu ala ten (Psalm 37:16; 73:3, 12). Den de leki a don guduman fu suma Yesus ben fruteri wan agersitori, di sma aksi en fu krutu wan tori di ben abi fu du nanga wan famirigudu di wan sma ben musu kisi. Yesus ben taigi den sma di ben de drape: „Luku bun èn kibri unsrefi gi ibri sortu bigi-ai, bika srefi te wan sma abi sani pasa marki, a libi fu en no e kon fu den sani di a abi.” Yesus ben gi wan agersitori fu sori san a ben wani taki. A ben fruteri taki a gron fu wan guduman ben gi so furu nyanyan, taki a guduman bigin denki fu broko den maksin fu en èn fu bow moro bigiwan pe a ben sa man poti ala den bun sani fu en. Ne a guduman ben denki taki a ben o nyan, dringi èn meki prisiri. Ma Gado taigi en: „Yu di no e denki, a neti disi ete den e aksi yu sili fu yu. Dan suma sa kisi den sani di yu ben tyari kon na wán?” Fu poti krakti tapu san a ben wani taki, dan Yesus taki moro fara: „Na so a e go nanga wan sma di e kibri gudu gi ensrefi, ma di no gudu na Gado ai.”—Lukas 12:13-21.
19, 20. (a) Fruteri fa sma ben e puru a buba fu a tarwe-siri na ini owruten. (b) Fu san ede Bijbel e agersi den ogrisma nanga a buba fu tarwe-siri?
19 Den ogrisma no „gudu na Gado ai”. Fu dati ede, den no abi a dyaranti taki sani sa waka bun gi den; a libi fu den de leki a fini buba fu tarwe-siri. Na ini owruten, baka te sma ben koti a tarwe, dan den ben e tyari en go na wan plata pisi gron di ben de na wan hei presi nofo tron. Drape den ben e meki meti soleki kaw, hari wan wagi na tapu a tarwe. A wagi ben abi banti nanga srapu pisi ston noso isri. Sobun, te a wagi ben e rei na tapu a tarwe, dan den tarwe-tiki ben e broko èn den buba ben e lusu fu den tarwe-siri. Baka dati, den ben e gebroiki wan sortu skopu fu trowe en go na ini a loktu te winti e wai (Yesaya 30:24). Na so den siri ben e fadon na tapu a gron baka, ma a winti ben e wai den tarwe-tiki nanga den buba gowe (Rut 3:2). Baka te den tarwe-siri ben pasa na ini wan manari fu puru ston nanga tra sani di no ben de fanowdu, dan den ben e poti en na ini maksin, noso den ben e miri en (Lukas 22:31). Ma a buba fu a tarwe no ben de moro.
20 Neleki fa den tarwe-siri ben fadon na gron èn sma ben e kibri den, aladi den ben meki a buba fu a tarwe-siri wai gowe, na so den regtfardikiwan sa tan èn den ogriwan sa wai puru. A no de fu taki dati wi breiti taki heri esi den sortu ogrisma disi no sa de moro fu têgo. Te den no de moro, dan den sma di e prisiri na ini a wet fu Yehovah sa kisi furu blesi. Iya, te fu kaba Gado sa gi têgo libi na den libisma di e gi yesi na En.—Mateyus 25:34-46; Romesma 6:23.
A „pasi fu den regtfardikiwan” e kisi blesi
21. Fa Yehovah e ’teki sabi fu den regtfardikiwan’?
21 A fosi psalm e kaba nanga den wortu disi: „Yehovah e teki sabi fu a pasi fu den regtfardikiwan, ma a heri pasi fu den ogriwan sa kisi pori” (Psalm 1:6). Fa Gado e ’teki sabi fu den regtfardikiwan’? We, efu wi e libi na wan opregti fasi, dan wi kan de seiker taki wi hemel Tata e si fa wi e du muiti fu hori wisrefi na den wet fu en, èn a e si wi leki futuboi fu en di a feni bun. Fu dati ede, wi kan trowe ala wi problema tapu en èn wi musu du dati tu, nanga a frutrow taki a e broko en ede nanga wi trutru.—Esekièl 34:11; 1 Petrus 5:6, 7.
22, 23. San o pasa nanga den ogrisma èn nanga den regtfardikisma?
22 „A pasi fu den regtfardikiwan” sa tan fu têgo, ma den ogrisma di no wani kenki, sa kisi pori fu di Yehovah sa krutu den. A „pasi” fu den, noso a fasi fa den e libi, sa kon na wan kaba te den e kisi pori. Wi kan frutrow taki den wortu fu David sa kon tru, namku: „Ete wan syatu pisi ten èn na ogrisma no sa de moro; èn yu sa luku seiker na a presi pe a ben de, èn a no sa de. Ma den safri-atisma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki. Na den regtfardikisma srefi sa abi grontapu leki a gudu fu den, èn den sa libi na tapu fu têgo.”—Psalm 37:10, 11, 29.
23 Wi sa de nanga bigi prisiri te wi e kisi a grani fu libi na ini wan paradijs grontapu pe nowan ogrisma no de moro! Den safri-atisma nanga den regtfardikisma sa abi trutru vrede fu di den sa prisiri na ini „a wet fu Yehovah” ala ten. Ma fosi dati pasa, sani musu pasa soleki fa ’Yehovah bosroiti’ (Psalm 2:7a). Na artikel di e kon sa yepi wi fu si san na a bosroiti dati èn san dati wani taki gi wi èn gi a heri libisma famiri.
San yu ben sa piki?
• Fu san ede wan sma de koloku te a e hori ensrefi na den wet fu Gado?
• San e sori taki wi e prisiri na ini a wet fu Yehovah?
• Fa wan sma kan de leki wan bon di e kisi furu watra?
• Fa a pasi fu regtfardikisma de heri tra fasi leki a di fu ogrisma?
[Aksi fu a tori disi]
[Prenki na tapu bladzijde 11]
Begi sa yepi wi fu no abi demakandra nanga ogrisma
[Prenki na tapu bladzijde 12]
Fu san ede wan regtfardiki sma de leki wan bon?