Den sani di Yehovah meki, moi srefisrefi

’Zomer nanga winter noiti no sa kon na wan kaba’

WAN bun faya son e skèin na ini wan sabana. Na tra presi fu grontapu, a faya fu a son e tyari waran kon, baka wan kowru winter (a kowru pisi ten fu a yari). Iya, a son na wan tumusi prenspari sani di e meki taki son presi na grontapu waran èn son presi kowru; a e meki sosrefi taki na ini wan yari yu abi waran nanga kowru pisi ten.

Difrenti presi na grontapu abi difrenti waran nanga kowru pisi ten na ini a yari. Ma sortu krakti den pisi ten disi abi na yu tapu? Yu no e prisiri te alen e fadon, baka wan bigi dreiten? Fa a de nanga den zomer-neti di e tyari wan switi waran kon? Yu no e prisiri te a ten doro taki gronman e go koti nyanyan na den gron? Yu no e kisi wan korostu firi te yu e si wan bigi busi di tapu nanga snew, soleki fa a prenki e sori?

San e meki taki a yari abi difrenti waran pisi ten nanga kowru pisi ten? Fu taki en syatu, na a skoinsi fasi fa grontapu e anga te a e drai lontu a son. Grontapu e anga sowan 23,5 graden go na wan sei te a e drai lontu a son. Efu a no ben e anga go skoinsi na wan sei, dan den difrenti pisi ten fu a yari no ben o de. Ala ten a srefi waran, noso kowru ben o de na grontapu. Disi ben o abi furu krakti tapu bon nanga tra sani di e gro èn tapu den pisi ten te den e meki froktu.

Te wi e luku a fasi fa den difrenti pisi ten fu a yari e kon baka makandra, dan wi kan si krin taki wan Mekiman musu fu de. A psalm skrifiman ben e taki nanga Yehovah Gado di a taki: „Na yu ben poti ala den skotu fu grontapu; zomer nanga winter, na yusrefi ben meki den.”—Psalm 74:17. *

Gi sma na grontapu, den sani di de na hemel soleki a son, a mun, nanga den stari, na prenspari sani di e sori wi na sortu pisi ten fu a yari wi de. Di Gado ben meki a stari sistema fu wi, a ben taki: „Meki sani di e gi leti, kon na heri hemel . . . ; èn den musu de leki marki fu den pisi ten èn fu den dei èn fu den yari” (Genesis 1:14). Na ini wán yari grontapu e drai lontu a son èn tu leisi na ini a yari, a son e skein leti na tapu na evenaar (wan agersi lin di e prati grontapu na ini tu pisi) twarfu yuru bakadina. Sma e kari a sani disi equinox, èn na furu kondre disi na wan marki taki lente noso herfst bigin. Te disi pasa, dan pikinmoro na heri grontapu, dei nanga neti langa a srefi.

Ma den difrenti pisi ten fu a yari èn den pisi ten te den e bigin, no abi fu du nanga planeiti èn nanga stari nomo. Ala den sani soleki den difrenti pisi ten fu a yari, a waran noso a kowru fu wan presi, alenten noso dreiten, abi fu du nanga wan dangra sistema di e meki taki sani kan libi na grontapu. Di a Kresten apostel Paulus nanga en mati Barnabas ben e taki nanga den sma fu Pikin Asia, di ben sabi fa fu prani èn koti gron, dan den apostel ben taki dati Gado na a sma di e ’gi unu alen komoto fu hemel èn a e gi bun ten sosrefi, so taki un ati firi bun fu di un abi bogobogo nyanyan nanga prisiri’.—Tori fu den Apostel 14:14-17.

Bon di e gro na tapu gron èn tra sortu prani di e gro na ini se, e meki nyanyan na wan tumusi moi fasi nanga yepi fu a son. Sobun, na wan dangra fasi a son nanga na alen èn a waran noso a kowru fu wan presi abi krakti tapu ala nyanyan di de fu feni na grontapu èn tapu ala libisani di de. Na wan moi fasi Paulus ben sori taki na Yehovah e du ala den sani disi. A ben taki: „Alen e nati a gron furu tron, èn disi e meki taki sani e gro di bun gi den sma di wroko a gron, èn fu dati ede Gado e blesi a gron disi.”—Hebrewsma 6:7.

Yu o kisi wan heri tra denki fu a wortu „blesi” te yu e sidon denki dipi fu san e pasa na den presi pe lente e tyari wan moi pisi ten kon pe a no waran noso kowru tumusi, den dei de moro langa, moro son e skèin, èn switi alen e fadon. Den bromki e bigin opo èn den insekt soleki wasiwasi e komoto fu  den presi pe den ben e sribi na winterten; den e tyari a puiri fu a wan bromki go na a trawan so taki den bon kan meki froktu bakaten. Den fowru nanga den moi kloru fu den èn den moi singi fu den, soleki a blauwe gaai [Cyanocitta cristata] di yu e si na tapu a prenki dyaso, e meki taki a heri busi e kon na libi. A gersi leki ala sani e kon na libi now; nyun bon e opo kon, trawan e kisi blad noso bromki, èn den alamala e gro kon bigi (Heisingi 2:12, 13). Ala den sani disi e meki taki te fu kaba a ten doro fu koti a nyanyan na den gron na a kaba fu a zomer, noso na ini herfst.—Exodus 23:16.

A fasi fa Yehovah meki grontapu anga skoinsi go na wan sei, e meki taki na wan wondru fasi dei nanga neti de, sosrefi den difrenti waran nanga kowru pisi ten fu a yari; wan ten de sosrefi fu sai èn wan ten fu koti a nyanyan na den gron. Wi sabi seiker taki baka zomer, winter e kon. Te yu luku en bun, dan na Gado srefi ben pramisi: „Bika ala den dei di grontapu sa de, a saiten nanga a kotiten, èn kowru nanga faya, èn zomer nanga winter, èn dei nanga neti noiti no sa kon na wan kaba.”—Genesis 8:22.

[Futuwortu]

[Faki na tapu bladzijde 9]

Wan planeiti di de tumusi prenspari gi a libi na grontapu

Na ini ala den hondrohondro yari di pasa, a mun na wan kefalek moi sani di hari a prakseri fu libisma. Ma yu sabi taki a mun abi krakti tapu den difrenti pisi ten fu a yari? A mun e yepi grontapu fu tan anga skoinsi go na wan sei. Disi „de wan tumusi prenspari sani di e meki taki sani kan libi na Grontapu”, na so a skrifiman fu sabidensi tori, Andrew Hill e taki. Efu wan bigi planeiti soleki a mun, no ben de fu hori grontapu skoinsi, dan grontapu ben o kon moro waran èn kande nowan sani ben o man libi na en tapu. Fu dati ede, wan grupu fu astronomiaman kon na a bosroiti disi: „Wi kan taki dati a Mun e sorgu taki Grontapu no e kon tumusi kowru, noso tumusi waran.”—Psalm 104:19.

[Sma di abi a reti fu den prenki]

Moon: U.S. Fish & Wildlife Service, Washington, D.C./Bart O’Gara

[Prenki na tapu bladzijde 9]

Kameili [Camelus dromedarius] na Noord-Afrika èn na a Schiereiland fu Arabia