Aksi fu leisiman

San Yesus ben abi na prakseri di a ben taigi den disipel fu en: „Mi si fa Satan fadon kaba neleki faya di e koti na hemel”?

Yesus ben teki 70 disipel, èn syatu baka dati a ben „seni den tu na tu go na en fesi na ibri foto nanga presi pe ensrefi ben o go”. Di den 70 disipel ben drai kon baka, den ben e prisiri fu di den ben abi bun bakapisi na ini a preikiwroko fu den. Den ben taki: „Masra, srefi den ogri yeye e arki wi te wi e gebroiki yu nen.” Na a momenti dati, Yesus taigi den: „Mi si fa Satan fadon kaba neleki faya di e koti na hemel.”—Lukas 10:1, 17, 18.

Na a fosi presi, a kan gersi leki Yesus ben e taki fu wan sani di ben feni presi kaba. Ma 60 yari baka di Yesus taki den sani disi, na owru apostel Yohanes ben gebroiki den srefi wortu di a ben skrifi: „Den ben fringi a bigi draak go na ondro, a fosi sneki, a wan di den e kari Didibri nanga Satan, di e kori sma na heri grontapu; den ben fringi en go na grontapu, èn den engel fu en den ben fringi go na ondro makandra nanga en.”—Openbaring 12:9.

Di Yohanes ben skrifi den wortu disi, dan Satan ben de na ini hemel ete. Fa wi du sabi dati? Fu di Openbaring a no wan buku di e fruteri fu sani di pasa na ini a historia, ma na wan buku fu profeititori (Openbaring 1:1). Sobun, di Yohanes ben de na libi, Satan no ben fringi go na grontapu ete. Fu taki en leti, buweisi de di e sori taki disi ben pasa syatu baka di Yesus ben tron Kownu fu Gado en Kownukondre na ini 1914. *—Openbaring 12:1-10.

Ma fu san ede Yesus taki fu a yagi di den yagi Satan gowe fu hemel, neleki a de wan sani di ben feni presi kaba? Son sabiman e taki dati Yesus ben e piri-ai gi den disipel fu en fu di den ben kon kisi heimemre. Den e bribi dati a sani di Yesus ben wani taki trutru, ben de: ’Unu wini den ogri yeye, ma unu no musu kisi heimemre. Satan ben kisi heimemre, èn dati meki a fadon so esi.’

Wi no kan taki seiker san Yesus ben abi na prakseri. Ma soleki fa a sori, dan na a momenti dati Yesus ben e prisiri makandra nanga den disipel fu en, èn a sori leki a ben e taki fu a pori di Satan ben o kisi na ini a ten di ben o kon ete. Moro leki iniwan fu den disipel fu en, Yesus ben sabi heri bun taki Didibri abi bigi atibron. Prakseri o breiti Yesus ben de di a yere fa den tranga ogri yeye ben arki den libisma disipel fu en di no de volmaakti! A wini di den disipel ben wini den ogri yeye ben de wan pikin eksempre fu a ten pe Yesus, a gran engel di ben o tyari a nen Mikael, ben o feti nanga Satan èn fringi en komoto fu hemel go na grontapu.

Soleki fa a sori, dan di Yesus ben taki dati a ben si fa Satan „fadon kaba”, a ben wani sori krinkrin taki Satan sa fadon trutru. Na so a de tu nanga tra Bijbel profeititori di skrifi na so wan fasi taki a gersi leki den pasa kaba, aladi den no pasa ete. Fu eksempre, luku fa son pisi fu a profeititori di skrifi na ini Yesaya 52:13–53:12 èn di abi fu du nanga a Mesias, skrifi na wan fasi di e sori leki den pasa kaba èn na wan fasi di e sori leki den sa feni presi ete. A kan taki Yesus ben e sori taki a ben abi a frutrow taki Satan ben o trowe komoto fu hemel, neleki fa en Tata ben abi na prakseri. Yesus ben de seiker sosrefi taki na a ten di Gado poti, Satan nanga den ogri yeye fu en sa fringi go na ini a peti di no abi gron èn taki bakaten den sa kisi pori fu têgo.—Romesma 16:20; Hebrewsma 2:14; Openbaring 20:1-3, 7-10.

[Futuwortu]