O ten wan sma bigi ini Krestes ai?—Leri fu denki leki en

„A sma di wani tron a bigiwan na un mindri, musu de un dinari.”—MATEYUS 20:26.

1. O ten grontapusma e denki taki wan sma bigi?

KROSIBEI fu na owruten foto Thebe (now a nen Karnak) na ini Egepte, sowan 500 kilometer na a zuidsei fu a foto Kairo, wan bun bigi popki fu Farao Amenhotep III e tanapu di hei sowan 18 meter. Iniwan libisma o firi ensrefi so pikin te a e tanapu na sei a bun bigi popki disi. A no de fu taki dati a popki disi meki so taki sma ben o kisi bigi lespeki gi a tiriman disi. A e sori o ten grontapusma e denki taki wan sma bigi. Gi grontapusma, wan sma bigi te a e du ala muiti fu kon moro hei noso moro prenspari leki tra sma, so taki a e gi tra sma a firi taki den lagi moro en.

2. Sortu eksempre Yesus ben gi den bakaman fu en, èn sortu aksi wi musu poti gi wisrefi?

² Meki wi teki a denki disi di grontapusma abi, gersi nanga san Yesus Krestes ben leri den bakaman fu en. Aladi a ben de a „Masra nanga Leriman” fu den bakaman fu en, toku Yesus ben leri den taki wan sma bigi te a e dini trawan. Na a lasti dei fu en libi na grontapu, Yesus ben wasi den futu fu den disipel fu en, fu sori den san a ben wani leri den. Dati na wan heri moi fasi fu sori  sakafasi èn fu dini trawan! (Yohanes 13:4, 5, 14) Sortu sani e hari yu moro: fu dini tra sma, noso fu meki tra sma dini yu? Na eksempre fu Krestes e gi yu a firi fu abi sakafasi neleki en? We, dan meki wi luku o ten wan sma bigi trutru ini Krestes ai, èn fa grontapu abi wan heri tra denki fu dati.

O ten wan sma bigi?—No teki a denki di grontapusma abi

3. Sortu Bijbel eksempre e sori taki a e tyari takru bakapisi kon gi den wan di e feti fu kisi glori fu tra sma?

³ Furu eksempre de na ini Bijbel di e sori dati te wan sma abi a denki taki a bigi soleki fa grontapusma e denki, dan dati e tyari takru bakapisi kon. Prakseri a makti Haman, di ben de wan tumusi prenspari sma na ini a kownu-oso fu Persia na ini den dei fu Ester nanga Mordekai. Fu di Haman ben wani kisi bigi nen nomonomo, meki te fu kaba a kisi syen èn a dede (Ester 3:5; 6:10-12; 7:9, 10). Fa a de nanga a heimemre Nebukadnesar di ben kon law na a pisi ten di a ben de a moro makti sma fu a ten dati? A fowtu denki di a ben abi taki a bigi trutru, ben de krin fu si na ini den wortu disi: „A no disi na Babilon a Bigiwan di misrefi bow gi a kownu-oso, nanga a tranga fu mi makti èn gi a wartifasi fu mi tirimakti?” (Danièl 4:30) Dan yu abi a bigimemre Herodes Agripa I di ben meki sma gi en glori, na presi taki den gi glori na Gado. „Woron ben nyan en èn a ben hari en lasti bro” (Tori fu den Apostel 12:21-23). Fu di den man disi no ben frustan o ten wan sma bigi ini Yehovah ai, meki den ben lasi ala a makti fu den na wan syen fasi.

4. Suma e gi sma na grontapu deki-ati fu abi heimemre?

⁴ A fiti efu wi wani gebroiki wi libi na wan fasi di e meki taki tra sma e gi wi grani èn e lespeki wi. Ma Didibri e du ala muiti fu meki a firi disi tron heimemre, fu di ensrefi na wan sma di abi bigimemre èn di e suku fu kisi makti nomonomo (Mateyus 4:8, 9). No frigiti noiti taki Didibri na „a gado fu a sistema disi”, èn taki a abi a fasti bosroiti fu meki den sma na grontapu teki a denki fu en (2 Korentesma 4:4; Efeisesma 2:2; Openbaring 12:9). Fu di Kresten sabi fu suma a denki disi e komoto, meki den no e denki fu a tori disi leki fa grontapusma e denki.

5. A de so taki wan sma o abi wan bun libi fu ala ten te a doro wan prenspari marki na ini en libi, te sma e gi en grani èn te a gudu srefisrefi? Fruklari dati.

⁵ Wan fu den denki di Didibri e gi sma, na taki wan bigi nen na ini grontapu, bigi grani, èn furu gudu, e meki wan sma kisi wan koloku libi. Dati de so trutru? A de so taki wan sma abi wan koloku libi te a doro wan prenspari marki na ini en libi, te tra sma e gi en grani, èn te a gudu srefisrefi? Bijbel e warskow wi fu no meki so wan denki kori wi. A koni Kownu Salomo ben skrifi: „Misrefi si ala a tranga wroko èn ala a koni di sma abi fu du wroko, dati wani taki a strei di wan sma e strei nanga wan trawan; disi tu de fu soso èn a strei di sma e strei fu kisi a winti” (Preikiman 4:4). Furu sma di gebroiki den heri libi fu kisi wan hei posisi èn fu kisi furu moni, e agri nanga a rai disi di Gado meki sma skrifi na ini Bijbel. Wan eksempre fu dati, na wan man di ben yepi fu teken wan rakèt di ben o tyari sma go na a mun, a yepi fu bow en, èn a ben pruberi luku tu efu a rakèt ben o wroko trutru. Di a prakseri fu san a ben du, dan a taki: „Mi ben wroko tranga èn mi ben man du a wroko fu mi heri bun. Ma toku a no tyari wini kon gi mi; a ben de wan soso sani di no ben gi mi koloku fu ala ten èn a no ben meki mi ati firi  korostu.” * Grontapusma e denki taki wan sma bigi te a de wan barinen bisnisman, sportman, noso pokuman, ma disi no man tyari wan bun èn koloku libi kon fu ala ten.

Wi kan tron sma di bigi te wi e dini trawan fu di wi lobi den

6. San e sori taki Yakobus nanga Yohanes no ben sabi o ten wan sma bigi trutru?

⁶ Wan sani di pasa na ini a libi fu Yesus e sori o ten wan sma bigi trutru. Yesus nanga den disipel fu en ben e waka go na Yerusalem fu hori a Paskafesa fu 33 G.T. Di den ben de na pasi, dan Yakobus nanga Yohanes, tu famiriman fu Yesus, ben sori taki den no ben sabi o ten wan sma bigi trutru. Den ben meki a mama fu den aksi Yesus a sani disi: „Taki dati den tu manpikin fu mi o sidon na yu sei na ini a kownukondre fu yu, a wan na yu reti-anusei èn a trawan na yu kruktu-anusei” (Mateyus 20:21). Gi den Dyu, a ben de wan bigi grani fu sidon na a reti-anusei, noso na a kruktu-anusei fu wan prenspari sma (1 Kownu 2:19). Na wan gridi fasi Yakobus nanga Yohanes ben e suku fu kisi den moro prenspari presi. Den ben wani den presi disi fu kan abi makti. Yesus ben sabi san den ben e denki èn a gebroiki na okasi disi fu sori den taki den no ben sabi o ten wan sma bigi trutru.

7. O ten wan Kresten bigi trutru, soleki fa Yesus ben sori dati?

⁷ Yesus ben sabi taki na ini a grontapu disi di abi heimemre, wan sma bigi te a abi makti tapu trawan, te a man komanderi sma, te sma e lon du wantewante san a taki, èn te sma e du iniwan sani di a wani. Ma gi den bakaman fu Yesus, wan sma bigi trutru te a abi a sakafasi fu dini trawan. Yesus ben taki: „A sma di wani tron a bigiwan na un mindri, musu de un dinari; a sma di wani de a fosiwan na un mindri, musu de un srafu.”—Mateyus 20:26, 27.

8. San a wani taki fu dini trawan, èn sortu aksi wi musu poti gi wisrefi?

⁸ Na ini Bijbel, a Griki wortu di vertaal nanga „dinari”, e sori go na wan sma di e du ala muiti doronomo fu dini trawan so taki den kan kisi wini fu dati. Yesus ben e leri den disipel fu en wan prenspari sani: wan sma no bigi te a e komanderi trawan fu du sani, ma na a dini di a e dini trawan fu di a lobi den, na dati e meki wan sma bigi. Aksi yusrefi: ’Fa mi ben o handri efu mi ben de Yakobus, noso Yohanes? Mi ben o frustan krin taki wan sma bigi trutru te a e dini trawan fu di a lobi den?’—1 Korentesma 13:3.

9. Sortu eksempre Yesus ben gi na ini a fasi fa a ben e handri nanga tra sma?

 ⁹ Yesus ben sori den disipel fu en taki den sani di e meki wan sma bigi na ini grontapu, a no den sani di e meki wan sma bigi ini Krestes ai. Noiti a ben sori taki a hei moro den sma di a ben e dini, èn noiti a ben e meki den firi leki den no warti noti. Ala sortu sma, mansma, umasma, nanga pikin, gudusma, pôtisma, nanga sma di ben abi makti, sosrefi sma di trawan ben sabi leki bigi sondari, iya, den alamala ben lobi fu de nanga en (Markus 10:13-16; Lukas 7:37-50). Furu tron, sma no abi pasensi nanga trawan di no man du sani so esi kande fu di den abi wan swakifasi. Ma Yesus ben de tra fasi. Ten na ten den disipel fu en ben e du sani sondro fu denki fosi, noso den ben e meki trobi son tron. Toku Yesus ben e gi den leri na wan pasensi fasi èn a ben e sori den taki a ben abi safri-ati èn sakafasi trutru.—Sakaria 9:9; Mateyus 11:29; Lukas 22:24-27.

10. Fa a heri libi fu Yesus e sori taki a no ben e denki ensrefi nomo, ma taki a ben e suku fu yepi tra sma ala ten?

¹⁰ Fu di a prenspari Manpikin disi fu Gado no ben e denki ensrefi nomo, meki a sori na wan tumusi moi fasi o ten wan sma bigi trutru. Yesus no ben kon na grontapu fu sma dini en, ma a ben kon fu dini tra sma fu di a ben e dresi den fu „difrenti sortu siki” èn a ben e fri den fu ogri yeye di ben de na den tapu. Aladi Yesus ben e kon weri èn a ben abi fu rostu, toku a ben e poti prakseri na tra sma fosi, èn a ben e du ala muiti fu trowstu den (Markus 1:32-34; 6:30-34; Yohanes 11:11, 17, 33). A lobi di a ben abi gi sma, ben meki taki a ben e yepi den na yeye fasi; a ben e waka hondrohondro kilometer na tapu santi pasi fu go preiki a bun nyunsu fu a Kownukondre gi den sma (Markus 1:38, 39). A no de fu taki dati Yesus ben e si en leki wan seryusu sani fu dini trawan.

Abi sakafasi neleki Krestes

11. Sortu fasi brada musu abi efu den wani kisi a wroko fu dini leki opziener na ini a gemeente?

¹¹ Na a kaba fu a di fu 18 yarihondro, a ben kon na krin sortu fasi Kresten opziener musu abi te den ben o poti na wroko fu go na difrenti presi fu sorgu gi den fanowdu fu a pipel fu Gado. Soleki fa a tijdschrift Zion’s Watch Tower fu 1 september 1894 ben sori, dan den brada disi musu „abi safri-ati so taki den no kon kisi bigifasi . . . , den musu abi sakafasi èn den no musu taki o bun den de, ma o bun Krestes de. Den no musu leri sma san densrefi sabi, ma den musu leri sma Gado Wortu di de makriki fu frustan èn di abi krakti”. A de krin fu si taki tru Kresten no musu suku fu kisi frantwortu fu kan kisi wini gi densrefi, fu tron wan moro prenspari sma, noso fu kisi moro makti fu prei basi gi tra sma. Wan opziener di abi sakafasi e tan hori na prakseri taki a frantwortu di a kisi, na fu du „wan tumusi bun wroko”, a no fu kisi wan hei posisi di o meki sma prèise en (1 Timoteyus 3:1, 2). Ala owruman nanga dinari ini a diniwroko musu du ala muiti fu dini trawan nanga sakafasi èn fu teki fesi na ini a santa diniwroko. Na so fasi den sa de warti eksempre gi trawan.—1 Korentesma 9:19; Galasiasma 5:13; 2 Timoteyus 4:5.

12. Sortu sani wan sma kan aksi ensrefi te a e suku fu kisi grani na ini a gemeente?

 ¹² Iniwan brada di wani kisi grani musu aksi ensrefi kande: ’Mi e suku okasi fu dini trawan, noso mi wani taki trawan musu dini mi? Mi de klariklari fu du sani fu yepi sma aladi kande tra sma no o si a bun di mi du?’ Fu eksempre, a kan de so taki wan yonkuman de klariklari fu hori lezing na ini a Kresten gemeente, ma kande a e draidrai fu yepi den owruwan na ini a gemeente. Kande a lobi fu abi demakandra nanga brada di abi frantwortu na ini a gemeente, ma a e suku reide fu no abi wan prati na a preikiwroko. A ben o bun efu a yonkuman disi aksi ensrefi: ’Mi e poti moro prakseri na den pisi fu a diniwroko gi Gado di o meki taki sma e poti prakseri na mi èn e prèise mi? A de so taki mi wani sori taki mi bun moro trawan?’ Te wi e suku fu kisi glori gi wisrefi, dan wi no e teki na eksempre fu Yesus kwetikweti.—Yohanes 5:41.

13. (a) Sortu krakti a kan abi tapu trawan te wan opziener e sori sakafasi? (b) Fu san ede wi kan taki dati sakafasi na wan sani di wan Kresten musu fu abi ala ten?

¹³ Te wi e meki muiti fu kon kisi sakafasi neleki Krestes, dan wi sa wani dini trawan. Luku na eksempre fu wan zone-opziener di ben e luku fa a wroko ben e go na wan fu den bijkantoro fu Yehovah Kotoigi. Aladi a ben abi furu fu du èn a ben abi furu frantwortu, toku na opziener disi teki ten fu yepi wan yongu brada di ben abi problema fu seti wan niet-masyin. „Mi no ben man bribi!”, na so a yongu brada taki. „A taigi mi taki a ben abi fu wroko nanga a srefi sortu masyin di a ben e dini na Bethel na ini en yongu yari, èn a ben man memre ete fa a ben muilek fu seti a masyin na wan bun fasi. Aladi a ben abi so furu prenspari sani fu du, toku a yepi mi nanga a masyin wan heri pisi ten langa. Dati naki mi ati srefisrefi.” A yongu brada disi, di tron wan opziener now na wan fu den bijkantoro fu Yehovah Kotoigi, e memre te now ete fa a zone-opziener ben sori sakafasi. Meki a de so, taki noiti wi e firi wisrefi tumusi hei fu du wroko di gersi lagi wroko, èn noiti wi musu firi wisrefi tumusi prenspari fu du wroko di no de so prenspari. Na presi fu dati, wi musu tai „sakafasi” na wi mindri, neleki a de wan banti lontu wi mindribere. Disi a no wan sani di wi kan du efu wi wani, noso o ten wi wani; wi musu du disi ala ten. A de wan fu den fasi di wi leki Kresten musu weri fu tron „a nyun sma”.—Filipisma 2:3; Kolosesma 3:10, 12; Romesma 12:16.

Fa wi kan tron sma di bigi ini Krestes ai

14. Fa wi kan kisi wan yoisti denki fu si o ten wan sma bigi trutru te wi e denki dipi fu a banti di wi abi nanga Gado èn nanga tra sma?

¹⁴ Fa wi kan kisi wan yoisti denki fu si o ten wan sma bigi trutru? Wán fasi fa wi kan du dati, na fu denki dipi fu a banti di wi abi nanga Yehovah Gado. A glori fu en, a krakti fu en, nanga a koni di a abi, e meki taki a hei moro iniwan sani di libisma sabi, noso di den man du (Yesaya 40:22). Te wi e prakseri fu a banti di wi abi nanga tra sma, dan dati kan yepi wi tu fu kon kisi sakafasi. Fu eksempre, a kan de so taki wi e du son sani moro bun leki trawan, ma kande trawan man du son sani na ini a libi moro bun leki wi, sani di moro prenspari srefi. A kan de so tu taki wi Kresten brada nanga sisa abi son fasi di wi no abi. Fu taki en leti, furu sma di warti ini Gado ai no de prenspari sma na ini grontapu, fu di den abi safri-ati èn sakafasi.—Odo 3:34; Yakobus 4:6.

15. Fa a getrowfasi fu a pipel fu Gado e sori taki nowan sma abi reide fu firi ensrefi moro hei leki trawan?

¹⁵ Disi de krin fu si te wi e luku den ondrofenitori fu Yehovah Kotoigi di ben tan horidoro na ini bribi aladi den ben kisi frufolgu. Furu tron den sma di grontapu no e si leki prenspari sma,  na den wan di tan getrow na Gado aladi den ben kisi hebi tesi. Te wi e denki dipi fu den sortu eksempre disi, dan dati kan yepi wi fu tan abi sakafasi èn dati kan leri wi tu fu „no denki moro fu wisrefi leki san de fanowdu”.—Romesma 12:3. *

16. Fa ala sma na ini a gemeente kan tron sma di bigi te den e teki na eksempre fu Yesus?

¹⁶ Ala Kresten, yonguwan nanga owruwan, musu du muiti fu tron sma di bigi ini Krestes ai. Difrenti wroko musu du na ini a gemeente. Noiti no kisi atibron te sma e aksi yu fu du wroko di gersi lagi wroko (1 Samuel 25:41; 2 Kownu 3:11). Papa nanga mama, yu e gi den yongu pikin nanga den tini pikin fu yu deki-ati fu wroko nanga prisiri te den kisi wan wroko fu du na ini a Kownukondre zaal, noso na den presi pe kring konmakandra noso kongres e hori? Den e si taki yu e du wroko di gersi fu de lagi wroko? Wan brada, di e dini now na a edekantoro fu Yehovah Kotoigi, e memre heri bun sortu eksempre en papa nanga mama ben de gi en. A ben taki: „A fasi fa den ben e si a wroko fu krin a Kownukondre zaal noso a kongreshal, ben sori mi taki den ben e si dati leki wan prenspari wroko. Furu tron den ben e gi den nen fu du wroko gi a bun fu a gemeente noso gi den brada nanga sisa, awinsi den wroko dati ben e gersi lagi wroko. A fasi fa den ben e denki fu a tori disi, ben yepi mi fu de klariklari fu teki iniwan wroko di mi e kisi fu du dyaso na Bethel.”

17. Na sortu fasi den uma di abi sakafasi kan de wan blesi gi a gemeente?

¹⁷ Wan moi eksempre fu wan sma di ben suku fu yepi trawan fosi, na Ester di ben tron a wefi fu a kownu fu a Gran Kownukondre Persia na ini a di fu feifi yarihondro b.G.T. Aladi a ben e libi na ini wan kownu-oso, toku a ben de klariklari fu poti en libi na ini kefar fu yepi a pipel fu Gado, èn na so fasi a ben du san Gado ben wani (Ester 1:5, 6; 4:14-16). Awinsi na ini sortu ekonomia situwâsi Kresten uma de na ini a ten disi, toku den kan de leki Ester fu di den e gi deki-ati na den wan di e firi brokosaka, fu di den e go luku den sikiwan, fu di den e teki prati na a preikiwroko, èn fu di den e wroko makandra nanga den owruman. Den sisa disi di abi sakafasi de wan bigi blesi gi a gemeente!

Den blesi di wan sma e kisi te a bigi ini Krestes ai

18. Sortu blesi yu kan kisi te yu e du sani di e meki taki yu bigi ini Krestes ai?

¹⁸ Yu sa kisi furu blesi te yu e tan meki muiti fu de wan sma di bigi ini Krestes ai. Te yu e dini trawan sondro fu denki yusrefi nomo, dan yu nanga den trawan sa kisi prisiri (Tori fu den Apostel 20:35). Te yu de klariklari fu wroko fayafaya gi yu brada nanga sisa, dan den sa lobi yu trutru (Tori fu den Apostel 20:37). San de moro prenspari, na taki Yehovah e poti prakseri na den bun sani di yu e du gi yu Kresten brada nanga sisa; a e si disi leki wan ofrandi fu prèise di a feni bun.—Filipisma 2:17.

19. San musu de wi fasti bosroiti efu wi wani tron sma di bigi ini Krestes ai?

¹⁹ Ibriwan fu wi musu ondrosuku en eigi ati èn wi musu aksi ensrefi: ’Mi e taki nomo dati mi wani de wan sma di bigi ini Krestes ai, noso mi e du ala muiti fu de so wan sma trutru?’ Yehovah e sori krin fa a e denki fu sma di abi bigimemre (Odo 16:5; 1 Petrus 5:5). Meki den sani di wi e du sori taki wi e prisiri taki wi kan tron sma di bigi ini Krestes ai. Meki wi sori na ini a Kresten gemeente, na ini wi osofamiri libi, èn na ini a fasi fa wi e handri nanga tra sma na ini wi aladei libi, taki wi wani de sma di bigi ini Krestes ai. Meki wi du ala den sani disi fu prèise Gado èn fu gi en glori.—1 Korentesma 10:31.

[Futuwortu]

Yu kan tyari disi kon na krin?

• O ten wan sma bigi na ini grontapu, èn fu san ede wi no musu abi a srefi fasi fu denki ini a tori disi?

• O ten wan sma bigi ini Yesus ai?

• Fa opziener kan abi sakafasi neleki Krestes?

• San kan yepi wi fu tron sma di bigi ini Krestes ai?

[Aksi fu a tori disi]

[Faki na tapu bladzijde 17]

Suma bigi trutru ini Krestes ai?

Wan sma di wani taki tra sma musu dini en, noso wan sma di de klariklari fu dini tra sma?

Wan sma di wani taki ala sma poti prakseri na en, noso wan sma di e du wroko di gersi lagi wroko?

Wan sma di e hei ensrefi, noso wan sma di e hei trawan?

[Prenki na tapu bladzijde 14]

Wan bun bigi popki fu Farao Amenhotep III

[Prenki na tapu bladzijde 15]

Yu sabi fu san ede Haman lasi a makti fu en?

[Prenki na tapu bladzijde 16]

Yu e suku okasi fu dini trawan?