San kan meki wi kisi wan trutru marki na ini a libi?

DI SMA aksi Jesse, wan studenti di abi 17 yari, san na a marki fu a libi, dan a piki: „Meki so furu prisiri leki yu kan, solanga yu de na libi.” Suzie ben e denki tra fasi fu a tori. A taki: „Mi e bribi trutru taki a sma srefi musu bosroiti san a wani du nanga en libi.”

Oiti yu aksi yusrefi san na a marki fu a libi? Fu san ede a libisma famiri de na grontapu? Noso a de so taki Suzie abi leti di a taki dati na wisrefi musu bosroiti san wi o du nanga wi libi? Awinsi omeni nyun sani sma e meki na ini a libimakandra fu wi, toku wi e firi leki wi no abi wan marki na ini a libi. A kan pasa wan dei, taki furu fu wi e aksi wisrefi: ’Fu san ede wi de na libi?’

Sabiman na ini a ten disi du furu muiti fu gi piki tapu na aksi dati. San na a piki fu den? David P. Barash, wan sabiman di e ondrosuku a libi fu libisma èn fu difrenti sortu meti, ben taki: „Soleki fa na evolutieleri e sori, dan a libi srefi no abi wan marki trutru.” Den sabiman di e ondrosuku libisani èn di e horibaka gi na evolutieleri, abi a denki taki libisani abi wán sani nomo fu du: den musu suku fu tan na libi èn den musu meki pikin. Fu dati ede, Professor Barash e taki: „Na ini wan bigi grontapu pe sma no abi nowan marki na ini a libi èn pe sma no e broko den ede nanga trawan, wi leki libisma abi a frantwortu fu feni wan marki na ini wi libi; na wi musu gebroiki wi frustan fu bosroiti gi wisrefi san wi wani.”

A Sma di e sori wi san na a marki fu a libi

We dan, a de so taki ibriwan fu wi musu du nomo san wi wani? Na dati na a marki fu a libi? Te yu luku en bun, dan wi no de na grontapu sondro wan marki na ini a libi, bika Bijbel sori langa ten na fesi kaba taki wi no meki fu soso. A libi di wi abi no kon fu ensrefi. Soleki fa Bijbel e taki, dan a Mekiman ben teki bun furu yari fu seti a grontapu gi den libisma di a ben o poti na en tapu. Noti no kon fu ensrefi. A sorgu taki ala sani ben de „heri bun” (Genesis 1:31; Yesaya 45:18). Fu san ede a du dati? Na fu di Gado ben abi wan spesrutu sani na prakseri gi libisma.

Ma a moi fu si taki Gado no bosroiti na fesi fa a libi fu ibri sma ben o waka te fu kaba. A fasi fa wi meki, no abi krakti tu tapu a fasi fa a libi fu wi o de. Aladi wi teki furu fu den fasi fu wi papa nanga mama abra, toku furu tron na wisrefi kan bosroiti san wi wani du. Wi alamala de fri fu bosroiti sortu pasi wi o teki na ini a libi.

Aladi ibriwan fu wi de fri fu bosroiti san wi wani du nanga wi libi, toku a ben o de wan fowtu sani fu no prakseri a Mekiman te wi e teki bosroiti. Fu taki en leti, furu sma kon frustan taki efu wi wani abi wan trutru marki na ini wi libi, dan wi musu abi wan banti nanga Gado. Wan sani di e sori krin taki wan banti nanga Gado de tumusi prenspari fu man abi wan marki na ini wi libi, na a nen fu Gado. En nen, Yehovah, wani taki „A e meki kon tron” (Exodus 6:3; Psalm 83:18). Dati wani taki, dati safrisafri a e meki ala den pramisi fu en kon tru, èn ala ten a e  du san a abi na prakseri (Exodus 3:14; Yesaya 55:10, 11). Prakseri a tori dati. A nen Yehovah e gi wi alamala a dyaranti taki ala ten en na a wan-enkri Sma di kan gi wi wan trutru marki na ini wi libi.

Te wan sma e bribi na ini a Mekiman, dan dati kaba abi furu krakti tapu a fasi fa a sma e si a libi. Linet, wan yonguwan di abi 19 yari, e taki: „Te mi e luku ala den moi sani di Yehovah meki èn fu san ede a meki den, dan dati e sori mi taki mi sosrefi no meki fu soso.” Amber e taki moro fara: „Te sma e taki dati den no sabi efu Gado de trutru, dan mi breiti taki mi sabi taki a de. Den sani di Yehovah meki e sori krin kaba taki a de trutru” (Romesma 1:20). A no de fu taki, dati a de prenspari fu bribi na ini wan Mekiman, ma a de moro prenspari fu kon abi wan bun banti nanga en.

Wan matifasi nanga Gado

Bijbel kan yepi wi nanga a sani disi sosrefi. Den fosi kapitel fu Bijbel e gi krinkrin buweisi taki Yehovah Gado na wan lobi-ati Tata. Fu eksempre, di Yehovah meki Adam nanga Eva, dan a no libi den sondro fu fruteri den suma na en. Na presi fu dati, a ben e taki doronomo nanga den. A no ben libi den na ini Eden meki den suku den eigi pasi, aladi ensrefi go du tra sani. Na presi fu dati, a gi den spesrutu rai di ben e sori den san ben de a moro bun fasi fu libi. A gi den wroko di ben e gi den prisiri, èn a ben sorgu taki den tan kisi leri (Genesis 1:26-30; 2:7-9). Disi na trutru san yu e fruwakti fu wan bun èn lobi-ati papa noso mama, a no so? We, prakseri now san dati wani taki. Denielle e taki: „Fu di mi sabi taki Yehovah meki grontapu èn taki a meki wi na so wan fasi taki wi kan prisiri fu den sani di a meki, dan dati e sori mi taki Gado wani dati wi musu de koloku.”

Boiti dati, neleki iniwan lobi-ati papa, Yehovah wani taki ala en pikin musu abi wan banti nanga en. Dati meki Tori fu den Apostel 17:27 e gi wi a dyaranti: „A no de fara fu ibriwan fu wi.” O prenspari a de fu abi wan banti nanga Yehovah? Amber e taki: „Fu di mi kon sabi Yehovah, meki mi abi a dyaranti taki noiti mi no de mi wawan. Awinsi san e pasa, ala ten mi abi wan sma nanga suma mi kan taki.” Boiti dati, te yu e kon sabi Yehovah moro bun, dan yu sa si taki a abi switifasi, taki a de regtfardiki, èn taki a bun. Yu kan frutrow na en tapu. Jeff e taki: „Di mi kon kisi wan krosibei banti nanga Yehovah, dan mi ben sabi taki moro leki iniwan sma, Gado de klariklari fu yepi mi na ini ten fu nowtu.”

Ma a de wan sari sani, dati sma taki furu takru sani fu Yehovah. Sma e taki dati na Gado meki taki furu sma e pina, èn taki na En meki taki kerkisma e handri na wan fasi di no fiti. Sma e taki dati den moro ogri-ati feti di pasa na ini a historia fu libisma, feni presi fu di Yehovah ben wani dati. Ma Deuteronomium 32:4, 5 e fruklari: „Ala san a e du, na retidu. . . . Den fu den sei, handri na wan pori fasi; den no de en pikin, a mankeri didon na densrefi.” Fu dati ede, a de na wi fu go ondrosuku den buweisi gi wisrefi.—Deuteronomium 30:19, 20.

A prakseri fu Gado sa kon tru

Ma awinsi sortu bosroiti wi e teki, noti no sa tapu Gado fu du ala den sani di a abi na prakseri nanga grontapu èn nanga libisma. Wi no musu frigiti taki en na a Mekiman. San a abi na prakseri dan? Di Yesus Krestes ben hori en Bergitaki, dan a ben sori san Gado abi na prakseri: „Koloku fu den safri-ati sma, bika den o kisi grontapu.” Bakaten, a ben sori en apostel Yohanes taki Gado abi a fasti bosroiti „fu pori den wan di e pori grontapu” (Mateyus 5:5; Openbaring 11:18). Di Gado ben meki hemel nanga grontapu, Yesus ben de nanga en. Fu dati ede, Yesus ben sabi taki sensi a bigin Gado ben wani taki wan volmaakti libisma famiri ben musu libi fu têgo na ini wan paradijs na grontapu (Genesis 1:26, 27; Yohanes 1:1-3). Èn Gado no e kenki (Maleaki 3:6). Gado e pramisi wi: „Fu tru, neleki fa mi ben abi na prakseri, na so a musu pasa; èn neleki fa mi ben bosroiti, na so a sa kon tru.”—Yesaya 14:24.

Na ini a ten fu wi, Yehovah bigin seti a fondamenti kaba fu wan libimakandra di abi wánfasi. Heri tra fasi leki furu fu den sma na grontapu, den sma fu a libimakandra dati no abi gridifasi èn den no e prakseri densrefi nomo, ma den lobi Gado èn den lobi tra sma tu (Yohanes  13:35; Efeisesma 4:15, 16; Filipisma 2:1-4). Den sma disi de na ini na organisâsi disi fu di densrefi wani. Den e meki muiti fu go na fesi èn den de fayafaya fu klari wan spesrutu wroko, namku: fu preiki a bun nyunsu fu Gado en Kownukondre di de fu kon, bifo a sistema disi kon na wan kaba (Mateyus 24:14; 28:19, 20). Na ini sowan 230 kondre, moro leki siksi milyun Kresten e anbegi Gado kaba na ini wánfasi makandra nanga lobi-ati brada nanga sisa di de na heri grontapu.

Kon kisi wan marki na ini yu libi

Efu yu wani abi wan trutru marki na ini yu libi, dan yu musu frustan taki Yehovah Gado e gi yu wan kari fu abi demakandra nownow kaba nanga a pipel fu en, noso a „regtfardiki nâsi” fu en (Yesaya 26:2). Ma kande yu e prakseri: ’Fa a de fu libi na ini a Kresten libimakandra disi? Mi wani moksi trutru nanga den sma disi?’ Luku san wan tu yonguwan taki:

Quentin: „A gemeente na wan presi pe mi kan feni kibri fu a grontapu. Fu di mi sabi taki Yehovah e yepi mi na ini mi libi, meki mi e frustan taki Gado de trutru èn taki a wani dati mi musu de koloku.”

Jeff: „A gemeente na a moro bun presi pe mi kan kisi deki-ati. Den brada nanga sisa fu mi de drape; den e yepi mi èn den e prèise mi. Trutru, den de leki famiri gi mi.”

Linet: „Nowan tra sani kan gi so furu prisiri leki te yu e si taki wan sma e teki a Bijbel waarheid èn taki a e teki a bosroiti fu dini Yehovah. Disi e gi mi furu prisiri na ini mi libi.”

Cody: „Sondro Yehovah, a libi fu mi no ben o warti noti. Neleki furu tra sma, mi ben o drifi fu a wan sani go na wan tra sani fu pruberi fu feni koloku, ma toku mi no ben o de koloku. Na presi fu dati, Yehovah gi mi a tumusi bigi grani fu abi wan banti nanga en, èn dati e meki taki mi abi wan marki na ini mi libi.”

Fu san ede yu no e ondrosuku gi yusrefi fa wan banti nanga Gado kan meki yu abi wan marki na ini a libi? Yu sa kon si taki te yu e kon krosibei na yu Mekiman, Yehovah Gado, dan yu sa feni wan trutru marki na ini yu libi.

[Prenki na tapu bladzijde 31]

Te wi abi wan banti nanga Gado, dan dati e meki taki wi e kisi wan marki na ini wi libi

[Sma di abi a reti fu a prenki na tapu bladzijde 29]

NASA photo