„Wi wani taki: ’Iya!’”

NO SO langa pasa a bijkantoro fu Yehovah Kotoigi na ini Nigeria kisi wan brifi. Wan pisi fu a brifi disi e taki:

„A manpikin fu wi, Anderson, lasi libi di a ben abi 14 yari. Fosi a dede, a ben e kweki tu fowru. A ben wani seri den fowru èn seni a moni go na a bijkantoro leki bijdrage fu horibaka gi a preikiwroko di e du na heri grontapu. Ma a lasi libi bifo den fowru ben kan seri.

Fu di a ben wani seni a moni go na a bijkantoro meki wi, en papa nanga en mama, kweki den fowru go doro èn wi seri den. Wi e seni a moni gi unu leki wan bijdrage fu Anderson. Fu a pramisi fu Yehovah ede, meki wi abi a frutrow taki a no sa teki langa moro, iya heri esi, wi sa si Anderson baka. Wi wani taki: ’Iya!’ te a sa aksi wi efu wi seni a moni go na a bijkantoro soleki fa a ben wani du dati. Iya, wi no e angri wawan fu si Anderson, ma sosrefi fu si wan ’bigi wolku fu kotoigi’ di sa kisi wan opobaka.”—Hebrewsma 12:1; Yohanes 5:28, 29.

Soleki fa a brifi disi e sori krin, dan a bribi na ini na opobaka na wan howpu di e tranga tru Kresten. Milyunmilyun famiri sa prisiri te den, makandra nanga a famiri fu Anderson, sa gi wan switikon na den sma di den ben lasi na ini dede, a feanti fu libisma!—1 Korentesma 15:24-26.

A Wortu fu Gado e trowstu wi nanga a howpu fu na opobaka leki wán fu den furu wondru sani di sa pasa na ini a regtfardiki nyun grontapu ondro a Kownukondre fu Gado (2 Petrus 3:13). Bijbel e taki san Gado sa du gi sma na a ten dati: „A sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba.”—Openbaring 21:4.