A de fanowdu fu kisi bun rai?

NA INI a ten disi, furu sma e bribi taki den man sabi o ten wan sani bun èn o ten wan sani ogri, èn den e bribi tu taki den abi a reti fu du san den wani. Trawan e taki dati den kan du pikinmoro ala san den wani, solanga a sani dati e meki den firi bun. Na osofamiri-libi nanga a trowlibi, di de prenspari seti na ini a libimakandra langa ten kaba, e ondrofeni bigi problema.—Genesis 3:5.

Luku san ben pasa nanga Verónica, * di e libi na ini Meksikow. A e fruteri: „Syatu fosi wi trow 15 yari, a masra fu mi ben taigi mi taki a e hori nanga wan tra uma. A ben taki dati a no ben o gowe libi na uma dati fu di na uma dati ben moro yongu èn a ben meki en firi koloku. San ben gi mi furu sari na a denki taki a moro bun mati fu mi, no ben o de na mi sei moro. Fosi, mi ben e denki taki a dede fu wan lobiwan na a moro hati sani di kan miti wan sma. Ma gi mi, sutadu e hati moro leki dati srefi, fu di mi no ben lasi wan sma wawan di mi ben lobi trutru, ma a sma di mi lasi e tan du sani di e hati mi.”

Na a tra sei yu abi wan yonguman di abi 22 yari, di broko trow kaba èn di abi wan boi, ma a yonguman disi no wani teki a frantwortu na en tapu di a abi leki papa. A e fruwakti taki en mama musu sorgu gi en, èn gi a boi fu en. Efu a mama no wani du san a e taki, dan a e atibron èn a e kosi en mama, neleki fa wan pikin e du di no abi maniri. A mama fu en no man du noti te a yonguman disi e afrontu en.

Den sortu sani disi no e pasa wawan leisi nomo. Na ala sei, moro nanga moro sma e broko trow, noso e gowe libi den trowpatna. Furu pikin e si fa den papa, noso den mama e gowe libi na osofamiri fu bigin nanga wan nyun libi. Son yonguwan no abi nowan lespeki moro gi trawan. Den no abi lespeki tu gi den papa nanga den mama fu den, èn now furu fu den e du  sani di den no ben o du fosi. Na ini furu kondre, a de wan aladei sani taki yonguwan e bigin abi seks demakandra frukufruku kaba, èn taki den e gebroiki drugs, noso den e du trawan ogri. A de wan aladei sani taki pikin e kiri den skoromeester, skoromisi, papa, noso mama. Soleki fa yu kan si na ini a ten disi, dan sma no e kisi problema wawan te den e kweki pikin, noso te den de na ini a trowlibi, ma den e kisi problema nanga furu tra sani.

Te wi e si ala den sani disi e pasa, dan kande wi e aksi wisrefi san pasa nanga a libimakandra. Efu sma sabi trutru san bun èn san ogri, dan fu san ede den no kan tyari wan lusu kon gi den furu problema di wi abi? A de so taki sma abi bun rai fanowdu? Wan sma de di kan gi bun rai, wan sma di sori taki wi kan frutrow na en tapu? Aladi furu sma e taki dati den e bribi na ini Gado èn na ini a Wortu fu en, toku den no e poti prakseri na Gado, noso a Wortu fu en, te den e teki bosroiti. Ma sortu wini wi kan kisi te wi e suku yepi na Gado èn te wi e handri akruderi a rai di a e gi wi? Meki wi go luku a tori disi na ini na artikel di e kon now.

[Futuwortu]