Fa yu kan feni a moro bun rai

FU TRU, a de wan tumusi moi sani te a libi fu wan sma e waka bun. Efu wi wani abi so wan libi na ini a muilek grontapu disi, dan a de tumusi prenspari fu kisi bun rai èn fu handri akruderi a rai dati. Ma a no ala ten libisma wani poti prakseri na bun rai. Furu sma taki dati libisma musu libi soleki fa densrefi wani. Te yu luku en bun, dan Bijbel e sori taki Satan na a fosi sma di ben de teige a reti di Gado abi fu tiri. A feanti disi ben sori den fosi libisma taki den man libi sondro Gado. Genesis 3:5 e sori san a ben taigi Eva: „Gado sabi taki na a dei di unu e nyan fu [a bon fu sabi bun nanga ogri], un ai sa kon opo trutru èn dan unu sa de leki Gado, fu di unu sa sabi bun nanga ogri.”

Fa a ben go nanga Adam èn Eva baka di den ben nyan fu a bon? A de so, taki den no ben kisi takru bakapisi, èn taki sani ben waka bun nanga den fu di den ben du sani soleki fa den ben e denki? Kwetikweti. Wantewante den ben ondrofeni den takru bakapisi, fu di den ben denki taki den sabi san bun èn san ogri. Gado ben abi ala reti fu no feni den bun moro èn fu di den ben tron sondu sma, meki a libi fu den ben kon hebi èn te fu kaba den dede (Genesis 3:16-19, 23). Wi alamala e dede. Bijbel e taki: „Wán man [Adam] tyari sondu kon na ini grontapu èn nanga sondu dede kon, èn na so dede panya go na ala libisma, fu di den alamala ben sondu.”—Romesma 5:12.

Aladi a bosroiti di Adam nanga Eva ben teki tyari takru bakapisi kon, toku furu sma no e bribi ete taki a de wan koni sani fu handri akruderi a rai fu Gado, a Mekiman fu libisma. Ma soleki fa Bijbel e sori, dan „na Gado srefi ben meki sma skrifi ala den Santa Buku èn den bun” èn a kan meki wi kon „koni dorodoro, de srekasreka dorodoro gi ibri bun wroko” (2 Timoteyus 3:16, 17). Trutru, wi sa de koloku te wi e handri akruderi a rai di skrifi na ini Bijbel. Wan prenspari presi pe wi kan ondrofeni disi, de na ini na osofamiri-libi.

Getrowfasi na ini a trowlibi

Soleki fa Bijbel e sori, dan Gado ben seti a trowlibi èn a wani taki trowpatna musu tan na makandra den heri libi langa (Genesis 2:22-24;  Mateyus 19:6). Boiti dati, den Buku fu Bijbel e taki dati ’a trowbedi musu de sondro flaka’, èn disi wani taki dati sutadu no musu meki taki a trowlibi pori (Hebrewsma 13:4). Ma kande yu sabi taki furu trowpatna no e hori densrefi na a markitiki disi. Son sma abi a gwenti fu freiri na wrokope nanga sma di no de den trowpatna. Trawan e lei gi den trowpatna nanga den pikin fu den, soso fu go abi demakandra nanga wan tra sma gi suma den abi lobi firi. Sonwan e gowe libi den trowpatna so taki den kan go libi nanga wan moro yongu patna; den e taki dati a sma dati e meki den firi moro yongu èn moro koloku, soleki fa Verónica, di wi kari na ini a fosi artikel, ben ondrofeni.

Ma toku, wan sma no sa feni trutru koloku te a wani plisi ensrefi nomo, sondro fu teki broko-ede nanga den bakapisi. Ronald kan taki fu a tori disi. A ben abi na overtoigi taki en libi ben o waka moro bun te a ben o gowe libi a wefi fu en fu go bigin wan nyun libi nanga wan tra uma. Na wan kibri fasi a ben e hori nanga na uma disi siksi yari langa èn a ben abi tu pikin nanga en kaba. Ma wan pisi ten baka di a brokotrow, a sma nanga suma a ben e hori, gowe libi en! Te fu kaba, Ronald go libi nanga en papa nanga mama. A e taki dati a libi fu en kon „moro takru”. Disi na wán eksempre nomo. Sma e handri na so wan fasi, fu di den e denki densrefi nomo. Dati meki moro nanga moro sma e brokotrow èn moro nanga moro osofamiri e prati na ini a ten disi. Ala den sani disi e meki taki bun furu bigisma nanga pikin e ondrofeni den takru bakapisi fu disi.

Na a tra sei, sma e kisi trutru koloku te den e teki a rai di de fu feni na ini Bijbel. Disi na san Roberto ondrofeni. A e taki: „Fu di mi ben gi yesi na a rai di skrifi na ini Bijbel, meki mi no ben lasi a wefi fu mi. Wi no sa de koloku trutru te wi e du hurudu nanga sma di no de wi trowpatna, awansi a sma dati moi. Den sani di mi leri na ini Bijbel yepi mi fu kisi warderi gi a trowpatna fu mi, di de nanga mi someni yari kaba.” A Bijbel rai di e taki dati „nowan sma musu handri na wan bedrigifasi nanga a wefi fu en yongu yari”, ben abi furu krakti tapu a libi fu Roberto (Maleaki 2:15). Na ini sortu tra sani wi kan kisi wini fu a rai di Gado e gi?

A fasi fa wi musu kweki wi pikin

Someni tenti yari pasa, furu sma bigin bribi taki papa nanga mama di e kweki pikin no musu poti tumusi furu wet gi den pikin fu den. Gi den sma dati, a ben de wan bun sani fu gi den pikin pasi fu bosroiti srefi fa den wani denki èn fa den wani handri. A marki fu den ben de fu meki den pikin gro na wan fri fasi sondro taki wan sani tapu den. Na son presi, wan tu skoro ben seti na so wan fasi, taki den studenti ben de fri fu du san den wani. Wan tu fu den sani di den studenti ben kan du, na taki densrefi ben kan bosroiti o ten den wani go na ini a  klas, densrefi ben kan bosroiti o furu prisiriten den wani, noso o furu rai den wani teki. Wán fu den skoro disi ben wani taki „den pikin ben musu de fri fu sori fa den e firi èn fa den e denki, sondro taki wan sma krutu den fu dati èn sondro taki wan bigisma taigi den wan sani”. Te now ete, son raiman di e ondrosuku a fasi fa sma e tyari densrefi, no e feni en bun taki sma e gi den pikin fu den trangaleri, srefi efu son papa nanga mama e feni en fanowdu fu gi den pikin fu den trangaleri na wan lobi-ati fasi.

San ben de a bakapisi? Furu sma de di e bribi taki a no bun gi den pikin te papa nanga mama e meki den du san den wani. Soleki fa den sma disi e prakseri, dan a fasi disi fu kweki pikin meki taki so furu pikin na ini a ten disi e du ogri èn e gebroiki drugs. Wan ondrosuku di du na ini Amerkankondre sori taki pikinmoro 7 fu ibri 10 sma nanga suma den ondrosukuman ben taki, ben feni taki pikin-nengre nanga yongusma no e kisi a yoisti leri di den abi fanowdu fu den papa nanga mama. Te sma e suku fu fruklari fu san ede yonguwan e sutu nanga gon na skoro èn fu san ede den e du tra ogri-ati sani, dan den e taki furu tron taki na fu di „papa nanga mama no e luku den pikin fu den bun”. Èn awansi sani no e waka so takru, toku papa, mama, nanga pikin e kisi takru bakapisi te pikin no kweki na a yoisti fasi.

San Bijbel e taki fu a tori disi? Bijbel e gi papa nanga mama a rai fu kweki den pikin na wan lobi-ati fasi èn na wan seryusu fasi tu. Bijbel e taki: „Lawfasi tai na a ati fu wan boi; a tiki fu trangaleri na a sani di sa puru en poti farawe fu en” (Odo 22:15). A no de fu taki dati papa nanga mama musu gi den pikin fu den a trangaleri di fiti san den du. Te wan sma e gi trangaleri, dan ala ten a musu du dati na wan safri-ati fasi, a musu dwengi ensrefi èn a musu hori a bun fu a pikin na prakseri. Te wan sma e gi trangaleri na a fasi disi, dan a e sori taki a lobi a pikin. Te papa nanga mama e kweki den pikin na wan lobi-ati fasi, no na wan grofu fasi, dan dati kan abi bun bakapisi.

Te wan sma e fiti a rai disi, dan a kan kisi bun bakapisi. Arturo di abi 30 yari e libi na ini Meksikow. No so langa pasa a trow, èn a e taki: „Mi papa ben sori mi nanga den brada fu mi krin, taki en nanga mi mama ben abi a frantwortu na ini na osofamiri. Noiti den ben draidrai fu gi wi trangaleri. Ma ala ten den ben meki ten fu taki nanga unu. Now di mi kon bigi kaba, mi breiti nanga a fasi fa mi libi e waka now, èn mi sabi taki mi e ondrofeni furu fu den bun bakapisi disi fu di mi papa nanga mi mama ben kweki mi na wan bun fasi.”

 Kisi wini fu a moro bun rai

A moro bun rai di libisma kan kisi de fu feni na ini a Wortu fu Gado, Bijbel. A rai di de fu feni drape no e sori wi wawan fa fu abi wan bun osofamiri-libi. A e yepi wi fu de srekasreka na someni fasi, fu di a e leri wi fa fu handri na ini wan grontapu pe furu sma no wani taki wan moro koni Sma tiri den, so taki a libi fu den kan waka bun.

Yehovah Gado, a Mekiman fu libisma, e gi wi a dyaranti disi nanga yepi fu a psalm skrifiman David: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Psalm 32:8). Yu man frustan trutru san a wani taki dati a Mekiman e luku wi so taki a kan kibri wi fu ogri no miti wi? Ma a sani di ibriwan fu wi musu aksi wisrefi na: ’Mi sa sori sakafasi fu di mi o teki a rai di Yehovah e gi mi, fu kibri mi gi ogri?’ Na wan lobi-ati fasi a Wortu fu en e sori wi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.”—Odo 3:5, 6.

Wi musu meki muiti èn wi musu horidoro efu wi wani kon sabi Yehovah, ma toku libisma kan kon sabi en nanga yepi fu Bijbel. A fasi fa Yehovah wani taki wi musu libi ’abi wan pramisi gi a libi fu now èn gi a libi di musu kon ete’. Te wi e luku ala den bun bakapisi di wi sa kisi, dan trutru wi kan taki dati wi sa nyan bun fu a libi dati.—1 Timoteyus 4:8; 6:6.

Efu yu wani kon sabi moro fu a koni rai di skrifi na ini Bijbel èn efu yu wani kisi blesi fu di yu e libi akruderi a rai disi, dan leisi a Wortu fu Gado èn prakseri dipi fu den sani di yu e leisi. Poti den sani disi na a fosi presi ini yu libi. Te yu e du dati, dan a sa yepi yu fu kakafutu gi den problema di yu e kisi now, èn yu sa man kakafutu gi iniwan problema di musu kon ete. Boiti dati, yu sa abi a howpu fu libi na ini a nyun grontapu fu Gado, pe ala sma sa kisi leri fu Yehovah èn pe a vrede fu ala sma sa de pasa marki.—Yesaya 54:13.

[Prenki na tapu bladzijde 5]

A rai di skrifi na ini Bijbel kan tranga a banti na mindri trowpatna

[Prenki na tapu bladzijde 6]

Bijbel e gi bun rai di e yepi wi fu tiri wi libi, ma toku a e gi pasi taki wi e meki prisiri

[Prenki na tapu bladzijde 7]

Den wan di e libi akruderi a rai di skrifi na ini Bijbel kan abi wan koloku libi