Sma no wani si den na ai, aladi den no du noti
Sma no wani si den na ai, aladi den no du noti
„Den no ben wani si mi na ai, aladi mi no du noti.”—YOHANES 15:25.
1, 2. (a) Fu san ede son sma no man frustan taki Kresten e kisi porinen, ma fu san ede a no musu fruwondru wi taki sma e taki ogri sani fu wi? (b) Na sortu fasi wi musu frustan den wortu „no wani si na ai” na ini na artikel disi? (Luku a futuwortu.)
YEHOVAH KOTOIGI e du muiti fu libi akruderi den gronprakseri di de fu feni na ini Gado Wortu. Leki bakapisi fu dati, den abi wan bun nen na ini furu kondre. Ma son tron sma e taki sani fu den di no tru. Fu eksempre, wan heihei-man fu lanti na ini a foto Sint Petersburg, na Rosiakondre, ben taki: „Sma ben taigi wi taki Yehovah Kotoigi na wan sortu ondrogron kerkigrupu di e du wan lo ogri sani kibrikibri, di e srakti pikin-nengre, èn di e kiri densrefi.” Ma baka di a srefi man disi wroko makandra nanga Yehovah Kotoigi fu seti sani gi wan internationaal kongres, dan a taki: „Now mi e si taki den de neleki tra sma èn taki den lobi fu lafu . . . Den lobi fu libi na ini vrede, den no e meki dyugudyugu, èn den lobi makandra srefisrefi.” A ben taki tu: „Mi no man frustan srefisrefi fu san ede sma e taki den sortu lei disi fu den.”—1 Petrus 3:16.
2 Futuboi fu Gado no e feni en wan prisiri sani te sma e taki dati den e du ogri, ma toku a no e fruwondru den taki sma e gi den porinen. Yesus ben warskow den bakaman fu en na fesi taki: „Efu grontapu no wani si unu na ai, dan unu sabi taki a no ben wani si mi na ai fosi. . . . A wortu ben musu kon tru di skrifi na ini a Wet fu den: ’Den no ben wani si mi na ai, aladi mi no du noti’” * (Yohanes 15:18-20, 25; Psalm 35:19; 69:4). Yesus ben taigi den disipel fu en kaba, taki: „Efu sma e taki dati a masra fu na oso na Beèlsebub, dan den sa taki dati fu na osofamiri tu, a no so?” (Mateyus 10:25) Kresten e horidoro awinsi den e kisi porinen, bika den e frustan taki disi na wan fu den sani di ben o miti den fu di den teki a „pina-postu” na den tapu di den tron bakaman fu Krestes.—Mateyus 16:24.
3. Sensi o ten tru anbegiman kisi frufolgu?
3 Bun langa kaba tru anbegiman e kisi frufolgu, iya, sensi a ten fu „a regtfardiki sma Abel” (Mateyus 23:34, 35). Den no kisi frufolgu wanwan leisi nomo. Yesus ben taki dati fu en nen ede den bakaman fu en ben o de ’sani di nowan sma ben o wani si na ai’ (Mateyus 10:22). Boiti dati, na apostel Paulus ben skrifi taki ala futuboi fu Gado, dati wani taki ibriwan fu wi sosrefi, musu fruwakti taki sma ben o frufolgu den (2 Timoteyus 3:12). Fu san ede disi ben o de so?
Suma e meki taki sma no wani si wi na ai, aladi wi no du noti
4. Fa Bijbel e tyari kon na krin suma e meki taki sma no wani si wi na ai?
4 Gado Wortu e tyari kon na krin taki sensi a bigin, wan sma di wi no man si, e meki taki sma no wani si wi na ai. Luku fa Abel, a fosi man di ben abi bribi, lasi en libi na wan tumusi ogri-ati fasi. Bijbel e taki dati en brada, a kiriman Kain, „ben komoto fu na ogriwan”, Satan Didibri (1 Yohanes 3:12). Kain ben teki a denki fu Satan, èn a gebroiki Kain fu du den ogri sani di ensrefi ben abi na prakseri. Bijbel e tyari kon na krin sosrefi taki na Satan ben meki taki ala sortu ogri-ati sani pasa nanga Yob èn nanga Yesus Krestes (Yob 1:12; 2:6, 7; Yohanes 8:37, 44; 13:27). A buku Openbaring e sori krin suma ben o meki den bakaman fu Yesus kisi frufolgu. A e taki: „Didibri sa tan trowe sonwan fu unu go na ini strafu-oso, so taki unu sa kisi tesi dorodoro” (Openbaring 2:10). Iya, Satan na a sma di e meki taki sma no wani si a pipel fu Gado na ai, aladi den no du noti.
5. Fu san ede Satan no wani si tru anbegiman na ai?
5 Fu san ede Satan no wani si tru anbegiman na ai? Fu di Satan ben denki tumusi furu fu ensrefi, meki a seti wan plan fu strei teige Yehovah Gado, „a têgo Kownu” (1 Timoteyus 1:17; 3:6). A feni taki Gado poti tumusi furu wet fu tiri den sma di a meki, èn taki nowan sma e dini Yehovah fu di a wani du dati trutru. Den e du dati soso fu di den e kisi wini fu dati. Satan taki dati efu a kisi na okasi fu tesi libisma, dan a kan meki taki ibriwan fu den drai baka gi Gado, so taki den no dini en moro (Genesis 3:1-6; Yob 1:6-12; 2:1-7). Satan gi Yehovah porinen fu di a taki dati Yehovah e kwinsi libisma, dati a de wan leiman èn wan sma di no man du bun. Na a fasi disi, Satan wani kisi a srefi reti di Yehovah abi fu tiri hemel nanga grontapu. Fu dati ede, a abi bita-ati gi den futuboi fu Gado, bika a wani nomonomo taki den musu anbegi en.—Mateyus 4:8, 9.
6. (a) San ibriwan fu wi musu du ini a strei di abi fu du nanga a reti di Yehovah abi fu tiri hemel nanga grontapu? (b) Te wi e frustan san na a strei disi, dan fa dati kan yepi wi fu tan getrow? (Luku a faki na tapu bladzijde 16.)
6 Yu e si fa a strei disi abi krakti tapu yu libi? A kan taki yu leki wan futuboi fu Yehovah, kon si kaba taki yu musu du furu muiti fu du a wani fu Gado, ma taki yu e kisi bun furu wini fu dati tu. Ma san yu ben o du efu yu kon na ini wan situwâsi pe a muilek, noso pe yu abi fu nyan pina srefi fu man hori yusrefi na den wet nanga gronprakseri fu Yehovah doronomo? Èn san yu ben o du te a gersi leki yu no e kisi wini te yu e dini Yehovah? Yu ben o denki taki a no e pai fu tan dini Yehovah? Noso a lobi di yu abi gi Yehovah èn a dipi warderi di yu abi gi den tumusi moi fasi fu en, o meki taki yu tan waka ala den pasi fu en? (Deuteronomium 10:12, 13) Yehovah e gi pasi taki Satan tesi wi, so taki ibriwan fu wi e kisi na okasi fu gi piki tapu na aksi di Satan poti fu tyalensi Yehovah.—Odo 27:11.
„Te sma e gi unu porinen”
7. San na wan fu den sani di Didibri e gebroiki te a e pruberi fu meki wi drai baka gi Yehovah?
7 Meki wi luku moro fini now san na wan fu den sani di Satan e gebroiki fu kori sma so taki a kan abi leti. A sani disi, na den ogri-ati lei di a e fruteri. Yesus ben kari Satan „a tata fu lei” (Yohanes 8:44). A nen Didibri e sori wantewante suma na en, bika a nen dati wani taki „Ogri-ati leiman”, èn disi e sori taki en na a moro bigi leiman di e fruteri ogri-ati lei fu Gado, fu a wortu fu en di e tyari wini kon, èn fu en santa nen. Didibri e taki sani di e meki sma tweifri na Gado, a e taki dati Gado e du ala sortu ogri, èn a e fruteri krinkrin lei so taki a kan kisi a reti di Yehovah abi fu tiri hemel nanga grontapu. Na a srefi fasi disi a e suku fu du ogri nanga den getrow futuboi fu Gado. A e meki taki Kotoigi e kisi porinen, èn na so fasi a kan meki en moro muilek gi den fu horidoro te wan hebi tesi e miti den.
8. Fa Satan ben meki Yob kisi porinen, èn san ben de a bakapisi?
8 Luku san ben pasa nanga Yob; en nen wani taki „Sma gi suma trawan abi bita-ati”. Boiti taki Satan kiri den meti nanga den pikin fu Yob, a meki tu taki Yob kon siki srefisrefi èn taki sma kisi a denki taki Yob ben de wan sondari di ben e kisi strafu fu Gado. Aladi sma ben abi dipi lespeki gi Yob fosi, toku srefi den famiriman fu en nanga den bun mati fu en ben kon tegu gi en bakaten (Yob 19:13-19; 29:1, 2, 7-11). Boiti dati, Satan gebroiki falsi trowstuman fu ’masi Yob nanga wortu’, fu di den ben feni fosi taki a du wan seryusu sondu èn bakaten den taki krin taki en na wan ogriman (Yob 4:6-9; 19:2; 22:5-10). Dati ben musu fu meki Yob firi brokosaka srefisrefi!
9. Fa Satan ben meki Yesus gersi wan sondari?
9 Gado Manpikin na a sma di sori na a moro bun fasi taki Yehovah abi a reti fu tiri hemel nanga grontapu, sobun a ben tron a moro prenspari sma gi suma Satan abi bita-ati. Di Yesus kon na grontapu, dan Satan meki a gersi leki Yesus na wan sondari, fu di a ben meki sma kisi a denki taki Yesus swaki na yeye fasi, neleki fa a ben du dati nanga Yob (Yesaya 53:2-4; Yohanes 9:24). Sma ben kari en wan drunguman nanga wan akanswari, èn den ben taki dati a „abi wan ogri yeye na en tapu” (Mateyus 11:18, 19; Yohanes 7:20; 8:48; 10:20). Den ben lei gi en taki a afrontu Gado (Mateyus 9:2, 3; 26:63-66; Yohanes 10:33-36). Disi ben meki Yesus sari fu di a ben sabi taki den lei disi ben e gi en Tata porinen (Lukas 22:41-44). Te fu kaba, den spikri Yesus na wan postu leki wan bigi ogriman (Mateyus 27:38-44). Fu tan getrow na wan volmaakti fasi, Yesus ben abi fu ’frudrage furu genstaki fu sondari’.—Hebrewsma 12:2, 3.
10. Fa Satan pruberi fu du ogri nanga a fikapisi fu den salfuwan na ini a ten disi?
10 Na ini a ten disi, Didibri abi bita-ati sosrefi gi a fikapisi fu den salfu bakaman fu Krestes. Bijbel e taki dati Satan na „a sma di e kragi den brada fu [Krestes] . . . , a sma di e kragi den dei nanga neti bifo wi Gado” (Openbaring 12:9, 10). Sensi Yesus trowe en komoto fu hemel kon na ini a birti fu grontapu, Satan du moro muiti fu gi den brada fu Krestes porinen, so taki sma no ben o wani bumui nanga den kwetikweti (1 Korentesma 4:13). Na ini son kondre, sma fruteri na ogri-ati lei taki den salfuwan disi na wan kerkigrupu di e du bun furu ogri sani, neleki fa den ben e taki dati fu den Kresten na ini a fosi yarihondro (Tori fu den Apostel 24:5, 14; 28:22). Soleki fa wi ben taki na a bigin, dan sma du ogri-ati sani nanga den fu di den fruteri lei fu den. Ma toku, „awinsi den e kisi glori, noso awinsi sma e gi den syen, awinsi sma e taki takru fu den, noso awinsi den e taki bun fu den”, toku den salfu brada fu Krestes, nanga den „tra skapu” di e horibaka gi den, e tan meki muiti na wan saka fasi fu ’hori densrefi na den komando fu Gado èn fu du a wroko fu gi kotoigi fu Yesus’.—2 Korentesma 6:8; Yohanes 10:16; Openbaring 12:17.
11, 12. (a) San e meki taki Kresten e kisi porinen son tron? (b) Na sortu fasi a bribi fu wan Kresten kan meki taki a e nyan pina aladi a no du noti?
11 A no de fu taki dati te wan futuboi fu Gado kisi porinen, dan a no ala ten dati e pasa ’fu di a regtfardiki’ (Mateyus 5:10). Son problema kan de bakapisi fu wi eigi sondu. Wi no o kisi wan spesrutu pai efu wi ’e horidoro te wi e sondu èn e kisi fonfon’. Ma efu wan Kresten ’e horidoro te a e pina aladi a e du bun, dan dati na wan bun sani’ na Yehovah ai (1 Petrus 2:19, 20). Na ini sortu situwâsi disi kan pasa?
12 Sma handri na wan grofu fasi nanga sonwan fu den fu di den no ben wani teki prati na son sani di sma gwenti fu du te den e go beri sma, bika den sani dati no de akruderi Bijbel gronprakseri (Deuteronomium 14:1). Sma ben kosi, noso dreigi yongu Kotoigi doronomo fu di den e hori densrefi na den markitiki fu Yehovah di e sori fa wan sma musu tyari ensrefi (1 Petrus 4:4). Son sma feni taki Kresten papa nanga mama no e broko den ede nanga den pikin èn taki den e du ogri nanga den pikin fu di den wani taki datra dresi den pikin fu den sondro brudu (Tori fu den Apostel 15:29). Fu di son sma tron futuboi fu Yehovah, meki den famiriman fu den nanga den birtisma fu den no e bumui nanga den moro (Mateyus 10:34-37). Ala den Kresten disi e teki na eksempre fu den profeiti èn fu Yesus srefi, di ben e nyan pina aladi den no ben du noti.—Mateyus 5:11, 12; Yakobus 5:10; 1 Petrus 2:21.
Wi musu de klariklari fu horidoro awinsi wi e kisi porinen
13. San kan yepi wi fu no lasi wi yeyefasi te hebi tesi e miti wi?
13 Te wi e kisi hebi tesi fu di wi de na bribi, dan wi kan lasi-ati neleki a profeiti Yeremia, èn kande wi abi a firi taki wi no man dini Gado moro (Yeremia 20:7-9). San kan yepi wi fu no lasi a yeyefasi fu wi? Pruberi fu si a situwâsi leki fa Yehovah e si en. A e si den wan di tan getrow aladi tesi miti den, leki winiman; a no e si den leki sma di lasi (Romesma 8:37). Prakseri fu ala den sma di tan horibaka gi a reti di Yehovah abi fu tiri hemel nanga grontapu, awinsi na sortu syen fasi Didibri tesi den. Prakseri fu sma soleki Abel, Yob, Maria di ben de mama fu Yesus, nanga tra getrow man nanga uma fu owruten, èn sosrefi den getrow futuboi fu Yehovah na ini a ten disi (Hebrewsma 11:35-37; 12:1). Prakseri fu a fasi fa den ben tan getrow. A bigi grupu fu den loyaalwan disi e gi wi wan kari fu kon tanapu na den sei na ini a grupu fu winiman di wini grontapu.—1 Yohanes 5:4.
14. Fa wi kan kisi a krakti fu tan getrow te wi e begi fayafaya?
14 Te ’den prakseri fu wi di e trobi wi e kon furu na ini wi ati’, dan wi kan begi Yehovah fayafaya, èn a sa trowstu wi èn gi wi krakti (Psalm 50:15; 94:19). A o gi wi a koni di wi abi fanowdu fu horidoro te tesi miti wi èn a o yepi wi fu hori na prakseri taki wi de ini a bigi strei di musu sori taki na Yehovah abi a reti fu tiri. Fu dati ede sma no wani si den futuboi fu Yehovah na ai, aladi den no du noti (Yakobus 1:5). Yehovah kan gi wi sosrefi „a vrede fu Gado, di pasa ala sma frustan” (Filipisma 4:6, 7). A vrede disi di Gado e gi wi, e meki taki wi no e bruya, wi abi deki-ati, èn wi no e tweifri noso frede te hebi tesi miti wi. Nanga yepi fu en santa yeye, Yehovah kan trowstu wi na ini ala sani di a e gi pasi fu pasa nanga wi.—1 Korentesma 10:13.
15. San kan yepi wi fu no hori sma na ati te wi e nyan pina?
15 San kan yepi wi fu no hori sma na ati te den no wani si wi na ai, aladi wi no du noti? Memre taki den moro bigi gensman fu wi, na Satan nanga den ogri yeye (Efeisesma 6:12). Son sma e frufolgu wi fu espresi, ma furu fu den e gens a pipel fu Gado fu di den no sabi suma na den èn fu di tra sma e kori den (Danièl 6:4-16; 1 Timoteyus 1:12, 13). Yehovah wani taki „ala sortu sma” kisi na okasi fu „kisi frulusu èn kon kisi wan soifri sabi fu waarheid” (1 Timoteyus 2:4). Iya, son sma di ben e gens wi fosi, na wi Kresten brada noso sisa now fu di den kon si taki wi a no sma di e du ogri (1 Petrus 2:12). Boiti dati, wi kan leri wan sani fu na eksempre fu Yosef, a manpikin fu Yakob. Aladi den afu-brada fu Yosef ben meki taki Yosef ben nyan furu pina, toku a no ben e si den leki en feanti. Fu san ede? Fu di a ben frustan taki Yehovah ben meki sani pasa na so wan fasi taki den prakseri fu En ben sa kon tru (Genesis 45:4-8). Na so a de tu taki te wi e nyan pina aladi wi no du noti, dan Yehovah kan gebroiki disi leki wan okasi fu gi en nen glori.—1 Petrus 4:16.
16, 17. Fu san ede wi no musu broko wi ede tumusi nanga den muiti di gensman e du fu tapu a preikiwroko?
16 Wi no musu broko wi ede tumusi efu a gersi fu wan pisi ten taki gensman ben man tapu a wroko fu prati a bun nyunsu. Now, Yehovah e seki den nâsi nanga a kotoigi di e gi na heri grontapu, èn den warti sani e kon na ini en oso (Hagai 2:7). A Bun Skapuman, Krestes Yesus, ben taki: „Mi skapu e arki mi sten, èn mi sabi den, èn den e waka na mi baka. Èn mi e gi den têgo libi, . . . èn nowan sma sa hari den puru fu mi anu” (Yohanes 10:27-29). Den santa engel sosrefi de na ini a kotiwroko disi na yeye fasi (Mateyus 13:39, 41; Openbaring 14:6, 7). Fu dati ede, nowan sani di gensman taki noso du kan tapu Gado fu du san a abi na prakseri.—Yesaya 54:17; Tori fu den Apostel 5:38, 39.
17 Nofo tron a de so taki den sani di gensman e du abi heri tra bakapisi leki san den e fruwakti. Na wan presi na ini Afrika, sma ben taki wan lo takru sani fu Yehovah Kotoigi di no tru. Den ben taki sosrefi dati Yehovah Kotoigi e anbegi Didibri. Fu dati ede, Grace ben e lon go na bakasei fu en oso te Kotoigi ben e kon na en èn a ben e kibri drape teleki den ben gowe baka. Wan dei, a fesiman fu en kerki hori wan fu den buku fu wi na loktu èn a taigi ala sma drape taki den no musu leisi a buku, bika dati o meki taki den gowe libi a bribi fu den. Disi ben meki taki Grace ben wani sabi moro. Di den Kotoigi kon na en oso baka, dan na presi taki a go kibri, a bigin taki nanga den èn a ben kisi wan fu den buku. A bigin nanga wan bijbelstudie, èn a teki dopu na ini 1996. Now, Grace e gebroiki en ten fu suku tra sma di no sabi suma na Yehovah Kotoigi trutru.
Tranga a bribi fu yu nownow
18. Fu san ede a de prenspari fu tranga a bribi fu wi bifo hebi tesi opo kon, èn fa wi kan du dati?
18 Na iniwan ten Satan kan puru atibron na wi tapu, aladi wi no du noti, èn fu dati ede a de tumusi prenspari fu tranga a bribi fu wi nownow. Fa wi kan du disi? Wan raportu fu wan kondre pe sma ben e frufolgu a pipel fu Yehovah, ben sori: „Wán sani de krin fu si: Den sma di abi bun gwenti na yeye fasi èn di e warderi a Bijbel waarheid trutru, no abi problema fu horidoro te tesi e miti den. Ma den sma di e dyompo konmakandra ’na ini bun ten’, den sma di no e teki prati doronomo na a preikiwroko èn di no e hori densrefi na Bijbel gronprakseri na ini pikin afersi, nofo tron e brokokindi te ’bigi’ tesi e miti den” (2 Timoteyus 4:2). Efu yu si taki yu kan du wan tu sani na ini yu libi moro bun, dan du muiti fu du dati nownow sondro fu draidrai.—Psalm 119:60.
19. Sortu bakapisi a abi te futuboi fu Gado e tan getrow te den e kisi frufolgu na wan bita-ati fasi, aladi den no du noti?
19 A fasi fa tru anbegiman e tan getrow aladi Satan e frufolgu den na wan bita-ati fasi, e sori krin taki Yehovah abi a reti fu tiri hemel nanga grontapu, èn taki a warti fu de a moro hei tiriman di e tiri na wan regtfardiki fasi. A getrowfasi fu den e meki na ati fu Gado prisiri. Awinsi sma e gi den porinen, toku a sma di hei moro iniwan sma na grontapu èn na hemel, „no e syen taki sma e kari en leki a Gado fu den”. Iya, a fiti fu taki fu ala den loyaalwan disi: „Grontapu no ben warti den.”—Hebrewsma 11:16, 38.
[Futuwortu]
^ paragraaf 2 Na ini den Buku fu Bijbel, den wortu „no wani si na ai” gebroiki na difrenti fasi. Na ini son pisi fu Bijbel, a gebroiki soso fu sori taki wan sma no abi so furu lobi gi wan tra sma (Deuteronomium 21:15, 16). Den wortu disi kan gebroiki tu fu sori taki wan sma no lobi wan tra sma kwetikweti, ma a no taki a wani du ogri nanga a tra sma. Na presi fu dati, a e wai pasi gi a tra sma fu di a e tegu gi a tra sma. Ma den wortu „no wani si na ai” gebroiki sosrefi te wan sma e si wan trawan leki wan bigi feanti, noso te wan sma abi so wan bita-ati gi wan trawan taki a e winsi taki wan ogri sani pasa nanga a trawan. Na fu a sortu bita-ati disi, na artikel disi e taki.
Yu kan tyari disi kon na krin?
• Suma e meki taki sma no wani si tru anbegiman na ai, aladi den no du noti?
• Fa Satan ben gi Yob nanga Yesus porinen so taki den ben kan lasi a getrowfasi fu den?
• Fa Yehovah e gi wi krakti fu man kakafutu gi Satan di no wani si wi na ai?
[Aksi fu a tori disi]
[Faki/Prenki na tapu bladzijde 16]
Den ben frustan san na a trutru strei
Wan Kotoigi fu Yehovah na ini Ukraini, pe lanti ben tapu a Kownukondre preikiwroko moro leki 50 yari langa, ben taki: „Wi no musu si a situwâsi fu Yehovah Kotoigi na ini a ten dati fu wán sei nomo, namku a fasi fa sma ben handri nanga wi. . . . Furu fu den heihei-man fu lanti ben e du den wroko nomo. Di wan tra tirimakti kon na ini a kondre, dan den lantiman gi yesi na a tra tirimakti, ma wi tan a srefi. Wi ben frustan taki Bijbel ben tyari kon na krin suma na a sma di e meki taki wi ben kisi den problema disi.
Wi no ben e si wisrefi nomo leki sma di ben abi fu nyan pina na wan ogri-ati fasi, aladi wi no du noti. A sani di yepi wi fu horidoro, na a frustan di wi ben e frustan san na a strei di ben bigin na ini a dyari fu Eden, a strei efu Gado abi a reti fu tiri. . . . Wi ben teki wan fasti bosroiti na ini wan strei di no abi fu du nanga libisma wawan, ma sosrefi nanga a Moro Hei Tiriman fu hemel nanga grontapu. Wi ben frustan moro krin leki tra sma san ben de a tori trutru. Disi ben tranga wi èn a ben yepi wi fu tan getrow, srefi na ini den moro muilek situwâsi.”
[Prenki]
Skowtu ben kisi Victor Popovych na ini 1970
[Prenki na tapu bladzijde 13]
Suma ben meki taki sma gi Yesus porinen?
[Prenki na tapu bladzijde 15]
Yob, Maria, nanga den disiten futuboi fu Gado, soleki Stanley Jones, ben horibaka gi a reti di Yehovah abi fu tiri hemel nanga grontapu