Wi e kon weri, ma wi e tan go doro
Wi e kon weri, ma wi e tan go doro
„Yehovah, a Mekiman fu den moro farawe presi fu grontapu, . . . e gi krakti na a sma di weri, èn a sma di no abi dinamik krakti a e gi krakti pasa marki.”—YESAYA 40:28, 29.
1, 2. (a) Sortu moi kari de gi ala sma di wani anbegi Gado na a yoisti fasi? (b) San kan de wan seryusu problema gi a yeyefasi fu wi?
LEKI disipel fu Yesus, wi sabi heri bun sortu moi kari a gi wi: „Un kon na mi, un alamala di musu wroko hebi èn di musu tyari hebi lai èn mi sa gi unu krakti baka. . . . Bika a tyatyari fu mi switi fu tyari èn mi lai lekti” (Mateyus 11:28-30). Sosrefi, Yehovah wani gi Kresten „ten di e gi kowru-ati” (Tori fu den Apostel 3:19). A no de fu taki dati yusrefi ondrofeni taki yu ben kisi furu krakti di yu kon sabi den tru tori fu Bijbel, di yu leri taki wan tumusi moi howpu de gi a ten di e kon, èn di yu bigin gebroiki den gronprakseri fu Yehovah na ini yu libi.
2 Ma toku, son anbegiman fu Yehovah e firi brokosaka ten na ten. Son leisi den e lasi-ati fu wan syatu pisi ten nomo. Ma son leisi a firi disi kan tan fu wan langa ten. Baka wan pisi ten a kan taki sonwan fu den e kisi a firi taki den frantwortu di den abi leki Kresten kon tron wan hebi gi den, na presi taki den e si en leki wan lai di kan gi den krakti baka, soleki fa Yesus ben pramisi. Den sortu takru firi disi no bun fu di a kan pori a banti di wi abi nanga Yehovah.
3. Fu san ede Yesus ben gi a rai di de fu feni na ini Yohanes 14:1?
3 Syatu bifo sma grabu Yesus èn kiri en, a ben taigi en disipel: „No bruya. Bribi na ini Gado, èn bribi na ini mi tu” (Yohanes 14:1). Yesus ben taki den wortu disi fu di wan tu sari sani ben o pasa nanga den apostel heri esi. Leti baka dati, den ben o kisi hebi frufolgu. Yesus ben sabi taki den apostel fu en ben kan naki futu, soso fu di den ben lasi-ati (Yohanes 16:1). Efu den no ben o basi a sari firi disi, dan den ben kan kon swaki na yeye fasi èn disi ben kan meki taki den lasi frutrow na ini Yehovah. Na so a de tu nanga Kresten na ini a ten disi. Lasi-ati kan moro wi te a e tan fu wan langa pisi ten, èn a kan tron leki wan hebi na wi ati (Yeremia 8:18). Wi kan firi leki wi e kon swaki. Te wi de nanga someni problema, dan wi kan firi brokosaka èn wi kan kon weri na yeye fasi, kande wi e lasi a firi srefi fu anbegi Yehovah.
4. San kan yepi wi fu no meki wi agersi ati kon weri?
4 A Bijbel rai disi fiti srefisrefi: „Kibri yu ati, moro leki ala tra sani di de fu kibri, bika na drape den rutu fu a libi de” (Odo 4:23). Bijbel e gi bun rai di kan yepi wi fu kibri na agersi ati fu wi, so taki wi no lasi-ati èn wi no kon weri na yeye fasi. Ma a fosi sani di wi musu du, na fu ondrosuku san e meki wi kon weri.
A Kresten bribi a no wan hebi
5. Sortu sani di Yesus ben taki fu a frantwortu fu wan Kresten disipel, gersi leki den de kontrari fu makandra?
5 A tru taki wi musu du furu muiti fu libi leki Kresten (Lukas 13:24). Yesus ben taki srefi: „Efu wan sma no e tyari en pina-postu èn a no e waka na mi baka, dan a no man de wan disipel fu mi” (Lukas 14:27). Te yu e leisi den wortu disi frafra, dan a gersi leki den de kontrari san Yesus ben taki dati en lai lekti èn dati a e gi krakti baka. Ma te yu e luku en moro fini, dan a no ben taki sani di de kontrari fu makandra.
6, 7. Fu san ede wi kan taki dati wi fasi fu anbegi no e meki wi kon weri?
6 Te wi e du furu muiti èn wi e wroko tranga, dan wi kan kon weri, ma toku wi kan firi switi èn wi kan kisi nyun krakti baka fu di wi du bun gi trawan (Preikiman 3:13, 22). Èn sortu sani moro bun leki fu prati den tumusi moi tru tori fu Bijbel nanga tra sma? Boiti dati, a muiti di wi e du fu hori wisrefi na den hei markitiki fu Gado, no de noti te wi e prakseri den wini di wi e kisi fu dati (Odo 2:10-20). Srefi te wi e kisi frufolgu, wi e si dati leki wan grani fu nyan pina fu Gado Kownukondre ede.—1 Petrus 4:14.
7 A lai fu Yesus e gi wi nyun krakti trutru, spesrutu te wi e teki en gersi nanga den sma di de na dungru na yeyefasi fu di den de ondro a tyatyari fu falsi bribi. Gado abi trutru lobi gi wi èn a no e aksi wi fu du sani di wi no man du. „Den wet fu [Yehovah] no de wan hebi” (1 Yohanes 5:3). A tru Kresten bribi, soleki fa den Buku fu Bijbel e sori, no e kwinsi wi. A de krin fu si taki wi fasi fu anbegi no e meki wi kon weri èn a no e meki wi lasi-ati.
’Puru ibri hebi’ na yu tapu
8. San e meki furu tron taki wi e kon weri na yeye fasi?
8 Nofo tron a de so taki te wi e kon weri na yeye fasi, dan dati na wan bakapisi fu den tra lai di na ogri sistema disi e poti na wi tapu. Fu di „heri grontapu de na ini a makti fu na ogriwan”, meki ala sortu ogri e lontu wi di kan meki taki wi kon weri èn taki wi leki Kresten e go na baka na yeye fasi (1 Yohanes 5:19). Te wi e du sani di no de fanowdu trutru, dan dati kan meki wi libi leki Kresten kon moro muilek èn a kan bruya den sani di wan Kresten musu du. Den lai disi kan meki a libi fu wi kon so hebi taki pikinmoro wi no man tyari en moro. Fu dati ede, a fiti taki Bijbel e gi wi a rai fu ’puru ibri hebi’ na wi tapu.—Hebrewsma 12:1-3.
9. Fa gudu kan de wan hebi gi wi te wi e feti baka dati?
9 Fu eksempre, wi kan kon kisi a denki fu grontapu, namku taki wan bigi nen, moni, prisiri, èn fu go koiri na tra kondre, na den moro prenspari sani na ini a libi (1 Yohanes 2:15-17). Son fosi yarihondro Kresten di ben e feti baka gudu, ben meki a libi fu den kon moro muilek. Na apostel Paulus e fruteri: „Den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e meki sma fadon go na ini pori. Bika a lobi gi moni na wan rutu fu ala sortu takru sani, èn fu di sonwan e feti na baka a lobi disi, meki den gowe libi a bribi èn den sutu densrefi na den heri skin nanga furu pen.”—1 Timoteyus 6:9, 10.
10. San wi kan leri fu gudu te wi e luku na agersitori di Yesus ben gi fu a man di ben sai siri?
10 Te wi e firi taki wi kon weri èn taki wi lasi-ati fu du diniwroko gi Gado, dan a bun fu aksi wisrefi efu wi e feti baka gudu na so wan fasi taki wi e kon swaki na yeye fasi? Disi kan de so trutru, soleki fa Yesus ben sori na ini na agersitori di a ben fruteri fu a man di ben sai siri. Yesus ben agersi „den broko-ede fu a sistema disi, a bedrigifasi fu gudu, nanga a wani di sma wani tra sani tu”, nanga makabon di e boro ’kon na ini na ati èn dati e kiri’ a siri fu a wortu fu Gado di de na ini wi ati (Markus 4:18, 19). Fu dati ede, Bijbel e gi wi a rai: „Meki a fasi fa unu e libi de fri fu a lobi fu moni, èn de tevrede nanga den sani fu now. Bika a taki: ’Mi no sa gowe libi yu kwetikweti, èn noiti mi sa drai mi baka gi yu.’”—Hebrewsma 13:5.
11. Fa wi kan puru sani di kan de wan hebi gi wi?
11 A no soso a feti di wi e feti fu abi moro gudu, kan meki wi libi kon moro muilek, ma son tron na san wi e du nanga den sani di wi abi kaba. Son sma kan firi taki den e kon weri èn den e firi brokosaka fu di a gosontu fu den e go na baka, fu di den lasi wan tu lobiwan fu den na ini dede, èn fu di den abi tra problema tu di e gi broko-ede. Den kon si taki den ben abi fu kenki sani ten na ten. Wan trowpaar ben bosroiti fu tapu nanga son sani di den ben lobi fu du na ini den fri ten èn sani di no de fanowdu trutru. Baka di den sidon luku sortu sani den ben abi, dan den kibri ala den sani di abi fu du nanga san den lobi fu du na ini den fri ten. Ten na ten, wi alamala kan kisi wini te wi sidon luku sortu sani wi gwenti du èn san na den sani di wi abi. Na so fasi wi kan puru ibri sani di no de fanowdu èn di de wan hebi gi wi, so taki wi no e kon weri èn firi brokosaka na ini wi sili.
A de tumusi prenspari fu sabi omeni yu man du èn fiti yusrefi na dati
12. San wi musu frustan fu den fowtu di wi e meki?
12 Den fowtu di wi e meki, awinsi na pikinpikin fowtu, kan meki wi libi kon moro muilek te fu kaba. David ben taki tru tori di a taki: „Den fowtu fu mi pasa mi ede; leki wan hebi lai den de tumusi hebi gi mi” (Psalm 38:4). Nofo tron wi kan puru hebi lai na wi tapu te wi e tyari kenki kon na ini wi libi.
13. Fa wi kan si a diniwroko fu wi na wan yoisti fasi te wi e hori na prakseri san wi man èn san wi no man du?
13 Bijbel e gi wi deki-ati fu kon kisi „koni nanga frustan” (Odo 3:21, 22). „A koni fu tapusei . . . e fiti ensrefi”, na so Bijbel e taki (Yakobus 3:17). A Kresten diniwroko de leki wan hebi gi son sma fu di den wani du so furu leki trawan. Ma Bijbel e gi wi a rai: „Meki ibri sma buweisi san na en eigi wroko, èn dan a sa abi wan reide fu prisiri fu ensrefi wawan, èn no te a teki ensrefi gersi nanga a tra sma. Bika ibriwan sma sa tyari en eigi lai” (Galasiasma 6:4, 5). A tru taki a bun eksempre fu wi Kresten brada nanga sisa kan gi wi deki-ati fu dini Yehovah nanga wi heri ati, ma te wi abi a koni fu du wi wroko èn te wi e hori na prakseri san wi man du, dan dati sa yepi wi fu poti marki di wi man doro na ini a situwâsi fu wi.
14, 15. Fa wi kan sori taki wi koni te wi e poti prakseri na san wi abi fanowdu na skin fasi èn fa wi e firi?
14 Awinsi wi e du pikinpikin sani di no gersi so prenspari, toku wi musu hori na prakseri san wi man èn san wi no man du, bika dati sa yepi wi tu fu no kon weri. Fu eksempre, a de so taki wi e meki muiti fu kisi bun gwenti di kan yepi wi fu tan gosontu? Luku na eksempre fu wan trowpaar di e dini na wan fu den bijkantoro fu Yehovah Kotoigi. Den kon si taki a de wan koni sani fu sorgu taki den no kon weri. A wefi e taki: „Awinsi wi abi furu wroko fu du, toku wi e pruberi fu go sribi na a srefi ten ibri neti. Doronomo wi e du sani fu lusu a skin sosrefi. Disi yepi wi trutru. Wi kon si omeni wi man du, èn wi e hori wisrefi na dati. Wi no e pruberi fu du someni leki trawan di gersi leki den man du moro furu.” Wi e nyan bun nyanyan doronomo èn wi e rostu nofo? Te wi e poti nofo prakseri na a gosontu fu wi, dan dati kan de wan yepi fu no firi brokosaka èn fu no kon weri na yeye fasi.
15 Sonwan fu wi abi spesrutu sani fanowdu. Fu eksempre, wan Kresten sisa ben du furuten diniwroko na difrenti presi pe a kisi furu tyalensi. A sisa disi ben kisi seryusu problema nanga a gosontu fu en, èn a ben kisi kanker sosrefi. San e yepi en na ini den sortu muilek situwâsi disi? A e taki: „Son leisi a de prenspari gi mi fu de mi wawan na wan presi pe nowan babari no de. O moro mi e si taki mi e kisi broko-ede èn taki mi e kon weri, o moro mi abi ten fanowdu fu de mi wawan so taki mi kan leisi èn rostu.” Te wi e gebroiki wi frustan nanga a koni di wi abi, dan dati sa yepi wi fu si san wi abi fanowdu èn fu du san wi musu du, bika na so wan fasi wi no o kon weri na yeye fasi.
Yehovah Gado e gi wi krakti
16, 17. (a) Fu san ede a de tumusi prenspari fu sorgu taki wi tan gosontu na yeye fasi? (b) Sortu gwenti wi musu abi ibri dei?
16 A no de fu taki dati a de tumusi prenspari fu sorgu taki wi tan gosontu na yeye fasi. Te wi abi wan krosibei banti nanga Yehovah Gado, dan kande wi sa kon weri na skin fasi, ma noiti wi sa kon weri fu anbegi en. Yehovah na a sma di „e gi krakti na a sma di weri, èn na sma di no abi dinamik krakti a e gi krakti pasa marki” (Yesaya 40:28, 29). Na apostel Paulus di ondrofeni taki disi de so trutru, ben skrifi: „Wi no e tapu, ma srefi efu a sma di wi de na dorosei e lasi gowe, fu tru a sma di wi de na inisei e kon nyun baka, ibri dei.”—2 Korentesma 4:16.
17 Luku den wortu „ibri dei”. Disi e sori taki ibri dei wi musu gebroiki den sani di Yehovah e gi wi. Wan zendeling di ben dini getrow 43 yari langa, ben kon weri na skin fasi son leisi èn a ben lasi-ati ten na ten. Ma a tan go doro. A e taki: „Mi meki a tron wan gwenti gi mi fu opo fruku so taki mi abi ten fu begi Yehovah èn fu leisi en Wortu, fosi mi bigin wroko. Na aladei gwenti disi yepi mi fu horidoro te now.” Wi kan abi a frutrow trutru taki Yehovah sa gi wi krakti te wi e begi en doronomo, iya, „ibri dei” wi musu du dati. Wi musu denki dipi sosrefi fu den tumusi moi fasi di a abi èn den sani di a pramisi wi.
18. Sortu trowstu Bijbel e gi na den getrow sma di kon owru, noso di siki?
18 Disi de wan yepi spesrutu gi den wan di lasi-ati fu di den e kon owru èn fu di den e siki. Kande den sma disi no e firi brokosaka fu di den no man du so furu leki trawan, ma den kan firi brokosaka fu di den e prakseri san den ben man du fosi. A de wan bigi trowstu fu sabi taki Yehovah e gi grani na den owruwan! Bijbel e taki: „Weti wiwiri na wan tumusi moi kownu-ati, te den e feni en na tapu a pasi fu regtfardikifasi” (Odo 16:31). Yehovah sabi omeni wi man du, èn a e warderi en trutru taki wi e dini en nanga wi heri ati aladi wi kon swaki. Èn noiti Gado sa frigiti den bun wroko di wi ben du. Den Buku fu Bijbel e gi wi a dyaranti disi: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den” (Hebrewsma 6:10). Wi alamala breiti srefisrefi fu de makandra nanga den wan di de loyaal na Yehovah furu yari kaba!
No lasi-ati
19. Fa wi e kisi wini te wi e tan du san bun?
19 Furu sma e bribi taki te wan sma abi a gwenti fu du sani pe a musu gebroiki en krakti, dan dati kan meki taki a no e weri so furu moro. Na so a de tu taki te wi abi a gwenti fu du sani di abi fu du nanga yeye afersi, dan wi no o firi brokosaka èn wi no o kon weri moro na yeye fasi. Bijbel e taki: „No meki wi tapu fu du san bun, bika na a reti ten wi sa koti efu wi no e kon weri. We dan, solanga a ten bun gi wi ete, meki wi du bun gi ala sma, ma spesrutu gi den wan di de na ini a srefi bribi leki wi” (Galasiasma 6:9, 10). Luku den wortu „du san bun” èn „du bun”. Den wortu disi e sori taki wi musu du wan sani. Te wi e du bun sani gi trawan, dan disi kan yepi wi trutru fu no kon weri fu du diniwroko gi Yehovah.
20. Nanga sortu sma wi no musu abi demakandra, efu wi no wani lasi-ati?
20 Kontrari fu dati, te wi abi demakandra nanga sma di no e poti prakseri na den wet fu Gado èn te wi e go du sani makandra nanga den, dan a kan tron wan hebi di e meki wi kon weri. Bijbel e warskow wi: „Wan ston hebi èn wan lai santi e wegi furu, ma a tanteri di wan donman e tanteri trawan, hebi moro ala tu” (Odo 27:3). Efu wi no wani lasi-ati èn efu wi no wani kon weri, dan a de wan bun sani fu no abi demakandra nanga sma di e si soso a takru sei fu wan tori, di lobi fu suku fowtu na trawan, èn di lobi fu krutu den.
21. Fa wi kan gi trawan deki-ati na den Kresten konmakandra?
21 Den Kresten konmakandra na wan seti fu Yehovah di kan gi wi krakti na yeye fasi. Drape wi e kisi moi okasi fu gi makandra deki-ati fu di wi e leri sani di e gi wi krakti baka, èn fu di wi abi demakandra nanga wi brada nanga sisa (Hebrewsma 10:25). Ala sma na ini a gemeente musu du muiti fu gi trawan deki-ati nanga den piki di den e gi na den konmakandra, noso te den abi wan prati na a programa na tapu a podium. Spesrutu den wan di e teki fesi leki leriman abi a frantwortu fu gi trawan deki-ati (Yesaya 32:1, 2). Srefi te a de fanowdu fu gi rai noso piri-ai, den musu du dati na wan fasi di e gi sma krakti baka (Galasiasma 6:1, 2). A lobi di wi abi gi tra sma sa yepi wi trutru fu man dini Yehovah sondro fu kon weri.—Psalm 133:1; Yohanes 13:35.
22. Fu san ede wi kan abi deki-ati, aladi wi na sondu libisma?
22 Efu wi wani anbegi Yehovah na ini a ten disi fu a kaba, dan wi abi fu wroko. Kresten sosrefi e kon weri na frustan sei, den e firi brokosaka, èn den de na ini situwâsi di e gi broko-ede. A sondu libisma skin fu wi swaki, neleki sani di meki fu tokotoko. Ma Bijbel e taki: „Wi abi a gudu disi na ini tokotoko patu, so taki a krakti di bigi pasa marki ben sa de fu Gado èn no fu wisrefi” (2 Korentesma 4:7). Iya, wi sa kon weri, ma meki wi tan go doro èn meki wi no lasi-ati. Na presi fu dati, meki wi „abi deki-ati èn taki: ’Yehovah na mi Yepiman.’”—Hebrewsma 13:6.
Luku syatu baka san wi leri
• San na wan tu hebi lai di wi kan puru na wi tapu?
• Fa wi kan „du san bun” gi wi Kresten brada nanga sisa?
• Fa Yehovah e yepi wi te wi e firi taki wi weri, noso te wi lasi-ati?
[Aksi fu a tori disi]
[Prenki na tapu bladzijde 23]
Yesus ben sabi taki efu den apostel ben o lasi-ati fu wan langa pisi ten, dan dati ben kan tron wan problema gi den
[Prenki na tapu bladzijde 24]
Son sma tapu nanga son sani di den lobi fu du na ini den fri ten èn sani di no de so prenspari
[Prenki na tapu bladzijde 26]
Awinsi wi no man du ala sani, toku Yehovah e warderi en trutru taki wi e anbegi en nanga wi heri ati