Yehovah, wi ’fortresi na ini ten fu banawtu’
Yehovah, wi ’fortresi na ini ten fu banawtu’
„A frulusu fu den regtfardikiwan e kon fu Yehovah; en na a fortresi fu den na ini ten fu banawtu.”—PSALM 37:39.
1, 2. (a) San Yesus ben begi gi den disipel fu en? (b) San Gado wani fu pasa nanga en pipel?
YEHOVAH abi ala makti. A abi a makti fu kibri den getrow futuboi fu en na iniwan fasi di a wani. A abi a makti sosrefi fu puru en pipel na mindri den tra sma na grontapu èn a kan poti den na wan presi pe nowan ogri e miti den èn pe den kan libi na ini vrede. Ma Yesus ben begi en hemel Tata gi den disipel fu en, taki: „Mi no e begi yu fu puru den na grontapu, ma mi e begi yu fu kibri den gi na ogriwan.”—Yohanes 17:15.
2 Yehovah bosroiti fu no puru wi „na grontapu”. Na presi fu dati, a wani taki wi musu libi na mindri tra sma na grontapu, so taki wi kan fruteri den a boskopu fu en di e gi sma howpu èn trowstu (Romesma 10:13-15). Ma soleki fa Yesus ben taki na ini a begi fu en, dan „na ogriwan” kan du wi ogri fu di wi e libi na ini a grontapu disi. Trangayesi libisma nanga ogri yeye e du furu ogri èn den e pina sma, sobun Kresten kan ondrofeni disi tu.—1 Petrus 5:9.
3. Nanga sortu tru tori den getrow futuboi fu Yehovah srefi e kisi fu du, ma sortu trowstu wi e feni na ini Gado Wortu?
3 A no musu fruwondru wi taki te den sortu tesi disi e miti wi, dan wi kan lasi-ati fu wan pisi ten (Odo 24:10). Bijbel abi furu tori di e fruteri fu getrow sma di ben lasi-ati. „Den rampu fu a regtfardikiwan furu”, na so a psalm skrifiman e taki, „ma Yehovah e frulusu en fu den alamala” (Psalm 34:19). Iya, ogri sani e pasa srefi nanga „a regtfardikiwan”. Neleki a psalm skrifiman David, na so wi kan kisi a firi son leisi taki wi ’no abi nowan krakti moro èn taki wi e firi brokosaka pasa marki’ (Psalm 38:8). Iya, a de wan trowstu fu sabi taki „Yehovah de krosibei fu den wan di lasi-ati; èn den wan di e firi brokosaka, a e frulusu”.—Psalm 34:18; 94:19.
4, 5. (a) San wi musu du efu wi wani kisi kibri fu Gado, soleki fa Odo 18:10 e taki? (b) San na wan tu spesrutu sani di wi musu du efu wi wani taki Gado yepi wi?
4 Soleki fa Yesus ben begi, dan Yehovah e luku wi trutru. A de wi ’fortresi na ini ten fu banawtu’ (Psalm 37:39). A buku Odo e taki wan srefi sortu sani te a e taki: „A nen fu Yehovah na wan tranga toren. Na drape a regtfardikiwan e lon go èn e kisi kibri” (Odo 18:10). A tekst disi e tyari wan prenspari tru tori kon na krin, namku taki fu di Yehovah abi lobi-ati fasi, meki a e broko en ede nanga den sma di a meki. Gado e kibri spesrutu den regtfardikiwan di e suku en fayafaya, neleki den e lon go suku kibri na ini wan tranga toren.
5 Te wi abi problema di e gi wi broko-ede, dan fa wi kan lon go suku kibri na Yehovah? Meki wi luku dri prenspari sani di wi musu du fu man kisi yepi fu Yehovah. A fosi sani, na taki wi musu taki nanga wi hemel Tata na ini begi. A di fu tu sani, na taki wi musu meki a santa yeye fu en tiri wi. Èn a di fu dri sani, na taki wi musu saka wisrefi ondro a seti fu Yehovah fu di wi o abi demakandra nanga tra Kresten brada nanga sisa di kan yepi wi nanga den broko-ede fu wi.
A krakti fu begi
6. Fa tru Kresten e si begi?
6 Son sabiman fu gosontu afersi e taki dati begi de leki wan dresi gi sma di e firi brokosaka, noso di lasi-ati. A kan de so trutru taki wan sma kan firi korostu te a de en wawan èn e denki dipi fu sani leki wan sortu begi. Ma wan sma kan kisi a srefi firi tu te a e arki sani soleki fowru di e froiti, noso te wan tra sma e hari en baka gi en. Tru Kresten no e si begi leki wan sani di e meki wan sma firi korostu nomo. Wi e si begi leki wan lespeki takimakandra di wi abi nanga Gado, wi Mekiman. Begi abi fu du nanga a dini di wi e dini Gado fayafaya èn a frutrow di wi abi na ini en. Iya, begi na wan pisi fu na anbegi fu wi.
7. San a wani taki fu abi frutrow te wi e begi, èn fa den sortu begi disi e yepi wi nanga den broko-ede fu wi?
7 Te wi e begi, dan wi musu abi frutrow na ini Yehovah. Na apostel Yohanes ben skrifi: „Disi na san wi sabi seiker fu en, taki awansi san wi e aksi akruderi a wani fu en, a e yere wi” (1 Yohanes 5:14). Yehovah, a Moro Hei Libisani di de, a wan-enkri tru èn almakti Gado, e poti spesrutu prakseri na den fayafaya begi fu den anbegiman fu en. A kan de wan trowstu gi wi kaba fu sabi taki wi lobi-ati Gado e yere wi te wi e fruteri en fu den broko-ede nanga problema fu wi.—Filipisma 4:6.
8. Fu san ede getrow Kresten noiti no musu firi syen, noso kisi a firi taki den no warti fu taki nanga Yehovah na ini begi?
8 Te getrow Kresten e taki nanga Yehovah na ini begi, dan noiti den no musu syen, den no musu firi leki den no warti, èn den no musu lasi frutrow. A tru taki te wi du wan sani di e meki wi firi brokosaka, noso te problema e moro wi, dan a no ala ten wi wani taki nanga Yehovah na ini begi. Na den sortu okasi disi a bun te wi e hori na prakseri taki Yehovah „e sori sari-ati gi den wan di e kisi kwinsi” èn a e „trowstu den wan di e firi brokosaka” (Yesaya 49:13; 2 Korentesma 7:6). Spesrutu na ini den ten disi pe sma e bruya èn den e firi brokosaka, wi musu frutrow tapu wi hemel Tata èn wi musu si en leki wi fortresi.
9. San bribi abi fu du nanga a taki di wi e taki nanga Gado na ini begi?
9 Efu wi wani kisi wini dorodoro fu a grani di wi abi fu taki nanga Gado na ini begi, dan wi musu abi trutru bribi. Bijbel e taki dati „a sma di e kon na Gado, musu bribi taki a de èn taki a e tron a sma di e pai den wan di e suku en seryusu” (Hebrewsma 11:6). A no sari fu bribi nomo taki Gado de trutru. Trutru bribi na a tranga bribi di wi abi taki Gado man èn wani pai wi fu di wi e gi yesi na en na ini ala san wi e du. „Den ai fu Yehovah de na tapu den regtfardikiwan, èn den yesi fu en e arki den tranga begi fu den” (1 Petrus 3:12). Te wi e tan hori na prakseri taki Yehovah e broko en ede nanga wi na wan lobi-ati fasi, dan den begi fu wi o de wan spesrutu sani gi wi.
10. Fa den begi fu wi musu de efu wi wani kisi yepi na yeye fasi fu Yehovah?
10 Yehovah e arki den begi fu wi te wi e begi nanga wi heri ati. A psalm skrifiman ben skrifi: „Mi ben kari yu nanga mi heri ati. Piki mi, o Yehovah” (Psalm 119:145). Tra fasi leki den begi fu furu kerkisma, den begi fu wi a no wan gwenti nomo di wi e du sondro firi, noso wan sani di no de so prenspari. Te wi e begi Yehovah nanga wi „heri ati”, dan wi no e taki wortu di no wani taki noti. Baka den sortu fayafaya begi disi, wi e bigin kisi wan korostu firi fu di wi trowe wi „hebi na tapu Yehovah”. Soleki fa Bijbel e pramisi, dan „ensrefi sa horibaka gi” wi.—Psalm 55:22; 1 Petrus 5:6, 7.
Gado yeye na wi yepiman
11. San na wan fasi fa Yehovah e piki wi te wi e „tan aksi” en fu yepi wi?
11 Yehovah a no a Yereman fu begi wawan, ma a de a Sma sosrefi di e gi piki tapu den begi (Psalm 65:2). David ben skrifi: „Na a dei fu mi banawtu mi sa kari yu, bika yu sa piki mi” (Psalm 86:7). Dati meki Yesus ben gi den disipel fu en deki-ati fu „tan aksi” yepi na Yehovah bika „a Tata na hemel” sa „gi santa yeye na den wan di e aksi en fu dati” (Lukas 11:9-13). Iya, a wroko krakti fu Gado de leki wan yepiman, noso wan trowstuman gi en pipel.—Yohanes 14:16.
12. Fa a yeye fu Gado kan yepi wi te problema e moro wi?
12 Srefi te tesi e miti wi, a yeye fu Gado kan gi wi „a krakti di bigi pasa marki” (2 Korentesma 4:7). Na apostel Paulus, di ben horidoro na ini furu situwâsi di e gi broko-ede, ben taki nanga ala frutrow: „Mi man du ala sani fu di en e gi mi krakti” (Filipisma 4:13). Na so a de tu, taki furu Kresten na ini a ten disi ben firi taki den ben kisi krakti baka na yeye fasi èn den no ben firi brokosaka moro, baka di den ben begi fayafaya. Nofo tron a de so taki problema di e gi broko-ede no e sori so bigi moro, baka te wi kisi yepi fu a yeye fu Gado. Fu di Gado e gi wi krakti na a fasi disi, meki wi sosrefi kan taki a srefi sani di na apostel ben taki, namku: „Na ala fasi den kwinsi wi, ma den no kwinsi wi na so wan fasi taki wi no man buweigi moro; wi no sabi san fu du moro, ma wi no de sondro wan fasi fu komoto; den frufolgu wi, ma Gado no libi wi na baka sondro yepi; den trowe wi na gron, ma wi no kisi pori.”—2 Korentesma 4:8, 9.
13, 14. (a) Fa Yehovah sori nanga yepi fu en Wortu di a meki sma skrifi, taki a de wi fortresi? (b) Fa yu ondrofeni taki Bijbel gronprakseri yepi yu na ini yu libi?
13 A santa yeye meki tu taki sma ben man skrifi Gado Wortu èn taki a kibri gi wi te now ete, so taki wi kan kisi wini fu dati. Fa Yehovah sori nanga yepi fu en Wortu taki a de wi fortresi na ini ten fu banawtu? Wan fasi, na taki a gi wi koni fu man du sani èn koni fu man si sani krin (Odo 3:21-24). Bijbel e oefen wi frustan èn a e yepi wi fu prakseri moro bun fu sani (Romesma 12:1). Te wi e leisi èn e studeri Gado Wortu doronomo, èn te wi e du san a e taki, dan wi o man ’gebroiki wi frustan fu man si sani krin, so taki wi kan sabi san bun èn san no bun’ (Hebrewsma 5:14). Kande yusrefi ondrofeni fa Bijbel gronprakseri yepi yu fu teki koni bosroiti di yu ben kisi problema. Bijbel e gi wi koni di kan yepi wi fu feni bun lusu gi problema di e gi wi broko-ede.—Odo 1:4.
14 Na ini Gado Wortu wi e feni wan tra sani di e gi wi krakti, namku a howpu fu kisi frulusu (Romesma 15:4). Bijbel e taigi wi taki ogri sani no o pasa fu ala ten. Iniwan sani di e meki wi pina, de fu wan syatu pisi ten nomo (2 Korentesma 4:16-18). Wi abi a „howpu fu têgo libi di Gado, di no man lei, pramisi langa ten pasa kaba” (Titus 1:2). Efu wi e prisiri nanga a howpu dati, aladi wi e tan hori na prakseri sortu moi pisi ten Yehovah pramisi wi na ini a ten di e kon, dan wi kan horidoro te tesi e miti wi.—Romesma 12:12; 1 Tesalonikasma 1:3.
A gemeente—Wan fasi fa Gado e sori lobi
15. Fa Kresten kan de wan blesi gi makandra?
15 Wan tra sani di Yehovah gi wi fu yepi wi na ini ten fu banawtu, na a banti di wi abi nanga den brada nanga sisa na ini a Kresten gemeente. Bijbel e taki: „Wan trutru mati abi lobi ala ten, èn a de wan brada di en mama meki fu te banawtu de” (Odo 17:17). Gado Wortu e gi ala sma na ini a gemeente a deki-ati fu lespeki èn fu lobi makandra (Romesma 12:10). „Meki ibriwan sma tan suku san bun gi trawan, ma no meki a tan suku san bun gi ensrefi”, na so na apostel Paulus ben skrifi (1 Korentesma 10:24). So wan fasi fu denki kan yepi wi fu tan poti prakseri na san trawan abi fanowdu, na presi fu luku den problema fu wi wawan. Te wi e du disi, dan wi no e yepi den nomo, ma wisrefi e firi prisiri tu, so taki den problema fu wi no gersi so hebi moro.—Tori fu den Apostel 20:35.
16. Fa ibri Kresten kan gi trawan deki-ati?
16 Man nanga uma di tranga na yeye fasi de prenspari fu gi trawan krakti na yeye fasi. Fu man du disi, den musu tyari densrefi na so wan fasi taki sma lobi fu go na den, èn den musu de klariklari fu yepi trawan (2 Korentesma 6:11-13). A gemeente e kisi blesi trutru te ala sma e teki ten fu prèise yonguwan, fu tranga a bribi fu den nyunwan na ini a gemeente, èn fu gi deki-ati na den wan di e firi brokosaka (Romesma 15:7). A lobi gi wi brada nanga sisa sa yepi wi fu frutrow makandra ala ten. Wi no musu de esi fu denki taki te wan sma abi furu problema, dan disi e sori taki a swaki na yeye fasi. Na wan fasi di fiti, Paulus e gi Kresten a deki-ati fu „taki nanga den sili di brokosaka, fu trowstu den” (1 Tesalonikasma 5:14). Bijbel e sori taki getrow Kresten srefi kan lasi-ati.—Tori fu den Apostel 14:15.
17. Sortu okasi wi abi fu meki a banti fu wi nanga wi Kresten brada nanga sisa kon moro tranga?
17 Den Kresten konmakandra na wan moi okasi gi wi fu trowstu makandra èn fu gi makandra deki-ati (Hebrewsma 10:24, 25). Fu abi demakandra na so wan lobi-ati fasi, a no wan sani di e pasa na den gemeente konmakandra wawan. Na presi fu dati, a pipel fu Gado e suku okasi sosrefi fu kon makandra na tra presi pe den kan abi prisiri na wan fasi di fiti. Te muilek situwâsi e opo kon, dan wi o de klariklari fu yepi makandra, bika wi kon de trutru mati fu makandra. Na apostel Paulus ben skrifi: „Nowan pratifasi no de na ini a skin, ma . . . den memre fu a skin musu sorgu gi makandra . . . . Èn efu wan memre e pina, dan ala den tra memre e pina nanga en; noso efu wan memre e kisi glori, dan ala den tra memre e prisiri nanga en.”—1 Korentesma 12:25, 26.
18. Gi sortu firi wi musu kakafutu te wi e firi brokosaka?
18 A kan son leisi taki wi e firi brokosaka so te, taki wi no wani abi demakandra nanga wi Kresten brada nanga sisa. Wi musu kakafutu gi a firi dati, so taki wi kan kisi a trowstu nanga a yepi di wi brada nanga sisa e gi. Bijbel e warskow wi taki: „Wan sma di e hori ensrefi aparti, sa suku en eigi wini nomo; a sa handri na wan fasi di e sori taki a no e poti prakseri kwetikweti na koni rai” (Odo 18:1). Gado gi wi brada nanga sisa na yeye fasi fu sori taki a e broko en ede nanga wi. Efu wi e si disi leki wan fasi fa wi lobi-ati Gado e sorgu wi, dan wi sa kisi frulekti na ini ten fu banawtu.
Tan abi wan bun denki fu a situwâsi fu yu
19, 20. Fa den Buku fu Bijbel e yepi wi fu no prakseri takru fu a situwâsi fu wi?
19 Te wi lasi-ati èn e sari, dan a makriki fu prakseri takru fu a situwâsi fu wi. Fu eksempre, te sma e gens wi, dan sonwan fu wi kan bigin tweifri na a yeyefasi fu den fu di den e denki taki den problema fu den na wan fasi fa Gado e sori taki a no feni den bun. Ma memre taki Yehovah no e tesi nowan sma nanga „ogri sani” (Yakobus 1:13). „Na ini en ati, [Gado] no ben wani kwinsi sma, èn a no ben wani meki den manpikin fu libisma firi sari”, na so Bijbel e taki (Kragisingi 3:33). Na presi fu dati, Yehovah de nanga dipi sari te a e si fa den futuboi fu en e pina.—Yesaya 63:8, 9; Sakaria 2:8.
20 Yehovah na „a Tata di abi furu sari-ati èn a Gado fu ala trowstu” (2 Korentesma 1:3). A e broko en ede nanga wi èn a sa hei wi te fu kaba (1 Petrus 5:6, 7). Te wi tan hori na prakseri taki Gado lobi wi trutru, dan dati sa yepi wi fu tan denki bun fu a situwâsi fu wi, iya, a sa yepi wi fu prisiri srefi. Yakobus ben skrifi: „Unu musu prisiri srefisrefi, mi brada, te unu e miti nanga difrenti tesi” (Yakobus 1:2). Fu san ede? A e piki: „Bika te Yehovah feni en bun, dan a sa kisi a kownu-ati fu libi, di Gado pramisi den wan di e tan lobi en.”—Yakobus 1:12.
21. Sortu dyaranti Gado e gi den sma di e sori taki den de getrow na en, awinsi sortu tesi den e kisi?
21 Soleki fa Yesus ben warskow wi, dan ala sortu banawtu o miti wi na ini a grontapu (Yohanes 16:33). Ma Bijbel e pramisi wi taki nowan „banawtu noso frufolgu noso angri noso sososkin noso kefar” sa prati wi fu a lobi fu Yehovah èn a lobi fu en Manpikin (Romesma 8:35, 39). A de wan trowstu trutru fu sabi taki iniwan banawtu di e miti wi now, de fu wan syatu pisi ten nomo! Ma na ini a pisi ten di wi e wakti a kaba fu ala pina di e miti libisma, wi lobi-ati Tata, Yehovah, e sorgu wi. Efu wi e lon go suku kibri na en, a sa sori taki a de „wan hei kibripresi gi iniwan sma di masi, wan kibripresi na ini ten fu banawtu”.—Psalm 9:9.
San wi ben leri?
• San Kresten musu fruwakti fu di den e libi na ini na ogri grontapu disi?
• Fa den fayafaya begi fu wi kan gi wi krakti te tesi e miti wi?
• Fa a yeye fu Gado na wan yepiman?
• San wi kan du fu yepi makandra?
[Aksi fu a tori disi]
[Prenki na tapu bladzijde 18]
Wi musu suku Yehovah neleki fa wi ben o lon go na ini wan tranga toren
[Prenki na tapu bladzijde 20]
Den wan di lepi na yeye fasi e gebroiki ibri okasi fu prèise trawan èn fu gi den deki-ati