Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San ben de a Complutenzer Polyglot, èn fu san ede a ben de prenspari?

Disi ben de wan Bijbel di ben druk nanga moro leki wán tongo na ini, èn den difrenti tongo disi ben skrifi sei nanga sei. A Bijbel disi ben abi a moro bun Hebrewtongo, Grikitongo, nanga Latijntongo tekst na ini. Son pisi ben skrifi na ini Arameisitongo. A Bijbel disi di ben abi so furu tongo na ini, ben de wan bigi yepi ini a wroko di sma ben du fu meki wan moro bun vertaling fu den fosi tongo fu Bijbel.—15/4, bladzijde 28-31.

• Fa libisma kan meki Gado firi prisiri?

Fu di Yehovah na wan trutru sma di de na libi, meki a man denki, a man du sani, èn a abi firi. En na „a koloku Gado”, èn a e prisiri fu du san a abi na prakseri (1 Timoteyus 1:11; Psalm 104:31). O moro wi e kon sabi fa Gado e firi, o moro wi o kon sabi san wi kan du fu prisiri en ati.—15/5, bladzijde 4-7.

• Fu san ede David ben gi pasi taki en wefi Mikal ben abi wan terafimpopki?

Di Kownu Saul ben wani kiri David, dan Mikal yepi David fu lowe gowe, fu di a poti wan popki, di ben gersi wan libisma kande, na tapu a foroisi bangi. Mikal ben kan abi wan terafimpopki, fu di a no ben e dini Yehovah nanga en heri ati. Kande David no ben sabi taki Mikal ben abi a popki, noso kande a ben gi en pasi fu abi dati fu di a ben de na umapikin fu Kownu Saul (1 Kroniki 16:25, 26).—1/6, bladzijde 29.

• San den komando di Gado ben gi ini a tori fu brudu e sori wi?

Nanga den sani di Gado ben taki baka a Frudu, na ini a Wet fu Moses, èn na ini a komando di skrifi na ini Tori fu den Apostel 15:28, 29, a ben poti prakseri na a srakti-ofrandi di abi fu du nanga a brudu fu Yesus di lon gi libisma. Wi kan kisi pardon, èn wi kan abi vrede nanga Gado soso nanga yepi fu a brudu dati (Kolosesma 1:20).—15/6, bladzijde 14-19.

• Omeni fu den wondru fu Yesus skrifi na ini Bijbel?

Den Evangelietori e taki fu 35 wondru di Yesus du. Ma den tori no e sori soifri omeni wondru Yesus du. Boiti dati, a no ala den wondru di Yesus du, skrifi na ini den Evangelietori (Mateyus 14:14).—15/7, bladzijde 5.