Aksi fu leisiman

Fu san ede Yehovah Kotoigi e taki dati a nomru 144.000 di kari na ini a buku Openbaring no de wan agersi nomru, ma taki a de wan trutru nomru fu sma?

Na apostel Yohanes ben skrifi: „Mi ben yere omeni den wan de di ben kisi wan lakstampu, wan hondro fotenti na fo dusun” (Openbaring 7:4). Na ini Bijbel, den wortu ’den wan di ben kisi wan lakstampu’ e sori go na wan grupu fu sma di teki puru na mindri a libisma famiri fu de makandra nanga Krestes na ini hemel fu tiri a Paradijs grontapu di o kon (2 Korentesma 1:21, 22; Openbaring 5:9, 10; 20:6). Difrenti reide de fu san ede wi kan frustan taki a nomru 144.000 na wan trutru nomru fu sma. Wán reide de fu feni na ini den tekst lontu Openbaring 7:4.

Baka di na apostel Yohanes ben yere na ini wan fisyun fu a grupu fu 144.000 sma, dan a ben si wan tra grupu. Yohanes e kari a di fu tu grupu disi „wan bigi ipi, di nowan sma ben man teri èn di komoto na ala kondre nanga lo nanga pipel nanga tongo”. A bigi ipi disi na den sma di sa pasa a „bigi banawtu” libilibi, di sa pori na ogri grontapu fu a ten disi.—Openbaring 7:9, 14.

Ma luku fa Yohanes e sori a difrenti na mindri vers 4 nanga vers 9 fu Openbaring kapitel 7. Te a e taki fu a fosi grupu, namku ’den wan di ben kisi wan lakstampu’, dan a e kari wan spesrutu nomru fu sma. Ma te a e taki fu a di fu tu grupu, namku „wan bigi ipi”, dan a no e kari wan spesrutu nomru fu sma. Nanga a sani dati na prakseri, dan a no de fu taki dati a nomru 144.000 na wan trutru nomru. Efu a nomru 144.000 ben de wan agersi nomru, èn efu a ben abi fu du nanga wan grupu fu san wi no sabi omeni sma de na ini, dan a difrenti na mindri den tu tekst disi ben o lasi krakti. Sobun, den tra tekst e sori krin taki wi musu si a nomru 144.000 leki wan trutru nomru fu sma.

Difrenti Bijbel sabiman fu fositen èn fu a ten disi, kon kisi a srefi prakseri fu a tori disi. Den e taki tu dati a nomru na wan trutru nomru fu sma. Fu eksempre, sowan 100 yari pasa, Dr. Ethelbert W. Bullinger, wan wortubuku skrifiman fu Ingrisikondre, ben taki disi fu Openbaring 7:4, 9: „Den wortu disi e sori krin fa a sani de: a srefi kapitel e kari wan nomru di e sori soifri o bigi a grupu fu sma de, ma kontrari fu dati a e kari wan tra grupu fu san a no taki soifri omeni sma de na ini” (The Apocalypse or “The Day of the Lord,” bladzijde 282). No so langa pasa, Robert L. Thomas, Jr., wan professor di e gi sma leri fu a Nyun Testamenti na The Master’s Seminary na ini Amerkankondre, ben skrifi: „Buweisi no de di e sori taki wi musu si a nomru 144.000 na wan agersi fasi.” A ben taki moro fara: „[Openbaring 7:4] e kari wan nomru di e sori soifri o bigi a grupu de, ma Openbaring 7:9 no e kari wan spesrutu nomru fu sma. Efu wi e si a nomru 144.000 na wan agersi fasi, dan wi no musu si nowan fu den nomru na ini a buku Openbaring leki wan trutru nomru.”—Openbaring: An Exegetical Commentary, Pisi 1, bladzijde 474.

A buku Openbaring abi furu tori na ini di wi musu frustan na wan agersi fasi. Fu dati ede meki son sma feni taki wi musu si ala nomru di  kari na ini a buku disi, sosrefi a nomru 144.000, na wan agersi fasi (Openbaring 1:1, 4; 2:10). Ma a de krin, taki a denki dati no bun. A tru, taki Openbaring abi furu nomru na ini di wi musu si na wan agersi fasi, ma a e kari trutru nomru tu. Fu eksempre, Yohanes e taki fu „den twarfu nen fu den twarfu apostel fu a Pikin Skapu” (Openbaring 21:14). A de krin fu si, taki a nomru 12 di kari na ini a vers disi no de wan agersi nomru, ma wan trutru nomru. Moro fara, na apostel Yohanes e skrifi fu „a dusun yari” tiri fu Krestes. Efu wi e ondrosuku Bijbel finifini, dan wi e si taki a nomru dati na wan trutru nomru tu * (Openbaring 20:3, 5-7). Fu dati ede, te wi wani sabi efu wi musu si wan nomru na ini Openbaring leki wan trutru nomru noso leki wan agersi nomru, dan wi musu ondrosuku den vers na fesi èn na baka fu a bijbeltekst pe a nomru skrifi.

Boiti dati, a prakseri taki a nomru 144.000 na wan trutru nomru èn taki a e sori go na wan pikin grupu fu sma te yu agersi dati nanga a „bigi ipi”, e kruderi nanga tra pisi fu Bijbel tu. Fu eksempre, bakaten na ini a fisyun di na apostel Yohanes kisi, a yere taki den 144.000 „ben bai puru na mindri libisma leki fosi froktu” (Openbaring 14:1, 4). Den wortu „fosi froktu” e sori go na wan pikin grupu fu sma di Gado teki. Sosrefi, di Yesus ben de na grontapu, dan a ben taki fu den sma di ben o tiri makandra nanga en na ini en hemel Kownukondre, èn a ben kari den wan „pikin ipi” (Lukas 12:32; 22:29). Iya, den wan di teki puru na mindri a libisma famiri fu tiri na ini hemel, na wan pikin grupu te wi teki a nomru fu den gersi nanga a nomru fu sma di sa tan na ini a Paradijs grontapu di e kon.

Sobun, den tekst lontu Openbaring 7:4 èn sosrefi den sani di tyari kon na fesi na ini tra pisi fu Bijbel, e sori krin taki a nomru 144.000 na wan trutru nomru. A e sori go na den sma di sa de na ini hemel makandra nanga Krestes fu tiri wan paradijs grontapu, di sa furu nanga wan bigi grupu koloku sma di e anbegi Yehovah Gado.—Psalm 37:29.

[Futuwortu]

[Prenspari pisi na tapu bladzijde 31]

Na 144.000 sma nomo sa tron hemel erfgenaam

[Prenki na tapu bladzijde 31]

A „bigi ipi” na wan grupu sma fu san wi no sabi a nomru

[Sma di abi a reti fu a prenki na tapu bladzijde 31]

Stars: Courtesy of Anglo-Australian Observatory, photograph by David Malin