Gi Gado glori „nanga wán mofo”

„Leki wán man èn nanga wán mofo unu kan gi a Gado nanga a Tata fu wi Masra Yesus Krestes glori.”—ROMESMA 15:6.

1. San Paulus ben leri tra Kresten bribiman fu a fasi fa den musu handri nanga makandra te den abi difrenti fasi fu si son sani?

A NO ala Kresten e teki den srefi bosroiti èn a no alamala lobi den srefi sani. Toku, ala Kresten musu waka leki wán man na tapu a pasi fu libi. A sani dati kan? Iya, a kan efu wi no e meki pikinpikin sani tron bigi problema. Dati na san na apostel Paulus ben leri tra Kresten bribiman na ini a fosi yarihondro. Fa a ben sori taki disi de prenspari trutru? Èn fa wi di e libi na ini a ten disi, kan gebroiki a rai di Gado gi nanga yepi fu Paulus?

Kresten wánfasi de prenspari

2. Fa Paulus ben sori taki wánfasi de tumusi prenspari?

² Paulus ben sabi taki Kresten wánfasi de tumusi prenspari, èn a ben gi bun rai fu yepi Kresten fu frudrage makandra na ini lobi (Efeisesma 4:1-3; Kolosesma 3:12-14). Toku, baka di a seti furu gemeente èn baka di a ben go fisiti trawan na ini wan pisi ten fu moro leki 20 yari, dan a ben kon si taki a ben kan muilek gi den Kresten fu tan hori a wánfasi di den ben abi (1 Korentesma 1:11-13; Galasiasma 2:11-14). Sobun, a gi den Kresten brada nanga sisa na ini Rome a rai disi: „Meki a Gado . . . di e gi horidoro nanga trowstu, sorgu taki . . . leki wán man èn nanga wán mofo unu kan gi a Gado nanga a Tata fu wi Masra Yesus Krestes glori” (Romesma 15:5, 6). Na ini a ten disi, wi sosrefi musu gi Yehovah Gado glori „nanga wán mofo” leki en pipel di de wán. Omeni muiti wi e meki fu du disi?

3, 4. (a) Sortu difrenti ben de na mindri Kresten na ini Rome? (b) Fa den Kresten na ini Rome ben o man dini Yehovah „nanga wán mofo”, aladi den ben abi difrenti fasi fu si son afersi?

³ Furu Kresten na ini Rome ben de bun mati fu Paulus (Romesma 16:3-16). Aladi den ben kweki na difrenti fasi, toku Paulus ben e teki den alamala leki „lobiwan fu Gado”. A ben skrifi: „Nanga yepi fu Yesus Krestes mi e taki mi Gado tangi fu un alamala ede, fu di sma na heri grontapu e taki fu a bribi fu unu.” A de krin fu si taki den Kresten fu Rome ben de bun eksempre na furu fasi (Romesma 1:7, 8; 15:14). Ma a ben de so tu taki son memre fu a gemeente ben e si son afersi na difrenti fasi. Kresten na ini a ten disi kweki na difrenti fasi èn den abi difrenti kulturu. Dati meki den musu luku fini sortu rai Paulus ben gi fu a fasi fa den musu handri nanga sma di e si sani na difrenti fasi, bika dati sa yepi den fu taki „nanga wán mofo”.

⁴ Na ini Rome yu ben abi Dyu bribiman èn bribiman fu tra nâsi (Romesma 4:1; 11:13). Soleki fa a sori, dan son Dyu Kresten no ben man tapu nanga den sani di den ben gwenti fu du na ini a pisi ten di den ben de ondro a Wet fu Moses, aladi den ben musu frustan taki den sani dati no ben de prenspari fu man kisi frulusu. Na a tra sei, yu ben abi tra Dyu Kresten di ben frustan taki a srakti-ofrandi fu Krestes ben fri den fu ala den wet di den ben e hori bifo den tron Kresten. Leki bakapisi, den ben kenki son sani di den ben gwenti fu du (Galasiasma 4:8-11). Toku, den alamala ben de „lobiwan fu Gado”, soleki fa Paulus ben sori. Den alamala ben o man prèise Gado „nanga wán mofo” efu  den ben tan abi a yoisti denki fu makandra. Na ini a ten disi, wi kan abi difrenti fasi fu si son afersi tu, sobun a de wan bun sani fu go luku moro fini san Paulus e fruteri fu a prenspari tori disi.—Romesma 15:4.

„Teki makandra nanga prisiri”

5, 6. Fu san ede den Kresten na ini a gemeente fu Rome ben abi difrenti denki fu son sani?

⁵ Na ini en brifi gi den Romesma, Paulus e fruteri fu wan situwâsi pe sma ben abi difrenti denki. A e skrifi: „A wan sma e bribi taki a kan nyan ala sani, ma a sma di swaki, e nyan gruntu.” Fu san ede disi ben de so? We, ondro a Wet fu Moses, sma no ben mag nyan agu (Romesma 14:2; Lefitikus 11:7). Ma baka di Yesus dede, sma no ben abi fu hori densrefi na a Wet moro (Efeisesma 2:15). Ne, dri nanga afu yari baka di Yesus dede, wan engel taigi na apostel Petrus taki Gado no e si nowan meti leki meti di no krin (Tori fu den Apostel 11:7-12). Nanga den sani disi na prakseri, son Dyu Kresten ben kan feni taki den ben kan nyan agu, noso tra sani di den no ben mag nyan di den ben de ondro a Wet.

⁶ Ma kande tra Dyu Kresten ben e tegu fu prakseri nomo taki den ben kan nyan son sani di den no ben mag nyan fosi. Fu di den sma disi no ben gwenti fu nyan den sortu sani disi, meki den ben kan si en leki wan bigi sondu te den tra Dyu Kresten brada nanga sisa fu den ben e nyan den sortu sani disi. Boiti dati, son Kresten di no ben de Dyu èn di ben de na ini wan bribi fosi pe den ben mag nyan ala sani, no ben man frustan taki sma ben e haritaki fu nyanyan. A no de fu taki dati a no ben fowtu efu wan sma no ben e nyan son sani, solanga a no ben de nomonomo taki na dati ben o meki en kisi frulusu. Toku, den difrenti denki disi ben kan meki dyugudyugu opo kon makriki na ini a gemeente. Den Kresten na ini Rome ben musu luku bun taki den difrenti fasi fa den ben e denki fu a tori disi no ben tapu den fu gi Gado glori „nanga wán mofo”.

7. Sortu difrenti denki den Kresten ben abi fu a poti di den ben poti wan spesrutu dei aparti ibri wiki?

⁷ Paulus e gi wan tra eksempre: „A wan sma feni taki a wan dei prenspari moro a trawan; wan tra sma feni taki ala dei na a srefi” (Romesma 14:5a). A Wet fu Moses ben taki dati nowan sma ben musu wroko na a Sabatdei. Srefi fu teki waka go na wan presi, ben de wan sani di  no ben mag kwetikweti na a dei dati (Exodus 20:8-10; Mateyus 24:20; Tori fu den Apostel 1:12). Ma di a Wet ben kon na wan kaba, dan den no ben abi fu hori densrefi na a sani dati moro. Toku, kande son Dyu Kresten no ben o firi switi efu den ben o du iniwan wroko, noso efu den ben o go na wan presi tapu wan dei di ben de wan santa dei fosi. A kan taki baka di den tron Kresten srefi, den ben poti a di fu seibi dei aparti fu du sani di abi fu du nanga yeye afersi, aladi Gado ben sori taki den no ben abi fu hori densrefi na a Sabatdei moro. A ben de wan fowtu sani fu du disi? Nôno, disi no ben fowtu solanga den no ben de nomonomo taki na Gado ben wani taki den ben musu hori a Sabatdei. Fu di Paulus ben hori a konsensi fu den Kresten brada nanga sisa fu en na prakseri, meki a skrifi: „Ibri sma musu de seiker fu a fasi fa ensrefi e si sani.”—Romesma 14:5b.

8. San den Kresten na ini Rome no ben musu du, aladi den ben musu hori a konsensi fu trawan na prakseri?

⁸ Paulus ben gi den brada nanga sisa fu en deki-ati fu hori pasensi nanga den wan di ben e tweifri fu son afersi di ben abi fu du nanga a konsensi fu den. Ma na a tra sei, a ben krutu den sma tu di ben e dwengi tra Kresten fu hori densrefi na a Wet fu Moses leki na dati ben o tyari frulusu gi den. Fu eksempre, na ini a pisi ten fu 61 G.T., Paulus ben skrifi a Bijbel buku Hebrewsma. Disi ben de wan krakti brifi gi den Dyu Kresten, pe Paulus sori krinkrin taki a no ben de fanowdu moro taki Kresten hori densrefi na a Wet fu Moses, fu di a frulusu-ofrandi fu Yesus ben meki taki Kresten abi wan moro moi howpu.—Galasiasma 5:1-12; Titus 1:10, 11; Hebrewsma 10:1-17.

9, 10. San Kresten no musu du? Fruklari dati.

⁹ Soleki fa wi ben si kaba, dan Paulus e sori taki a wánfasi di Kresten abi no abi fu pori fu di den e teki difrenti bosroiti, boiti efu den bosroiti dati de krinkrin teige Kresten gronprakseri. Fu dati ede, Paulus e aksi den Kresten di abi wan swaki konsensi: „Fu san ede unu e krutu den brada fu unu?” Èn a e aksi den wan di moro tranga na yeye fasi (kande den wan di abi wan konsensi di e gi den pasi fu nyan son sani di den no ben mag nyan ondro a Wet fu Moses, noso fu du wroko na a Sabatdei): „Fu san ede unu e wisiwasi sosrefi a brada fu unu?” (Romesma 14:10) Soleki fa Paulus ben taki, dan den Kresten di abi wan swaki konsensi, no musu krutu den brada nanga sisa fu den di e prakseri tra fasi fu son sani. Na so a de tu taki Kresten di tranga na yeye fasi no musu wisiwasi den wan di abi wan swaki konsensi ete na ini son afersi. Solanga wan sma e du sani di no fowtu, dan ibriwan fu wi musu lespeki dati, èn nowan fu wi musu „denki moro fu [ensrefi] leki san de fanowdu”.—Romesma 12:3, 18.

¹⁰ Paulus ben fruteri fa wi kan si sani na wan  yoisti fasi: „A sma di e nyan, no musu si a sma di no e du dati, leki wan soso sma; a sma di no e nyan, no musu krutu a sma di e nyan, bika Gado teki a sma dati tu.” Boiti dati, a e taki: „Krestes ben teki wi nanga prisiri, so taki Gado kan kisi glori.” Fu di Gado nanga Krestes e teki den trangawan nanga den swakiwan sosrefi, meki wi musu de klariklari tu fu teki iniwan sortu sma, iya, wi musu „teki makandra nanga prisiri” (Romesma 14:3; 15:7). Yu no e agri taki na a denki disi wi musu abi?

A lobi gi wi brada nanga sisa e meki taki wi de wán na ini a ten disi

11. Sortu spesrutu situwâsi ben de na ini a ten fu Paulus?

¹¹ Na ini a brifi di Paulus ben skrifi gi den Romesma, a ben taki fu wan spesrutu situwâsi. A no langa na fesi, Yehovah ben tyari wan kaba kon na a wán frubontu èn a ben seti wan nyun frubontu. Son sma ben feni en muilek fu kon gwenti a nyun frubontu. A spesrutu situwâsi dati no de moro na ini a ten disi, ma den srefi sortu problema kan opo kon ten na ten.

12, 13. San na wan tu situwâsi pe disiten Kresten kan sori taki den e hori a konsensi fu den brada nanga sisa fu den na prakseri?

¹² Fu eksempre, kande wan Kresten uma ben de na wan kerki fosi pe umasma no mag meki modo, den no mag weri moi krosi noso tra moimoi sani di de na modo. Te so wan uma e kon na ini a waarheid, dan a kan feni en wan muilek sani fu kenki a denki fu en èn fu frustan taki a mag weri moi krosi di fiti, noso taki a mag poti make-up fu moi en fesi. Fu di nowan Bijbel gronprakseri no e sori taki disi no mag, meki a no ben o fiti te wan trawan e pruberi fu meki a Kresten uma dati du wan sani di de teige en konsensi. Na a srefi ten, na uma disi no musu krutu tra Kresten uma di abi wan konsensi di e gi den pasi fu meki modo.

¹³ Luku wan tra eksempre. Kande wan Kresten mansma gro kon bigi na mindri sma di e si a dringi fu sopi leki wan ogri sani. Baka di a kon sabi waarheid, a kon si taki Bijbel e si win leki wan sani di wi kisi fu Gado èn taki wan sma kan gebroiki dati na wan fasi di fiti (Psalm 104:15). Sobun, a e agri nanga a fasi fa Bijbel e si disi. Toku, a fasi fa a kweki kan meki taki a e bosroiti fu no dringi nowan sani di abi sopi na ini, ma a no e krutu trawan di e gebroiki sopi na wan fasi di fiti. Na so wan fasi a e gi yesi na den wortu fu Paulus: „Meki wi du muiti fu du den sani di e tyari vrede kon èn den sani di e meki taki wi kan yepi makandra fu kon moro tranga na ini a bribi.”—Romesma 14:19.

14. Na ini sortu situwâsi Kresten kan gebroiki a rai di Paulus ben gi den Romesma?

¹⁴ Tra situwâsi kan opo kon pe wi musu gebroiki a rai di Paulus ben gi den Romesma. Na ini a Kresten gemeente difrenti sma de di lobi difrenti sani. Fu dati ede, den kan teki difrenti bosroiti; fu eksempre, ini a tori fu den krosi di den e weri èn a fasi fa den e moi densrefi. A no de fu taki dati Bijbel abi gronprakseri di e sori krin na sortu sani ala tru Kresten musu hori densrefi. Nowan fu wi musu weri krosi, noso kan wi ede-wiwiri na so wan fasi taki ala sma o drai luku wi. Wi krosi nanga a fasi fa wi kan wi ede-wiwiri no musu meki wi gersi grontapusma tu (1 Yohanes 2:15-17). Awinsi Kresten go na wan presi fu bro den ede, toku den e hori na prakseri ala ten taki den na sma di e teki presi gi a Moro Heiwan fu hemel nanga grontapu (Yesaya 43:10; Yohanes 17:16; 1 Timoteyus 2:9, 10). Toku furu bun krosi de fu feni di fiti Kresten. *

Luku bun fu no meki trawan fadon

15. Te wan Kresten e hori en brada nanga sisa na prakseri, dan na ini sortu situwâsi a kan bosroiti fu no du wan sani, aladi a sani dati no fowtu?

¹⁵ Na ini en rai gi den Kresten fu Rome, Paulus e poti prakseri na ete wan prenspari sani. Son tron, wan Kresten di oefen en konsensi bun, kan bosroiti fu no du wan sani, aladi a sani dati no fowtu. Fu san ede? Fu di a e frustan taki efu a ben o du so wan sani, dan a kan meki trawan fadon. San wi kan du te wi de na ini so wan situwâsi? Paulus e taki: „A bun fu no  nyan meti, dringi win, noso du wan tra sani di kan meki yu brada fadon” (Romesma 14:14, 20, 21). Sobun, „wi di tranga, musu tyari den swakifasi fu den wan di no tranga, èn wi no musu plisi wisrefi. Meki ibriwan fu wi plisi a sma na en sei na ini san bun fu bow en” (Romesma 15:1, 2). Te wi sabi dati a konsensi fu wan Kresten kan trobi en fu wan sani di wi e du, dan a lobi di wi abi gi en musu meki taki wi hori en na prakseri èn taki wi no du a sani dati. Wan eksempre fu disi kan de a gebroiki fu sopi. Wan Kresten mag dringi win, ma a no musu dringi tumusi furu. Ma te a e si taki disi kan meki taki en brada fadon, dan a no o de nomonomo fu dringi a win fu di a abi a reti fu du dati.

16. Fa wi kan sori taki wi e hori den birtisma fu wi na prakseri?

¹⁶ Wi kan gebroiki a gronprakseri disi dorosei fu a Kresten gemeente sosrefi. Fu eksempre, kande wi e libi na wan presi pe furu sma e go na wan kerki di e si wan spesrutu dei na ini a wiki leki wan dei fu rostu. Wi no wani taki den birtisma fu wi kisi wan takru denki fu wi so taki den no arki wi te wi e preiki. Sobun efu a kan, dan wi no o du sani na a dei dati di kan meki wi birtisma teige wi. Na ini wan tra situwâsi, wan gudu Kresten kan froisi go na wan presi pe moro preikiman de fanowdu, fu go dini na mindri pôtisma. A kan sori taki a e hori den nyun birtisma fu en na prakseri fu di a no o weri ala sortu kefalek krosi, noso fu di a no e go libi wan guduman-libi na mindri den pôtisma.

17. Fu san ede a de wan bun sani fu hori trawan na prakseri te wi e teki bosroiti?

¹⁷ Wi kan fruwakti taki den ’trangawan’ na yeye fasi o tyari den sortu kenki disi kon? We, prakseri na agersitori disi: Aladi wi e rei na tapu wan bigi pasi, wi e si na wi fesi fa wan tu pikin e wakawaka krosibei fu a pasi. Wi o go doro fu rei bun tranga ete, soso fu di lantiwet taki dati wi mag du dati na tapu so wan bigi pasi? Nôno, wi o rei moro safri fu no naki den pikin nanga a wagi, efu den ben o lon kon na tapu a pasi kande. Son tron wi musu de klariklari tu fu teki en moro safri, noso fu no du son sani fu man tan abi wan bun banti nanga wi brada nanga sisa, noso nanga tra sma. Kande wi e du wan sani di wi mag du. A no de teige Bijbel gronprakseri. Ma toku, efu wi ben sa kan meki trawan di abi wan swaki konsensi, fadon, dan a Kresten lobi di wi abi gi den musu meki taki wi handri  nanga koni (Romesma 14:13, 15). Fu tan abi wánfasi èn fu tan horibaka gi Kownukondre afersi, de moro prenspari leki fu du son sani fu di wi abi a reti fu du dati.

18, 19. (a) Fa wi e teki na eksempre fu Yesus te wi e hori tra sma na prakseri? (b) Na ini sortu sani wi e handri na ini wánfasi, èn fu sortu sani wi o taki na ini na artikel di e kon?

¹⁸ Te wi e handri na so wan fasi, dan wi e waka baka a moro bun eksempre di de. Paulus taki: „Krestes srefi no ben plisi ensrefi, ma soleki fa a skrifi: ’Den kosikosi fu den wan di e kosi yu, fadon na mi tapu.’” Yesus ben de klariklari fu gi en libi leki srakti-ofrandi gi wi. Efu wi wani taki „den wan di no tranga” musu gi Gado glori makandra nanga wi, dan a no de fu taki dati wi sa de klariklari fu no du wan sani, awinsi wi abi a reti fu du dati. Iya, wi kan sori taki wi e hori den Kresten na prakseri di abi wan swaki konsensi, sobun, wi no o de nomonomo taki wi o du son sani fu di wi abi a reti fu du dati. Na so wan fasi wi e sori taki wi abi „a srefi fasi fu denki . . . di Krestes Yesus ben abi”.—Romesma 15:1-5.

¹⁹ Aladi wi kan abi difrenti denki fu sani di no abi fu du nanga Bijbel gronprakseri, toku wi e handri na ini wánfasi na ini sani di abi fu du nanga na anbegi fu wi (1 Korentesma 1:10). Fu eksempre, a wánfasi disi de fu si na ini a fasi fa wi e handri nanga den wan di e gens a tru anbegi. Gado Wortu e kari den gensman disi freimdesma èn a e warskow wi fu luku bun nanga „a sten fu freimdesma” (Yohanes 10:5). Fa wi kan sabi suma na den freimdesma disi? Fa wi musu handri nanga den? Wi sa luku den aksi disi na ini na artikel di e kon.

[Futuwortu]

San yu ben sa piki?

• Fu san ede na abi di wi abi difrenti denki fu wan tori, no abi fu pori a wánfasi fu wi?

• Fu san ede wi leki Kresten musu sori taki wi e hori makandra na prakseri na wan lobi-ati fasi?

• San na wan tu fasi fa wi kan gebroiki a rai di Paulus ben gi fu wánfasi na ini a ten disi, èn san sa meki wi du dati?

[Aksi fu a tori disi]

[Prenki na tapu bladzijde 9]

A rai fu Paulus di ben abi fu du nanga wánfasi, ben de tumusi prenspari gi a gemeente

[Prenki na tapu bladzijde 10]

Kresten de wán, aladi den kweki na difrenti fasi

[Prenki na tapu bladzijde 12]

San a sma di e rei a wagi disi musu du now?