Luku bun nanga „a sten fu freimdesma”
Luku bun nanga „a sten fu freimdesma”
„Noiti den o waka baka wan freimdesma, ma den o lowe gi en fu di den no sabi a sten fu freimdesma.”—YOHANES 10:5.
1, 2. (a) San Maria du di Yesus kari en na en nen, èn fa a tori disi e sori san Yesus ben taki bifo? (b) San e meki taki wi man tan krosibei fu Yesus?
YESUS di kisi wan opobaka, e si wan uma e tanapu krosibei fu a leigi grebi fu en. A sabi na uma heri bun. Na Maria Magdalena. Pikinmoro tu yari na fesi, a ben puru ogri yeye na en tapu. Sensi a ten dati, Maria ben go nanga en èn nanga den apostel fu en, aladi a ben e sorgu gi den sani di den ben abi fanowdu ibri dei (Lukas 8:1-3). Ma tide Maria e krei, sari e moro en fu di a si fa Yesus ben e dede èn now en skin no de na ini a grebi moro srefi! Sobun, Yesus e aksi en: „Uma, fu san ede yu e krei? Suma yu e suku?” Maria e denki taki na a man di e sorgu a dyari e taki nanga en, sobun a e piki: „Masra efu yu puru en, dan taigi mi pe yu poti en, dan mi o puru en.” Dan Yesus e taki: „Maria!” A fasi fa Yesus taki nanga en, e meki taki Maria sabi wantronso suma e taki nanga en. „Masra!”, a e bari fu prisiri. Dan a e brasa Yesus.—Yohanes 20:11-18.
2 A tori disi e sori na wan moi fasi san Yesus ben taki bifo. A ben agersi ensrefi nanga wan skapuman èn den bakaman fu en de leki skapu. A ben taki dati a skapuman e kari en eigi skapu na den nen èn den skapu sabi a sten fu a skapuman fu den (Yohanes 10:3, 4, 14, 27, 28). Iya, neleki fa wan skapu sabi en skapuman, na so Maria ben sabi en Skapuman, Krestes. Na so a de tu nanga den bakaman fu Yesus na ini a ten disi (Yohanes 10:16). A koni di wan skapu abi fu arki a sten fu en skapuman, e meki taki a man tan krosibei fu en. Na so wi musu abi koni na yeye fasi fu man waka na ini den futumarki fu wi Bun Skapuman, Yesus Krestes.—Yohanes 13:15; 1 Yohanes 2:6; 5:20.
3. Sortu aksi e opo kon te wi e luku na agersitori di Yesus ben gi fu a skapu-pen?
3 Ma soleki fa a srefi agersitori e sori, dan na fu di a skapu abi a koni fu sabi a sten fu libisma, meki a man sabi suma na en mati, ma sosrefi suma na en feanti. Disi de tumusi prenspari, bika wi abi feanti di wani kori wi. Suma na den? Fa den e du sani? San wi kan du fu kibri wisrefi? Fu man sabi a piki tapu den aksi disi, dan meki wi luku sortu tra sani Yesus e taki na ini en agersitori fu a bun skapuman.
’A sma di no e waka na a doro’
4. Soleki fa na agersitori fu a skapuman e taki, dan baka suma den skapu e waka, èn baka suma den no e waka?
4 Yesus e taki: „A skapuman fu den skapu e waka na a doro fu go na inisei. A man di e hori wakti na a doro e opo a doro gi en, èn den skapu e arki a sten fu a skapuman; a e kari en eigi skapu na den nen èn a e tyari den go na dorosei. Te a tyari ala den skapu fu en go na dorosei, dan a e waka na den fesi èn den skapu e waka na en baka fu di den sabi en sten. Noiti den o waka baka wan freimdesma, ma den o lowe gi en fu di den no sabi a sten fu freimdesma” (Yohanes 10:2-5). Luku taki Yesus e gebroiki a wortu „sten” dri tron. Tu tron a e taki fu a sten fu wan skapuman, ma a di fu dri tron, a e taki fu „a sten fu freimdesma”. Fu sortu freimdesma Yesus e taki?
5. Fu san ede wi no e teki den sortu freimdesma na oso di kari na ini Yohanes kapitel 10?
5 Yesus no e taki dyaso fu den sortu freimdesma di wi ben sa wani teki na ini wi oso, bika te Bijbel e taki fu den sortu freimdesma dati, dan a e gebroiki a wortu di wani taki „fu lobi freimdesma” (Hebrewsma 13:2). Na ini na agersitori fu Yesus, a freimdesma a no wan sma di yu ben o teki na ini yu oso. A „no e waka na a doro fu go na ini a skapu-pen, ma a e kren kon na inisei na wan tra presi”. A de „wan fufuruman nanga wan abani” (Yohanes 10:1). Suma na a fosi sma di kari na ini Gado Wortu di ben tron wan fufuruman nanga wan abani? Satan Didibri. Wi e feni buweisi fu dati na ini a buku Genesis.
A fosi leisi di a sten fu wan freimdesma ben de fu yere
6, 7. Fu san ede wi kan taki nanga leti taki Satan na wan freimdesma?
6 Genesis 3:1-5 e fruteri fa a sten fu wan freimdesma ben de fu yere na grontapu fu a fosi leisi. A tori e taki dati Satan ben go na a fosi uma, Eva, èn nanga yepi fu wan sneki a ben taki nanga en fu kori en. A tru taki Bijbel no e kari Satan „wan freimdesma” na ini a tori disi. Ma toku, den sani di a ben du e sori taki a abi den srefi fasi leki a freimdesma fu na agersitori fu Yesus di skrifi na ini Yohanes kapitel 10. Luku wan tu fasi fu den di de a srefi.
7 Yesus e taki dati a freimdesma no e waka langalanga go na ini a skapu-pen fu du ogri nanga den skapu, ma a e kren kon na ini na wan tra presi. Na a srefi fasi, Satan no waka langalanga go taki nanga Eva, ma a gebroiki wan sneki fu taki nanga en. A fasi disi fa a go na Eva, e sori krin suma na en, namku wan abani di e bedrigi sma. Boiti dati, a freimdesma na ini a skapu-pen wani fufuru den skapu fu a skapuman. Fu taki en leti, a de moro ogri leki wan fufuruman, bika a kon fu „kiri èn pori” sosrefi (Yohanes 10:10). Na so Satan ben de wan fufuruman tu. Di a kori Eva, dan a ben de leki a fufuru a getrowfasi di Eva ben gi na Gado. Boiti dati, Satan tyari dede kon gi libisma tu. Fu dati ede, a de wan kiriman.
8. Fa Satan drai den wortu nanga den prakseri fu Yehovah?
8 Wi man si a bedrigifasi fu Satan te wi e luku a fasi fa a drai den wortu nanga den prakseri fu Yehovah. „A de so trutru, taki Gado ben taki dati unu no musu nyan fu ibri bon fu a dyari?”, na so a aksi Eva. Satan ben du neleki a e fruwondru fu disi èn a ben de neleki a taki: ’Fa Gado kan taki so wan sani?’ A taki moro fara: „Gado sabi taki na a dei di unu e nyan fu en, un ai sa kon opo trutru.” Luku san a taki: „Gado sabi.” A de neleki Satan taki: ’Mi sabi san Gado sabi. Mi sabi san a abi na prakseri fu du, èn na soso ogri de na en ede’ (Genesis 2:16, 17; 3:1, 5). A de wan sari taki Eva nanga Adam no drai baka gi a sten fu a freimdesma disi. Na presi fu dati, den arki a sten èn disi ben tyari soso takru bakapisi gi den èn gi den bakapikin fu den.—Romesma 5:12, 14.
9. Fu san ede wi musu fruwakti taki a sten fu freimdesma de fu yere na ini a ten disi?
9 Satan e gebroiki den srefi sortu fasi fu kori a pipel fu Gado na ini a ten disi (Openbaring 12:9). A de „a tata fu lei” èn den wan di e pruberi fu kori den futuboi fu Gado neleki fa en e pruberi dati, na en pikin (Yohanes 8:44). Meki wi luku wan tu fasi fa a sten fu den freimdesma disi de fu yere na ini a ten disi.
Fa a sten fu freimdesma de fu yere na ini a ten disi
10. San na wan fasi fa a sten fu freimdesma de fu yere?
10 Falsi denki. Na apostel Paulus e taki: „No meki sma tyari un ede gowe nanga difrenti freimde leri” (Hebrewsma 13:9). Sortu leri na dati? Fu di den leri dati kan ’tyari wi ede gowe’ meki a de krin fu si taki Paulus e taki fu leri di kan meki wi kon swaki na yeye fasi. Suma e taki fu den sortu freimde leri disi? Paulus ben taigi wan grupu fu Kresten owruman: „Na un mindri, man sa opo kon di e taki kruktu sani fu hari den disipel kon na den baka” (Tori fu den Apostel 20:30). Iya, neleki fa a ben de na ini a ten fu Paulus, na so son sma na ini a ten disi di ben de memre fu a Kresten gemeente fosi, e pruberi fu kori den skapu fu di den e taki „kruktu sani”. Dati wani taki, den e taki lei di moksi nanga tru tori, ma den e taki krinkrin lei tu. Soleki fa na apostel Petrus e taki, dan den e gebroiki „leitori”, noso falsi wortu; den e taki wortu di e gersi tru tori, ma te yu e luku en bun dan den wortu fu den de leki falsi moni di no warti noti.—2 Petrus 2:3.
11. Fa den wortu fu 2 Petrus 2:1, 3 e sori na sortu fasi den sma di fadon komoto na bribi e wroko èn nanga sortu marki den e kon?
11 Petrus e sori moro fara fa den sma di fadon komoto na bribi e wroko, fu di a e taki dati „na kibrifasi, den o kon nanga falsi leri di e pori sma” (2 Petrus 2:1, 3). Neleki fa a fufuruman na ini na agersitori di Yesus ben gi fu a skapu-pen no e „waka na a doro. . . , ma a e kren kon na inisei na wan tra presi”, na so den sma di fadon komoto na bribi, e kon na wi na wan kibri fasi (Galasiasma 2:4; Yudas 4). Nanga sortu marki den e kon? Petrus e taki moro fara: „Den sa suku fu kisi unu.” Iya, awinsi sortu bun sani den e taki fu densrefi, a trutru marki fu den wan di e boro kon na ini a gemeente, na „fu fufuru sani èn fu kiri èn fu pori” (Yohanes 10:10). Luku bun nanga den freimdesma disi!
12. (a) Fa den sma nanga suma wi abi demakandra kan meki taki wi yere a sten fu freimdesma? (b) Sortu fasi fu Satan de a srefi leki den fasi fu freimdesma na ini a ten disi de a srefi?
12 Takru mati. A sten fu freimdesma kan de fu yere tu nanga yepi fu den sma nanga suma wi abi demakandra. Takru mati na wan bigi problema, spesrutu gi yonguwan (1 Korentesma 15:33). Memre taki Satan ben go na Eva di ben de a moro yonguwan fu den tu fosi libisma èn a no ben abi so furu ondrofeni. Satan ben man meki Eva bribi taki na fu soso Yehovah ben poti wet gi den so taki den no ben kan de fri, ma disi no ben de so kwetikweti. Yehovah ben lobi den libisma di a ben meki èn a ben sorgu taki ala sani waka bun nanga den (Yesaya 48:17). Na so a de tu na ini a ten disi taki freimdesma e pruberi fu meki un yonguwan bribi taki na fu soso un Kresten papa nanga mama e tapu unu so taki un no kan de fri. Fa den freimdesma disi kan abi krakti na yu tapu? Wan Kresten meisje e taki: „Wan fu den sani di ben meki taki a bribi fu mi ben kon swaki fu wan pisi ten, na den skoromati fu mi. Den ben e taigi mi doronomo taki a kerki fu mi lai tumusi furu wet èn a strak tumusi.” Ma yu papa nanga mama lobi yu trutru. Sobun, te yu skoromati e pruberi fu meki yu lasi frutrow na ini yu papa nanga mama, dan no meki den kori yu neleki fa Satan kori Eva.
13. Sortu koni sani David ben du, èn san na wan fasi fa wi kan de leki en?
13 A psalm skrifiman David e taki fu takru mati: „Mi no sidon nanga den man di no lobi waarheid; èn den wan di e kibri san den de trutru, mi no e kon na pe den de” (Psalm 26:4). Yu e si dyaso baka sortu spesrutu fasi freimdesma abi? Den e kibri san den de trutru, neleki fa Satan ben e kibri suma a de fu di a ben gebroiki wan sneki. Na ini a ten disi, son sma di abi doti prakseri, e kibri suma den de èn san den wani du, fu di den e gebroiki Internet. Bigisma di abi ogri prakseri e gebroiki computer fu taki nanga trawan tapu Internet; den e du leki den na yongusma fu man kori yu. Yonguwan, grantangi, luku bun nanga a sani disi, so taki yu no kisi mankeri na yeye fasi.—Psalm 119:101; Odo 22:3.
14. Fa nyunsuman e meki sma yere a sten fu freimdesma son tron, èn fa koni Kresten e handri fu dati ede?
14 Leitori. Aladi son nyunsu boskopu e sori suma Yehovah Kotoigi de trutru, toku nyunsuman e gi pasi son leisi taki sma e yere den leitori di a sten fu freimdesma e taki. Fu eksempre, wan nyunsu boskopu na ini wan kondre ben fruteri a lei taki Kotoigi ben e horibaka gi a tirimakti fu Hitler na ini a di fu Tu Grontapufeti. Na ini wan tra kondre wan nyunsu boskopu ben taki dati Kotoigi e go broko kerki-oso na wan ogri-ati fasi. Na ini difrenti kondre, nyunsuman krutu Kotoigi taki den no wani meki datra dresi den pikin fu den èn taki den e tapu den ai gi seryusu sondu di tra Kotoigi e du (Mateyus 10:22). Ma toku, opregtisma di sabi suma na wi, e frustan taki den sortu tori disi na leitori.
15. Fu san ede a no de wan koni sani fu bribi ala sani di nyunsuman e taki?
15 San wi musu du te wi e yere den leitori di a sten fu den freimdesma disi e panya na ala sei? A de wan bun sani gi wi fu poti prakseri na a rai di skrifi na ini Odo 14:15: „Ibriwan sma di no abi ondrofeni, e bribi ibri wortu, ma a koniwan e luku pe a e poti en futu.” A no de wan koni sani fu bribi ala sani di nyunsuman e taki. Wi e bribi son nyunsu, ma wi e hori na prakseri tu taki „heri grontapu de na ini a makti fu na ogriwan”.—1 Yohanes 5:19.
’Ondrosuku efu den boskopu e komoto fu Gado’
16. (a) Fa a fasi fa skapu e tyari densrefi e sori taki den sani di Yesus taki na ini Yohanes 10:4, de so trutru? (b) Bijbel e gi wi a deki-ati fu du sortu sani?
16 Ma fa wi kan sabi seiker efu wi abi fu du nanga wan mati, noso wan feanti? We, Yesus taki dati den skapu e waka baka a skapuman „fu di den sabi en sten” (Yohanes 10:4). Den skapu no e waka baka a skapuman fu di den e luku fa a skapuman tan, ma na fu di den e arki en sten. Wan buku di e taki fu den kondre di kari na ini Bijbel, e fruteri taki wan fisitiman ben feni taki a no a sten, ma na a fasi fa a skapuman e weri e meki taki den skapu sabi en. Wan skapuman piki a fisitiman taki den skapu sabi a sten fu den skapuman. Fu sori taki a abi leti, a skapuman kenki krosi nanga a fisitiman. Di a fisitiman weri a krosi fu a skapuman, dan a kari den skapu, ma den skapu no ben e gi yesi. Den no ben sabi a sten fu a fisitiman. Ma di a skapuman kari den skapu, aladi a ben weri den krosi fu a fisitiman, dan wantewante den skapu lon go na en. Sobun, wan sma kan gersi wan skapuman, ma gi skapu dati no wani taki dati a de wan skapuman trutru. Fu taki en leti, den skapu e ondrosuku a sten, noso den e arki bun fu sabi efu a sten di kari den, na a sten fu a skapuman fu den. Gado Wortu e taigi wi fu du a srefi sani tu; wi musu „ondrosuku den boskopu disi fu si efu den komoto fu Gado trutru” (1 Yohanes 4:1; 2 Timoteyus 1:13). San kan yepi wi fu du dati?
17. (a) Fa wi kan kon sabi a sten fu Yehovah? (b) Sortu sani wi o man du te wi abi sabi fu Yehovah?
17 Wi kan frustan taki o moro wi sabi a sten fu Yehovah, noso a boskopu fu en, o moro esi wi o man sabi efu a sten di wi e yere na a sten fu wan freimdesma. Bijbel e sori fa wi kan kon sabi dati. A e taki: „Un eigi yesi sa yere wan wortu na un baka di e taki: ’Disi na a pasi. Waka na tapu, un pipel’” (Yesaya 30:21). A „wortu” dati di wi e yere na wi baka, e kon fu a Wortu fu Gado. Ibri tron te wi e leisi Gado Wortu, a de leki wi e yere a sten fu wi Gran Skapuman, Yehovah (Psalm 23:1). Fu dati ede, o moro wi e studeri Bijbel, o moro wi e kon sabi a sten fu Gado. Te wi sabi a sten fu Gado bun, dan dati sa yepi wi fu sabi wantewante efu wan sten na a sten fu wan freimdesma.—Galasiasma 1:8.
18. (a) San a wani taki fu sabi a sten fu Yehovah? (b) Fu san ede wi musu gi yesi na a sten fu Yesus, soleki fa Mateyus 17:5 e sori?
18 San a wani taki moro fu sabi a sten fu Yehovah? Boiti taki wi e yere a sten fu en, wi musu gi yesi na a sten tu. Luku Yesaya 30:21 ete wan leisi. Gado Wortu e taki drape: „Disi na a pasi.” Iya, te wi e studeri Bijbel, dan wi e „yere” fa Yehovah wani taki wi musu tyari wisrefi. Baka dati, a e gi wi a komando: „Waka na tapu.” Yehovah wani taki wi musu du san wi yere. Sobun, te wi e du san wi leri, dan wi no e sori nomo taki wi yere a sten fu Yehovah, ma wi e sori sosrefi taki wi e gi yesi na en sten (Deuteronomium 28:1). Fu gi yesi na a sten fu Yehovah wani taki tu dati wi e gi yesi na a sten fu Yesus, bika Yehovah srefi taki dati wi musu arki Yesus (Mateyus 17:5). San Yesus, a Bun Skapuman, e taigi wi fu du? A e leri wi fu meki sma tron disipel èn fu frutrow „a getrow èn koni srafu” (Mateyus 24:45; 28:18-20). Te wi e gi yesi na en sten, dan wi sa kisi têgo libi.—Tori fu den Apostel 3:23.
„Den o lowe gi en”
19. San wi musu du te wi e yere a sten fu freimdesma?
19 Ma san wi musu du dan te wi e yere a sten fu freimdesma? Wi musu du leki skapu. Yesus e taki: „Den no o waka na baka wan freimdesma kwetikweti, ma den o lowe gi en” (Yohanes 10:5). Wi musu du tu sani. A fosi sani, na taki ’noiti wi o waka na baka’ wan freimdesma. Nanga ala wi krakti wi o kakafutu gi wan freimdesma. Fu taki en leti, a Griki wortu di vertaal nanga „kwetikweti” na ini Bijbel, na a moro krakti wortu di wan sma ben kan gebroiki fu sori taki a e kakafutu gi wan sani (Mateyus 24:35; Hebrewsma 13:5). A di fu tu sani, na taki wi ’o lowe gi en’, noso wi o drai baka gi en. Dati na a wan-enkri bun sani fu du nanga den wan di e leri sma sani di de teige a sten fu a Bun Skapuman.
20. San wi o du te wi e kisi fu du nanga (a) sma di fadon komoto na bribi èn di wani kori wi, (b) takru mati, (c) falsi nyunsu boskopu?
20 Fu dati ede, te wi e miti sma di e horibaka gi den denki fu sma di fadon komoto na bribi, dan wi wani du san Gado Wortu e taki: „Luku bun nanga den sma di e suku fu prati unu èn di e kon nanga sani di unu no ben leri, soso fu di den wani meki trawan fadon; tan farawe fu den” (Romesma 16:17; Titus 3:10). Na so a de tu taki te Kresten yonguwan e kisi fu du nanga mati di no bun, dan den musu teki a rai di na apostel Paulus ben gi a yongu Timoteyus, namku: „Lowe gi den lostu di yongusma abi.” Èn te wi e yere falsi nyunsu boskopu, dan wi sa tan memre a rai di Paulus gi Timoteyus moro fara: „Den [sma di e arki a sten fu freimdesma] sa drai go na tori di no tru. Ma hori yu frustan na wán na ini ala sani” (2 Timoteyus 2:22; 4:3-5). Awinsi o moi a sten fu freimdesma e gersi, toku wi e lowe gi ala sani di kan meki wi lasi wi bribi.—Psalm 26:5; Odo 7:5, 21; Openbaring 18:2, 4.
21. Sortu blesi e wakti den wan di e weigri fu arki a sten fu freimdesma?
21 Fu di den Kresten di salfu nanga santa yeye, e weigri fu arki a sten fu freimdesma, meki den e du soleki fa a Bun Skapuman ben taki na ini Lukas 12:32. Drape a e taigi den: „No frede, pikin ipi, bika un Tata feni en bun fu gi unu a kownukondre.” Den „tra skapu” sosrefi, e wakti fayafaya fu yere Yesus taki: „Un kon, unu di mi Tata blesi, èn teki a kownukondre di sreka gi unu sensi a ten di grontapu seti” (Yohanes 10:16; Mateyus 25:34). Dati na wan tumusi moi blesi di e wakti wi te wi e luku bun nanga „a sten fu freimdesma”!
Yu e memre disi ete?
• Fu san ede Satan de leki a freimdesma na ini na agersitori di Yesus ben gi fu a skapu-pen?
• Fa a sten fu freimdesma de fu yere na ini a ten disi?
• Fa wi kan sabi efu wan sten na a sten fu wan freimdesma?
• San wi musu du te wi yere a sten fu freimdesma?
[Aksi fu a tori disi]
[Prenki na tapu bladzijde 15]
Maria ben sabi Krestes
[Prenki na tapu bladzijde 16]
A freimdesma no e kon langalanga na den skapu
[Prenki na tapu bladzijde 18]
San wi e du te wi e yere a sten fu freimdesma?