Sani di wi kan du te wi lasi-ati

YU LASI-ATI? Na ini a ten disi pe seikerfasi no de, èn pe problema lai, furu sma lasi-ati. Son sma lasi-ati fu di den no abi wan wroko. Trawan e ondrofeni den bakapisi fu wan mankeri di den ben kisi. Yu abi sma so srefi di e feti ete nanga problema na ini na osofamiri, wan hebi siki, noso den e firi sari fu di den de den wawan.

Pe yu kan feni yepi te yu lasi-ati? Milyunmilyun sma na heri grontapu feni trowstu fu di den leisi Gado Wortu, a Bijbel. Den wortu fu na apostel Paulus gi den krakti baka. Paulus ben taki: „Blesi fu a Gado nanga Tata fu wi Masra Yesus Krestes, a Tata di abi furu sari-ati èn a Gado fu ala trowstu, di e trowstu wi na ini ala wi banawtu” (2 Korentesma 1:3, 4). Fu san ede yu no e leisi a tekst disi nanga tra bijbeltekst na ini yu eigi Bijbel? Te yu e du disi, dan a sa ’trowstu yu ati èn a sa meki yu tanapu kánkan’.—2 Tesalonikasma 2:17.

Te wi e sari wi kan feni yepi tu, te wi abi demakandra nanga sma di e dini Yehovah. Odo 12:25 e taki: „Tumusi furu broko-ede sa meki wan sma lasi-ati, ma a bun wortu, na dati sa meki na ati prisiri.” Te wi e go na den Kresten konmakandra, dan wi e yere a „bun wortu” dati di ’switi gi a sili èn di de neleki dresi gi den bonyo’ (Odo 16:24). Fu san ede yu no e go na wan konmakandra na wan Kownukondre zaal fu Yehovah Kotoigi fu ondrofeni gi yusrefi fa so wan demakandra kan tranga yu?

Yu kan kisi wini tu fu a krakti fu begi. Te yu e firi taki den sorgu fu a libi e kon tumusi furu gi yu, dan fruteri a „Yereman fu begi” san yu abi tapu yu ati (Psalm 65:2). A Mekiman fu wi, Yehovah Gado, sabi wi moro bun leki fa wi sabi wisrefi. Wi kan frutrow taki a sa yepi wi. A Wortu fu en e pramisi wi: „Trowe yu hebi na tapu Yehovah, èn ensrefi sa horibaka gi yu. Noiti a sa meki taki a regtfardikiwan e degedege” (Psalm 55:22). Iya, „den wan di e howpu tapu Yehovah, sa kisi krakti baka”.—Yesaya 40:31.

Yehovah Gado gi wi krakti wrokosani di kan yepi wi fu kakafutu nanga bun bakapisi te wi lasi-ati. Yu sa gebroiki den wrokosani disi?