„Meki Masra gi unu krakti”
„Meki Masra gi unu krakti”
„Meki Masra gi unu krakti, èn tranga unsrefi nanga a kefalek bigi krakti fu en.”—EFEISESMA 6:10.
1. (a) Sortu aparti feti ben pasa sowan 3000 yari pasa? (b) Fu san ede David ben wini a feti?
SOWAN 3000 yari pasa, tu fetiman fu tu feanti legre ben miti densrefi fu feti teige makandra. A yongu fetiman ben de wan skapuman di ben nen David. Na en fesi Goliat ben e tanapu, wan man di ben bigi kefalek èn di ben tranga srefisrefi. Na isri bosroko di a ben weri ben wegi sowan 57 kilo, èn a ben abi wan bigi hebi lansri nanga wan bigi feti-owru. David no ben weri nowan sani fu kibri en skin, èn a wan-enkri fetisani di a ben abi ben de wan slenger. A bun bigi Filistiaman Goliat ben firi leki den Israelsma ben e meki spotu nanga en, fu di den ben seni wan yongu boi nomo fu kon feti nanga en (1 Samuel 17:42-44). Gi den Israelsma nanga den Filistiasma di ben e luku fa a feti ben o waka, a ben de wan seiker sani kaba suma ben o wini. Ma a no den trangawan e wini a feti ala ten (Preikiman 9:11). David ben wini a strei fu di a ben feti nanga a krakti di Yehovah ben gi en. „A feti na fu Yehovah”, na so a taki. A Bijbel tori disi e taki dati „David di ben abi wan slenger nanga wan ston, ben de moro tranga leki a Filistiaman.”—1 Samuel 17:47, 50.
2. Na ini sortu feti Kresten de?
2 Kresten no e teki prati na feti na mindri libisma. Aladi den e libi na ini vrede nanga ala sma, toku a de so taki den e feti wan feti na yeye fasi teige bun tranga feanti (Romesma 12:18). Na ini a lasti kapitel fu a brifi di Paulus ben skrifi gi den Efeisesma, a ben taki fu wan feti pe ala Kresten de na ini. A ben skrifi: „Wi no e feti nanga brudu èn nanga skin, ma nanga den tiri, nanga tirimakti, nanga den grontapu tiriman fu a dungru disi, nanga den ogri yeye na den hemel kontren.”—Efeisesma 6:12.
3. Soleki fa Efeisesma 6:10 e taki, dan san wi musu du efu wi wani abi a dyaranti taki wi o wini a feti?
3 Den „ogri yeye” dati, na Satan nanga den ogri engel di wani pori a banti di wi abi nanga Yehovah Gado. Fu di den tranga omeni tron moro wi, meki wi kan taki dati wi de na ini wan srefi sortu situwâsi leki David, èn wi no sa man wini a feti, boiti efu wi e frutrow tapu Gado fu gi wi krakti. Iya, Paulus e gi wi a deki-ati fu ’meki Masra gi wi krakti, èn fu tranga wisrefi nanga a kefalek bigi krakti fu en’ (Efeisesma 6:10). Baka di na apostel gi a rai disi, dan a e taki fu den yeye yepisani nanga den Kresten fasi di sa meki wi wini a feti.—Efeisesma 6:11-17.
4. Sortu tu prenspari sani wi sa luku na ini na artikel disi?
4 Meki wi luku now san den Buku fu Bijbel e taki fu a makti di a feanti fu wi abi èn na sortu fasi a e wroko. Baka dati wi o luku na sortu fasi wi musu feti fu man kibri wisrefi. Efu wi e gi yesi na san Yehovah e taigi wi fu du, dan wi kan de seiker taki den feanti fu wi no sa wini wi.
Wan feti teige ogri yeye
5. Te wi luku san a wortu gi „feti” na ini Efeisesma 6:12 wani taki, dan fa dati kan meki wi frustan san Satan abi na prakseri?
5 Paulus e taki dati wi „e feti . . . nanga den ogri yeye na den hemel kontren”. A no de fu taki dati a moro prenspari ogri yeye na Satan Didibri, „a tiriman fu den ogri yeye” (Mateyus 12:24-26). Na ini a tongo di sma ben gebroiki biginbigin fu skrifi Bijbel, den gebroiki wan wortu di e sori taki a feti fu wi de neleki te sma e „aswa”, noso te den e feti nanga anu. Te sma fu owruten Grikikondre ben e aswa, dan ibri fetiman ben e pruberi fu meki a trawan lasi balansi so taki a ben kan trowe en na gron. Na so Didibri e pruberi tu fu meki wi lasi balansi na yeye fasi. Fa a kan du dati?
6. Sori nanga yepi fu den Buku fu Bijbel fa Didibri kan gebroiki difrenti sani fu pori a bribi fu wi.
6 Didibri kan du leki wan sneki, wan lew di e bari, èn srefi leki wan engel fu leti (2 Korentesma 11:3, 14; 1 Petrus 5:8). A kan gebroiki libisma fu frufolgu wi, noso fu meki wi lasi-ati (Openbaring 2:10). Fu di Satan abi heri grontapu na ini en makti, meki a man gebroiki den lostu fu grontapu èn tra sani di e hari sma, fu kori wi (2 Timoteyus 2:26; 1 Yohanes 2:16; 5:19). A kan gebroiki a denki fu grontapu, noso a denki fu sma di fadon komoto na bribi, fu kori wi neleki fa a ben kori Eva.—1 Timoteyus 2:14.
7. San den ogri yeye no man du, èn san na wan tu sani di e sori taki wi man wini a feti teige den?
7 Satan nanga den ogri yeye fu en abi kefalek fetisani èn a kan gersi leki den abi krakti pasa marki, ma toku den no man du ala san den wani. Den ogri yeye disi no man dwengi wi fu du ogri sani di wi hemel Tata no feni bun. Gado ben meki wi na so wan fasi taki wi kan teki a bosroiti fu du bun noso ogri. Sosrefi, wi man basi den prakseri fu wi èn den sani di wi e du. Boiti dati, wi no de na ini a feti wi wawan. Neleki fa a ben de na ini a ten fu Elisa, na so a de tu na ini a ten disi, taki: ’Moro de nanga wi leki den wan di de nanga den’ (2 Kownu 6:16). Bijbel e gi wi a dyaranti taki te wi e saka wisrefi na Gado ondro èn te wi e kakafutu gi Didibri, dan Didibri sa lowe gowe fu wi.—Yakobus 4:7.
Wi sabi san Satan abi na prakseri
8, 9. Sortu tesi Satan ben tyari kon tapu Yob fu meki a lasi en soifri retifasi, èn sortu sani na ini a ten disi kan meki wi lasi balansi na yeye fasi?
8 A no de so taki wi no sabi san Satan abi na prakseri, bika den Buku fu Bijbel e sori san na den triki di a e gebroiki furu tron (2 Korentesma 2:11). Didibri ben suku fu kisi a regtfardiki man Yob nanga difrenti sani. A meki Yob kisi bigi ekonomia problema, a meki den lobiwan fu Yob lasi libi, famiri bigin gens en, Yob ben kon siki, èn wan tu sokari mati ben krutu en sondro iniwan buweisi. Yob ben kon lasi-ati èn a ben firi leki Gado gowe libi en (Yob 10:1, 2). A kan de so taki Satan no e tyari den problema disi langalanga tapu Kresten na ini a ten disi, ma toku den sortu problema disi abi krakti tapu furu Kresten, èn Didibri kan gebroiki dati fu meki den lasi bribi.
9 Na ini disi ten fu a kaba, moro furu sani de di kan meki taki wi lasi a yeyefasi fu wi. Wi e libi na ini wan grontapu pe sma e feti baka gudu, na presi taki den e suku fu doro marki na yeye fasi. Ibri tron baka na telefisi noso radio, sma e taki fu seks hurudu leki na wan sani di e tyari koloku kon na presi fu sari. Èn furu sma kon tron ’sma di lobi prisiri moro leki den lobi Gado’ (2 Timoteyus 3:1-5). Efu wi no e „feti wan tranga feti gi a bribi”, dan a denki disi kan meki wi lasi balansi na yeye fasi.—Yudas 3.
10-12. (a) San na wan fu den warskow di Yesus ben gi na ini en agersitori fu a saiman? (b) Gi wan eksempre fu a fasi fa sma kan tapu fu poti prakseri na yeye afersi.
10 Wan fu den trapu di Satan gebroiki fu kisi furu sma, na taki a e pruberi fu meki wi poti ala wi prakseri na den sani fu grontapu èn na gudu. Na ini na agersitori fu a saiman, Yesus ben warskow taki son tron „den broko-ede fu a grontapu disi nanga a bedrigifasi fu gudu, e kiri a wortu [fu a Kownukondre]” (Mateyus 13:18, 22). A Griki wortu di vertaal dyaso nanga „kiri”, wani taki „fu tyokro dorodoro”.
11 Na ini den bigi busi fu son waran kondre, yu abi wan figabon di e gro leki fowru-doti. A e gro safrisafri lontu a skin fu wan tra bon. Den rutu fu a figabon disi e kon tranga moro nanga moro, èn safrisafri den e tapu a tra bon krinkrin. Te fu kaba den furu rutu fu a figabon e teki furu fu a nyanyan di de na ini a gron leti na den rutu fu a tra bon, èn den wiwiri fu a figabon e tapu a tra bon so taki a no kan kisi leti fu a son. Te fu kaba, a tra bon e dede.
12 Na a srefi fasi, den broko-ede fu a sistema disi èn sosrefi a feti di sma e feti fu kon gudu èn fu abi wan moro bun libi, safrisafri kan bigin teki moro fu wi ten nanga krakti. Te a prakseri fu wi de na den sani fu grontapu, dan a makriki fu frigiti taki wi musu studeri Bijbel, èn wi kan teki en leki wan gwenti fu misi den Kresten konmakandra. Na so wan fasi wi no e kisi yeye nyanyan moro. Na presi fu poti marki na yeye fasi, wi e poti en leki marki now fu kon gudu, èn te fu kaba wi e kon swaki so taki Satan kan kisi wi makriki.
Wi musu tanapu kánkan
13, 14. Sortu fasti bosroiti wi musu abi te Satan e gens wi?
13 Paulus ben gi tra Kresten bribiman a deki-ati fu „tanapu kánkan gi den triki fu Didibri” (Efeisesma 6:11). A no de fu taki dati wi no man kiri Satan nanga den ogri yeye fu en. Gado gi a wroko dati na Yesus Krestes (Openbaring 20:1, 2). Ma solanga a no puru Satan, wi musu „tanapu kánkan” so taki a no kisi wi nanga den triki fu en.
14 Na apostel Petrus ben sori tu taki a de tumusi prenspari fu kakafutu gi Satan. „Hori unsrefi, de na ai”, na so Petrus ben skrifi. „Un gensman, Didibri, e waka lontu leki wan krasi lew, di e suku fu nyan wan sma. Ma kakafutu gi en, hori fasti na a bribi, fu di unu sabi taki den srefi sani disi e miti ala un brada na grontapu, leki wan fasi fu kisi pina” (1 Petrus 5:8, 9). Fu taki en leti, a yepi fu wi brada nanga sisa na yeye fasi de tumusi prenspari fu man tanapu kánkan te Didibri e kon na wi tapu leki wan krasi lew.
15, 16. Gi wan eksempre fu Bijbel di e sori taki Kresten bribiman kan yepi makandra fu tanapu kánkan.
15 Te wan lew e bari na ini a sabana fu Afrika, dan den dia di de krosibei e bigin lon bun esi teleki a lew no man kisi den moro. Ma a sani di asaw e du na ini so wan situwâsi, na wan moi eksempre di e sori o prenspari a de fu horibaka gi makandra. Wan buku e taki: „Nofo tron te wan ipi fu asaw musu kibri makandra, dan den bigi asaw e tanapu sei na sei fu makandra e luku go na den meti di wani du den ogri, èn den e tanapu lontu den pikin asaw fu kibri den” (Elephants—Gentle Giants of Africa and Asia). Te den lew e si fa den asaw tranga èn fa den e horibaka gi makandra, dan nofo tron den no e pruberi fu kisi den pikin asaw srefi.
16 Te Satan nanga den ogri yeye fu en wani du wi ogri, dan wi musu tan na makandra tu; wi musu tanapu sei nanga sei makandra nanga den brada nanga sisa fu wi di e tanapu kánkan na ini a bribi. Paulus ben taki dati wan tu Kresten brada nanga sisa ben de ’wan yepi gi en di ben gi en krakti’ di a ben de na strafu na ini Rome (Kolosesma 4:10, 11). A Griki wortu di vertaal nanga ’yepi di e gi krakti’ de wán leisi nomo na ini den Kresten Griki Buku fu Bijbel. Soleki fa wan wortubuku e taki, dan „sma ben gebroiki a wortu disi te den ben e taki fu wan dresi di e kowru a skin te a e krasi” (Vine’s Expository Dictionary of New Testament Words). Neleki wan salfu di e kowru a skin, na so lepi anbegiman fu Yehovah kan yepi fu lekti a pen fu wi te wi e firi brokosaka noso te wi e siki.
17. San kan yepi wi fu tan getrow na Gado?
17 A deki-ati di wi e kisi fu wi Kresten brada nanga sisa na ini a ten disi, kan yepi wi fu abi wan moro fasti bosroiti fu dini Gado na wan getrow fasi. Spesrutu den Kresten owruman de klariklari fu gi yepi na yeye fasi (Yakobus 5:13-15). Tra sani di e yepi wi fu tan getrow, na fu studeri Bijbel doronomo, èn fu go na den Kresten konmakandra, kring konmakandra, nanga kongres. A krosibei banti di wi abi nanga Gado e yepi wi tu fu tan getrow na en. Iya, awinsi wi e nyan, awinsi wi e dringi, noso wi e du iniwan tra sani, meki wi du ala sani fu gi Gado glori (1 Korentesma 10:31). A no de fu taki dati a de tumusi prenspari fu begi Yehovah èn fu frutrow na en tapu, so taki wi kan tan waka na wan fasi di e plisi en.—Psalm 37:5.
18. Fu san ede wi no musu tapu fu du san e plisi Gado, srefi te muilek situwâsi e meki wi kon swaki?
18 Son tron, Satan e kon feti nanga wi te wi no e firi tranga na yeye fasi. Wan lew e suku fu kisi wan meti di swaki. Osofamiri problema, ekonomia problema, noso siki kan meki wi kon swaki na yeye fasi. Ma meki wi no tapu fu du san e plisi Gado, bika Paulus taki: „Te mi swaki, dan mi tranga” (2 Korentesma 12:10; Galasiasma 6:9; 2 Tesalonikasma 3:13). San a ben wani taki nanga den wortu disi? A ben wani taki dati a krakti fu Gado kan meki wi kon tranga te wi leki libisma de swaki. Ma a sa du dati soso te wi e frutrow tapu Yehovah fu gi wi krakti. A wini di David ben wini Goliat e sori taki Gado man tranga en pipel èn taki a e du dati tu. Disiten Kotoigi fu Yehovah kan taki nanga overtoigi taki den firi fa Gado gi den krakti te bigi problema ben miti den.—Danièl 10:19.
19. Gi wan eksempre fu sori taki Yehovah kan gi krakti na den futuboi fu en.
19 Wan trowpaar ben skrifi disi fu a fasi fa Gado horibaka gi den: „Na ini den yari di pasa, wi dini Yehovah leki masra nanga wefi, wi kisi furu blesi, èn wi kon leri sabi furu bun sma. Yehovah leri wi fu horidoro te problema ben miti wi èn a tranga wi sosrefi. Neleki Yob, wi no ben frustan ala ten fu san ede son sani ben e pasa nanga wi, ma wan sani di wi ben sabi na taki Yehovah ben de nanga wi ala ten fu yepi wi.”
20. Fa Bijbel e sori taki Yehovah e yepi en pipel ala ten?
20 Noiti Yehovah anu syatu tumusi fu yepi en getrow pipel èn fu gi den krakti (Yesaya 59:1). A psalm skrifiman David ben singi: „Yehovah e yepi ala sma di e fadon. A e yepi ala sma di beni go na gron, fu opo tanapu” (Psalm 145:14). Iya, wi hemel Tata „e tyari a lai gi wi ala dei” èn a e gi wi san wi abi fanowdu trutru.—Psalm 68:19.
Wi musu „weri ala den pisi fu a fetisani fu Gado”
21. Fa Paulus ben sori taki a de tumusi prenspari fu weri yeye fetisani?
21 Wi luku wan tu fasi fa Satan e suku fu kisi sma, èn wi kon si taki a de tumusi prenspari fu tanapu kánkan te Satan e kon feti nanga wi. Now wi musu go luku wan tra prenspari sani di sa yepi wi fu feti gi a bribi fu wi. Na ini a brifi gi den Efeisesma, na apostel Paulus ben taki tu leisi fu wan prenspari sani di de fanowdu fu man tan tanapu kánkan te Satan e kon nanga den triki fu en, èn fu man wini a feti teige den ogri yeye. Paulus ben skrifi: „Weri ala den pisi fu a fetisani fu Gado, so taki unu man tanapu kánkan gi den triki fu Didibri . . . Teki a heri fetisani fu Gado, so taki unu kan kakafutu na a ogri dei, èn baka te unu du ala sani dorodoro, unu kan tanapu kánkan.”—Efeisesma 6:11, 13.
22, 23. (a) San na den yeye fetisani di Gado gi wi? (b) Sortu sani wi sa luku na ini na artikel di e kon?
22 Iya, wi musu weri „ala den pisi fu a fetisani fu Gado”. Di Paulus ben skrifi en brifi gi den Efeisesma, dan wan srudati fu Rome ben e koti wakti gi en, èn a kan taki son tron a srudati disi ben weri ala sani di ben de fanowdu fu go na feti. Ma na Gado ben meki na apostel taki fu den yeye fetisani di ibri futuboi fu Yehovah abi tranga fanowdu.
23 Den fetisani disi di Gado e gi, na den difrenti fasi di wan Kresten musu abi èn sosrefi sani di Yehovah seti gi wi na yeye fasi. Na ini na artikel di e kon, wi sa taki fu ibriwan fu den fetisani disi. Disi sa meki wi kon si efu wi de srekasreka trutru fu feti a feti na yeye fasi. Wi sa luku tu fa a moi eksempre fu Yesus Krestes e yepi wi fu kakafutu gi Satan Didibri.
San yu ben sa piki?
• Na ini sortu feti ala Kresten de?
• Taki fu wan tu fasi fa Satan e suku fu kisi wi.
• Fa wi kan kisi krakti fu a yepi di tra Kresten bribiman e gi?
• Tapu a krakti fu suma wi musu frutrow, èn fu san ede wi musu du dati?
[Aksi fu a tori disi]
[Prenki na tapu bladzijde 11]
Kresten ’e feti nanga ogri yeye’
[Prenki na tapu bladzijde 12]
Den broko-ede fu a sistema disi kan kiri a wortu fu a Kownukondre
[Prenki na tapu bladzijde 13]
Kresten brada noso sisa kan de ’wan yepi di e gi krakti’
[Prenki na tapu bladzijde 14]
Yu e begi Gado fu gi yu krakti?