Miri di e poti nyanyan na tapu tafra

DEN taki fu brede dati a de „a nyanyan di e hori sma na libi”. Den e taki sosrefi dati a de „a moro prenspari nyanyan di de”, èn „hondrohondro yari kaba, a de a moro prenspari nyanyan gi libisma”. Iya, sensi owruten, brede de wan prenspari nyanyan. Fu taki en leti, wan fu den moro prenspari sani di libisma ben musu du, na taki den ben musu suku wan fasi fu feni den aladei brede.

A moro prenspari sani di e go na ini brede na blon di den e meki te den e mara karu, noso tarwe. Fu dati ede, wi kan taki dati a wroko fu mara sani e du sensi owruten kaba. Na ini a ten dati di sma no ben abi masyin ete, a ben musu fu de wan hebi wroko fu mara karu kon tron blon. Na ini Bijbel ten a ben de so, taki te na anumiri ben de fu yere, dan disi ben wani taki dati sani ben waka bun èn taki vrede ben de. Ma te na anumiri no ben de fu yere, dan disi ben wani taki pinaten.—Yeremia 25:10, 11.

Fa sma ben e mara sani na ini den yarihondro di pasa? San na wan tu fasi nanga wrokosani di sma gebroiki fu mara sani? Sortu miri sma e gebroiki na ini a ten disi, so taki yu kan nyan brede?

Fu san ede miri ben de fanowdu?

Yehovah ben taigi den fosi libisma, Adam nanga Eva, taki: „Luku, mi gi unu ala den sani di e gi siri èn di e gro na heri grontapu, sosrefi ibri bon di e gi froktu di abi siri. Na dati unu musu nyan” (Genesis 1:29). Wan fu den sani di Yehovah ben gi libisma fu nyan, ben de den siri di e gro na den sortu grasi leki aleisi, noso karu. A nyanyan disi ben de prenspari fu hori libisma na libi, fu di ala sani soleki tarwe, groto, aleisi, noso karu abi zetmeel nanga koolhydraat. A skin man meki den tu sani disi kon tron wan sortu sukru di nen glucose, wan prenspari sani fu gi a skin en krakti.

Ma libisma no man nyan den heriheri ai-karu te den no bori. A moro makriki gi libisma fu nyan karu te a tron blon èn te den e bori en, noso te den e baka en. A moro makriki fasi fa sma kan meki wan pikinso karu tron blon, na te den e stampu en na ini wan mata, te den e masi en na mindri tu ston, noso te den e du den tu sani disi makandra.

Libisma e gebroiki den eigi krakti fu mara nanga miriston

Sma feni pikin stonpopki na ini den grebi fu den Egeptesma fu owruten èn den stonpopki disi e sori taki fosifosi, sma ben gebroiki wan sortu miri di den e kari ’sadri anumiri’. Den ben kari en so, fu di a gersi wan sadri. Na anumiri disi ben abi tu ston. Wan fu den ston ben gersi na inisei fu wan komki èn den lanki ben skoinsi pikinso. Disi ben de na ondrosei-ston, èn wan moro pikin ston ben de na tapusei. Te a wrokoman, moro furu wan umasma, ben kindi na tapu gron na fesi a miri, dan a ben grabu a tapusei-ston hori nanga ala tu anu. Dan nanga ala en krakti a ben griti a tapusei-ston go-kon na tapu na ondrosei-ston. Na so fasi a ben masi a karu na mindri den tu ston. A no ben de wan kefalek wrokosani, ma a ben wroko bun trutru!

Ma den uma ben kisi problema na den skin, fu di den ben musu kindi so langa na tapu gron. Te wan uma ben pusu a tapusei-ston go te na a bakasei lanki fu na anumiri, èn a ben e hari a ston kon na fesisei baka, dan dati ben hebi tumusi gi a baka fu en,  en anu, en bowtu, en kindi nanga den finga fu en futu. Sabiman di e ondrosuku dedebonyo fu sabi fa sma fu fositen ben e libi, ondrosuku den dedebonyo fu sma di ben libi na ini Siria fu owruten. Na a fasi fa den bonyo ben de, den sabiman disi kon si, taki yongu uma di ben e wroko nanga den sortu anumiri disi ben kisi problema na den skin: den kindikoko ben kon plata, den ben kisi mankeri na a lasti pisi fu den bakabonyo èn a bigidoin fu den futu ben e gro kron. Na ini Egepte fu owruten, a ben de den uma-futuboi di ben musu wroko nanga na anumiri (Exodus 11:5). * Son sabiman e denki taki di den Israelsma gowe libi Egepte, dan den ben teki a sadri anumiri go nanga den tu.

Bakaten, den ben meki den ston so, taki a wan sei fu den ston ben gersi wan gruma, èn na so fasi den ben man mara moro bun. Na ini a tapusei-ston den ben meki wan sortu kokro-olo, èn drape a wrokoman ben kan kanti karu go, so taki pikinsopikinso a karu ben kan doro na mindri den ston. Na ini a di fu fo yarihondro noso a di fu feifi yarihondro b.G.T., sma na ini Grikikondre ben meki wan nyun sani: wan sortu masyin di ben kan mara karu. Na a lanki fu a tapusei-ston wan pikin tiki ben de di den uma ben kan hori fu drai a tapusei-ston go-kon, aladi den ben man kanti karu go na ini a kokro-olo na ini a ston. Na so fasi a tapusei-ston ben kan griti a karu na tapu na ondrosei-ston.

Ma wán sani ben de di sma no ben kan du nanga den sortu miri disi. Den ben abi fu drai den ston go-kon, èn soso libisma ben kan du dati. Meti no ben kan leri fu du a wroko disi. Fu dati ede, libisma ben de fanowdu fu wroko nanga den miri disi. Ne sma kon nanga wan nyun sortu wrokosani: wan miri di ben kan drai lontu. Now fosi den ben man gebroiki meti fu du a wroko.

A wroko e kon moro makriki nanga miri di e drai lontu

A miri di e drai lontu, meki kande na mindri a di fu tu yarihondro nanga a fosi yarihondro b.G.T., na ini den kondre di de ini a birti fu a Mindrikondre Se. Na ini a fosi yarihondro G.T., den Dyu na ini Palestina ben sabi a sortu miri disi kaba, bika Yesus ben taki fu wan „bun bigi miriston” leki a wan di buriki e drai lontu.—Markus 9:42.

Wan meti ben e drai a miri disi lontu, èn sma ben gebroiki en na ini a foto Rome èn na furu presi na ini a Gran Kownukondre Rome sosrefi. Furu fu den miri disi de ete na ini Pompeyi. Den miri disi ben abi tu miriston: wan bigi tapusei-ston di ben gersi wan mata èn di ben abi wan olo pe den ben kan kanti a karu go na ini, èn a ben abi wan ondrosei ston tu. Te a karu ben musu mara, dan den ben kanti en fosi na ini na olo fu a tapusei-ston di ben e drai lontu, èn na so fasi a karu ben doro na mindri den tu ston di ben e masi a karu kon tron blon. Den sortu tapusei-ston disi de fu feni ete, èn den bigi kande sowan 45 te go miti 90 centimeter. Den miri disi hei sowan 180 centimeter.

Wi no sabi sortuwan ben de fosi: den moro lekti miri di sma e drai lontu nanga anu, noso den wan di meti e drai lontu. Ma a miri di sma e drai lontu nanga anu, ben abi moro wini fu di sma ben kan opo en tyari gowe èn a ben moro makriki fu gebroiki. A ben abi tu lontu ston di ben bigi kande 30 te go miti 60 centimeter. Tapusei fu na ondrosei-ston ben bòl pikinso èn ondrosei fu a tapusei-ston ben gersi wan komki. Na so fasi a tapusei-ston ben man fiti na tapu na ondrosei-ston. Mindrisei fu a tapusei-ston wan tiki ben de di ben hori a ston na en presi èn wan pikin udu tiki ben fasi na a ston, so taki den ben kan drai en. A gwenti ben de, taki tu uma ben e sidon abrasei fu makandra, èn ibriwan fu den ben hori a pikin tiki nanga wán anu fu drai a tapusei-ston (Lukas 17:35). Wan fu den uma ben gebroiki a tra anu fu kanti pikinso karu go na ini a kokro-olo na ini a tapusei-ston, èn te a blon ben fadon komoto fu a lanki fu a miri, dan a tra uma ben fanga a blon na ini wan baki, noso na ini wan duku di a ben bradi na ondro a miri. Te srudati, sipiman,  noso osofamiri no ben libi krosibei fu wan miri-oso, dan den ben musu gebroiki a sortu miri disi.

Miri di e wroko nanga watra noso winti

Na ini 27 b.G.T., wan koni bowman fu Rome di nen Vitruvius skrifi fu wan miri na ini a ten fu en di ben e wroko nanga watra. Pikin planga di e wroko leki pari ben fasi na wan bigi upru, èn te watra ben e fadon na tapu den pikin pari disi, dan na upru ben e bigin drai. Na upru disi ben fasi na wan isri tiki èn disi ben fasi na wan postu di ben tanapu leti-opo. Te na upru ben e bigin drai, dan a postu ben e drai tu èn a ben meki taki wan bigi miriston di ben de tapusei fu a postu, ben e bigin drai lontu fu kan mara a karu.

Ma a ben de so taki a miri di e wroko nanga watra, ben kan mara moro leki den tra sortu miri? Nanga wan anumiri, sma no man mara moro leki 10 kilo karu na ini wán yuru, èn a moro bun anumiri kan mara sowan 50 kilo karu. Ma a miri fu Vitruvius di ben wroko nanga watra, ben kan mara sowan 150 te nanga 200 kilo karu na ini wán yuru. Someni yarihondro baka di Vitruvius skrifi fa den miri disi ben e wroko, sma di sabi meki miri ben e gebroiki den srefi sani di Vitruvius skrifi fu meki miri, aladi den ben kenki wan lo sani fu meki den miri wroko moro bun.

Sma no ben gebroiki watra fu meki den miri drai. Den ben kan du a srefi sani tu, efu den ben o gebroiki miri di ben kan drai nanga winti, na presi fu gebroiki upru di e drai nanga watra. Na ini Europa a ben de kande a di fu 12 yarihondro G.T. di sma bigin gebroiki miri di e drai nanga winti, èn na ala sei na ini Belgia, Doisrikondre, Bakrakondre èn na tra presi den ben gebroiki den fu mara karu. Den gebroiki den miri disi teleki miri ben kon di ben e drai nanga faya dampu èn na tra fasi. Baka wan pisi ten na soso den miri disi sma ben gebroiki.

„A brede di wi abi fanowdu gi a dei disi”

Nyun sortu miri ben meki, ma yu abi son presi na grontapu ete pe den e gebroiki den fasi fa sma fu fositen ben e mara sani. Te now ete sma e gebroiki mata nanga matatiki na ini son presi fu Afrika nanga Oceania. Na ini Meksikow nanga Mindri-Amerika, sma e gebroiki sadri anumiri fu mara karu fu meki karu pankuku. Na difrenti presi, sma e gebroiki miri ete di e drai nanga watra noso nanga winti.

Ma na ini den gudu kondre na ini a ten disi, sma e meki blon moro furu nanga bigi miri di e drai nanga masyin èn nanga yepi fu computer. Safrisafri den isri lolo fu den miri disi e mara ai-karu kon tron blon fu di den ai-karu e pasa na difrenti fu den isri lolo disi. A skin fu den lolo disi gersi wan gruma èn a no ala den lolo e drai lontu na a srefi fasi, fu di a wan e go moro esi leki a trawan. Na so fasi sma man meki difrenti sortu blon sondro taki a e kostu furu moni.

A no abi misi, taki wi no abi fu du so furu muiti moro fu meki blon di sma e gebroiki fu meki nyanyan, leki fa sma ben musu du dati fositen. Ma toku wi kan taigi wi Mekiman tangi taki a gi wi karu, èn taki a gi wi a koni tu fu meki disi tron „a brede di wi abi fanowdu gi a dei disi”.—Mateyus 6:11.

[Futuwortu]

[Prenki na tapu bladzijde 23]

Sadri anumiri di den Egeptesma ben gebroiki

[Sma di abi a reti fu a prenki]

Soprintendenza Archeologica per la Toscana, Firenze

[Prenki na tapu bladzijde 23]

Na ini wan miri di meti ben e drai lontu, den ben masi olèif fu meki oli

[Sma di abi a reti fu a prenki na tapu bladzijde 22]

From the Self-Pronouncing Edition of the Holy Bible, containing the King James and the Revised versions