’Un musu begi so’

YU SABI den wortu fu a Wi Tata Begi? Nanga yepi fu a begi disi, Yesus Krestes ben leri sma fa fu begi. Na ini a barinen Bergitaki fu en, Yesus taki: „Fu dati ede un musu begi so” (Mateyus 6:9). Fu di na Yesus leri sma a begi disi, meki son sma e kari en a Begi fu Masra, èn furu tra sma sabi a begi disi leki a Wi Tata Begi.—Latijntongo, Paternoster.

Milyunmilyun sma na heri grontapu sabi a Wi Tata Begi na ede èn den e taki en ibri tron baka, kande ala dei srefi. Na ini den lasti yari di pasa, furu sma taki den wortu fu a begi disi ibri leisi baka na skoro èn na spesrutu okasi sosrefi. Fu san ede sma e si a Wi Tata Begi leki so wan warti sani?

Cyprianus, wan sabiman fu kerkitori, di ben e libi na ini a di fu dri yarihondro ben skrifi: „Sortu tra begi abi so furu fu du nanga yeye afersi, leki a begi di Krestes leri wi . . . ? Te wi e begi a Tata, dan sortu begi abi so furu waarheid na ini, leki a wan di wi leri fu a Manpikin, di de a Waarheid?”—Yohanes 14:6.

Soleki fa a buku nanga den prenspari leri fu a Lomsu Kerki e sori, dan den e si a Wi Tata Begi leki „a moro prenspari begi fu Kresten”. Wan buku e taki dati a begi disi prenspari trutru gi ala Kresten bribi; a e kari a begi dati wan fu den „fondamenti leri fu a Kresten bribi” (The World Book Encyclopedia).

 Ma wi musu agri taki furu sma di e taki den wortu fu a Wi Tata Begi ibri tron baka no e frustan san a begi disi wani taki trutru. Wan koranti fu Kanada di nen Ottawa Citizen e taki: „Efu yu kweki leki wan Kresten, dan kande yu sa man taki a Wi Tata Begi esi-esi sondro fu hari bro srefi, ma yu ben kan abi problema fu taki en safrisafri èn fu sabi srefi san a begi disi wani taki.”

A de prenspari trutru fu sabi san wi e taki te wi e begi Gado? Fu san ede Yesus leri wi a Wi Tata Begi? San a wani taki gi yu? Meki wi poti prakseri na den aksi disi now.