A ben fruteri den studenti fu en klas fu a bribi fu en

YU BEN sa wani yepi den pikin fu yu klas fu kon frustan moro bun san yu leri na ini Bijbel? Magdalena na wan Kotoigi fu Yehovah. A abi 18 yari èn a de wan studenti na wan middelbaar skoro na ini Polen. Furu tron, a e taki nanga den pikin fu en klas fu a bribi fu en. Leki bakapisi fu dati, dan nofo tron den e aksi en sani soleki: ’San a wani taki fu de wan Kotoigi fu Yehovah? Yu e bribi na ini Yesus Krestes?’ Fa a ben kan yepi den pikin fu en klas? Magdalena aksi Yehovah fu tiri en, èn baka dati a ben meki muiti fu du soleki fa a begi.—Yakobus 1:5.

Wan dei, Magdalena ben aksi en skoromisi di ben lespeki a bribi fu en, efu a ben kan sori den pikin fu a klas a video Jehovah’s Getuigen — De organisatie achter de naam (Yehovah Kotoigi—Na organisâsi di abi a nen disi). * A skoromisi ben gi en primisi fu du dati. Baka dati, Magdalena taigi den pikin fu en klas: „Mi e seti sani so taki wan mati fu mi kan kon sori unu wan video èn hori wan takimakandra di abi fu du nanga Yehovah Kotoigi. A sa teki 90 miniti. Yu wani kon?” Ala sma taki dati den ben wani kon. Magdalena nanga Wojciech, wan furuten preikiman di abi ondrofeni, bigin sreka sani gi a dei dati.

Den ben abi na prakseri fu bigin nanga wan lezing fu 20 miniti, di teki puru fu a brochure Jehovah’s Getuigen — Wie zijn zij? Wat geloven zij? (Yehovah Kotoigi—Suma na den? San den e bribi?) *, èn baka dati den ben o hori wan aksi-nanga-piki takimakandra. Baka na aksi-nanga-piki takimakandra, den ben o sori a video na ini a bibliotheek fu a skoro. Ibri studenti fu a klas ben o kisi wan kado, namku wan bigi envelop nanga wan tu brochure na ini, sosrefi a buku Wat jonge mensen vragen — Praktische antwoorden * (Yongu sma e aksi—Piki di e wroko), èn wan tu traktaat nanga tijdschrift.

Na a dei fu a takimakandra, sowan 14 pikin fu Magdalena en klas ben kon fu arki. En skoromisi nanga 4 tra studenti di ben de na ini a bibliotheek a dei dati, ben kon arki tu. Wojciech bigin fruteri fosi taki wan tu puwema skrifiman nanga tra skrifiman na ini Polen ben gebroiki a nen fu Gado, Yehovah, na ini den buku fu den. A ben fruteri tu taki a nen fu Gado skrifi na ini wan tu owru buku di e taki fu den fondamenti leri fu a Lomsu kerki. Di a ben e fruteri fu a wroko di Yehovah Kotoigi e du na ini a ten disi, dan a ben sori den arkiman brochure fu difrenti bijkantoro, èn sosrefi fowtow fu wan tu presi pe bigi konmakandra e hori.

Leki bakapisi fu dati, wan fayafaya takimakandra bigin. Magdalena nanga Wojciech ben gebroiki Bijbel fu piki den aksi. Disi ben naki na ati fu den arkiman èn den kon frustan taki Yehovah Kotoigi no e fruteri sma den eigi prakseri te den e preiki. San na wan tu fu den aksi di den studenti ben poti, èn fa Magdalena nanga Wojciech piki den aksi dati?

Aksi: Bijbel e taki furu sani na wan agersi fasi èn na wan fasi di no de krin fu frustan. A bakapisi de, taki sma kan fruklari den sani disi leki fa den wani. Efu dati de so, dan fa wan sma kan libi soleki fa Bijbel e taki?

Piki: Son sma e taki dati yu kan gebroiki Bijbel fu horibaka gi iniwan denki di yu abi. Ma prakseri disi: Efu yu wani kon sabi san wan skrifiman wani taki nanga den sani di a skrifi, dan a no ben  o moro bun fu aksi a skrifiman srefi? Heri tra fasi leki den libisma skrifiman di dede kaba, dan a Skrifiman fu Bijbel, Yehovah Gado, de na libi (Romesma 1:20; 1 Korentesma 8:5, 6). Den vers di skrifi na fesi èn na baka fu wan bijbeltekst kan sori yu san a tekst wani taki trutru. Boiti dati, nofo tron Bijbel e taki fu a srefi sani na ini difrenti bijbeltekst. Sobun, te yu ben o teki den tekst disi gersi nanga makandra, dan dati kan yepi yu fu frustan san wan spesrutu tekst wani taki. Na a fasi disi wi kan meki Gado tiri den prakseri fu wi, èn a o de neleki Gado srefi e fruklari a bijbeltekst gi wi. Te wi e du dati, dan a no de fu taki dati wi kan kon sabi san Gado wani, èn wi sa man libi akruderi a wani fu en di skrifi na ini Bijbel, a no so?

Aksi: San na a difrenti na mindri Kresten nanga Yehovah Kotoigi?

Piki: Fu taki en leti, wi na Kresten! Ma na presi taki Yehovah Kotoigi e taki nomo dati den na Kresten, dan den e pruberi fu libi akruderi a bribi fu den èn akruderi den sani di Gado e leri den gi a bun fu den (Yesaya 48:17, 18). Den sabi taki den abi a waarheid, fu di ala den sani di den e leri sma, e komoto fu Bijbel.—Mateyus 7:13, 14, 21-23.

Aksi: Fu san ede unu e tan go na sma di unu no sabi srefisrefi, fu taki nanga den? A no dwengi unu e dwengi sma dan, fu teki a bribi fu unu?

Piki: Yu denki taki a fowtu te wan sma na strati e taki nanga yu na wan switi fasi, èn te a e aksi yu fa yu e prakseri fu wan tori? (Yeremia 5:1; Sefanya 2:2, 3) (Baka dati, Wojciech nanga Magdalena ben demo fa den ben aksi wan sma na strati efu Gado e broko en ede nanga den wan di ondrofeni den takru bakapisi fu a frudu di ben de na ini Polen no so langa pasa.) Te wi yere fa a sma e denki, dan wi e sori en san Bijbel e taki fu a tori. Efu wan sma no wani arki, dan wi e taki en odi èn wi e waka go doro (Mateyus 10:11-14). Na dwengi wi e dwengi sma fu taki nanga wi? Noso a de so taki sma no musu taki moro nanga makandra?

Aksi: Fu san ede unu no e hori fesadei?

Piki: A wan-enkri fesa di wi e hori na a wan di Bijbel e komanderi wi fu hori, namku a Memrefesa fu a dede fu Yesus Krestes (1 Korentesma 11:23-26). Efu unu wani sabi moro fu den fesadei, dan unu kan luku na ini wortubuku nanga tra buku di yu kan frutrow, fu pe den fesa disi komopo. Te unu e du dati, dan unu sa frustan makriki fu san ede wi no e hori nowan fu den sortu fesa disi.—2 Korentesma 6:14-18.

Den arkiman ben poti furu tra aksi ete, èn Wojciech nanga Magdalena ben piki den aksi dati tu. A takimakandra ben teki so langa, taki den ben musu luku a video wan tra dei.

San den studenti ben feni fu a takimakandra? Meki Magdalena fruteri wi dati: „Mi ben fruwondru fu si taki son studenti di ben gwenti tyari densrefi na wan lawlaw fasi èn di ben e spotu nanga trawan, ben e poti seryusu aksi. Aladi den ben taki dati den no e bribi taki wan Gado de, toku na a takimakandra den ben sori taki den e bribi na ini Gado!” Den wan di ben kon drape ben warderi den kado di den kisi. Ala nanga ala, den ben prati sowan 35 buku, 63 brochure, nanga 34 tijdschrift gi den arkiman.

A takimakandra di Magdalena nanga Wojciech ben hori na skoro ben abi tumusi moi bakapisi trutru! A yepi den pikin fu Magdalena en klas fu kon sabi èn fu kon frustan Yehovah Kotoigi moro bun. Ma a no dati wawan. A yepi furu fu den yongu sma tu fu prakseri fu a marki fu a libi. We, fu san ede yu no e meki muiti fu yepi den pikin fu yu klas fu kon sabi moro fu a bribi fu yu?

[Futuwortu]

[Prenki na tapu bladzijde 31]

Magdalena nanga Wojciech e sreka densrefi gi a takimakandra