A no prei den e prei nomo

PIKIN-NENGRE lobi prei. Ma „dati a no lasiten”, na so a buku The Developing Child e taki. „Dati na a fasi fa pikin e leri fu frustan san e pasa lontu den.” Te pikin-nengre e prei, dan den e leri fu gebroiki den frustan, den e kon sabi den sani lontu den moro bun, èn den e leri fu taki èn wroko makandra nanga trawan.

Te pikin-nengre tapu fo yari noso feifi yari, dan na wan prei-prei fasi den e bigin du sani di bigisma e du. Wan leisi, Yesus ben taki fu pikin-nengre di ben e prei. Son pikin ben wani du neleki den ben hori wan „trow-oso”, trawan ben wani du neleki den ben de na wan „beri”. We, èn soleki fa pikin nengre e du furu tron, den ben e haritaki nanga makandra bika sonwan fu den no ben wani prei nanga den (Mateyus 11:16, 17). Te pikin-nengre e prei na a fasi disi, dan dati e yepi den fu frustan den prenspari sani di sma e du na ini a libi.

Den pikin di de fu si na tapu den prenki disi e du neleki den e hori wan bijbelstudie. Wán fu den na a leriman, èn a trawan na a studenti. Den no e hori wan trutru bijbelstudie, ma a de krin fu si taki den abi a denki fu prati a boskopu fu Bijbel gi trawan. Èn disi na wan prenspari sani di den e leri, fu di Yesus ben gi ala den bakaman fu en a komando fu meki sma tron disipel èn fu leri den sma disi fu du ala san a komanderi den.—Mateyus 28:19, 20.

Te pikin-nengre e du neleki den e hori bijbelstudie nanga lezing, noso efu den e du neleki den e preiki oso fu oso, dan papa nanga mama kan prisiri nanga a wroko di den du fu gi den pikin bun leri. A no de fu taki dati pikin-nengre e du den srefi sani di den si bigisma e du. Te pikin-nengre e prei sani di abi fu du nanga Bijbel tori, dan dati e sori taki den papa nanga mama ’e leri den fu du san Masra wani èn taki den e warskow den leki fa A wani’.—Efeisesma 6:4, Nyun Testamenti.

Yehovah wani taki pikin-nengre abi wan prati na a tru anbegi. A ben taigi Moses fu kari „den pikinwan” tu fu kon arki te sma ben e leisi a Wet (Deuteronomium 31:12). Efu yongu pikin e firi taki den abi wan prati na wan sani, dan dati o de fu si tu na den sani di den e prei. Èn te wan pikin-nengre e du neleki en na wan dinari fu Gado, dan dati na a fosi sani di kan meki taki a tron wan dinari fu Gado trutru.